Book of Common Prayer

¹³⁷ हे यहोवा, तू सच्चा अहा
    अउर तोहार फइसला खरा अहइँ।
¹³⁸ उ सबइ चिजियन उत्तिम अहइँ जउन तू हमका करार मँ दिहा।
    हम पूरी तरह स तोहरे विधान क भरोसे रहि सकित ह।
¹³⁹ तोहरे बरे मोर धुन मोका बर्बाद करत ह।
    मइँ बहोत बेचैन हउँ, काहेकि मोर दुस्मन लोग तोहरे वचन क बिसराइ दिहन।
¹⁴⁰ हे यहोवा, तोहार वचन प्रमाणित अउर फुरइ अउर सच्चा बाटइ,
    अउर मइँ तोहार सेवक एहसे पिरेम करत हउँ।
¹⁴¹ मइँ एक महत्वहीन हउँ अउर लोग मोर आदर नाहीं करत बाटेन।
    मुला मइँ तोहरे उपदेसन क बिसरत नाहीं अहउँ।
¹⁴² हे यहोवा, तोहार अच्छाई अनन्त अहइ।
    तोहरे सिच्छन क भरोसे रहा जाइ सकत ह।
¹⁴³ संकट अउर परेसानी मोका घेरि लिहेस ह।
    मुला, मइँ तोहार उपदेसन क नाहीं बिसारे रहेउँ।
¹⁴⁴ तोहार करार हमेसा नीक बाटइ।
    एका समुझइ मँ मोर सहायता करा ताकि मइँ जी सकउँ।

¹⁴⁵ सम्पूर्ण मन स यहोवा मइँ तोहका गोहरावत हउँ, मोका जवाब द्या।
    मइँ तोहरे आदेसन क पालन करत हउँ।
¹⁴⁶ हे यहोवा, मोर तोहसे बिनती बाटइ।
    मोका बचाइ ल्या।
    मइँ तोहरी करार क पालन करब।
¹⁴⁷ यहोवा, मइँ तोहरी पराथना करइ क भोर क तड़के उठा करत हउँ।
    मोका ओन बातन पइ भरोसा अहइ, जेनका तू कहत ह।
¹⁴⁸ पूरी रात मइँ तोहरे वचन पइ
    बिचार करइ बरे बइठा रहत हउँ।
¹⁴⁹ हे यहोवा, तू आपन पूरे पिरेम स मोह पइ कान द्या,
    तू वइसा ही करा जेका तू ठीक कहत ह, अउर मोर जिन्नगी बनाए राखा।
¹⁵⁰ लोग मोरे बिरूद्ध कुचक्र रचत अहइँ अउर मोर कइँती आवत हीं।
    अइसे इ सबइ लोग तोहरी सिच्छन पइ चला नाहीं करतेन।
¹⁵¹ मुला तू मोरे लगे अहा।
    तोहरे सबइ आग्यन पइ बिस्सास कीन्ह जाइ सकत ह।
¹⁵² बहोत दिनन पहिले ही तोहार करार दुआरा मइँ सीख लिहे रहेउँ
    कि ओकर नींव सदा बरे डाली गइ अहइ।

¹⁵³ हे यहोवा, मोर यातना क लखा अउर मोका बचाइ ल्या,
    मइँ तोहरे उपदेसन क बिसरा नाहीं अहउँ।
¹⁵⁴ हे यहोवा, मोरे मुकदद्मा बरे बहस करा अउर मोका छुरावा।
    कृपा कइके मोका तोहार वाचा क अनुसार जिअइ द्या।
¹⁵⁵ दुट्ठ बिजयी नाहीं होइहीं।
    काहेकि उ पचे तोहरे विधान पइ नाहीं चलत अहइँ।
¹⁵⁶ हे यहोवा, तू बहोत दयालु अहा।
    आपन नीक सासन क अनुसार मोका फुन स जिन्नगी द्या।
¹⁵⁷ मोर बहोत स सत्रु अहइँ जउन मोका हानि पहोंचावइ बरे जतन करतेन;
    मुला मइँ तोहरी करार क अनुसरण नाहीं तजेउँ।
¹⁵⁸ मइँ ओन बिस्सासघातियन क लखत हउँ।
    उ पचे तोहरे बचन क पालन नाहीं करतेन।
    मइँ ओनका तजि दिहेउँ ह।
¹⁵⁹ लखा, मइँ तोहार उपदेसन स पिरेम करत हउँ।
    हे यहोवा, कृपा कइके मोका तोहरे दयालु पिरेम स जिअइ द्या।
¹⁶⁰ सुरू स ही तोहार सबहिं वचन बिस्सास क जोग्ग रहेन ह।
    अउर तोहार खरा फइसलन सदा बरे रहिहीं।

² “मइँ आजु भी बुरी, सिकाइत करत हउँ कि परमेस्सर मोका कर्री सजा देत अहइ,
    एह बरे मइँ सिकाइत करत रहत हउँ।
³ कास! मइँ इ जान पावत कि ओका कहाँ हेरउँ।
    कास! मइँ इ जान पावत कि परमेस्सर क लगे कइसे जाउँ।
⁴ मइँ आपन मुकद्मा क सफाई परमेस्सर क समन्वा पेस करब्य्।
    मइँ आपन क निर्दोख साबित करइ बरे बहस करब्या।
⁵ मइँ इ जानइ चाहत हउँ कि परमेस्सर कइसे मोरे दलीलन क जवाब देत ह,
    तब मइँ परमेस्सर क जवाब समुझ पउतेउँ।
⁶ का परमेस्सर आपन महासक्ती क संग मोरे खिलाफ होत?
    नाहीं! उ मोर सुनी।
⁷ मइँ एक नेक मनई हउँ।
    परमेस्सर मोका आपन कहानी क कहइ देइ, तब मोर निआउ कत्ती परमेस्सर मोका अजाद कइ देइ।

¹ हे यहोवा, तू मोका जाँच्या ह।
    मोरे बारे मँ तू सब कछू जानत अहा।
² तू जानत अहा कि मइँ कब बइठत अउ कब खड़ा होत हउँ।
    तू दूर रहत भए मोरे मन क बात जानत अहा।
³ हे यहोवा, तू जानत ह कि मइँ कहाँ जात अउ कहाँ ओलरत हउँ।
    तू बहोत अच्छी तरह जानत ह जउन कछू मइँ करत हउँ।
⁴ हे यहोवा, एहसे पहिले क सब्द मोरे मुख स निकलइ
    तोहका पता होत ह कि मइँ का कहइ चाहत हउँ।
⁵ हे यहोवा, तू मोरे चारिहुँ कइँती मौजूद अहा।
    मोरे समन्वा भी अउर पाछा भी, तू आपन निज हाथ मोरे ऊपर हौले स रखत अहा।
⁶ मोका अचरज अहइ ओन बातन पइ जेनका तू जानत अहा।
    जेनका मोरे बरे समुझब बहोत कहिन अहइ।
⁷ हर जगह जहाँ भी मइँ जात हउँ हुआँ तोर आतिमा होत ह।
    हे यहोवा, मइँ तोहसे बचिके कहँ नाहीं जाइ सकत।
⁸ हे यहोवा, अगर मइँ आकासे पइ जाब हुआँ पइ भी तू ही अहा।
    अगर मइँ मउत क देस पाताल मँ जाब हुआँ पइ तू ही अहा।
⁹ अगर मइँ पूरब मँ जहाँ स सूरज निकरत ह,
    अगर मइँ समुद्दर क पीछे रहब,
¹⁰ हुआँ तलक भी तोहार दायाँ हाथ पहोंचत ह।
    तू मोका आपन हाथ स धइके अगुवाइ करत ह।