◀ All Reading Plans / Book of Common Prayer / Ps. 8 47; Ps. 24 96; Ezek. 1:1–14 24–28b; Heb. 2:5–18; Matt. 28:16–20 (Awadhi Bible: Easy-to-Read Version)

Prev Day

May 18, 2023

Next Day

Use the calendar to view readings from this devotional.

May 2023
Su	Mo	Tu	We	Th	Fr	Sa
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 8

गित्तीथ क संगत पइ संगीत निर्देसक बरे दाऊद क एक ठु पद।

¹हे यहोवा, हमार सुआमी, तोहार नाउँ सारी भुइँया पइ बहोतइ अद्भुत बाटइ।
तोहार नाउँ सरगे मँ हर कइँती तोहका बड़कइ देत बाटइ।

²लरिकन अउ नान्ह गदेलन क मुँहन स, तोहरी बड़कइ क गीत गावा जात हीं।
तू आपन दुस्मनन क चुप करावइ मँ अइसा करत ह।

³हे यहोवा, जब मोर निगाह अकासे पइ पड़त ह, जेका तू आपन हाथे स रच्या ह।
    अउर जब मइँ चाँद तारन क लखत हउँ जउन तोहार रचना बाटइ, तउ मइँ अचम्भा स भरि जात हउँ।
⁴मनइयन तोहरे बरे काहे ऍतना महत्वपूर्ण होइ गएन?
    तू ओनका काहे बरे सुमिरत अहा?
मनई क पूत तोहरे बरे काहे महत्वपूर्ण बाटइ?
    काहे तू ओन पइ धियान तलक देत अहा?

⁵मुला तोहरे बरे मनई महत्वपूर्ण अहइ!
    तू मनई क देवता क प्रतिरूप बनाया ह, अउ ओनके मूँड़े पइ महिमा अउ सम्मान क मुकुट धरे अहा।
⁶तू आपन सृस्टि क जउन कछू भी रच्या ह
    मनइयन क ओकर हकदार बनाया ह।
⁷मनई भेड़िन पइ, गोरू धने पइ अउ जंगल क सबहिं हिंसक जन्तुअन पइ राज्ज करत ह।
⁸उ अकासे मँ पंछियन पइ
    अउ समुद्दर मँ तैरत भए जलचरन पइ राज्ज करत ह।
⁹हे यहोवा, हमार सुआमी, सारी धरती पइ तोहार नाउँ बहोतइ अद्भुत अहइ।

भजन संहिता 47

संगीत निर्देसक बरे कोरह परिवार क एक ठू भजन।

¹हे सबहिं लोगो, ताली बजावा,
    अउर आनन्द मँ भरिके परमेस्सर क जय जयकार करा!
²महिमा महिम यहोवा भय अउर विस्मय स भरा बाटइ।
    सारी भुइँया क उहइ महान राजा अहइ।
³उ हुकूम दिहेस कि रास्ट्रन हमार नियंत्रन मँ होब
    ऍह बरे हम पचन्क ओनका हराइ दिहा ह।
⁴हमार धरती उ हमरे बरे चुनेस ह।
    उ याकूब बरे अद्भुत धरती चुनेस जेहसे उ पिरेम करत ह।

⁵यहोवा परमेस्सर तुरही क ध्वनि
    अउर जुद्ध क नरसिंहे क स्वर क संग ऊपर उठत ह।
⁶परमेस्सर क गुणगान करत भए गुण गावा।
    हमरे राजा क बड़कई क गीत गावा।
    अउर ओकर जस क गीत गावा।
⁷परमेस्सर सारी भुइँया क राजा अहइ।
    ओकर बड़कई क गीत गावा।
⁸परमेस्सर आपन पवित्तर सिंहासन पइ बिराजत ह।
    परमेस्सर सबहिं रास्ट्रन पइ हुकूमत करत ह।
⁹रास्ट्रन क नेता, इबाहीम क परमेस्सर क लोगन क संग मिलत हीं।
    सबहिं रास्ट्रन क नेता,
परमेस्सर क अहइँ।
    परमेस्सर ओन सबन क ऊपर अहइ।

भजन संहिता 24

दाऊद क एक ठु पद।

¹धरती अउ ओह प क सब चिजियन यहोवा क अहइँ;
संसार अउ हर कउनो जउन एहमाँ रहत हीं ओकर अहइँ।
²यहोवा इ धरती क जल पइ रचे अहइ।
उ एका जल क धारन पइ बनाएस।

³यहोवा क पहाड़े क मन्दिर मँ कउन जाइ सकत ह?
    कउन यहोवा क पवित्तर ठउर मँ खड़ा होइ सकत अउर आराधना कइ सकत ह?
⁴अइसा मनई जउन हाथन क साफ किहे ह,
    अइसा मनई जउन पवित्तर जीवन क अगुवाइ करत ह,
अइसा मनई जउन मोरे नाउँ क प्रयोग कइके दूसर बरे गलत नाहीं किहे ह,
    अउर अइसा मनई जउन झूठ न बोलेस, अउ न ही झूठा वचन दिहेस ह।
    बस अइसेन मनई ही हुआँ आराधना कइ सकत हीं।

⁵सज्जन तउ चाहत हीं यहोवा सब क भला करइ।
उ पचे सज्जन परमेस्सर स जउन ओनकर उद्धारक अहइ, नेक चाहत हीं।
⁶उ पचे सज्जन परमेस्सर क अनुसरण क जतन करत हीं।
उ पचे याकूब क परमेस्सर क लगे मदद पावइ जात हीं।

⁷फाटकन, आपन मूँड़ी ऊँची करा!
    सनातन दुआरन, खुलि जा!
    प्रतापी राजा भितरे आई।
⁸इ प्रतापी राजा कउन अहइ?
    यहोवा ही उ राजा अहइ, उहइ सबल सैनिक अहइ,
    यहोवा ही उ राजा अहइ, उहइ जुद्ध नायक बा।

⁹फाटकन, आपन, मूँड़ी ऊँची करा!
    सनातन दुआरन, खुलि जा!
    प्रतापी राजा भितरे आई।
¹⁰उ प्रतापी राजा कउन अहइ? यहोवा सर्वसक्तिमान ही उ राजा अहइ।
    उ प्रतापी राजा उहइ अहइ।

भजन संहिता 96

¹यहोवा बरे एक ठु गीत गावा।
    हे समस्त ब्रह्माण्ड यहोवा बरे गीत गावा।
²यहोवा बरे गावा, ओकरे नाउँ क धन्न कहा।
    हर दिन इ ओकरे उद्धार क बारे मँ सुसमाचार क सुनावा।
³दूसर रास्ट्रन क बतावा कि यहोवा फुरइ अद्भुत बाटइ।
    सब कतहूँ क लोगन मँ ओन अद्भुत बातन क जेनका उ करत ह बखान करा।
⁴यहोवा महान बा अउर बड़कई क जोग बा।
    उ कउनो “देवतन” स जियादा स्रद्धालु बा।
⁵दूसर रास्ट्रन क सबहिं “देवतन” सिरिफ मूर्तियन अहइँ,
    मुला यहोवा अकासन क रचेस।
⁶ओकरे समन्वा सुन्दर महिमा दमकत बा।
    परमेस्सर क पवित्तर मन्दिर सामरथ अउ सुरन्दरता अहइँ।
⁷हे वंसो, अउर रास्ट्रो,
    यहोवा बरे महिमा अउर बड़कई क गीत गावा।
⁸यहोवा क नाउँ क गुणगान करा।
    आपन भेंटन उठावा अउ मन्दिर मँ जा।
⁹    यहोवा क ओकर भव्य, मन्दिर मँ उपासना करा।
अरे ओ धरती क मनइयो, यहोवा क उपासना करा।
¹⁰    रास्ट्रन क जानइ द्या कि यहोवा राजा अहइ।
निहचय ही उ उहइ अहइ जउन जगत क स्थिर अउर अखण्ड बनाएस ह।
    यहोवा मनइयन पइ निआउ स सासन करी।
¹¹अरे अकास, खुस ह्वा, हे धरती, आनन्द मनावा।
    हे सागर, अउर ओहमाँ क सबइ चिजियन क आनन्द स ललकारा।
¹²अरे ओ खेतो अउर ओहमाँ उगइवाली हर वस्तु आनन्द स भरपूर होइ जा।
    हे जंगल क बृच्छो गावा अउर आनन्द मनावा।
¹³आनन्द स भरपूर होइ जा
    काहेकि यहोवा आवत अहइ।
यहोवा जगत क सासन करइ आवत अहइ,
    उ खरेपन स निआउ करी।

यहेजकेल 1:1-14

प्रस्तावना

1 ^1-3मइँ बूजी क पूत याजक यहेजकेल हउँ। मइँ देस स निकारा गवा रहेउँ। मइँ उ समइ बाबुल मँ कबार नदी पइ रहेउँ जब मोरे बरे सरग खुला अउर मइँ परमेस्सर क दर्सन किहेउँ। इ तीसवे बरिस क चउथे महीने जुलाई क पाँचवा दिन रहा। राजा यहोयाकीम क देस स निकारे गए पँचएँ बरिस अउर महीना क पँचए दिन यहेजकेल क यहोवा क सँदेसा मिला। उ ठउरे पइ ओकरे ऊपर यहोवा क सक्ति आइ।

यहोवा क रथ अउर ओकर सिंहासन

⁴मइँ (यहेजकेल) एक आँधी उत्तर स आवत लखेउँ। इ एक बिसाल बादर रहा अउर ओहमाँ स आगी चमकत रही। एकरे चारिहुँ कइँती प्रकास जगमगात रहा। इ आगी मँ चमकत तपत धातु क तरह देखात रहा। ⁵बादरे क भीतर चार प्राणी रहेन। उ पचे मनइयन क तरह देखात रहेन। ⁶किन्तु हर एक प्राणी क चार मुँह अउर चार पखना रहेन। ⁷ओनकर गोड़ सोझ रहेन। ओनकर गोड़ बछवा क गोड़ जइसे देखात रहेन अउर उ पचे झलकत भए पीतर क तरह चमकत रहेन। ⁸ओनकर पखना क खाले मनई क हाथ रहेन। हुआँ चार प्राणी रहेन अउर हर एक प्राणी क चार मुँह अउर चार पखना रहेन। ⁹ओनकर पखना एक दूसर क छुअत रहेन। जब प्राणियन चलत रहेन तउ उ पचे मुड़त नाहीं रहेन। उ सबइ उ दिसा मँ चलत रहेन जेका लखत रहेन।

¹⁰हर एक प्राणी क चार मुँह रहेन। समन्वा कइँती ओनकर चेहरा मनई क रहा। दाई कइँती सेर क चेहरा रहा। बाई कइँती बर्धा क चेहरा रहा अउर पाछे कइँती उकाब क चेहरा रहा। ¹¹प्राणियन क पखना ओनके ऊपर फइले भए रहेन। उ सबइ दुइनउँ पखनन स अपने लगे क प्राणी क दुइ पखनन क छुए भए रहेन अउ दुइ क आपन तन क ढाँपइ बरे उपयोग मँ लिहे रहेन। ¹²उ सबइ प्राणी जब चलत रहेन तउ मुड़त नाहीं रहेन। उ सबइ उ दिसा मँ चलत रहेन जेका उ पचे लखत रहेन। उ पचे हुँवइ जात रहेन जहाँ आतिमा ओनका लइ जात रही। ¹³हर एक प्राणी इ तरह देखात रहा।

ओन प्राणियन क बीच क जगह मँ बरत भइ कोयला क आगी सा देखात रही। इ आगी नान्ह-नान्ह मसालन क तरह ओन प्राणियन क बीच चलत रही। आगी बड़के प्रकास क संग चमकत रही अउर बिजुरी क तरह कौंधत रही। ¹⁴उ सबइ प्राणी बिजुरी क तरह तेजी स पाछे अउ अगवा कइँती दउड़त रहेन।

यहेजकेल 1:24-28

²⁴जब कबहुँ उ सबइ प्राणी चलत रहेन, ओनकर पखना बड़की तेज अवाज करत रहेन। मइँ उ अवाज क सुनेस। इ समुद्दर क गर्जना जइसी पइदा होत रही। उ सर्वसक्तीमान परमेस्सर क निचके स निकरइ क वाणी क नाई रही। उ कउनो फउजे क जन-समूह क सोर क तरह रही। जब उ प्राणी चलब बन्द करत रहेन तउ उ पचे आपन पखनन क आपन बगल मँ नीचे कइ लेत रहेन।

²⁵ओन प्राणियन चलब बन्द किहेन अउर आपन पखनन क समेटेन अउर हुवाँ फुन भीसन अवाज भइ। उ अवाज उ खोरे स भइ जउन मूँड़ि क ऊपर रहा। ²⁶उ खोरे क ऊपर हुवाँ कछू रहा जउन एक सिहांसन क तरह देखात रहा। इ नीलमणि क तरह नीला रहा। हुवाँ कउनो रहा जउन उ सिहांसने पइ बइठा भवा एक ठु मनई क तरह देखात रहा। ²⁷अउर मइँ ओका ओकर कमर क ऊपर लखेउँ। वह तप्त धातु की तरहा दिखा, मानो ओकरे चारिहुँ कइँती आगी होइ। अउर नीचे स कमर तलक उ आगी क नाईं दिखावइ देत रहा। अउर ओकरे चारिहुँ कइँती प्रकास जगमग करत रही। ²⁸ओकरे चारिहुँ कइँती चमकत प्रकास बादरन मँ इन्दर धनुस जइसा रहा। इ यहोवा क महिमा जइसा देखात रहा। जइसेन ही मइँ उ लखेउँ, मइँ धरती पइ भहराइ गएउँ। मइँ धरती पइ आपन माथा टेकेउँ। तब मइँ एक अवाज सम्बोधित करत भए सुनेउँ।

इब्रनियन 2:5-18

उद्धारकर्ता मसीह क मानुस देह धारण

⁵ओह भावी संसार क, जेकर हम चरचा करत अही उ सरगदूतन क अधीन नाहीं किहेस, ⁶बल्कि पवित्तर सास्तरन मँ कउनउ स्थान पर कउनो इ साच्छी दिहे अहइः

“परमेस्सर का बा मनई जउन
    तू ओकर सुध लेत अहा?
का अहइ हर मनई क पूत
    जेकर बरे अहा चितिंत तू?
⁷तू सरगदूतन स किंचित ओका कम कीहा
    तनिक स समइ क रख दिहा ओका सिर महिमा अउर सम्मान क राजमुकुट
⁸अउर ओकरे चरनन तरे ओकरे अधीनता मँ रख दिहा सभन कछू।” ^(A)

सब कछू क ओकरे अधीन रखत भए परमेस्सर तउ कछू भी अइसेन नाही छोड़ेस जउन्न ओकरे अधीन न होइ। फिन भी आजकाल हम हर एक चीज क ओकरे अधीन नाहीं देखत हई। ⁹मुला हम इ देखित हई कि उ ईसू जेका तनिक समइ क बरे सरगदूतन स नीचे कइ दीन्ह गवा रहा, अब ओका महिमा अउर सम्मान क मुकुट पहिनावा गवा बा काहेकि उ मउत क यातना झेले रहा। जे परमेस्सर क अनुग्रह क कारण उ हर एक लोग क बरे मउत क अनुभव किहेस।

¹⁰परमेस्सर एक ही बाटइ जउन सबहिं चीजन क बनएस। अउर सबहिं चीजन ओकरी महिमा बरे अहइँ। कइयउ बेटवन क महिमा प्रदान करत भवा उ परमेस्सर क बरे जेकर द्वारा अउर जेकरे बरे सब क अस्तित्व बना भवा बा, तउ उ ईसू क पूर्ण बनाएस। ओकरे बेटवन क इ सोभा देत ह कि उ ओनके छुटकारा क विधाता क जातनन क द्वारा पूरा सिद्ध करइ।

¹¹उ दुइनउँ ही-उ (ईसू) जउन मनई क पवित्तर बनावत ह अउर उ पचे जउन पवित्र बनावा जात हीं, एक्कई परिवार क अहइँ। इहीं बरे उ (ईसू) ओन्हन क भाइयन तथा बहिनियन कहइ मँ लज्जा नाहीं करत ह। ¹²ईसू कहेस,

“आपन भाइयन मँ नाउँ क उद्घोस तोहरे मइँ करबइ
सभा क बीच सबके सामने प्रसंसा गीत तोहरे गउबइ मइँ।” ^(B)

¹³अउर फिन,

“मइँ ओकर बिसवास करबइ।” ^(C)

अउर फिन उ कहत ह:

“मइँ इहाँ हउँ, अउर उ पचे सन्तान जउन हइन साथे मोरे हई दीन्ह जेनका मोरे परमेस्सर।” ^(D)

¹⁴काहेकि संतान माँस अउर लहू स युक्त रही इही बरे ऊहउ ओनकइ इ मानुसता मँ सहभागी होइ गवा ताकि अपने मउत क जरिये उ ओका मतलब सइतान क खतम कइ सकइ जेकरे लगे मारइ का सक्ती बाटइ। ¹⁵अउर ओन्हन क मुक्त कइ लेइ जेकर सम्पूर्ण जीवन मउत क बरे आपने भय क कारण दासता मँ बीता बा। ¹⁶काहेकि उ निस्चित बा कि उ सरगदूतन नाहीं बल्कि इब्राहीम क बंसजन क सहायता भी करत अहइ। ¹⁷इही बरे उ सब तरह स ओकरे भाइयन क जइसा बनावा गवा ताकि उ परमेस्सर क सेवा मँ दयालु अउर बिसवासी महाजायक बनि सकइ। अउर लोगन क ओनके पापन क छमा देवॉवइ क बरे बलि दइ सकइ। ¹⁸काहेकि उॅ खुदइ ओह समइ, जब ओकर परीच्छा लीन्ह जात रही खूबइ जातना भोगे अहइ। इही बरे जेकर परीच्छा लीन्ह जात बाटइ उ ओकर सहायता करइ मँ समर्थ बा।

मत्ती 28:16-20

ईसू क आपन चेलन स बातचीत

(मरकुस 16:14-18; लूका 24:36-49; यूहन्ना 20:19-23; प्रेरितन 1:6-8)

¹⁶फिन ग्यारहु चेलन गलील मँ उ पहाड़ी प पहुँचेन जहाँ जाइके बरे ईसू कहे रहा। ¹⁷जब उ पचे ईसू के निहारेन तउ ओकर आराधना करेन। जदपि कछूक मनवा मँ सक रहा। ¹⁸फिन ईसू ओनके लगे जाइके कहेस, “सरगे मँ अउ धरती प सबइ हक मोका दइ दीन्ह गवा अहइँ। ¹⁹तउ, जा अउर सब देसन क मनइयन क मोर चेलन बनावा। तोहका इ काम परमपिता क नाउँ मँ, पूत क नाउँ म अउर पवित्तर आतिमा क नाउँ मँ, ओनका बपतिस्मा दइके पूर करब अहइ। ²⁰उ सबइ हुकुम जउन मइँ तोहका दिहे हउँ, ओनका ओन प चलब सिखावा। अउर याद राखा इ सृस्टि क अंत ताईं मइँ हमेसा तोहरे संग रहब।”

Awadhi Bible: Easy-to-Read Version (ERV-AWA)