Book of Common Prayer

Живејте примерно

¹¹ Драги мои, вие сте привремени жители, туѓинци на оваа Земја. Затоа ве молам да не им се препуштате на телесните страсти, зашто тие војуваат против вашите души. ¹² Однесувајте се примерно спрема луѓето кои не Го познаваат Бога. Иако тие ве клеветат дека сте злосторници, кога ќе видат дека вршите добри дела, ќе Го прослават^[a] Бога во денот кога Тој ќе ги посети^[b].

¹³ Заради Господ, покорувајте им се на институциите на власта: било на царот, како на врховен владетел, ¹⁴ било на управниците назначени од него. Тие се поставени за да ги казнуваат злосторниците, а да ги пофалуваат оние што прават добро.

¹⁵ Бог сака со правење добро да ги замолкнете неоснованите обвинувања на неразумните луѓе. ¹⁶ Вие не сте робови, туку слободни луѓе, но не треба да ја користите слободата како изговор за да правите зло, туку да живеете служејќи Му на Бог. ¹⁷ Почитувајте ги сите луѓе. Сакајте ги христијаните, имајте страхопочит спрема Бог и почитувајте ја власта^[c].

Христос и Неговото страдање нека ви бидат пример

¹⁸ Слуги^[d], покорувајте им се со страхопочит на вашите господари, не само на оние што се добри и кротки, туку и на оние што се сурови. ¹⁹ Вредно е во Божјите очи ако од обѕири спрема Него трпеливо поднесувате страдања на кои сте неправедно изложени. ²⁰ Инаку, зар би било за пофалба, ако трпите заслужена казна!? Но ако правите добро, а сепак страдате, тоа е вредно во Божјите очи. ²¹ Токму заради ова Бог и ве одбра. Христос страдаше за вас и ви даде пример што треба да го следите.

²² „Грев Тој не направи, лага не изусти^[e].“

²³ Кога Го навредуваа, Тој не им возвраќаше со навреди.

Кога страдаше, Тој не се закануваше,

туку се препушти во рацете на Бог, Кој суди праведно.

²⁴ Ги зеде нашите гревови врз себе, на крстот,

за да бидеме мртви за гревот,

и да почнеме да живееме за праведноста.

Тој доби рани за да бидете вие здрави.

²⁵ Талкавте како залутани овци.

Но сега се вративте кај Пастирот,

кај Оној што се грижи за вашите души.

¹² Сега ви заповедам: Сакајте се меѓу себе како што Јас ве сакам. ¹³ Најголема љубов што некој може да ја искаже спрема своите пријатели е да го даде својот живот за нив. ¹⁴ Ќе ве сметам за Мои пријатели, ако го извршувате она што ви го заповедам. ¹⁵ Не ви зборувам како на Мои слуги, зашто слугите не знаат што прави нивниот господар, туку ве сметам за пријатели, и затоа ви го објавив сето она што Ми го кажа Мојот небесен Татко. ¹⁶ Не Ме избравте вие Мене, туку Јас ве избрав вас и ве испратив да одите и да создавате плод - таков плод што трајно ќе остане. Тогаш Мојот небесен Татко ќе ви ја исполни секоја молба што ќе Му ја упатите во Мое име. ¹⁷ Значи, ви заповедам да се сакате еден со друг!“

¹⁸ „Кога луѓето од овој свет ќе ве мразат, сетете се дека прво Мене Ме замразија. ¹⁹ Да му припаѓавте на светот, тој ќе ве сакаше како свои. Но Јас ве избрав од светот и вие не му припаѓате на светот; затоа светот ве мрази. ²⁰ Спомнете си на зборовите што ви ги кажав: ‚Слугата не е поголем од својот господар‘. Штом Мене Ме прогонуваа, и вас ќе ве прогонуваат. Штом Моето учење го слушаа, ќе го слушаат и вашето. ²¹ Но, сето ова ќе ви го прават заради Моето име, зашто не Го познаваат Оној што Ме испрати. ²² Да не дојдев и да не им зборував, немаше да бидат виновни за грев. Но сега немаат изговор за своите гревови. ²³ Кој Ме мрази Мене - Го мрази и Мојот Татко. ²⁴ Да не бев направил чуда меѓу нив, какви што никој друг не направил, немаше да бидат виновни за грев. Но тие, и покрај тоа што ги видоа Моите дела, сепак не замразија и Мене и Мојот Татко. ²⁵ Но ова е за да се исполни претскажаното во Светото Писмо^[a]: ,Без причина Ме замразија‘.

²⁶ Кога ќе дојде Помошникот - Духот на вистината, Кој произлегува од Таткото и Кого Јас ќе ви го пратам од Таткото - Тој ќе ја објавува вистината за Мене. ²⁷ А и вие ќе ја објавувате вистината за Мене, затоа што од почеток сте со Мене.“