Book of Common Prayer

Поттик за свет живот

¹³ Затоа, впрегнете го својот ум, размислувајте трезвено. Сета своја надеж положете ја во благонаклоноста што ќе ви биде дадена кога ќе се врати Исус Христос! ¹⁴ Бидете Му послушни на Бог, бидејќи сте Негови деца. Немојте да им се препуштате на вашите поранешни страсти од времето кога живеевте во незнаење. ¹⁵ Напротив, бидете свети во сите свои постапки, бидејќи вие сте Божји избраници, а Тој е свет. ¹⁶ Самиот Бог во Светото Писмо ни порачува:

„Бидете свети, затоа што Јас сум свет^[a]!“

¹⁷ Кога веќе Бога го сметате за ваш небесен Татко, Кој секого наградува или казнува според постапките, без пристрасности спрема поединци, тогаш, се додека живеете како туѓинци, овде на Земјава, однесувајте се со страхопочит спрема Бог. ¹⁸ Вие знаете каква цена беше платена за да бидете откупени од безвредниот начин на живеење што го имавте наследено од вашите татковци. Знаете дека не бевте откупени^[b] со сребреници и златници, кои се потрошни нешта, ¹⁹ туку со скапоцената крв на Христос, безгрешното, совршено Божјо Јагне. ²⁰ Бог Него Го одбра за оваа цел уште пред создавањето на светот, но дури сега, во овие последни времиња, Го испрати на Земјата заради вас. ²¹ Преку Христос вие поверувавте во Бог, во Оној што Го воскресна од мртвите и Го прослави. Затоа можете со целосна доверба да ја положите својата надеж во Бог.

²² Сега, откако и се покоривте на вистината, ги исчистивте своите души. Од тоа произлезе искрена, братска љубов меѓу вас. Затоа, сакајте се меѓусебно искрено и од се срце. ²³ Сакајте се затоа што сега сте наново родени, не од земни родители, кои би ви ја пренесле и смртта, туку од бесмртниот Родител, преку живиот и вечен Божји Збор. ²⁴ Светото Писмо вели:

„Секој човек е како трева,

а секоја човечка слава и убавина

се како цвеќе во ливада;

тревата се суши, цвеќето венее,

²⁵ само зборот Господов вечно ќе живее^[c].“

Тој збор е Радосната вест што ви беше проповедана.

¹⁸ Нема да ве оставам сираци - Јас ќе се вратам кај вас! ¹⁹ Уште малку и светот повеќе нема да Ме гледа, но вие ќе Ме гледате; и бидејќи Јас живеам - ќе живеете^[a] и вие. ²⁰ Кога ќе дојде тој ден, ќе сфатите дека Јас сум едно со Мојот Татко, вие сте едно со Мене и Јас сум едно со вас. ²¹ Тој што ги прифаќа Моите заповеди и ги исполнува - покажува дека Ме сака. А секој што Ме сака, ќе биде сакан и од Мојот Татко и од Мене и Јас ќе му се објавам.“

²² „Господе“, - Му рече Јуда (не Јуда Искариот, туку другиот) - „Како можеш да ни се објавиш нам, а не и на светот?“

²³ Исус му одговори: „Ако некој Ме сака, ќе му се покорува на Моето учење. Тогаш Мојот Татко ќе го засака и Ние ќе дојдеме кај тој човек и во него ќе живееме. ²⁴ А тој што не Ме сака, нема да му се покорува на Моето учење. Зборовите што ги слушате не се Мои, туку на Оној што Ме испрати, а тоа е небесниот Татко.

²⁵ Ова ви го кажав уште додека сум кај вас. ²⁶ Но небесниот Татко, наместо Мене, ќе ви Го испрати Светиот Дух да ви биде Помошник^[b]. Тој ќе ве научи на се и ќе ве потсети на се што Јас ви кажував. ²⁷ Ви давам мир - Мојот сопствен мир ви го давам. Мирот што Јас ви го давам не е како мирот што го дава светот. Затоа, не вознемирувајте се и не плашете се!

²⁸ Слушнавте кога ви реков: ,Заминувам, но пак ќе се вратам кај вас‘. Ако навистина Ме сакате, ќе се радувате што заминувам кај Таткото, бидејќи Таткото е поголем од Мене. ²⁹ Однапред ви го кажав ова, па кога ќе се случи, да имате вера во Мене. ³⁰ Нема уште долго да разговарам со вас, зашто кнезот^[c] на овој свет доаѓа. Тој нема власт над Мене, ³¹ но, светот мора да сфати дека го сакам Таткото и затоа дејствувам онака како што Ми заповеда Таткото. Ајде, станете да си одиме одовде.“