◀ All Reading Plans / Book of Common Prayer / Ps. 119:97–120; Ps. 81 82; 2 Samuel 9:1–13; Acts 19:1–10; Mark 8:34—9:1 (Awadhi Bible: Easy-to-Read Version)

Prev Day

August 9, 2023

Next Day

Use the calendar to view readings from this devotional.

August 2023
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 119:97-120

मेम

⁹⁷मइँ तोहरी उपदेसन स बहोत जिआदा पिरेम करत हउँ।
    हर घड़ी मइँ ओनकर ही बारे मँ सोचत हउँ।
⁹⁸तोहार आदेसन मोका मोर दुस्मनन स जियादा बुद्धिमान बनाएन।
    तोहार कानून क वजह स उ सदा मोरे संग रहत ह।
⁹⁹मइँ आपन सबइ सिच्छकन स जियादा बुद्धिमान हउँ,
    काहेकि मइँ तोहरी करार क अध्ययन किया करत हउँ।
¹⁰⁰मइँ बुजुर्ग प्रमुखन स जियादा समुझत हउँ।
    काहेकि मइँ तोहरे आदेसन क मानत हउँ।
¹⁰¹मइँ तोहार आदेसन क पालन करइ बरे
    हर बुरे काम स बचा हउँ।
¹⁰²हे यहोवा, तू मोर सिच्छक अहा।
    एह बरे मइँ तोहरे फइसलन स नाहीं मुरेउँ ह।
¹⁰³तोहार वचन मोर मुहे मँ
    मधु स भी जियादा मीठा अहइँ।
¹⁰⁴तोहार उपदेसन क मइँ सावधान पूर्वक अध्यन करत हउँ,
    ऍह बरे मइँ झूठापन स घिना करत हउँ।

नून

¹⁰⁵हे यहोवा, तोहार सिच्छन मोका बुद्धिमान बनावत हीं।
    तउ झूठी सिच्छन स मइँ घिना किया करत हउँ।
¹⁰⁶तोहार फइसलन बहोत नीक अहइँ।
    मइँ ओनका पालन करइ क प्रतिग्या किहेउँ, एह बरे मइँ पालन करब।
¹⁰⁷हे यहोवा, बहोत समइ तलक मइँ विपदन झेलेउँ ह,
    कृपा कइके मोका वइसी जिन्नगी द्या जइसा तू देइ क वादा किहा ह।
¹⁰⁸हे यहोवा, मोरी बिनती क तू अंगीकार करा जउन मइँ तोहका भेंट करत हउँ,
    अउर मोका आपन फइसलन क सिच्छा द्या।
¹⁰⁹होइ सकत ह कि मइँ हर दिन आपन जीवन जोखिम मँ डालत हउँ,
    किन्तु मइँ तोहार उपदेसन क कबहुँ नाहीं बिसरत हउँ।
¹¹⁰दुट्ठ जन मोका फँसावइ क जतन करत हीं,
    मुला मइँ तोहरे उपदेसन नाहीं मुरेउँ ह।
¹¹¹तोहार करार सदा बरे मोर खज़ाना अहइ।
    इ मोका बहोत खुस किया करत ह।
¹¹²मइँ सदा तोहरे विधान पइ चलइ क
    बहोत कठोर जतन करब।

सामेख

¹¹³हे यहोवा, मोका अइसे ओन लोगन स घिना अहइ, जउन पूरी तरह स तोहरे बरे सच्चा नाहीं अहइँ।
    मोका तउ तोहार सिच्छन भावत हीं।
¹¹⁴तू मोर ढाल अउर रच्छक अहा।
    मइँ तोहार वचन पइ भरोसा किहउँ ह।
¹¹⁵दुट्ठ लोगन क मोहसे दूर करा,
    ताकि मइँ आपन परमेस्सर क आग्यन क पालन कइ सकेउँ।
¹¹⁶हे यहोवा, मोका अइसे ही सहारा द्या जइसे तू वचन दिहा, ताकि मइँ जी सकेउँ।
    मोका तोहेमाँ बिस्सास अहइ, मोका निरास जिन करा।
¹¹⁷हे यहोवा, मोका सहारा द्या कि मोर उद्धार होइ।
    मइँ सदा तोहरे आदेसन क पाठ किया करब।
¹¹⁸हे यहोवा, तू हर अइसे मनई स बिमुख होइ जात ह, जउन तोहार नेम तोड़त हीं।
    काहेकि उ पचे छल क बियर्थ राहन क पालन करत हीं।
¹¹⁹हे यहोवा, तू इ धरती स सबहिं दुट्ठ लोगन क अइसा हटावा, जइसेन उ पचे बेकार पदार्थ होइ,
    मइँ तोहरी करार स सदा पिरेम करब।
¹²⁰हे यहोवा, मइँ तोहसे डेरान हउँ, मइँ डेरात अहउँ,
    अउर तोहरे विधान क आदर करत हउँ।

भजन संहिता 81-82

संगीत निर्देसक बरे आसाफ क एक ठु गीत गित्तीथ वाद्य यंत्र क संग गावा भवा।

¹परमेस्सर जउन हमार सक्ति अहइ ओकरे बरे आनन्द क गीत गावा।
    याकूब क परमेस्सर क जय जयकार करा।
²संगीत सुरू करा।
    तम्बूरा बजावा।
    वीणा सारंगी स मधुर धुन निकारा।
³नवा चंदा क समय मँ तू पचे नरसिंहा फूँका।
    पूर्णमासी क अवसर पइ तू पचे हम लोगन क त्यौहार क दिन मँ नरसिंहा फूँका।
⁴इस्राएल क लोगन क बरे अइसा ही नेम अहइ।
    इ आदेस परमेस्सर याकूब क दिहस ह।
⁵परमेस्सर यूसुफ क संग एक करार तब किहे रहा
    जब उ मिस्र गवा रहा
जहाँ उ उ रास्ट्र क भाखा नाहीं जानेस रहेन।
⁶परमेस्सर कहत ह, “तोहरे काँधे क बोझा मइँ लइ लिहेउँ ह।
    ओकर हाथन मँ मजदूर क टोपा मँ स छुरावा गवा।
⁷जब तू मुसीबत मँ रह्या तू मदद क गोहार लगाया अउर मइँ तोहका बचाएउँ।
    मइँ तूफानी बदरन मँ छुपा रहेउँ अउर मइँ तू पचन्क जवाब दिहेउँ।
    मइँ तू पचन्क मरिबा क जल क लगे परखेउँ।”

⁸“अरे मोर मनइयो, तू पचे मोर बात सुना।
    अउर मइँ तू पचन्क चेताउनी देब।
    इस्राएल, तू मोका सुन्या।
⁹तू कउनो कउनो बिदेसी देवता क पूजा जिन करा।
    कउनो बिदेसी लोगन क देवता क समन्वा आपन मुँड़ि जिन झुकावा।
¹⁰मइँ, यहोवा तोहार परमेस्सर हउँ।
    मइँ उहइ परमेस्सर हउँ
जउन तू पचन्क मिस्र स बाहेर लिआए रहेउँ।
    तू आपन मुँहना खोला, मइँ ओका भर देब।

¹¹“मुला मोर मनइयन मोर नाहीं सुनेन।
    इस्राएल मोर आग्या नाहीं मानेस।
¹²एह बरे मइँ ओनका ओकरे हठी जिद् पइ छोर दिहेउँ।
    इस्राएली लोग उहइ चिजियन क किहेन जेका उ उत्तिम समझेन।
¹³भला होत इस्राएल क लोग मोर बात सुन लेतेन,
    अउर उ लोग वइसी ही जिन्नगी जिअतेन जइसा मइँ ओहसे चाहत रहेउँ।
¹⁴तब मइँ इस्राएल क दुस्मनन क हाली हराइ देतेउँ।
    अउर मइँ ओन लोगन क सजा देतेउँ जउन इस्राएल क दुःख देतेन।
¹⁵तब यहोवा क दुस्मन डर स थर-थर काँपत हीं।
    अउर उ पचे सदा सर्वदा सजा पइहीं।
¹⁶परमेस्सर आपन चेलन क उत्तम गोहूँ देइ।
    चट्टान ओनका समूर्ण तृप्त होइ तलक सहद देब।”

आसाफ क एक ठु गीत।

¹परमेस्सर देवन क सभा^[a] क बीच निआवाधीस क रूप मँ विराजत ह।
सरगदूत क बीच उ निआव करत ह।
²परमेस्सर कहत ह, “कब तलक तू लोग अनिआव स भरा निआव करब्या?
कब तलक तू लोग दुराचारी लोगन क खास सामर्थ दिखावा?

³“अनाथन अउ कमज़ोर लोगन क रच्छा करा।
    जेनका संग उचित बेउहार नाहीं कीन्ह गवा ह।
    अउर दीन लोगन क अधिकारन क रच्छा करा।
⁴गरीब अउ बेसहारा लोगन क बचावा।
    दुस्टन क चंगुल स ओनका बचाइ ल्या।

⁵“इस्राएली नाहीं जानते कि का कछू घटत बा
    एब बरे उ पचे नाहीं समझतेन।
उ पचे नाहीं जानतेन
    कि बदी करने वाला का करत रहेन।”
⁶मइँ कहेउँ,
    “तू देवतन^[b] अहा।
    तू सर्वोच्च परमेस्सर क पूत अहा।
⁷फिर भी तू मानव जाति क नाईं मरब्या।
    तू पचे वइसेन मरब्या जइसे दूसर नेतन मरि जात हीं।”

⁸हे परमेस्सर, खड़ा ह्वा! धरती पइ निआव लइ आवा,
काहेकि तू सारे ही देसन पइ नियन्त्रन रखत ह।

2 समूएल 9

दाऊद साऊल क परिवार पइ कृपालु अहइ

9 दाऊद पूछेस, “का साऊल क परिवार मँ अब तलक कउनो बचा अहइ? मइँ योनातन क कारण उ मनई पइ दाया करइ चाहत हउँ।”

²हुवाँ साऊल क परिवार स एक सेवक रहा जेकर नाउँ सीबा रहा। दाऊद क सेवकन सीबा क दाऊद क लगे बोलाएन। राजा दाऊद स पूछेस, “का तू सीबा अहा?”

सीबा कहेस, “हाँ मइँ सीबा, आप क सेवक हउँ।”

³राजा पूछेस, “का साऊल क परिवार मँ कउनो बचा ह? मइँ उ मनई पइ परमेस्सर क कृपा देखावइ चाहत हउँ।”

सीबा राजा दाऊद स कहेस, “योनातन क पूत अबहिं तलक जिअत अहइ? उ दुइनउँ गोड़वन स लँगड़ा अहइ।”

⁴राजा सीबा स कहेस, “इ पूत कहाँ अहइ?”

सीबा राजा स कहेस, “उ लोदबार क अम्मीएल क पूत माकीर क घरन मँ अहइ।”

⁵दाऊद न आपन सेवकन क लोदबार क अम्मीएल क पूत माकीर क घरे स योनातन क पूत क लिआवइ क कहेस। ⁶योनातन क पूत मपीबोसेत दाऊद क लगे आवा अउर आपन मूँड़ भुइँया तलक निहुराएस।

दाऊद कहेस, “मपीबोसेत।”

मपीबोसेत कहेस, “हाँ इ मइँ, आप क सेवक हउँ।”

⁷दाऊद मपीबोसेत स कहेस, “डेराअ जिन। मइँ तोहरे बरे दयालु रहब। मइँ इ तोहार बाप योनातन बरे करब। मइँ तोहार पितामह साऊल क सारी भुइँया तोहका देब, अउर तू सदा मेरी मेज पइ खइया क खाइ सकब्या।”

⁸मपीबोसेत दाऊद क समन्वा फुन निहुरा। मपीबोसेत कहेस, “आप अपने सेवक पइ बहोत कृपालु रहेन ह अउर मइँ एक ठु मरा कूकुर स जियादा नाहीं हउँ।”

⁹तब राजा दाऊद साऊल क सेवक सीबा क बोलाएस। दाऊद सीबा स कहेस, “मइँ साऊल अउर ओकरे परिवार क सबहिं चिजियन जउन कछू ओकर अहइ, ओका तोहरे सुआमी क पोता मपीबोसेत क दइ दिहेउँ ह। ¹⁰तू मपीबोसेत बरे भुइँया पइ खेती करब्या। तोहार पूत अउर सेवक मपीबोसेत बरे इ करिहीं। तू फसल कटब्या। तब तोहरे सुआमी क पोता मपीबोसेत क खाइ बरे अपार भोजन होइहीं। किन्तु मपीबोसेत तोहरे सुआमी क पोता मोरी मेज पइ खाइ क हमेसा अधिकारी होइ।”

सीबा क पन्द्रह पूत अउर बीस सेवक रहेन। ¹¹सीबा राजा दाऊद स कहेस, “मइँ आप क सेवक हउँ। मइँ उ सब कछू करब, जउन मोर सुआमी, मोर राजा हुकूम देइहीं।”

एह बरे मपीबोसेत दाऊद क मेज पइ राजा क पूतन मँ स एक क तरह भोजन किहस। ¹²मपीबोसेत क एक नान्ह पूत मीका नाउँ क रहा। सीबा परिवार क सबहिं लोग मपीबोसेत क सेवक होइ गएन। ¹³मपीबोसेत दुइनउँ गोड़न स लँगड़ा रहा। मपीबोसेत यरूसलेम मँ रहत रहा। हर एक दिन मपीबोसेत राजा क मेज पइ भोजन करत रहा।

प्रेरितन क काम 19:1-10

पौलुस इफिसुस मँ

19 अइसा भवा कि जब अपुल्लोस कुरिन्थुस मँ रहा तबहि पौलुस भीतर क पहँटा स जात्रा करत भवा इफिसुस मँ आइ पहोंचा। हुवाँ ओका कछू चेलन मिलेन। ²अउर उ ओनसे कहेस, “का जब तू पचे बिसवास धारण किहे रहा तब पवित्तर आतिमा क ग्रहण किहे रहा?”

उ सबइ जवाब दिहेन, “हम पचे तउ सुना तलक नाहीं कि कउनो पवित्तर आतिमा बाटइ भी!”

³तउ उ कहेस, “तउ तू पचे कइसा बपतिस्मा लिहे अहा!”

उ सबइ कहेन, “य़ूहन्ना क बपतिस्मा।”

⁴फिन पौलुस कहेस, “यूहन्ना क बपतिस्मा तउ मनफिरावइ क बपतिस्मा रहा। उ मनइयन स कहे रहा कि जउन मोरे पाछे आवत अहइ, ओह पइ अरथ अहइ ईसू प बिसवास धरा।”

⁵इ सुनिके उ पचे पर्भू ईसू क नाउँ क बपतिस्मा लइ लिहेन। ⁶फिन जब पौलुस ओन प हाथ धरेस तउ ओन पइ पवित्तर आतिमा उतरि आइ। अउर उ सबइ अलग अलग भाखा बोलइ अउर भविस्सबाणी करइ लागेन। ⁷कुल जोरिके उ पचे कउनो बारह मनई रहेन।

⁸फिन पौलुस यहूदी आराधनालय मँ चला गवा अउर तीन महीना निडर होइके बोलत रहा। उ यहूदी लोगन क साथ बहस करत भवा ओनका परमेस्सर क राज्य क बारे मँ समझावत रहत रहा। ⁹मुला ओहमाँ स कछू लोग बहोत जिद्दी रहेन। उ पचे बिसवास ग्रहण करइ स इन्कार कइ दिहेन अउर मनइयन क समन्वा भला बुरा कहत रहेन। तउ उ आपन चेलन क संग लइके ओनका तजिके चला गवा। अउर तरन्नुस क पाठसाला मँ हर रोज बिचार करत रहा। ¹⁰दुइ बरिस तलक अइसा ही होत रहा। एकर नतीजा इ भवा कि सबइ एसिया क बसइया अउर यहूदियन अउर गैर यहूदियन पर्भू क बचन सुनि लिहेन।

मरकुस 8:34-9:1

³⁴तब उ भीर क चेलन संग निअरे बोलाएस अउर उ ओनसे कहेस, “जदि कउनो मोरे पाछे आवा चाहत ह तउ उ आपन सब कछू तजि दे। ओका आपन क्रूस उठाइ लेइ चाही अउर ओका मोरे पाछे होइ चाही। ³⁵मुला जउन आपन जिन्नगी क बचावा चाहत ह, उ एका खोइ देइ। अउर जउन आपन जिन्नगी मोका अउर सुसमाचार बरे खोई उ एका बचावा चाही। ³⁶अगर कउनो मनई आपन आतिमा खोइ के समूची दुनिया लइ लेत ह, तउ ओसे का फाइदा? ³⁷अइसे कउनो मनई कउनो ठो चीज क बदले आतिमा नाहीं पाइ सकत। ³⁸जदि कउनो व्यभिचार अउर पापी पीढ़ी मँ मोर नाउँ अउर उपदेस क कारण सर्मात ह तउ मनई क पूत जब पवित्तर सरगदूतन क संग आपन परमपिता क महिमा लइ के आई तउ उहउ सर्माइ जाई।”

9 अउर ईसू ओनसे कहेस, “मइँ सबन क सच सच बताउब, जउन हियाँ खड़ा अहइँ, ओहमाँ स कछू परमेस्सर क राज्य सक्ति क संग आवइ स पहिले देखिहीं अउर मरइ क अंजाद न करिहीं।”

Awadhi Bible: Easy-to-Read Version (ERV-AWA)