◀ All Reading Plans / Book of Common Prayer / Ps. 55; Ps. 138 139:1–17 (18–23); Neh. 4:1–23; Rev. 7: (4–8) 9–17; Matt. 13:31–35 (Awadhi Bible: Easy-to-Read Version)

Prev Day

November 4, 2023

Next Day

Use the calendar to view readings from this devotional.

November 2023
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 55

संगीत निर्देसक बरे। तार वाले बाजन क संग। दाऊद क एक ठु मस्किल।

¹हे मोर परमेस्सर, मोर पराथना सुना।
    कृपा कइके तू मोहसे दूर जिन ह्वा।
²हे परमेस्सर, कृपा कइके मोर सुना अउर मोका जवाब द्या।
    तू मोका आपन दुःख तोहसे कहइ द्या।
³मोर दुस्मन मोहसे दुर्बचन बोलेन ह।
    दुट्ठ लोग मोह पइ चीखेन ह।
    मोर दुस्मन किरोध कइके मोह पइ टूट पड़ा अहइँ।
    उ पचे मोका नास करइ बिपत्ति ढावत अहइँ।
⁴मोर मनवा भितरे स चूर-चूर होत बा,
    अउर मोका मउत स बहोत डर लागत अहइ।
⁵मइँ बहोत डेरान अहउँ।
    मइँ थरथर काँपत अहउँ।
    मइँ डेरान अहउँ।
⁶ओह, अगर कबूतरे क नाई मोरे पखना होतेन,
    अउर मइँ पखना पवतेउँ तउ दूर कउनो चैन पावइ क जगह उड़ि जातेउँ।
⁷    मइँ उड़िके दूर निर्जन जगह मँ जातेउँ।

⁸मइँ दूर चला जाब
    अउर इ बिपत्ति क आँधी स बचिके दूर भाग जाब।
⁹हे मोर सुआमी, हवाँ सहर मँ मतभेद अउर हिंसा अहइ।
    ओनके झूठन क रोका जउन मतभेद का कारण अहइँ।
¹⁰बाहेर दिन अउर रात इ सहर ओन स घेरे अहइ,
    अउर अन्दर मँ हुवाँ परेसानियन अउर अपराधन अहइँ।
¹¹गलियन मँ बहोत जियादा अपराध फइलत अहइ।
    हर कहूँ लोग झूठ बोलिके छलत अहइँ।

¹²जदि इ मोर दुस्मन होत
    अउर मोका नीचा देखाँवत तउ मइँ ऍका सहि लेतेउँ।
अगर इ सबइ मोर दुस्मन होतेन,
    अउर मोह पइ वार करतेन तउ मइँ छिप सकत रहेउँ।
¹³ओ। मोरे संगी, मोरे हमजोली, मोरे मीत, इ मगर तू अहा
    अउर तू ही मोका कस्ट पहोंचावत अहा।
¹⁴हम आपुस मँ गुप्त बातन बाँटे रहेन।
    हम परमेस्सर क मन्दिर मँ साथ-साथ उपासना कीन्ह।

¹⁵कास कउनो दुस्मन आपन समइ स पहिले ही मरि जाइँ।
कास ओनका जिअत ही गाड़ दीन्ह जाइ,
काहेकि उ पचे आपन घरन मँ अइसे भयानक कुचक्र रचा करत हीं।

¹⁶मइँ तउ मदद बरे परमेस्सर क पुकारब।
    यहोवा ओकर जवाब मोका देइ।
¹⁷मइँ तउ आपन दुःख क परमेस्सर स भिन्सारे दुपहरिया अउ राति मँ कहब।
    उ मोर सुनी।
¹⁸मइँ केतनी जुद्धन मँ लड़ाई लड़ेउँ ह।
    मुला परमेस्सर मोरे संग अहइ, अउर हर जुद्ध स मोका सुरच्छित लउटाइ।
¹⁹परमेस्सर मोर सुना अउर ओनका हराइ देब।
    उ अनन्त राजा बाटइ।

मोर दुस्मन कबहुँ नाहीं बदलिहीं।
    उ पचे परमेस्सर स नाहीं डरतेन, अउर न ही ओकर आदर करतेन।
²⁰मोर दुस्मन आपन ही मीतन पइ वार करतेन।
    उ सबइ ओन बातन क नाहीं करतेन, जेनका करइ क उ पचे सहमत होइ ग रहेन।
²¹मोर दुस्मन फुरइ मीठा बोलत हीं, अउर सुसान्ति क बातन करत रहत हीं।
    मुला असलियत मँ, उ पचे जुद्ध क कुचक्र रचत हीं।
    ओनकर सब्द काट करत हीं छुरी क तरह अउ फिसलन भरा अहइँ जइसे तेल होत ह।

²²आपन सबइ चिन्ता क तू यहोवा क सौंप द्या।
फुन उ तोहार रखवारी करी।
यहोवा सज्जन क कबहुँ हारइ न देइ।

²³एहसे पहिले कि ओनकर आधी उमर बीत जाइ।
हे परमेस्सर, ओन हत्यारन क अउर ओन झूठन क कब्र मँ पठवा।
जहाँ तलक मोर अहइ, मइँ तउ तोह पइ भरोसा रखब।

भजन संहिता 138:1-139:23

दाऊद क एक ठु पद।

¹हे परमेस्सर, मइँ आपन पूर्ण मन स तोहार गीत गावत हउँ।
    मइँ सबहिं देवन क समन्वा मइँ तोहार पद गाउब।
²हे परमेस्सर, मइँ तोहरे पवित्तर मन्दिर कइँती दण्डवत करब।
    मइँ तोहरे नाउँ क बड़कई करब,
काहेकि तोहार बिस्ससनीय पिरेम सच्चा अउर पिआरा अहइ,
    अउर काहेकि तू आपन वचन क आपन महान सक्ति स किहा ह।
³हे यहोवा, जब मइँ मदद पावइ बरे तोहार पराथना करेउँ तउ मोका जवाब द्या।
    तू मोका बल देइके मोर साहस बढ़ाया।

⁴हे यहोवा, धरती क सबहिं राजा तोहार अच्छाई क गुण गावइँ।
    जब उ पचे तोहार वचन क सुनिहीं।
⁵उ पचे यहोवा क स्तुति करइँ,
    काहेकि यहोवा क महिमा महान अहइ।
⁶काहेकि यहोवा महान अहइ,
    मुला उ अबहुँ तलक विन्रम मनई क धियान रखत ह।
उ घमण्डी लोगन क कामन क पता
    दूर स ही जानत हीं।
⁷हे यहोवा, अगर मइँ संकट मँ पड़उँ तउ मोका जीवित रहइ द्या।
    अगर मोर दुस्मन मोह पइ किरोध करइँ तउ ओनसे मोका बचावा।
⁸यहोवा उ सबइ बातन क करी जेनका उ मोका वचन दिहेस ह।
    हे यहोवा, तोहार बिस्ससनीय पिरेम सदा ही बना रहत ह।
    हे यहोवा, तू हमका रच्या ह।
    तउ तू हमका जिन बिसरा।

संगीत निर्देसक बरे वाद्य यंत्र क संग दाऊद क एक ठु गीत।

¹हे यहोवा, तू मोका जाँच्या ह।
    मोरे बारे मँ तू सब कछू जानत अहा।
²तू जानत अहा कि मइँ कब बइठत अउ कब खड़ा होत हउँ।
    तू दूर रहत भए मोरे मन क बात जानत अहा।
³हे यहोवा, तू जानत ह कि मइँ कहाँ जात अउ कहाँ ओलरत हउँ।
    तू बहोत अच्छी तरह जानत ह जउन कछू मइँ करत हउँ।
⁴हे यहोवा, एहसे पहिले क सब्द मोरे मुख स निकलइ
    तोहका पता होत ह कि मइँ का कहइ चाहत हउँ।
⁵हे यहोवा, तू मोरे चारिहुँ कइँती मौजूद अहा।
    मोरे समन्वा भी अउर पाछा भी, तू आपन निज हाथ मोरे ऊपर हौले स रखत अहा।
⁶मोका अचरज अहइ ओन बातन पइ जेनका तू जानत अहा।
    जेनका मोरे बरे समुझब बहोत कहिन अहइ।
⁷हर जगह जहाँ भी मइँ जात हउँ हुआँ तोर आतिमा होत ह।
    हे यहोवा, मइँ तोहसे बचिके कहँ नाहीं जाइ सकत।
⁸हे यहोवा, अगर मइँ आकासे पइ जाब हुआँ पइ भी तू ही अहा।
    अगर मइँ मउत क देस पाताल मँ जाब हुआँ पइ तू ही अहा।
⁹अगर मइँ पूरब मँ जहाँ स सूरज निकरत ह,
    अगर मइँ समुद्दर क पीछे रहब,
¹⁰हुआँ तलक भी तोहार दायाँ हाथ पहोंचत ह।
    तू मोका आपन हाथ स धइके अगुवाइ करत ह।

¹¹होइ सकत ह मइँ सोचउँ कि तोहसे छुपा अहउँ अउर कहइ लागूँ,
    “दिन रात मँ बदल गवा ह।
    निहचय ही अँधियारा मोका ढाँपि लेइ।”
¹²मुला यहोवा अँधेरा भी तोहरे बरे अँधेरा नाहीं अहइ।
    हिआँ तलक कि तोहरे बरे रात भी दिन जइसी ही उजरी अहइ,
    काहेकि दुइनउँ अँधेरा अउर उजियारा तोहार समान अहइ।
¹³तू मोर देह क अन्दरुनी भाग क बनाया ह।
    तू मोका आपन महतारी क कोख मँ ही रचे रहा।
¹⁴हे यहोवा, मइँ तोहका ओन सबहिं अचरज भरे काम बरे धन्यवाद देत हउँ जउन रास्ते स तू मोका बनाया ह,
    अउर मइँ सचमुच जानत हउँ कि तू जउन कछू करत अहा उ अचरजे स पूर्ण अहइ।

¹⁵जब मइँ आपन महतारी क कोख मँ रहा
    अउर मोरे देह गुप्त रूप मँ रूपधारण करत रहेन तबहिं तू मोर हाड़न क लख्या।
¹⁶तू मोरी देह क मोरी महतारी क गर्भ मँ बनत भए लख्या।
    अउर मोर सरीर क सबइ हींसा जउन दिन ब दिन बनत रहा, उ सबइ क बनइ स पहिले तोहार किताब मँ लिखा भवा रहेन।
¹⁷तोहार विचारन मोरे बरे बहोत कीमती अहइँ।
    उ गिनती मँ बहोत जियादा अहइँ।
¹⁸तू जउन कछू जानत अहा, ओन सब क अगर मइँ गन सकउँ, तउ उ सबइ सबहिं धरती क रेत क कणन स भी जियादा होइहीं।
    जद्यपि अगर मइँ लगातार जगा रहेउँ, तउ भी मइँ ओनकर बरे तोहरे साथ गना जाब।

¹⁹हे परमेस्सर, दुर्जन क नस्ट करा।
    तू हत्यारन, मोसे दूर रहा।
²⁰उ पचे बुरे लोग तोहरे बरे बुरी बातन कहत हीं।
    तोहार दुस्मन झूठ स तोहार नाउँ लेत ह।
²¹हे यहोवा, मोका ओन लोगन स घिना अहइ जउन तोहसे घिना करत हीं।
    मइँ ओन लोगन स घिना करत हउँ जउन तोहार खिलाफ बिद्रोह करत ह।
²²मोका ओनसे पूरी तरह घिना अहइ।
    तोहार दुस्मन मोर भी दुस्मन अहइँ।
²³हे परमेस्सर, मोका जाँच्या अउर मोर मन जान ल्या।
    मोका परख्या अउर मोर चिन्तन क जान ल्या।

नहेमायाह 4

सम्बल्लत अउर तोबियाह

4 जब सम्बल्लत सुनेस कि हम लोग यरूसलेम क नगर देवार क पुनःनिर्माण करत अही, तउ उ बहोत किरोधित अउ बियाकुल होइ उठा। उ यहूदियन क हँसी उड़ावइ लाग। ²सम्बल्लत अपने मीतन अउर फउज स सोमरोन मँ इ बिसय क लइके बातचीत किहस। उ कहेस, “इ सबइ सक्तिहीन यहूदी का करत अहइँ? ओनकर बिचार का अहइ? का उ पचे आपन बलियन चढ़ाइ पइही? साइद उ पचे अइसा सोचत ही कि उ पचे एक दिन मँ ही इ निर्माण कार्य क पूरा कइ लेइही। धूर माटी क इ ढेर मँ स उ पचे पाथरन क उठाइके फुन स नवी जिन्नगी नाहीं दइ पइही। इ सबइ तउ अब राखी अउ माटी क ढेर बन चुका अहइँ।”

³अम्मोन क निवासी तोबियाह सम्बल्लत क संग रहा। तोबियाह बोला, “इ सबइ यहूदी जउन निर्माण करत रहे ओकरे बारे मँ इ सबइ का सोचत ही? जदि कउनो नान्ह स लोखरी भी उ देवार पइ चढ जाइ तउ ओनकर उ पाथरन क देवार ढह जाइ।”

⁴तब नहेमायाह परमेस्सर स पराथना किहस अउर उ बोला, “हे हमरे परमेस्सर, हमरी बिनती सुना। उ सबइ लोग हम स घिना करत ही। सम्बल्लत अउ तोबियाह हमार अपमान करत हीं। एन बुरी बातन क तू ओन ही क संग घटाइ द्या। ओनका ओन मनइयन क नाई लज्जित कइके जेनका बन्दी क रूप मँ लइ जावा जात रहा होइ। ⁵ओनकर उ अपराध क दूर जिन करा अथवा ओनके ओन पापन क छिमा जिन करा जेनका उ पचे तोहरे लखत किहन ह। उ पचे देवार क बनावइ बालन क अपमान किहन ह अउर ओनकर हिम्मत तोड़ेन ह।”

⁶हम यरूसलेम क देवार क पुन: निर्माण किहा ह। हम नगर क चारिहुँ कइँती देवार बनावा ह। मुला ओका जेतना ऊँच होइ चाही, उ ओहसे आधी ही रहि गइ ह। हम इ एह बरे कइ पाए कि हमार लोग अपने समूचे मन स इ कार्य क किहा।

⁷किन्तु सम्बल्लत, तोबियाह, अरब क लोगो, अम्मोन क निवासियो अउर असदोद क रहइवाले लोगन क उ समइ बहोत किरोध आवा। जब उ पचे इ सुनेन कि यरूसलेम क देवार पइ लोग निरंतर काम करत अहइँ। उ पचे सुने रहेन कि लोग देवार क टूटा भवा भाग क भरत अहइँ। ⁸तउ उ पचे सबहिं लोग आपुस मँ बटुरेन अउर उ पचे यरूसलेम क खिलाफ जोजनन बनाएन। उ पचे यरूसलेम क खिलाफ गड़बड़ी पइदा करइ क सडयन्त्र रचेस। उ पचे इ जोजना भी बनाएन कि नगर क ऊपर चढाई कइके जुद्ध कीन्ह जाइ। ⁹मुला हम अपने परमेस्सर स बिनती किहस अउर नगर देवार क देवारन पइ हम पहरेदार बइठाए दिहन ताकि उ पचे हीआँ दिन-रात रखवारी करइँ जेहसे हम ओन लोगन क मुकाबला करइ क बरे तुरन्त तइयार रहइँ।

¹⁰उधर उहइ समइ यहूदा क लोग कहेन, “कारीगर लोग थकत जात अहइँ। हुवाँ बहोत स कचरा पड़ा अहइ। तउ हम अब देवार पइ निर्माण कार्य करत नाहीं रहि सकित। ¹¹अउर हमार दुस्मन कहत अहइँ, ‘एहसे पहिले कि यहूदियन क एकर पता चलइ या उ पचे हम क लखि लेइँ, हम ठीक ओनके बीच पहोंच जाब। हम ओनका मार डाउब जेहसे ओनकर काम रुक जाइ।’”

¹²एकरे पाछे हमरे दुस्मनन क बीच रह रहे यहूदी हमरे लगे आवइँ अउर उ पचे हम स दस दाईँ इ कहेन, “हमरे चारिहुँ कइँती हमार दुस्मन अहइँ, हम जिधर भी मुड़ी, हर कहूँ हमार दुस्मन फइले अहइँ।”

¹³तउ मइँ देवार क देवार क संग-संग जउन जगह सब स खाले पड़त रहिन, ओनके पाछे कछू लोगन क नियुक्त कइ दिहेउँ अउर मइँ देवार मँ जउन नाके पडत रहेन, ओन पइ भी लोगन क लगाइ दिहेउँ। मइँ समूची देवारन क ओनकर तरवारन, भालन अउर धनुस बागन क संग हुवाँ लगाइ दिहेउँ। ¹⁴मइँ सारी स्थिति क अंजाद लिहेउँ अउर फुन खड़े होइके महत्त्वपूर्ण परिवारन, हाकिमन अउ दूसरे लोगन स कहेउँ, “हमरे दुस्मनन स डेराअ जिन। हमरे सुआमी क याद राखा। यहोवा महान अहइ अउ सक्तीसाली अहइ। तू पचन्क अपने भाइयन, अपने पूतन अउ अपनी बिटियन क बरे इ लडाई लडब ही अहइ। तू पचन्क अपनी मेहररूअन अउ अपने घरन क बरे जुद्ध करब ही होइ।”

¹⁵एकरे पाछे हमरे दुस्मनन क कान मँ इ भनक पड गइ कि हम क ओनकी जोजनन क पता चल चुका ह। उ पचे जान गएन कि परमेस्सर ओनकी जोजनन पइ पानी फेर दिहस। एह बरे हम सबहिं नगर देवार क देवार पइ काम करइ क वापस लउटि गए। हर मनई फुन अपने जगह पइ वापस चला गवा अउर अपने हींसे क काम करइ लाग। ¹⁶उ दिन क पाछे स मोरे आधे लोग देवार पइ काम करइ लागेन अउर मोर आधे लोग भालन, ढारन, तीरन अउर कवचन स सुसज्जित होइके पहरा देत रहे। यहूदा क ओन लोगन क पाछे जउन नगर देवार क देवार क निर्माण करत रहेन, फउज क अधिकारी खड़े रहत रहेन। ¹⁷सामान ढोवइवाले मजदूर एक हाथ स काम करतेन तउ ओनके दूसर हाथे मँ हथियार रखत रहेन। ¹⁸हर कारीगर क बगल मँ जब उ काम करत भवा होत, तरवार बँधी रहत रही। लोगन क सावधान करइ बरे तुरही बजावइवाला मनई मोरे लगे ही रहत। ¹⁹फुन प्रमुख हथियारन, हाकिमन अउर बाकी दूसरे लोगन क सम्बोधित करत भए मइँ कहेउँ, “इ बहोत बड़ा काम अहइ। हम देवार क सहारे सहारे फइले भए अही। हर एक दूसरे स दूर पड गए अही। ²⁰तउ जदि तू तुरही क अवाज सुना, तउ उ निर्धारित जगह पइ भाग आवा हुँवइ हम सब बटुरब अउर हमरे बरे परमेस्सर जुद्ध करी।”

²¹इ तरह हम यरूसलेम क उ देवार पइ काम करत रहे अउर हमरे आधे लोग भाले थामे रहे। हम भिंसारे क पहली किरण स लइके रात मँ तारे छिटकइ तलक काम किया करत रहे।

²²उ अवसर पइ लोगन स मइँ इ भी कहे रहेउँ: “रात क समइ हर मनई अउर ओकर सेवक यरूसलेम क भीतर ही ठहरइ ताकि राति क समइ मँ उ पचे पहरेदार रहइँ अउर दिन क समइ कारीगर।” ²³इ प्रकार हम मँ स कउनो भी कबहुँ अपने ओढ़ने नाहीं उतारत रहा न मइँ, न मेरे साथी, न मेरे लोग अउर न पहरेदार। हर समइ हम मँ स हर एक मनई अपने दाहिने हाथ मँ हथियार तइयार रखा करत रहा।

प्रकासित वाक्य 7:4-17

⁴फिन जउन मनइयन प मोहर लगाई ग रही, मइँ औनकइ तादाद सुनेउँ। उ 1,44,000 रहेन जेनकइ ऊपर मोहर लगाई ग रही, उ सब इस्राएल क सब परिवार समूहन स रहेन:

⁵यहूदा क परिवार समूह क 12,000

रुबेन क परिवार समूह क 12,000

गाद क परिवार समूह क 12,000

⁶आसेर परिवार समूह क 12,000

नप्ताली परिवार समूह क 12,000

मनस्से परिवार समूह क 12,000

⁷समौन परिवार समूह क 12,000

लेवी परिवार समूह क 12,000

इस्साकार परिवार समूह क 12,000

⁸जबूलून परिवार समूह क 12,000

यूसुफ परिवार समूह क 12,000

बिन्यामीन परिवार समूह क 12,000

भयंकर भीड़

⁹एकरे बाद मइँ देखेउँ कि मोरे सामने एक बहुत बड़ी भीड़ रही जेकर कउनउँ गनती नाही कइ सकत रहा। इ भीड़ मँ हर जाति क, हर वंस क, हर कुल अउर हर भाखा क मनई रहेन। उ पचे उ सिंहासन अउर उ मेमना क आगे खड़ा रहेन। उ सबेन्ह सफेद चोगा पहिरे रहेन अउर अपने हाथे मँ खजूर क टहनी लिहे रहेन। ¹⁰उ सबेन्ह बोलावत रहेन, “सिंहासन प बइठा हमरे परमेस्सर क जय होइ अउर मेमना क जय होइ।”

¹¹सभी सरगदूतन सिंहासन, बुजुर्गन अउर ओन चार प्रानीयन क घेरे खड़ा रहेन। सिंहासन क सामने झुकिके प्रणाम कइके ओन सरगदूतन परमेस्सर क आराधना किहेन। ¹²उ पचे कहेन, आमीन हमरे परमेस्सर क, “स्तुति, महिमा, विवेक, धन्यवाद, समादर, पराक्रम अउर सक्ति हमेसा हमेसा होत रहइ। आमीन!”

¹³तबहि ओन बुजुर्गन मँ स कउनउँ एक मोसे इ पूछेस, “इ सफेद चोगा पहिरे कउन मनई अहइँ अउर इ कहाँ स आए अहइँ?”

¹⁴मइँ ओनका जवाब दिहेउँ, “मोर प्रर्भू तू तउ जनतइ अहा।”

इ सुनिके उ मोसे कहेस, “इ पचे उहइ मनई अही जउन कठोर अत्याचार क बीच स होइके आवत अहइँ उ सबेन्ह आपन चोगा मेमना क खून स धोइके सफेद अउर उज्जर करे अहइ। ¹⁵इही बरे अउर इ पचे परमेस्सर क सिंहासन क समन्वा खड़ा अहइँ अउर ओनके मंदिर मँ दिन रात ओकर आराधना करत ही। जउन सिंहासन पर बइठा बा, उ ओन पर आपन छाया करी। ¹⁶न तउ कबहूँ ओनका भूख सतावात ह अउर न तउ कबहूँ पियासा रहत ह। सूरज ओनकइ कछू नाहीं बिगाड़ पावत अउर न तउ चिलचिलात धूप ओनका कबहूँ तपावत ह। ¹⁷काहेकि उ मेमना जउन सिंहासन क बीच मँ अहइ, ओनकइ देखभाल करी। अउर ओनकर चरवाहा होइ। उ ओनका जिन्दगी देइ वाले पानी क झरना क पास लइ जाई अउर परमेस्सर ओनकी आंखिन क आंसू क पोछ देई।”

मत्ती 13:31-35

अउर दिस्टान्त कथा

(मरकुस 4:30-34; लूका 13:18-21)

³¹ईसू ओनके समन्वा अउर दिस्टान्त कथन्क राखेस: “सरग क राज्य राई क बिआ क छोटवार बिआ क नाईं अहइ, जेका कउनो लइके खेते मँ बोई दिहे होय। ³²ई बिआ नान्ह स नान्ह होत ह मुला बड़वार होए प इ बगिया क सबइ पउधन स बड़वार होइ जात ह। इ पेड़ बनत ह अउर अकासे क पंछी आइके ऍकर डारन प सरन लेत हीं।”

³³ईसू ओनका एक दिस्टान्त कथा अउ कहेस, “सरगे क राज्य खमीर क नाई अहइ, जेका जउनो स्त्री तीन अढ़इया आटा मँ मिलाएस अउर तब ताई ओका राखि दिहेस जब तलक उ सबइ क सबइ खमीर नाहीं भवा।”

³⁴ईसू लोगन्स सब कछू दिस्टान्त कथन स बताएस। असिल मँ उ ओनसे दिस्टान्त कथा क बिना कछू नाहीं कहत रहा। ³⁵अइसा एह बरे भवा कि परमेस्सर नबी स जउन कछू कहवाए रहा पूरा होइ जाइ: परमेस्सर कहेस,

“मइँ दिस्टांत कथन स आपन मुँहना खोलिहउँ।
सृस्टि क सुरू स जउन बात छुपी रहिन, ओनका परगट करब।” ^(A)

Awadhi Bible: Easy-to-Read Version (ERV-AWA)