Book of Common Prayer

⁶ परमेस्सर निआउ क जज अहइ
    अकास ओकरी धार्मिक भावना क घोसणा करत ह।

⁷ परमेस्सर कहत ह, “सुना मोरे भक्तो!
    इस्राएल क लोगो, मइँ तू पचन्क खिलाफ साच्छी देबउँ।
    मइँ परमेस्सर हउँ, तोहार परमेस्सर।
⁸ मोका तोहरी बलियन स सिकाइत नाहीं।
    इस्राएल क लोगो, तू पचे सदा होम बलियन मोका चढ़ावत रहा।
    तू पचे हर रोज अर्पित करा।
⁹ मइँ तोहरे घरे स कउनो बर्धा नाहीं लेब।
    मइँ तोहरे गोरू घरे स कउनो बोकरा नाहीं लेब।
¹⁰ मोका तोहरे ओन गोरुअन क जरूरत नाहीं।
    मइँ ही तउ वन क सबहिं गोरुअन क सुआमी हउँ।
    हजारन पहाड़न पइ जउन गोरू विचरत हीं, ओन सबन क मइँ सुआमी हउँ।
¹¹ जिन चिरइयन क बसेरा सब स ऊँच पहाड़ पइ अहइ, ओन सबन क मइँ जानत हउँ।
    अचलन पइ जउन सचल अहइँ उ सबइ सब मोरे ही अहइँ।
¹² मइँ भुखान नाहीं हउँ, अगर मइँ भूखा होतउँ, तउ भी तू पचन्स मोका भोजन नाहीं माँगइ क पड़त।
    मइँ जगत क सुआमी हउँ अउर ओकर भी हर चीज जउन इ जगत मँ बाटइ।
¹³ मइँ बर्धा क गोस नाहीं खावा करत हउँ।
    बोकरन क खून नाहीं पिअत हउँ।”

¹⁴ फुरइ जउन बलि क परमेस्सर क प्रसन्न करत ह धन्यवाद क भेंटन होइ
    अउर उ प्रतिग्या क पूरा करत ह जउन तू सर्वोच्च परमेस्सर क समन्वा किहे रह्या।
¹⁵ परमेस्सर कहत ह, “मोका पुकारा जब तू मुसीबत मँ रह्या,
    मइँ तू पचन्क खतरा स निकारब, अउर तब तू पचे मोर मान कइ सकब्या।”

¹⁶ दुट्ठ लोगन स परमेस्सर कहत ह,
    “तू पचे मोर व्यवस्था क बातन करत अहा,
    तू पचे मोरे करार क भी बातन करत अहा।
¹⁷ फुन जब मइँ तू पचन्न्क सुधारत हउँ, तब भला तू पचे मोसे बैर काहे करत अहा?।
    तू पचे ओन बातन क उपेच्छा काहे करत अहा जेनका मइँ तू पचन्क बतावत हउँ?
¹⁸ तू पचे चोर क लखिके ओसे मिलइ बरे दौड़ जात अहा।
    तू पचे ओनके संग बिछउना मँ कूद पड़त अहा जउन बिभिचार करत हीं।
¹⁹ तू पचे बुरा वचन अउ झूठ बोलत अहा।
²⁰ तू पचे दूसर लोगन क हिआँ तलक कि
    आपन भाइयन क निन्दा करत अहा।
²¹ तू पचे बुरा करम करत अहा, अउर तू सोचत अहा मोका चुप रहइ चाही।
    तू कछू नाहीं कहत अहा अउर सोचत अहा कि मोका चुप रहइ चाही।
लखा, मइँ चुप नाहीं रहब, तोहका स्पस्ट कइ देब।
    तोहरे ही मुँहे पइ तोहार दोख बताउब।
²² तू लोग परमेस्सर क बिसरि गवा अहा।
    एकरे पहिले कि मइँ तोहका चीर डावउँ,
अच्छी तरह समुझ ल्या।
    जब वइसा होइ कउनो भी मनई तू पचन्क बचाइ नाहीं पाई।
²³ अगर कउनो मनई स्तुति अउ धन्यवादन क बलि चढ़ावइ, तउ उ सचमुच मोर मान करी।
    अगर कउनो मनई आपन जिन्नगी बदल डावइ तउ ओका मइँ परमेस्सर क सक्ति देखाँउब जउन बचावत हीं।”

⁶ उ सबइ दुर्जन साँझ क होत ही सहर मँ घुसि आवत हीं।
    उ सबइ लोग गुर्रात कूकुरन स
    सहर क बीच मँ घूमत रहत हीं।
⁷ तू ओनकर धमकियन अउर अपमानन क सुना।
    उ पचे अइसी क्रूर बातन कहा करत ही।
    उ सबइ इ बात क चिंता तलक नाहीं करतेन कि ओनकर कउन सुनत ह।

⁸ हे यहोवा, तू ओनकर उपहास कइके
    ओन सबहिं लोगन क मजाक बनाइ द्या।
⁹ हे परमेस्सर, तू मोर सक्ति अहा, मइँ तोहार बाट जोहत हउँ।
    हे परमेस्सर, तू ऊँचे पहाड़न पइ मोर सुरच्छा क ठउर अहा।
¹⁰ परमेस्सर मोहसे पिरेम करत ह, अउर उ जीतइ मँ मोर सहायक होइ।
    उ मोरे दुस्मनन क हरावइ मँ मोर मदद करी।
¹¹ हे परमेस्सर, बस ओनका जिन मार डावा, नाहीं तउ होइ सकत ह मोर लोग बिसरि जाइँ।
    हे मोर सुआमी अउ संरच्छक, तू आपन सक्ती स ओनका छितराइ द्या अउर हराइ द्या।
¹² उ सबइ बुरे लोग कोसत अउ झूठ बोलत रहत हीं।
    ओन बुरी बातन क सजा ओनका द्या, जउन उ पचे कहे अहइँ।
    ओनका आपन अभिमान मँ फँसइ द्या।
¹³ तू आपन किरोध स ओनका बरबाद करा।
    ओनका पूरी तरह बरबाद करा।
लोग तबहिं जनिहीं कि परमेस्सर,
    याकूब क लोगन क अउर उ सारे संसार क राजा अहइ।

¹⁴ फुन अगर उ सबइ लोग संझा क एहर ओहर टहरत
    गुर्रातन कूकुरन स सहर मँ आवइँ,
¹⁵ तउ उ सबइ खाइ क कउनो क चीज हेरत फिरिहीं,
    अउर खाइ क कछू भी नाहीं पइहीं अउर न ही सोवइ क कउनो ठउर पइहीं।
¹⁶ मुला मइँ तोहार बड़कई क गीत गाउब।
    हर भिन्सारे मइँ तोहरे पिरेम मँ आनन्दित होब।
काहेकि तू पर्वतन क ऊपर मोर सरणस्थल अहा मइँ तोहरे लगे आइ सकत हउँ,
    जब मोका विपत्तियन घेरिहीं।
¹⁷ मइँ आपन गीतन क तोहरी बड़कइ मँ गाउब
    काहेकि पर्वतन क ऊपर तू मोर सरणस्थल अहा।
    तू परमेस्सर अहा, जउन मोका पिरेम करत ह।

⁵ तू आपन महासक्ति क प्रयोग कइके हमका बचाइ लिहा।
    मोर पराथना क जवाब द्या अउर उ मनई क बचाइ ल्या जउन तोहका पियारा अहइ।

⁶ परमेस्सर आपन मन्दिर मँ कहेस:
    “मोर विजय होइ अउर मइँ विजय पइ खुस होब।
मइँ इ धरती क आपन लोगन क बीच बाँटब।
    मइँ सकेम अउ सुक्कोत घाटी क बँटवारा करब।
⁷ गिलाद अउ मनस्से मोर बनिहीं।
    एप्रैम मोरे मूँड़े क टोप (हेलमेट) बनी।
    यहूदा मोर राजदण्ड बनी।
⁸ मइँ मोआब क अइसा बनाउब, जइसा कउनो मोर गोड़ धोवइ क पात्र।
    एदोम एक दास जइसा जउन मोर पनहियन उठावत ह।
    मइँ पलिस्ती लोगन क हराउब अउर विजय क उद्घोस करब।”

⁹ कउन मोका ओकरे खिलाफ जुद्ध करइ क सुरच्छित मजबूत सहर मँ लइ जाइ?
    मोका कउन एदोम तलक लइ जाइ?
¹⁰ हे परमेस्सर, बस तू ही इ करइ मँ मोर मदद कइ सकत ह।
    मुला तू तउ मोका बिसराइ दिहा।
    परमेस्सर हमरे साथे नाहीं जाइ अउर उ हमरी सेना क संग नाहीं जाइ।
¹¹ हे परमेस्सर, तू ही हमका इ संकट क भुइँया स उबार सकत ह।
    मनई हमार रच्छा नाहीं कइ सकतेन।
¹² मुला हमका परमेस्सर ही मजबूत बनाइ सकत ह।
    परमेस्सर हमार दुस्मनन क पराजित कइ सकत ह।

¹ जब याकूब क घराना
    बिदेसियन क रास्ट्र मिस्र क तजेस।
² उ समइ यहूदा परमेस्सर क खास मनई बना,
    इस्राएल ओकर राज्ज बन गवा।
³ लाल सागर ऍका लखेस, उ पराइ गवा।
    यरदन नदी उलटिके बह चली।
⁴ पर्वत मेमनन क नाई नाच गएन।
    पहाड़ी भ़ेड़न क नाई नाचि गइन।

⁵ हे लाल सागर, तू काहे पराइ गया?
    हे यरदन नदी, तू काहे उलटी बहिउ?
⁶ हे पहाड़ो, काहे तू पचे भ़ेडन क नाई नाच्या?
    हे पहाड़ियो, तू पचे काहे मेमनन जइसी नाचिउ?

⁷ हे धरती, यहोवा याकूब क परमेस्सर,
    सुआमी क समन्वा काँप।
⁸ परमेस्सर ही चट्टानन क चीरिके जल क बाहेर बहाएस।
    परमेस्सर पक्की चट्टान स जल क झरना बहाए रहा।

¹ यहोवा, हमका कउनो गैारव ग्रहण नाहीं करइ चाही।
    गौरव तउ तोहार अहइ।
    तोहार पिरेम अउ निस्ठा क कारण गौरव तोहार अहइ।
² रास्ट्रन काहे कहिइ,
    “ओकर परमेस्सर कहाँ अहइ?”
³ मोर परमेस्सर सरगे मँ अहइ।
    उ उहइ करत ह जउन कछू उ चाहत ह।
⁴ ओन जातियन क “देवता” बस सिरिफ पुतला अहइँ जउन सोना चाँदी क बना अहइँ।
    उ सबइ बस सिरिफ पुतलन अहइँ जेनका कउनो मनई बनाएस ह।
⁵ ओन पुतलन क मुँह अहइँ, मुला उ सबइ बोल नाहीं पउतेन।
    ओनकर आँखिन अहइँ, पर उ सबइ लखि नाहीं पउतेन।
⁶ ओनके कान अहइँ, मुला उ सबइ सुन नाहीं सकतेन।
    ओनके लगे नाक अहइँ, मुला उ सबइ सूँघ नाहीं पउतेन।
⁷ ओनके हाथ अहइँ, मुला उ पचे कउनो चीज क छुइ नाहीं सकतेन।
    ओनके गोड़ अहइँ, मुला उ पचे चल नाहीं सकतेन।
    उ पचे आपन गटइ स कउनो आवाज़ नाहीं निकारइ सकतेन।
⁸ जउन मनई इ सबइ पुतलन बनावत हीं, अउर ओनमाँ बिस्सास धरत हीं
    बिल्कुल इ सबइ मूरतियन जइसे बन जइहीं।

⁹ ओ इस्राएल क लोगो, यहोवा मँ भरोसा रखा।
    यहोवा इस्राएल क मदद देत ह अउर ओकर रच्छा करत ह।
¹⁰ ओ हारून क घराने, यहोवा मँ भरोसा रखा।
    हारून क घराने क यहोवा सहारा देत ह, अउ ओकर रच्छा करत ह।
¹¹ हे यहोवा क सबइ मनवइयो, ओनमाँ भरोसा रखा।
    उ सहारा देत ह अउर आपन लोगन क रच्छा करत ह।

¹² यहोवा हमका याद राखत ह।
    यहोवा हमका वरदान देइ,
यहोवा इस्राएल क आसीसित करी।
    यहोवा हारून क परिवार क आसीसित करी।
¹³ उ ओन लोगन क आसीसित करी जउन ओहसे डेरात ह,
    छोटा स लइके बरा तलक।

¹⁴ मोका आसा अहइ यहोवा तोहार बढ़ोतरी करी अउर मोका आसा अहइ,
    उ तोहार संतानन क भी जियादा स जियादा देइ।
¹⁵ यहोवा जउन सरग अउ धरती क बनाएस ह,
    तोहका आसीस देइ।
¹⁶ सरग यहोवा क अहइ।
    मुला उ धरती क मानव जाति क दिहेस ह।
¹⁷ मरे भए लोग यहोवा क गुण नाहीं गउतेन।
    कब्र मँ पड़े भए लोग यहोवा क गुणगान नाहीं करतेन।
¹⁸ मुला हम अबहुँ यहोवा क स्तुति करति ह,
    अउर हम ओकर स्तुति सदा-सदा करब!