Book of Common Prayer

Новиот живот на христијанинот

3 Вие сте воскреснати за да живеете со Христос. Затоа стремете се кон она што е на небото, каде што Христос владее, седнат од Божјата десна^[a] страна. ² Размислувајте за она што е на небото, а не за она што е на Земјата. ³ Вие умревте кога умре Христос, а тоа значи дека вашиот вистински живот е скриен во Христос, кај Бог. ⁴ А кога ќе се појави Христос, Кој е вашиот вистински живот, тогаш и вие ќе се појавите, закитени со Неговата слава.

⁵ Затоа, не дозволувајте вашето тело да управува со вас! Умртвете го во вас она што е развратно, гнасно, похотно, зло и алчно. И алчноста е еден вид на идолопоклонство! ⁶ Ваквите постапки го предизвикуваат Божјиот гнев. ⁷ Така постапувавте и вие кога вашиот живот беше неуреден. ⁸ Сега треба да престанете со гнев, омраза и злоба. Престанете да навредувате и да се служите со непристојни зборови. ⁹ Немојте да лажете. Вие веќе ја соблековте и ја отфрливте вашата стара природа, со нејзините навики, ¹⁰ па наместо неа облековте нова природа, која постојано се обновува, колку што подобро Го запознавате Христос, Кој ја создаде новата природа во вас. ¹¹ Не е важно дали сте Грци^[b] или Евреи, дали сте обрежани или не, дали сте варвари или Скити^[c], дали сте робови или слободни. Се што е важно е Христос да живее во сите нас!

¹² Бог ве сака и ве одбра да бидете Негов свет народ. Затоа, сочувствувајте со луѓето, бидете љубезни спрема нив, бидете скромни, кротки и трпеливи. ¹³ Толерирајте се, простувајте си кога некој ќе ви згреши. Простувајте си исто како што Господ вам милостиво ви прости. ¹⁴ А најважно од се е да бидете исполнети со љубов, зашто меѓусебната љубов сврзува во совршена заедница.

¹⁵ Секој од вас е дел од Христовото тело. Треба да бидете сложни и благодарни. Дозволете мирот што доаѓа од Христос да ги води вашите срца. ¹⁶ Зборовите на Христос, во сето нивно богатство, нека го исполнуваат вашиот живот. Користете ја сета мудрост што ја имате за да се поучувате и советувате еден со друг. Пејте Му на Бог псалми, химни и духовни песни, пејте Му со благодарност и од се срце. ¹⁷ Се што ќе кажете или ќе направите, правете го како претставници на Господ Исус, оддавајќи Му преку Него благодарност на Бог Таткото.

Исус ги избира првите ученици

(Мк.1:14-20; Лк.5:1-11) ¹⁸ Одејќи по брегот на Галилејското Езеро, Исус виде двајца браќа: Симон - подоцна наречен Петар, и неговиот брат Андреј. Тие поставуваа мрежа во езерото, бидејќи по занает беа рибари. ¹⁹ Исус ги повика: „Тргнете по Мене и Јас ќе ве научам како да ловите луѓе!“ ²⁰ Тие веднаш ги оставија своите мрежи и тргнаа по Него.

²¹ Одејќи понатаму, Исус виде и повика уште двајца браќа: Јаков и Јован, синови на Завдај, кои, заедно со својот татко Завдај се наоѓаа во своето бротче и си ги подготвуваа рибарските мрежи. ²² Тие веднаш ги оставија бротчето и татка си и тргнаа по Исус.

Исус поучува, проповеда и исцелува

²³ Исус одеше по цела Галилеја, поучувајќи по синагогите^[a], проповедајќи ја Радосната вест^[b] за Божјото царство и исцелувајќи секакви болести и заболувања кај луѓето. ²⁴ Гласот за Него се рашири дури и во Сирија и кај Него ги доведуваа сите заболени од разни болести, луѓе обземени со демонски духови, епилептичари и парализирани - и Исус ги исцелуваше. 25По Него тргна голема толпа народ од покраините Галилеја и Декаполис, како и од Ерусалим, од Јудеја и од пределите источно од реката Јордан.