Book of Common Prayer

Единство и скромност

2 Затоа, ако наоѓате охрабрување во фактот дека сте Христови следбеници, ако Неговата љубов ве утешува, ако имате заедништво со Светиот Дух, ако сте чувствителни и сочувствувате еден спрема друг, тогаш ² потрудете се мојата радост да биде целосна со тоа што ќе бидете сложни, ќе се сакате, и здружени ќе се стремите кон една иста цел.

³ Немојте да правите ништо од себичност, од ривалство и со цел да се истакнете, туку работете скромно и негувајте повисоко мислење за другите, отколку за себе. ⁴ Не гледајте си ги само сопствените интереси, туку грижете се и за потребите на другите. ⁵ Размислувајте онака како што размислуваше Исус Христос:

⁶ Тој, иако по Својата природа е Бог,

не ја искористи Својата еднаквост со Бог

за да приграби нешто за Себе.

⁷ Напротив, се откажа од тоа и стана слуга,

се роди во човечко тело

и живееше како човек.

⁸ Како човек, Тој се понижи, остана покорен

и по цена на Својот живот,

и понизно умре распнат на крст.

⁹ Затоа Бог Го воздигна и Му даде име

поголемо од секое друго име.

¹⁰ Пред тоа име, пред Исус,

сите суштества на колена ќе клекнат:

небесните, земните и оние под земјата,

¹¹ сите отворено ќе признаат дека

Исус Христос е Господ!

Тоа ќе Му донесе

слава на Бог Таткото.

Бидете светала во овој свет

¹² Затоа, драги мои, како што бевте послушни додека бев кај вас, уште поважно е да останете послушни и сега, кога сум отсутен. Продолжете да работите, со длабока страхопочит, за да се заокружи вашето спасение, ¹³ зашто Бог дејствува во вас, за да ве направи желни и способни да го работите она што Тој го сака.

¹⁵ Симон Петар и еден друг ученик одеа по Исус. Тој ученик се познаваше со Првосвештеникот, па влезе заедно со Исус во дворот на Првосвештеникот, ¹⁶ а Петар остана надвор, пред влезот. Тогаш другиот ученик, кој се познаваше со Првосвештеникот, излезе и откако зборуваше со вратарката, го внесе и Петар внатре.

¹⁷ А вратарката му рече на Петар: „Да не си и ти еден од учениците на Овој човек?“ „Не сум!“ - и одговори тој.

¹⁸ Беше студено, па слугите и гардистите стоеја околу огнот што го запалија и се грееја. И Петар дојде кај нив, за да се стопли.

Петар повторно се откажува од Исус

(Матеј 26:71-75; Марко 14:69-72; Лука 22:58-62) ²⁵ Додека Симон Петар се уште стоеше таму и се грееше, некој го праша: „Да не си и ти еден од учениците на Оној човек?“ Петар вторпат одрече, велејќи: „Не сум!“

²⁶ Еден од слугите на Првосвештеникот, кој му беше роднина на Малхус, на кого Петар му го отсече увото, рече: „Зар не те видов и тебе во градината со Оној човек?“ ²⁷ Петар третпат одрече и во тој момент запеа петел.