Book of Common Prayer

Нашиот Првосвештеник е Исус

¹⁴ Затоа да се држиме непоколебливо до верата што ја исповедаме, бидејќи Го имаме највозвишениот Првосвештеник - Исус, Божјиот Син, Кој отиде на небото! ¹⁵ Нашиот Првосвештеник не е некој што не може да сочувствува со нашите слабости; напротив, имаме Првосвештеник Кој беше искушуван во се, како и ние, но Тој не згреши. ¹⁶ Затоа, ние треба да пристапуваме кон престолот на Божјата благонаклоност со целосна доверба. Таму ќе добиеме милост и благонаклоност кои ќе ни бидат од голема помош кога ќе затреба.

Спасението ни е од Христос

5 Секој Првосвештеник е човек одбран да ги застапува луѓето пред Бог. Тој ги принесува нивните дарови за Бог и жртвите за нивните гревови. ² Тој може да биде нежен спрема луѓето, иако тие живеат во незнаење и често застрануваат, бидејќи и самиот е човек и има свои слабости. ³ Поради своите слабости, тој мора да принесува жртви не само за гревовите на народот, туку и за сопствените гревови. ⁴ Но никој не може да стане Првосвештеник само затоа што сака да има таква чест. Тој мора да биде повикан од Бога, како што беше повикан и Арон.

⁵ Така беше и со Христос. Тој не си ја додели Самиот на Себе честа да биде Првосвештеник, туку Бог Му рече:

„Ти си Мојот Син, денес Јас станав Твој Татко^[a]!“

⁶ А на друго место Бог за Него вели:

„Ти си вечен Свештеник, според редот на Мелхиседек^[b]!“

Исус ја познава природата на човекот

²³ Додека Исус беше во Ерусалим, за време на празникот Пасха, многумина поверуваа дека Тој е Месијата, гледајќи ги чудата што ги правеше. ²⁴ Самиот Исус, пак, не им се доверуваше, затоа што Тој ги познаваше сите. ²⁵ Немаше потреба некој да му кажува за луѓето, зашто Тој знаеше што се крие во нивните срца.

3 Меѓу фарисеите^[a] имаше еден човек по име Никодим^[b], кој беше еврејски верски старешина. ² Тој дојде кај Исус ноќе и му рече: „Раби, знаеме дека Ти си учител дојден од Бог, зашто овие чуда што Ти ги правиш никој не може да ги прави, ако Бог не е со него!“

³ Исус му одговори: „Најсериозно ти велам: ако човек наново^[c] не се роди, не може да го види Божјото царство!“

⁴ „Како може стар човек наново да се роди!?“ - праша Никодим. „Може ли да се врати во утробата на својата мајка и повторно да се роди!?“

⁵ Исус му одговори: „Ти велам и ти нагласувам: ако човек не се роди од вода и Дух, не може да влезе во Божјото царство!

⁶ Телото може да роди само тело, додека Светиот Дух раѓа нов, духовен живот, од небото. ⁷ Не чуди се што ти реков: ,Морате наново да се родите!‘ ⁸ Ветрот дува каде што сака. Звукот му го слушаш, но не знаеш од каде доаѓа и каде оди. Така е со секој што е роден од Духот.“

⁹ „Како може тоа да биде!?“ - праша Никодим.

¹⁰ Исус му рече: „Како можеш да му бидеш учител на израелскиот народ, а да не го знаеш тоа!? ¹¹ Најсериозно ти велам: ние знаеме што зборуваме и сведочиме за она што сме го виделе, а вие нашето сведоштво не го примате. ¹² Ако не Ми верувате кога ви зборувам за земни работи, како ќе Ми верувате ако ви зборувам за небесни работи!? ¹³ Никој не бил горе на небото, освен Синот Човечки^[d], Кој слезе од небото. ¹⁴ Исто како што Мојсеј ја подигна бронзената змија во пустината^[e], така ќе мора и Јас, Синот Човечки, да бидам подигнат. ¹⁵ Тогаш секој што ќе поверува во Мене, ќе се здобие со вечен живот.