Book of Common Prayer

6 Затоа, да ги надминеме веќе еднаш основите на христијанското учење и да се стремиме кон духовно созревање. Нема потреба повторно да ги поставуваме темелите за обраќање од мртвите дела, за верата во Бог, ² за крштавањето, за полагањето раце, за воскресението на мртвите и за Вечниот суд. ³ Ајде да напредуваме, со Божја помош!

⁴ Зашто, за луѓето кои еднаш веќе биле просветлени и вкусиле од небесниот дар, се придружиле кон делото на Светиот Дух, ⁵ ја вкусиле добрината на Божјата порака и силата на идниот свет, ⁶ а потоа Му го свртеле грбот на Бог, нема можност одново да се покајуваат. Таквите луѓе одново Го распнуваат Божјиот Син и јавно Го срамотат!

⁷ Ако почвата, откако ќе го впие дождот што често врне врз неа, му роди добра жетва на оној што ја обработува, таа ќе биде благословена од Бог. ⁸ Но ако раѓа само трње и боцки, таа е бескорисна и Бог наскоро ќе ја проколне и ќе ја запали!

⁹ Но, иако зборуваме вака, драги мои, ние сепак веруваме дека ова не се однесува на вас. Уверени сме дека вас ве очекува нешто многу подобро, нешто што доаѓа со спасението. ¹⁰ Бог не е несправедлив и нема да заборави колку напорно работевте за Него, колку љубов покажавте спрема Него, помагајќи им на другите христијани и порано, а и сега. ¹¹ Нашата искрена желба е секој од вас да истрае докрај во својата ревност. Така ќе можете да бидете сигурни дека вашата надеж навистина и ќе се исполни. ¹² Само така нема да станете духовно мрзливи, туку ќе го следите примерот на оние што имаат вера и трпение преку кои го наследуваат она што Бог им го вети.

²² По ова, Исус и Неговите ученици заминаа од Ерусалим, но останаа во покраината Јудеја, каде што Исус помина извесно време со нив и крштаваше. ²³ Јован исто така крштаваше во Енон^[a], близу до Шалем, зашто таму имаше многу вода. Луѓето доаѓаа и беа крштавани. ²⁴ Тоа беше пред Јован да биде фрлен в затвор.

²⁵ Тогаш се разви една расправа меѓу Јовановите ученици и еден Евреин околу обредното миење. ²⁶ Тие дојдоа кај Јован и му рекоа: „Раби, Оној Човек што беше со тебе од другата страна на реката Јордан за Кого ти посведочи дека е Месијата - ете, Тој крштава и сите одат кај Него!“

²⁷ Јован им одговори: „Човек не може да врши никаква мисија, ако не му е дадено од небото^[b]. ²⁸ Вие самите сте ми сведоци дека реков оти јас не сум Месијата, туку дека сум испратен како Негова претходница. ²⁹ Невестата ќе оди таму каде што е Mладоженецот, а пријателот на Mладоженецот, кој стои и слуша, од се срце се радува што го слуша гласот на Mладоженецот. Мојата радост на тој начин се исполни. ³⁰ Тој мора да напредува, а јас да се намалувам.“

Дојдениот од небото

³¹ Најголем од сите е Оној што доаѓа одозгора. Оној што е од Земјата, пак, и припаѓа на Земјата и зборува за земни работи. Најголем од сите е Оној што доаѓа од небото. ³² Тој сведочи за она што го видел и слушнал, но малкумина го прифаќаат Неговото сведоштво. ³³ Оној што го прифаќа Неговото сведоштво потврдува дека Бог е вистинит. ³⁴ Зашто, Оној Кого Бог Го прати ги зборува Божјите зборови, затоа што Бог му дава Дух без мера. ³⁵ Таткото Го сака Својот Син и Му предал се во Неговите раце. ³⁶ Оној што верува во Синот има вечен живот; оној, пак, што му е непослушен^[c] на Синот, не ќе види живот, туку останува под Божјата казна!