Book of Common Prayer

⁷ Крајот е близу. Затоа бидете трезвени и ревносно молете се, ⁸ а најмногу од се, сакајте се меѓу себе длабоко и искрено, зашто љубовта покрива многу гревови. ⁹ Бидете гостољубиви еден спрема друг, без да негодувате.

¹⁰ Секој, согласно со дарбите што ги има, нека им служи на другите. На тој начин ќе докажете дека добро управувате со дарбите што ги дава Бог, дарежливо и разновидно. ¹¹ Ако е некој добар говорник, нека ја проповеда Божјата порака. Ако некој има дарба да им помага на луѓето, нека го прави тоа со силата што му ја дава Бог. Се треба да се прави така што да Му се оддава слава на Бог, преку Исус Христос, на Кого Му припаѓаат славата и власта во вечни времиња. Амин.

Бидете пример и кога страдате

¹² Драги мои, нека не ве изненадува фактот што минувате низ огнени искушенија, небаре нешто неочекувано ви се случува! ¹³ Радувајте се што преку страдањата се идентификувате со Христос. Затоа, пак, ќе се радувате и веселите кога ќе се открие Неговата слава.

¹⁴ Ако ве навредуваат поради тоа што сте Христови следбеници, тоа треба да ве радува! Тоа е доказ дека величествениот Божји Дух е во вас. ¹⁵ Срамота е ако некој од вас биде казнет за убиство, за кражба, за злосторство или за правење сплетки, ¹⁶ но ако страдате поради тоа што сте христијани, немојте да се срамите. Напротив, бидете Му благодарни^[a] на Бог што го носите Христовото име!

¹⁷ Бог веќе почна да суди и тоа најпрво меѓу Своите следбеници. Ако ние, христијаните сме судени, каков ли ќе им биде крајот на оние што и се противат на Божјата Радосна вест!?

¹⁸ „Ако праведните одвај се спасуваат,

што ли ќе биде со безбожните и грешните^[b]!?“

¹⁹ Заради тоа, оние што страдаат извршувајќи ја Божјата волја, нека Му ги доверат своите души на својот Творец, Кој никогаш не изневерува, и нека продолжат да прават добро.

Тага, па радост

¹⁶ „Уште малку, па веќе нема да Ме гледате, но по извесно време пак ќе Ме видите.“

¹⁷ Тогаш некои од Неговите ученици си рекоа еден на друг: „Што значи ова што ни го вели: ,Уште малку, па веќе нема да Ме гледате, а по извесно време пак ќе Ме видите?‘ и: ‚зашто заминувам кај Таткото‘!?“ ¹⁸ Тие продолжуваа да прашуваат: „Што значи тоа ‚уште малку‘ за кое Тој зборува!? Не разбираме за што зборува!“

¹⁹ Исус сфати дека тие сакаат да Го прашаат, па им рече: „Реков: ‚Уште малку, па нема да Ме гледате, но по извесно време пак ќе ме видите.‘ За ова ли се расправате меѓу себе? ²⁰ Со сигурност можам да ви кажам дека вие ќе плачете и ќе тагувате, а светот ќе се радува. Вие ќе тагувате, но подоцна вашата тага ќе се претвори во радост. ²¹ Кога жената раѓа, таа има болки, зашто дошло времето на болките. Но, кога ќе се роди детето, таа заборава на маките, и се радува што родила човек на овој свет. ²² Така и вие сега сте полни со тага. Но повторно ќе се видиме и ќе се израдувате; таа радост не ќе може никој да ви ја одземе! ²³ Во тој ден, за ништо повеќе нема да Ме прашувате. Ве уверувам дека Мојот небесен Татко ќе ви даде се што ќе посакате во Мое име. ²⁴ Досега не сте побарале ништо во Мое име. Барајте и ќе добиете, за да бидете наполно среќни.“

Победа над светот

²⁵ „Се користев со споредби за да ви го објаснам тоа што сакав да ви го кажам. Доаѓа време кога нема повеќе да се служам со споредби, туку отворено ќе ви кажувам за небесниот Татко. ²⁶ Во тој ден ќе барате во Мое име и не ќе има потреба Јас да Го молам Таткото за вас, ²⁷ зашто, Таткото и Самиот ве сака, бидејќи вие Мене Ме засакавте и поверувавте дека Јас дојдов од Бога. ²⁸ Јас дојдов од Таткото и влегов во светот. Сега заминувам од светот и се враќам кај Таткото.“

²⁹ Неговите ученици рекоа: „Ете, сега ни зборуваш отворено и не се служиш со споредби. ³⁰ Сега знаеме дека Ти разбираш се и нема потреба да Те прашуваме. Поради тоа, ние веруваме дека Ти си дојден од Бог.“

³¹ Исус им одговори: „Велите дека сега верувате? ³² Еве, доаѓа часот, и веќе е дојден, кога ќе се разбегате, секој на своја страна, а Мене ќе Ме оставите Сам. Сепак, Јас нема да бидам сам, зашто Таткото ќе биде со Мене.

³³ Овие работи ви ги кажав, за да имате мир преку единство со Мене. Додека сте во светот, ќе доживувате страдања, но разведрете се - Јас го поразив светот!“