◀ All Reading Plans / Book of Common Prayer / Ps. 41 52; Ps. 44; Gen. 14: (1–7) 8–24; Heb. 8:1–13; John 4:43–54 (Awadhi Bible: Easy-to-Read Version)

Prev Day

January 22, 2024

Next Day

Use the calendar to view readings from this devotional.

January 2024
Su	Mo	Tu	We	Th	Fr	Sa
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 41

संगीत निर्देसक बरे दाऊद क एक ठु गीत।

¹जउन दीन क कामयाब होने मँ मदद करत ह उ धन्य अहइ।
    यहोवा ओनका बचावत ह जब उ पचे विपत्ती मँ होत हीं।
²यहोवा उ मनई क रच्छा करी अउ ओकर जिन्नगी बचाइ।
    उ मनई धरती पइ बहोतइ बरदान पाई।
    परमेस्सर ओकरे दुस्मनन क जरिये ओकर नास नाहीं होइ देइ।
³जब मनई रोगी होइ अउर बिछउना मँ पड़ा होइ, ओका यहोवा सक्ति देइ।
    उ मनई बिछउना मँ चाहे रोगी पड़ा होइ, मुला यहोवा ओका चंगा कइ देइ।

⁴मइँ कहेउँ, “यहोवा, मोहे पइ दाया करा।
    मइँ तेरे खिलाफ पाप किहेउँ ह, मुला मोका अउर अच्छा करा।”
⁵मोर दुस्मन मोरे बरे अपसब्द कहत अहइँ,
    उ पचे कहत अहइँ, “इ कब मरी अउर कब बिसराइ दीन्ह जाई?”
⁶कछू लोग मोरे लगे मिलइ बरे आवत हीं।
    उ पचे कउनो लाभदायक बात नाहीं बोलत हीं,
उ पचे सिरिफ कछू समाचार मोरे बरे जमा करत हीं।
    बाद मँ इ ओनका हर जगह फइलावत हीं।
⁷मोर दुस्मन छुपे छुपे मोर निन्दा करत रहत हीं।
    उ पचे मोरे खिलाफ कुचक्र रचत हीं।
⁸उ पचे कहा करत हीं, “उ कउनो बुरा करम किहेस ह,
    इहइ स ओका कउनो बुरा लोग लगा ह।
    मोका आसा अहइ उ कबहुँ तन्दुरुस्त नाहीं होइ।”
⁹मोर परम मित्र मोरे संग खात रहा, ओह पइ मोका भरोसा रहा।
    मुला अब मोर परम मित्र भी मोरे खिलाफ होइ ग अहइ।
¹⁰तउ हे यहोवा, मोह पइ कृपा करा अउ मोहे पइ कृपालु ह्वा।
    मोका खड़ा करा कि मइँ बदला लेउँ।
¹¹हे यहोवा, अगर तू मोरे दुस्मनन क बुरा नाहीं करइ देब्या,
    तउ मइँ समुझब कि तू मोका अपनाइ लिहा ह।
¹²मइँ निर्दोख रहेउँ अउर तू मोर मदद किहा।
    तू मोका खड़ा किहा अउर मोका तोहार सेवा करइ दिहा।

¹³इस्राएल क परमेस्सर,
यहोवा क प्राचीन काल स लइके अन्तिम समई तलक धन्न होइ।

आमीन, आमीन!

भजन संहिता 52

संगीत निर्देसक बरे उ समइ क एक ठु कलात्मक। जब एदमी दोएग साऊल क लगे आइके कहे रहा, दाऊद अबीमेलेक क घरे मँ अहइ।

¹अरे ओ, बड़का मनई! तू काहे सेखी बघारत अहा जउन बुरे करमन क तू करत अहा?
    तू लगातार परमेस्सर क अपमान करत अहा।
²तू मूरखता भरा कुचक्र रचत अहा।
    तोहार जीभ वइसी ही भयानक अहइ, जइसे तेज उस्तरा होत ह।
    काहेकि तोहार जीभ झूठ बोलत रहत ह!
³तोहका नेकी स जियादा बदी भावत ह।
    तोहका झूठ क बोलब, फुरइ बोलइ स जियादा भावत ह।

⁴तोहका अउ तोहरी झूठी जीभ क, लोगन क हानि पहोंचाउब नीक लागत ह।
⁵तोहका परमेस्सर सदा बरे नस्ट कइ देइ।
उ तोह पइ झपटी अउर तोहका धरिके घरे से बाहेर करी।
उ तोहका मारी अउ तोहार कउनो भी संतान नाहीं रही।

⁶सज्जन लोग ऍका लखिहीं
    अउ परमेस्सर स डेराब अउर ओकर आदर करब सिखिहीं।
उ पचे तोह पइ, जउन घटा ओह पइ हँसिहीं अउर कइहीं,
⁷    “लखा उ मनई क संग का भवा जउन यहोवा पइ निर्भर नाहीं रहा।
    उ मनई सोचेस कि ओकर धन अउर झूठ ऍकर रच्छा करिहीं।”

⁸मुला मइँ परमेस्सर क मन्दिर मँ एक ठु हरिअर जइतून क बृच्छा जइसा अहउँ।
मोर परमेस्सर क बिस्सासी पिरेम मँ सदा-सदा बरे भरोसा अहइ।
⁹हे परमेस्सर, मइँ ओन कामे क बरे जेनका तू किह्या हमेसा स्तुति करब।
मइँ तोहरे बिस्सासी मनइयन क समन्वा तोहरे नाउँ क घोसना करब।

भजन संहिता 44

संगीत निर्देसक बरे कोरह परिवार क एक ठु भक्ति गीत।

¹हे परमेस्सर, हम पचे तोहरे बारे मँ सुने अही।
    हमार पुरखन ओनकइ दिनन मँ जउन काम तू किहे रह्या ओनके बारे मँ हम पचन्क बताया।
    उ पचे पुराने जमाने मँ जउन तू किह्या ह, ओनका हम पचन्क बताया।
²हे परमेस्सर, तू इ धरती आपन महासक्ति स पराये लोगन्स लिहा
    अउर हम का दिहा।
ओन बिदेसी लोगन्क तू कुचर दिहा,
    अउर ओनका इ धरती तजिके देइ क दबाव डाया।
³हमार पुरखन इ धरती आपन तरवारन क बल पइ नाहीं लिहे रहेन आपन भुजदण्डन क बल पइ बिजयी नाहीं भएन।
    इ एह बरे भवा रहा।
काहेकि तू हमरे पुरखन क संग रह्या।
    हे परमेस्सर, तोहार महान सक्ति हमरे पुरखन क रच्छा किहस।
    काहेकि तू ओनसे पिरेम करत रह्या।
⁴हे मोरे परमेस्सर, तू मोर राजा अहा।
    उ आदेस द्या जउन कि याकूब क लोगन क जीत मँ अगुवाइ करी।
⁵परमेस्सर, तोहरी सक्ति स हम आपन दुस्मनन क पीछे ढकेल दिहन।
    तोहार नाउँ स हम आपन दुस्मन क कुचरि देब।
⁶मोका आपन धनुस अउ बाणन पइ भरोसा नाहीं।
    मोर तरवार मोका बचाइ नाहीं सकत।
⁷हे परमेस्सर, तू ही हमका मिस्र स बचाया।
    तू हमरे दुस्मनन क लज्जित किहा।
⁸हर दिन हम परमेस्सर क गुण गाउब।
    हम तोहरे नाउँ क स्तुति सदा करब।

⁹मुला अब, हे यहोवा, तू हम लोगन स पीछे मुड़ि गवा ह अउ हमका नीचा कइ दिहा ह!
    तू हमरे फउज मँ जुरइ स इन्कार कइ दिहा ह जब हम जुद्ध मँ गए रहेन!
¹⁰तू हमका हमरे दुस्मनन क लगे छोड़ि दिहेस,
    तउ उ पचे हमार सारा धन दौलत छीन लइ गएन।
¹¹तू हमका उ भेड़ी क नाई तज्या जउन खइया क तरह खाइ क होत ह।
    तू हमका रास्ट्रन क बीच छितराइ दिहा।
¹²हे परमेस्सर, तू आपन लोगन क यूँ ही बेच दिहा,
    अउ ओनके मूल्य पइ भाव ताव नाहीं किहा।
¹³तू हमका हमरे पड़ोसियन मँ हँसी क पात्र बनाया।
    हमरे पड़ोसी हमार मसखरी करत हीं, अउर हमार मजाक बनावत हीं।
¹⁴लोग हमरी भी कथा उपहास कथा मँ कहत हीं।
    हिआँ तलक कि उ सबइ लोग जेनका आपन कउनो रास्ट्र नाहीं अहइ, आपन मूँड़ी हलाइके हमार मसखरी करत हीं।
¹⁵मइँ लज्जा मँ बूड़ा अहउँ।
    मइँ सारे दिन भइ निज लज्जा निहारत रहत हउँ।
¹⁶मोर दुस्मन मोका लज्जित किहेन ह।
    मोर मसखरी उड़ावत भए मोर दुस्मन, आपन बदला लेइ चाहत ह।
¹⁷हे परमेस्सर, हम तोहका बिसरावा नाहीं।
    फिन भी तू हमरे संग अइसा करत ह।
    हम जब आपन करार पइ तोहरे संग हस्ताच्छर किहे रहे, झूठ नाहीं बोले रहे।
¹⁸हे परमेस्सर, हम तउ तोहसे मुँह नाहीं मोड़ा।
    अउर न ही तोहार अनुसरण करब तजा ह।
¹⁹मुला, हे यहोवा, तू हमका इ ठउरे पइ अइसे ठूँस दिहा ह जहाँ सियार रहत हीं।
    तू हमका इ जगह मँ जउन मउत क तरह अँधियर अहइ मूँद दिहा ह।
²⁰का हम आपन परमेस्सर क नाउँ बिसरी?
    का हम विदेसी देवतन क अगवा निहुरी? नाहीं।
²¹निहचय ही, परमेस्सर ऍन बातन क जानत ह।
    उ तउ हमार गहिर रहस्य तलक जानत ह।
²²हे परमेस्सर, हम तोहरे बरे रोज रोज मारा जात अही।
    हम ओन भेड़िन जइसा बना अही जउन बधइ बरे लइ जाई जात अहइँ।
²³मोर सुआमी, उठ!
    नींदिया मँ काहे ओलरा अहा?
    उठा! हमका सदा बरे जिन तजा।
²⁴हे परमेस्सर, तू हमसे काहे छुपत ह?
    का तू हमार दुःख अउर सबइ वेदना क बिसरि गवा अहा?
²⁵हमका धूरि मँ पटक दीन्ह गवा ह।
    हम ओंधा मुँह कइके धरती पइ पड़ा भवा अही।
²⁶हे परमेस्सर, उठा अउर हमका बचाइ ल्या।
    आपन नित्य पिरेम क कारण हमार रच्छा करा।

उत्पत्ति 14

लूत धरा गवा

14 अम्रापेल सिनार क राजा रहा। अर्योक एल्लासार क राजा रहा। कदोर्लाओमेर एलाम क राजा रहा। तिदाल गोयीम क राजा रहा, ²इ सबहि राजा लोगन मँ सदोम क राजा बेरा, अमोरा क राजा बिर्सा, अद्मा क राजा सिनाब, सबोयीम क राजा सेमेबेर अउ बेला। (बेला सोअर भी कहा जात रहा।) क राजा क संग एक जुद्ध भवा।

³सिद्दीम क घाटी मँ इ सबहिँ राजा आपन आपन फउज स मिलेन। (सिद्दीम क घाटी आजुकल नून क समुद्दर अहइ।) ⁴इ सबइ राजा लोग कदोर्लाओमेर क सेवा बारह बरिस तलक किहन। मुला तेरहवाँ बरिस उ सबइ ओकरे खिलाफ होइ गएन। ⁵ऍह बरे चौदहवें बरिस मँ राजा कदोर्लाओमेर दूसर राजा लोगन क संग ओनसे लड़इ आवा। कदोर्लाओमेर अउ ओकरे संग क राजा लोग रपाई लोगन क असतरोत्कनम मँ हराएन। उ पचे हाम मँ जूजि लोगन क भी हराएन। उ पचे एमि लोगन क उ सबइ एमि लोगन क साबेकिर्यातैम मँ हराएन। ⁶अउर उ पचे होरीत लोगन क सेईर क पहाड़ी पहटा स हराइके एल्पारान कइँती खदेरेन। (एल्पारान मरुभूमि क निचके बाटइ।) ⁷तब राजा कदोर्लाओमेर पाछे कइँती घूमा अउ एन्मिसपात क गवा। (इ कादेस कहा जात ह।) अउर सबहि अमालेकी लोगन क हराएस। उ एमोरी लोगन क भी हराएस। इ पचे हससोन्तामार मँ रहत हीं।

⁸उ समइ सदोम क राजा, अमोरा क राजा, अदमा क राजा, सबोयीम क राजा, अउ बेला क राजा, (बेला सोअर ही अहइ।) सबहि एक संग मिलिके आपन दुस्मनन स लड़इ बरे गएन। ⁹उ पचे एलाम क राजा कदोर्लाओमेर, गोयीम क राजा तिदाल, सिनार क राजा अम्रापेल, अउर एल्लासार क राजा अर्योक स लड़ेन। इ तरह चार राजा पाँच राजा लोगन स लड़त रहेन।

¹⁰सिद्दीम क घाटी मँ राल स भरा भवा ढेरिके गड्डा रहेन। सदोम अउ अमोरा क राजा अउ ओकर फउजियन पराइ गएन। ओकरे बहुत सारे फउजियन ओन गड्डन मँ गिर गएन। मुला दूसर लोग पहाड़ी मँ पराइ गएन।

¹¹सदोम अउ अमोरा क लगे जउन कछू रहा ओका ओनकइ दुस्मनन लइ लिहन। उ पचे ओनकइ सब भोजन-ओढ़ना क लइ लिहन अउ उ पचे चला गएन। ¹²अब्राम क भाई क पूत लूत सदोम मँ रहत रहा, ओका दुस्मन कैद कइ लिहन। उ पचे ओका अउर ओकरे लगे जउन कछू भी रहा लइ लिहेन। ¹³एक ठु मनई जउन धरा नाही जाइ सका उ हिब्रू मनई अब्राम क इ सबइ सारी बातन क बताएस। एमोरी मम्रे क बृच्छन क लगे अब्राम आपन डेरा डाएस। मम्रे एस्कोल अउ आनेर एक समझौता एक दूसरे क मदद करइ बरे किहे रहेन अउर उ पचे अब्राम क मदद खातिर एक समझौता किहे रहेन।

अब्राम लूत क छोड़ावत ह

¹⁴तब अब्राम क पता लाग कि लूत धरा ग अहइ। तउ उ आपन पूरा परिवार क बटोरेस अउ ओनमाँ स तीन सौ अठारह प्रसिच्छित फउजियन क अब्राम दान नगर तलक दुस्मनन क पाछा किहस। ¹⁵उहइ रात उ अउर ओकर मनइयन ओनका खिलाफ धावा बोलि दिहन। उ पचे दुस्मनन क हराएन अउ दमिस्क क उत्तर मँ होवा तलक ओनकइ पाछा किहन। ¹⁶तब अब्राम दुस्मनन क जरिये चोरॅाइ गइ सब चिजियन लइ आएन। अब्राम लूत, ओकर मेहरारुअन अउर ओकरे नउकरन अउर ओकरे सबहिँ चिजियन क लइ आवा।

¹⁷कदोर्लाओमेर अउ ओकरे संग क सब राजा लोगन क हराए क पाछे अब्राम आपन घरे लौटि आवा। जब उ घर आवा तउ सदोम क राजा ओसे भेटंइ सावे क घाटी मँ पहोंचा। (ऍका अब राजा क घाटी कहत हीं।)

मेल्कीसेदेक

¹⁸सालेम क राजा मेल्कीसेदेक भी अब्राम स भेटंइ गवा। मेल्कीसेदेक, सर्वोच्य परमेस्सर क याजक रहा। मेल्कीसेदेक रोटी अउ अंगूरे क दाखरस लइ आवा। ¹⁹मेल्कीसेदेक अब्राम क आसीर्बाद दिहस अउ कहेस:

“अब्राम, सर्वोच्य परमेस्सर तोहका आसीर्बाद देइ।
परमेस्सर भुइँया अउ अकास बनाएस।
²⁰अउर हम सर्वोच्य परमेस्सर क उपासना करित ह।
परमेस्सर दुस्मनन क हरावइ मँ तोहार मदद किहेस।”

तबहि अब्राम लड़ाई मँ मिली हर चीज क दसवाँ हीस्सा मेल्कीसेदेक क दिहस। ²¹तब सदोम क राजा कहेस, “तू इ सब चीजन क अपने लगे रखि सकत ह, मोका सिरिफ ओन मनइयन क दइ द्या जेनका दुस्मन धइ ल गए रहेन।”

²²मुला अब्राम सदोम क राजा स कहेस, “मइँ सर्वोच्य परमेस्सर यहोवा जउन भुइँया अउ आकास क बनाएस ह: ओकरे समन्वा इ किरिया खावा ह ²³कि जउन आप क चीज बाटइ ओहमाँ स कछू भी न लेब। हियाँ तलक कि एक ठु धागा अउर पनही क फीता भी न लेब। मइँ इ नाही चाहित कि आप कहइँ, ‘मइँ अब्राम क धनी बनाएउँ।’ ²⁴मइँ सिरिफ उ भोजन क अपनाउब्या जेका हमार जवान लोग खाएस ह। मुला तू दूसर मनइयन क भी ओकर हीँसा देइँ। हमरी लड़ाई मँ जीती भइ चीजन्क आप लइ लेइँ अउ एहमाँ स कछू आनेर, एस्कोल अउ मम्रे क दइ देइँ। इ मनइयन लड़ाई मँ हमार मदद किहेन रहेन।”

इब्रनियन 8

नवा करार क महाजायक

8 जउन कछू हम कहत अही कि, ओकर मुख्य बात इ बाः निस्चय ही हमरे लगे एक अइसा महायाजक बा जउन सरगे मँ ओह महा महिमावान क सिंहासन क दहिने हाथ बिराजमान अहइ ²उ ओह पवित्तर गर्भ गृह मँ यानी स्वर्गिक रावटी, मँ जेका परमेस्सर तउ स्थापित किहे रहा, न कि मनई, सेवा क काम करत ह।

³हर एक महायाजक क एह बरे नियुक्त कीन्ह जात ह उ भेंटन अउर बलिदानन-दुन्नऊ क ही अर्पित करइ। अउर इही बरे एह महायाजक क बरे भी जरूरी रहा कि ओकरे लगे भी चढ़ावा क बरे कछू होइ। ⁴अगर उ धरती प होत तउ उ याजक नाहीं होइ पावत काहेकि उहाँ पहिलेन स ही अइसेन मनई अहइँ जउन व्यवस्था क अनुसार भेंट-चढ़ावत हीं। ⁵पवित्तर आराधना स्थान मँ ओनकर सेवा-आराधना सरगे क यथार्थ क एक छाया नकल अहइ। इही बरे जब मूसा पवित्तर रावटी क निर्माण करइवाला रहा, तबइ ओका चेतावनी दइ दीन्ह गइ रहीः “ध्यान रहइ कि तू हर चीज ठीक उही प्रतिरूप क अनुसार बनावा जउन तोहका पर्वत प देखावा गवा रहा।” ⁶मुला जउन सेवा काम ईसू क मिला बा, उ ओनके सेवा काम स स्रेस्ठ बा। काहेकि उ जेह करार क मध्यस्थ अहइ उ पुरान करार स भी उत्तिम अहइ अउर उत्तिम चीजन क सबइ प्रतिज्ञा प अधारित बा।

⁷काहेकि अगर पहिला करार मँ कउनउ खोट नाहीं होत तउ दुसरे करार क बरे कउनउ स्थान इ नाहीं रही जात। ⁸मुला परमेस्सर क ओन्हन लोगन मँ खोट मिला उ कहेसः

“पर्भू घोसित करत ह, आवत अहइ उ समइ करबइ,
    जब मइँ इस्राएल क घराना स
    यहूदा क घराना स एक नवा करार
⁹इ करार होई न वइसेन
    जइसेन किहे रहेउँ मइँ ओनके पूर्वजन क साथ
ओह समइ जब मइँ ओनकर हाथ
    मिस्र स निकाल लइयावइ बरे पकड़े रहेउँ
काहेकि पर्भू कहत ह, उ मोरे करार मँ बिसवास नाहीं रखत
    मइँ ओनसे मुहँ फेर लिहेउँ।
¹⁰इ बा उ करार जेका मइँ इस्राएल क घराना स करबइ।
    अउर फिन ओनके बाद पर्भू घोसित करत ह
ओनके मन मँ निज व्यवस्था बसउबइ मइँ
    ओनके हिरदय प लिखि देबइ मइँ
ओनका परमेस्सर बनबइ
    अउर उ मोर जन होइहीं।
¹¹फिन तउ कबहुँ कउनो जन अपने पड़ोसी क, अइसेन न सिखावइ या
    कउनो जन न अपने भाइयन स कबहुँ कही तू पर्भू क पहचाना।
    काहेकि तब त ओ सभन छोट से लइ के बड़न से बड़न मोका जनिहीं तलक।
¹²काहेकि मइँ ओनके दुस्ट करमन क छमा करबइ
    अउर कबहुँ ओनके पापन क याद न रखबइ।” ^(A)

¹³एह करार क नवा कहिके उ ओनसे पहिले क व्यवहार क अयोग्य ठहरायेस। अउर जउन पुरान पड़त अहइ अउर व्यवहार क अयोग्य अहइ, उ त फिन जल्दी ही लुप्त होइ जाई।

पुराने करार क आराधना

यूहन्ना 4:43-54

राजकर्मचारी क बेटवा क जीवन दान

(मत्ती 8:5-13; लूका 7:1-10)

⁴³दुइ दिन क बाद उ हुवाँ स गलील क चल दिहेस। ⁴⁴(एक बरे कि ईसू खुद कहे रहा कि कउनो नबी अपने देस मँ कबहुँ आदर नाहीं पावत।) ⁴⁵इ तरह जब उ गलील आवा तउ गलील क रहइवाले ओकर स्वागत करेन्ह काहे बरे उ पचे उ सबइ कछू लखे रहेन्ह जउन कछु फसह क त्यौहार यरूसलेम मँ उ किहे रहा: काहेकि उ पचे सबहिं त्यौहार मँ सामिल रहेन।

⁴⁶ईसू एक बार फिन गलील मँ काना गवा जहाँ उ पानी क दाखरस बनाइ दिहे रहा। अब की दाई कफरनहूम मँ एक ठु राजकर्मचारी रहा जेकर बेटवा बीमार रहा। ⁴⁷जब राजकर्मचारी सुनेस कि यहूदिया स ईसू गलील आवा अहइ तउ उ ओकरे पास आवा अउर इ विनती किहेस कि उ कफरनहूम जाइके ओकरे बेटवा क चंगा कइ दे ओकर बेटवा एकदम मरइ क किनारे आइ गवा रहा। ⁴⁸ईसू ओसे कहेस, “अद्भुत कारजन अउर अचरजे कारजन क देखे बिना तू पचे बिसवास न करब्या।”

⁴⁹राजकर्मचारी ओसे कहेस, “महासय, एकरे पहले कि मोर बेटवा मरि जाइ, तू मोरे साथे घरे चला।”

⁵⁰ईसू जवाब दिहेस, “जा तोहार बेटवा जिअत रही।” ईसू जउन कहे रहा, उ पचे ओह पइ बिसवास किहेस अउर घर चला गवा। ⁵¹उ घर लौटत ही रास्ते मँ रहा कि ओकर नउकर मिल गएन अउर इ समाचार सुनाएन, “तोहार बेटवा चंगा होइ गवा।”

⁵²उ पूछेस, “ओकर हालत कब स ठीक होइ लाग ह?”

उ जवाब दिहसे, “कल दुपहरिया मँ एक बजे ओकर बुखार उतर गवा।”

⁵³उ लरिका क बाप क इ याद आइ गवा कि इहइ ठीक समइ रहा जब ईसू ओसे कहेस, “तोहार बेटवा जिअत रही।” इ तरीका स ओकर पूरा परिवार ईसू मँ बिसवास करइ लाग।

⁵⁴इ दूसर अद्भुत कारज रहा जउन ईसू यहूदियन क गलील आए क बाद देखाएस।

Awadhi Bible: Easy-to-Read Version (ERV-AWA)