◀ All Reading Plans / Book of Common Prayer / Ps. 72; Ps. 119:73–96; 2 Samuel 3:22–39; Acts 16:16–24; Mark 6:47–56 (Awadhi Bible: Easy-to-Read Version)

Prev Day

August 2, 2023

Next Day

Use the calendar to view readings from this devotional.

August 2023
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 72

सुलैमान बरे।

¹हे परमेस्सर, राजा क मदद करा ताकि उ भी तोहरी तरह स विवेक स भरिके निआउ करइ।
    राजपुत्र क सहायता करा ताकि उ तोहार धार्मिक भावना क जानि सकइ।
²राजा क सहायता करा कि तोहरे मनवइयन क उ निस्पच्छ निआउ करइ।
    सहायता करा कि उ दीन जनन क संग उचित बेउहार करइ।
³पहाड़न क सबइ बरे सान्ति लिआवइ द्या।
    समूचइ भुइँया बरे सान्ति अउर निआउ लिआवइ द्या।
⁴राजा निर्धन लोगन बरे निआउ स भरा रहइ।
    उ बेसहार लोगन क मदद करइ।
    उ सबइ लोग सजा पावइँ जउन ओनका सतावत होइँ।
⁵मोर इ कामना अहइ कि जब तलक सूरज अकास मँ चमकत ह, अउर चन्द्रमा अकासे मँ अहइ।
    लोग राजा क डर मानइँ।
    मोर आसा अहइ कि लोग ओकर डर सदा मनिहीं।
⁶राजा क मदद, धरती प पड़इवाली बरसात बनावइ मँ करा।
    ओकर मदद करा कि खेतन मँ पड़इवाली बौछार बनइ।
⁷जब तलक उ राजा अहइ, भलाइ फूलइ-फरइ।
    जब तलक चन्द्रमा अहइ, सान्ति बनी रहइ।
⁸ओकर राज्ज समुद्दर स समुद्दर तलक
    अउ परात नदी स लइके सुदूर तलक फइलि जाइ।
⁹रेगिस्ताने क लोग ओकरे अगवा निहुरइँ।
    अउर ओकर सबइ दुस्मन ओकरे अगवा औधे मुँह भहरान भए धरती पइ निहुरइँ।
¹⁰तर्सीस क राजा अउ दूर देसन क राजा ओकरे बरे उपहार लिआवइँ।
    सेबा क राजा अउ सबा क राजा ओका उपहार देइँ।
¹¹सबइ राजा हमरे राजा क अगवा निहुरइँ।
    सबहिं रास्ट्र ओकर सेवा करत रहइँ।
¹²हमार राजा बेसहारन क सहायक अहइ।
    हमार राजा दीनन पइ अउर बेसहारा लोगन क सहारा देत ह।
¹³दीन, बेसहारा लोग ओकरे सहारे अहइँ।
    इ राजा ओनका जिअत रखत ह।
¹⁴इ राजा ओनक ओन लोगन स बचावत ह, जउन क्रूर अहइँ अउर जउन ओनका दुःख देइ चाहत हीं।
    राजा बरे ओन दीनन क जीवन बहोतइ महत्वपूर्ण अहइ।
¹⁵राजा लम्बी उमर क होइ!
    अउर सेबा स सोना प्राप्त करइ।
राजा बरे सदा पराथना करत रहा,
    अउर तू हर दिन ओका असीस द्या।
¹⁶खेत भरपूर फसल देइ। पहाड़ियन फसलन स ढकि जाइँ।
    इ सबइ खेत लबानोन क खेतन स उपजाऊ होइ जाइँ।
सहर लोगन क भीड़ स भरि जाइ,
    जइसेन खेत घनी घासे स भरि जात हीं।
¹⁷राजा क जस सदा बना रहइ।
    लोग ओकरे नाउँ क सुमिरन तब तलक करत रहइँ, जब तलक सूरज चमकत ह।
ओकरे कारण सारी प्रजा धन्य होइ जाइ
    अउ उ पचे सबहिं ओका असीसइँ।

¹⁸यहोवा परमेस्सर क गुण गावा, जउन एस्राएल क परमेस्सर अहइ।
उहइ परमेस्सर अइसे अचरज क कर्म कइ सकत ह।
¹⁹ओकरे महिमा स भरा नाउँ क बड़कई सदा करा।
ओकर महिमा सारी दुनिया मँ भरि जाइ।
आमीन अउ आमिन।

²⁰यिसै क पूत दाऊद क पराथनन समाप्त भइन।

भजन संहिता 119:73-96

योध

⁷³हे यहोवा, तू मोका बनाया ह मोर स्थापना आपन निज हाथन स किह्या ह।
    आपन आग्यन क पढ़इ समुझ मँ तू मोर मदद करा।
⁷⁴हे यहोवा, तोहार भगत मोका लखत हीं, अउर उ पचे खुस अहइँ,
    काहेकि मइँ तोहार बातन पइ भरोसा रखत हउँ।
⁷⁵हे यहोवा, मइँ इ जानत हउँ कि तोहार फइसला हमेसा नीक अउ खरा होत हीं।
    एह बरे इ मोरे बरे उचित रहा कि तू मोका कस्ट दिहा ह।
⁷⁶अब, आपन सच्चे पिरेम स मोका आराम द्या।
    मोका आराम द्या जइसा तू आपन सेवक स किह्या ह।
⁷⁷मोह पइ कृपा करा तइ मइँ जी सकेउँ।
    फुरइ मइँ तोहार उपदेसन मँ आनन्दित अहउँ।
⁷⁸ओन लोगन क जउन सोचा करत हीं कि उ पचे मोसे उत्तिम बाटेन, ओनका लजाइ द्या।
    काहेकि उ पचे मोरे बारे मँ झूठी बातन कहेन ह।
    हे यहोवा, मइँ तोहरे उपदेसन क बिचार किहेउँ ह।
⁷⁹आपन भगतन क मोरे लगे लउटि आवइ द्या।
    अइसे ओन लोगन क मोरे लगे लउटि आवइ द्या, जेनका तोहरी करार क जानकारी अहइ।
⁸⁰मोरे हिरदय क हमेसा तोहार कानून क मानइ द्या,
    ताकि मइँ कबहुँ लज्जित न होबेउँ।

काफ़

⁸¹मइँ तोहार इन्तज़ार करइ मँ कमज़ोर होइ गवा हउँ कि तू मोका बचउब्या।
    मुला यहोवा, मोका तोहार वचन पइ भरोसा बा।
⁸²जउन बातन क तू वचन दिहे रह्या, मइँ ओनकर बाट जोहत रहत हउँ।
    मुला मोर आँखिन दुर्बल होइ गइ अहउँ। तू मोका कब आराम देब्या?
⁸³हिआँ तलक जब मइँ कचड़ा क धुआँ पइ क दाखरस क झुरान मसक जइसा हउँ,
    बूढ़ा अउर झुर्रीदार तबहुँ भी तोहरे कानून क न भूलब।
⁸⁴मइँ कब तलक जिअब?
    हे यहोवा, कब सज़ा देब्या तू अइसे ओन लोगन क जउन मोहका सतावत हीं?
⁸⁵कछू अहंकारी लोग आपन फंदन स मोह पइ वार किहे रहेन।
    इ तोहरी सीखन क खिलाफ अहइ।
⁸⁶हे यहोवा, सब लोग तोहरी आग्यन क भरोसे कइ सकत हीं।
    उ पचे मोका बिना कउनो कारण सतावत रहत हीं। मोर मदद करा।
⁸⁷ओन सबइ लोग धरती स करीब करीब मोका बर्बाद कइ दिहन ह।
    तउ प भी मइँ तोहरे उपदेसन क नाहीं तजेउँ।
⁸⁸हे यहोवा, आपन बिस्सासी पिरेम क मोह पइ परगट करा।
    अउर मोका जिन्नगी द्या।
    तउ मइँ तोहार करार क पालन कइ सकेउँ।

लामेध

⁸⁹हे यहोवा, तोहरे वचन सरग मँ, उ सबइ सदा रहत हीं।
⁹⁰तू हमेसा हमेसा बरे बिस्सासी अहा।
    तू ही धरती ओकरे जगह पइ रच्या अउर इ हमेसा स हिआँ रहत रह्या।
⁹¹तोहरे फइसलन क कारण ही अब तलक सबहिं वस्तु मौजूद अहइँ।
    काहेकि सबहिं चिजियन तोहार सेवक अहइँ।
⁹²अगर तोहार सीखन मीत जइसी नाहीं होतिन,
    तउ मोर संकट मोका बर्बाद कइ डउतेन।
⁹³हे यहोवा, तोहरे आदेसन क मइँ कबहुँ नाहीं बिसरब।
    काहेकि उ सबइ ही मोका जिअत राखत हीं।
⁹⁴हे यहोवा, मइँ तउ तोहार अहउँ, मोर रच्छा करा।
    काहेकि तोहरे उपदेसन पइ चलइ क मइँ कठिन जतन करत हउँ।
⁹⁵दुट्ठ जन मोका विनास करइ क इन्तज़ार करत हीं,
    मुला मइँ तोहार करार क समुझइ बरे ओहे पइ विचार करत हउँ।
⁹⁶सब कछू क सीमा अहइ,
    किन्तु तोहरी आग्यन आपन छेत्र मँ असीमित अहइँ।

2 समूएल 3:22-39

अब्नेर क मउत

²²योआब अउ दाऊद क अधिकारी जुद्ध स लउटिके आएन। ओनके लगे बहोत स कीमती सामान रहेन जउन उ पचे दुस्मन स लिआए रहेन। दाऊद अब्नेर क सान्तिपूर्वक जाइ दिहस। एह बरे अब्नेर दाऊद क संग हेब्रोन मँ नाहीं रहा। ²³योआब अउर ओकर सारी फउज हेब्रोन पहोंची। फउज योआब स कहेस, “नेर क पूत अब्नेर राजा दाऊद क लगे आवा रहा अउर दाऊद ओका सान्तिपूर्वक जाइ दिहस।”

²⁴योआब राजा क लगे आवा अउर कहेस, “इ आप का किहेन? अब्नेर आप क लगे आवा अउर आप ओका बिना चोट पहोंचाए जाइ दिहन। काहे? ²⁵आप नेर क पूत अब्नेर क जानत हीं। उ आप क संग चाल चलइ आवा। उ ओन सबहिं बातन क पता करइ आवा रहा जउन आप करत अहइँ।”

²⁶योआब दाऊद क छोड़ेस अउ सीरा क कुआँ पइ अब्नेर क लगे दूत पठएस। दूत अब्नेर क वापिस लिआएन। किन्तु दाऊद क एकर पता न चला। ²⁷जब अब्नेर हेब्रोन आवा तउ योआब, प्रवेस दुआर क एक किनारे ओका लइ गवा अउर तब योआब अब्नेर क पेट मँ प्रहार किहस अउर अब्नेर मर गवा। पिछले दिनन मँ अब्नेर योआब क भाई असाहेल क मारे रहा। एह बरे अब योआब अब्नेर क मार डाएस।

दाऊद अब्नेर बरे रोवत ह

²⁸पाछे दाऊद इ खबर सुनेस। दाऊद कहेस, “मइँ अउर मोर राज्ज नेर क पूत अब्नेर क मउत बरे निरपराध अहइ। यहोवा एका जानत ह। ²⁹योआब अउर ओकर परिवार ऐकर जिम्मेदार अहइ, अउर ओकरे पूरा परिवार क दोखी ठेहराइ जाइ। मोका इ आसा अहइ कि ओकरे परिवार मँ कछू लोग ज़ख्मी होइ अउर कछू भंयकर चर्मरोग स पीड़ित होइ या कछू लोग लंगड़ा लूला होइ, कछू जुद्ध मँ मारा जाइ अउर कछू बगैर भोजन क रही।”

³⁰योआब अउर ओकर भाई अबीसै अब्नेर क मार डाएस काहेकि अब्नेर ओकरे भाई असाहेल क गिबोन क लड़ाई मँ मारे रहा।

^31-32दाऊद योआब क संग सबहिं मनइयन स कहेस, “अपने ओढ़नन क फार डावा अउर सोक वस्त्र पहिरा। अब्नेर बरे रोवा।” उ पचे अब्नेर क हेब्रोन मँ दफनाएन। दाऊद अन्त्येस्टि मँ गवा। राजा दाऊद अउर सबहिं लोग अब्नेर क कब्र पइ रोएन।

³³दाऊद अब्नेर बरे आपन सोक-गीत गाएस:

“का अब्नेर कउनो मूरख अपराधी क तरह मरब रहा?
³⁴ अब्नेर तोहार हाथ बँधे नाहीं रहेन।
तोहार गोड़ जंजीरन मँ कसा नाहीं रहेन।
नाहीं अब्नेर, तोहका दुस्टन मारेन।”

तब सबहिं लोग फुन अब्नेर बरे रोएन। ³⁵सबहिं लोग दाऊद क दिन रहत भोजन करइ बरे प्रेरित करइ आएन। किन्तु दाऊद खास प्रतिग्या किहेस। उ कहेस “परमेस्सर मोका दण्ड देइ अउर मोरे कस्टन क बढ़ावइ जदि मइँ सूरज बूड़इ क पहिले रोटी या कउनो दूसर भोजन करउँ।” ³⁶जउन कछू भवा सबहिं लोग लखेन अउर उ पचे ओन सबहिं कामन स सहमत भएन जउन राजा दाऊद करत रहा। ³⁷उ दिन यहूदा क लोगन अउर सबहिं इस्राएलियन समुझ लिहन कि राजा दाऊद नेर क पूत अब्नेर क मारइ क आदेस नाहीं दिहे रहा ह।

³⁸राजा दाऊद अपने मनइयन स कहेस, “तू लोग जानत अहा कि आज इस्राएल मँ एक बहोत महत्वपूर्ण नेता मरि गवा ह। ³⁹इ सबइ उहइ दिन भवा जउने दिन मोर अभिसेक राजा क रूप मँ भवा रहा। किन्तु सरूयाह क पूत मोर बरे बहोत जियादा मज़बूत अहइ। यहोवा बुरा व्यक्ति क ओकरे बुरा कामन क अनुसार ओका सज़ा दइ!”

प्रेरितन क काम 16:16-24

पौलुस अउर सीलास क बंदी बनावा जाब

¹⁶फिन अइसा भवा कि जब हम पचे पराथना ठउर कइँति जात रहे, हम पचन क एक दासी मिली जेहमाँ एक सगुन बतावइ वाली आतिमा क सवारी रहीं। उ मनइयन क भाग्ग बताइके आपन मालिकन क ढेर धन कमाइके देत रही। ¹⁷उ हमरे पौलुस क पाछे इ चिचियात भइ होइ गइ “इ पचे परम परमेस्सर क सेवक अहइँ। इ पचे तोहका मुक्ति क रस्ता क संदेसा सुनावत अहइँ।” ¹⁸उ बहोत दिनाँ तलक अइसा ही करत रहाइ तउ पौलुस परेसान होइ गवा। उ मुड़िके उ आतिमा स कहेस, “मइँ ईसू मसीह क नाउँ प तोहका आदेस देत हउँ, ‘इ बिटिया मँ स बाहेर निकरि आवा!’” तउ उ फउरन ओहमाँ स बाहेर निकरि गइ।

¹⁹फिन ओकर स्वामी लोगन जब लखेन कि ओनकइ कमाई क आसा स मन टूटि गवा अहइ तउ उ पचे पौलुस अउर सिलास क धइ दहबोचेन अउर ओऩका घेर्रावत भए बजार क बीच नगर क अधिकारियन क समन्वा लइ गएन। ²⁰फिन न्यायकर्ता क लगे ओनका लइ जाइके बोलेन, “इ सबइ यहूदियन अहइँ अउर हमरे सहर मँ गड़बड़ी फइलावत बाटेन। ²¹इ पचे अइसी रीति रिवाज क दोहाई देत हीं जेनका अपनाउब या जेन पइ चलब हम रोमी मनइयन बरे निआव क मुताबिक नाहीं बा।”

²²भीड़ भी खिलाफत मँ मनइयन क संग होइके हमला करइ आइ। दण्डनायक भी ओनकइ ओढ़ना फाड़िके उतरवाइ दिहेन अउर आग्या दिहेन कि ओनकइ कुटुम्मस होइ। ²³ओन पइ बहोत मारि पड़ चुकइ क पाछे उ पचे ओनका जेल मँ डाइ दिहेन अउर जेल क अधिकारि क आदेस दिहेन कि ओनके बरे कर्रा पहरा बइठाइ दीन्ह जाइ। ²⁴अइसा आदेस पाइके उ ओनका जेल क भितरी खोली मँ धाँध दिहेन। उ ओनकइ गोड़वा मँ कठघरा जड़ दिहेन।

मरकुस 6:47-56

⁴⁷जब सांझ भइ, नाउ झिलिया क मँझधर मँ रही अउर उ भुइयाँ प अकेल्ले रहा। ⁴⁸उ ओनका नाउ खेवत क मुसीबते मँ देखेस, काहेकि हवा ओनके खिलाफ बहत रही। लगभग तीन स छ बजे क समइ भिंसारेउ ओनके निअरे झिलिया प चलत आवा। जइसे हि ओनके निअरे स जाइ क भवा, ⁴⁹उ पचे ओका पानी प चलत भवा निहारेन। उ सब अंजाद लगाएन कि कउनो बड़वार दुस्ट आतिमा अहइ। ऍसे उ पचे डेरात भए चिचिआनेन। ⁵⁰मुला उ पचे ओका निहारेन अउर उ सब ससाइ गएन। तुरंतहि उ ओनसे बोला, “हिम्मत रखा। इ मइँ हउँ जिन डेराअ।” ⁵¹फिन उ ओनके संग नाउ प चढ़ि गवा, तब आँधी पटाइ गइ। ऍसे उ सबइ अचरज मँ पड़ि गएन। ⁵²उ पचे रोटियन क अद्भुत कारज क बारे मँ समझ पाएन नाहीं। ओनके दिमाग कठोर होइ गवा।

ईसू बहुतेन बेरमियन क नीक किहेस

(मत्ती 14:34-36)

⁵³जब उ सब झील पार कइ लिहन तउ गन्नेसरत क घाटे प आएन अउर नाउ क बाँध लिहन। ⁵⁴जबहिं उ पचे नाउ क छाँड़ि क उतर आएन, मनइयन ईसू क पहिचान लिहन। ⁵⁵उ पचे समूचे पहंटा मँ भागत फिरेन अउर बेरमियन क बिछउना प जहाँ कहूँ उ पचे सुनेन कि ईसू हुवाँ बा, लादि क लइ जाइ लागेन। ⁵⁶जहाँ कहूँ उ गाउँ मँ कस्बन मँ या खेतन मँ जात रहा, उ पचे आपन बेरमियन क हाटन मँ बइठाइ देतेन अउर उ पचे ईसू स बिनती करतेन कि उ आपन ओढ़ना क एक हींसा छुअइ दे। अउर सबइ जउन ऍका छुएन नीक होइ गएन।

Awadhi Bible: Easy-to-Read Version (ERV-AWA)