Book of Common Prayer

¹ हे परमेस्सर, तू मोर परमेस्सर अहा।
    वइसे केतॅना मइँ तोहका चाहत हउँ।
जइसे उ पियासी छीन धरती जेह पइ जल न होइ
    वइसे मोर देह अउर मन तोरे बरे पिआसा अहइ।
² हाँ, तोहरे मन्दिर मँ तोहार दर्सन किहेउँ।
    तोहार सक्ती अउर तोहार महिमा देख लिहेउँ ह।
³ मोर बिस्ससयनीय पिरेम जिन्नगी स उत्तिम अहइ।
    मोर होंठ तोहार बड़कई करत हीं।
⁴ हाँ, मइँ निज जीवन मँ तोहार गुण गाउब।
    मइँ हाथ ऊपर उठाइके तोहरे नाउँ पइ तोहार पराथना करब।
⁵ जइसा मोर जु़बान^[a] मज़ेदार भोजन स आनन्दित होत ह,
    ठीक वइसा ही मोर होंठ तोहार स्तुति गाइके खुस होइहीं।
⁶ मइँ आधी रात मँ बिछउना पइ
    ओलरा भवा तोहका याद करब।
⁷ फुरइ तू मोर मदद किहा ह।
    मइँ खुस हउँ कि तू मोका बचाया ह।
⁸ मोर मनवा तोहमाँ समात ह।
    तू मोर हथवा थामे रहत ह।

¹ यहोवा बरे एक नवा गीत गावा,
    काहेकि उ नई अउ अद्भुत बातन क किहस ह।
ओकर पवित्तर दाहिन भुजा
    ओकरे बरे फुन बिजय बनाई।
² यहोवा रास्ट्रन क समन्वा आपन रच्छा क सक्ती क परगट किहेस ह।
    उ ओनका आपन बिजय देखाँएस ह।
³ उ इस्राएल पइ आपन पिरेम अउर बिस्सास क स्मरण किहेस ह।
    दूर रास्ट्रन क लोग हमरे परमेस्सर क रच्छासक्ती निहारेन।
⁴ हे धरती क हर मनई, चिचियाइके स्तुति कइके यहोवा क सुआगत करा।
    फूट पड़ा! चिचियावा! गावा!
⁵ वीणन क संग यहोवा बरे गावा।
    मधुर स्वर स वीणा बजाइके, ओकर महिमा क स्तुति करा।
⁶ वीणाओ, यहोवा क गुण गावा।
    हे बिगुल के मधुर संगीत ओकर गुण गावा, ओकर महिमा क स्तुति करा।
⁷ बाँसुरी बजावा अउर नरसिंगन क फूँका।
    आनन्द स यहोवा, हमरे राजा क जय जयकार करा।
⁸ हे सागर अउ धरती,
    अउ ओनमाँ क सबइ चिजियन ऊँच सुर मँ गावा।
⁹ इ यहोवा क समन्वा होइ, काहेकि उ संसार क निआव करइ बरे जात ह।
    उ संसार क धार्मिकता स अउर ओकरे लोगन क इमानदारी स निआव करी।
तू यहोवा क समन्वा गावा, काहेकि उ जगत क सासन करइ जात अहइ,
    उ जगत क निआउ नेकी अउ सच्चाई स करी।

¹ हे मोर आतिमा, यहोवा क स्तुति करा।
    हे मोर अंग-प्रत्यंग ओकरे पवित्तर नाउँ क बड़कई करा।
² हे मोर आतिमा, यहोवा क स्तुति करा
    अउर ओकरे सबइ कृपालु कामन क जिन बिसरा।
³ उ तोहार पापन क छमा करत ह।
    उ तोहार सबइ बेरामियन स तोहका चंगा करत ह।
⁴ उ तोहार प्राण क कब्र स बचावत ह,
    अउर उ तोहका पिरेम अउ करुणा स सज़वत ह।
⁵ परमेस्सर हमका भरपूर उत्तिम वस्तुअन देत ह।
    उ हमका फुन उकाब क नाई
    जवान करत ह।
⁶ यहोवा खरा कामन करत ह।
    परमेस्सर ओन लोगन क निआउ देत ह, जउने पइ दूसर लोग अत्याचार किहन ह।
⁷ उ मूसा क आपन मारग सिखाएस।
    उ इस्राएलियन क आपन कार्यन बताएस।
⁸ यहोवा करुणा स भरा अउर दयालु अहइ।
    परमेस्सर सहनसील अउ पिरेम स भरा अहइ।
⁹ यहोवा सदा ही आलोचना नाहीं करत।
    अउर ठीक इहइ तहर उ सदा हम पइ कोहान नाहीं रहत ह।
¹⁰ उ हम लोगन क संग हमार कीन्ह गवा पाप क अनुसार बेउहार नाहीं करत ह,
    अउर उ हमका वइसा सजा नाहीं देत जेका हम हकदार अहइँ।
¹¹ आपन बिस्सासी पइ परमेस्सर क पिरेम वइसे महान अहइ
    जइसे धरती पइ अहइ ऊँचा उठा भवा अकास।
¹² उ हमरे पापन क हम से ऍतना ही दूर हटाएस
    जेतना पूरब क दूरी पच्छिम स अहइ।
¹³ उ ओहे पइ जउन ओहसे डेरात ह वइसे ही दयालु अहइ,
    जइसे बाप आपन गदेलन पइ दाया करत ह।
¹⁴ परमेस्सर हमार सब कछू जानत ह।
    परमेस्सर जानत ह कि हम माटी स बना अही।
¹⁵ परमेस्सर जानत ह कि मानव जिन्नगी नान्ह स अहइ।
    उ जानत ह हमार जिन्नगी घास जइसी अहइ।
    परमेस्सर जानत ह कि हम लोगन क जिन्नगी बनफूल जइसा अल्प अहइ।
¹⁶ उ फूल जल्दी ही उगत ह।
    फिन गरम हवा चलत ह अउर उ फूल मुरझात ह।
    अउर फुन हाली ही तू लख नाहीं पउत्या कि उ फूल कइसे ठउर पइ उगत बाटइ।
¹⁷ मुला यहोवा क पिरेम सदा बना रहत ह।
    परमेस्सर सदा सदा ही आपन भगतन स पिरेम करत ह।
    परमेस्सर क दया ओकरे गदेलन स गदेलन तलक बनी रहत ह।
¹⁸ उ अइसन पइ दयालु अहइ, जउन ओकरी करार पइ चलत हीं।
    उ अइसन पइ दयालु अहइ जउन ओकरे आदेसन क पालन करत हीं।
¹⁹ परमेस्सर क सिंहासन सरगे मँ बना अहइ।
    हर चीज पइ ओकर हुकूमत अहइ।
²⁰ हे सरगदूतो, यहोवा क स्तुति करा।
    हे सक्तिसाली सरगदूतन जउन ओकरे वचन क सुनत ह
    अउर ओकर पालन करत, ओकर गुण गवा।
²¹ हे सबइ ओकर दुस्मनो, यहोवा क स्तुति करा।
    तू जउन ओकर सेवा करत ह
    अउर उहइ करत ह जउन उ चाहत ह, ओकर गुण गवा।
²² हे समूचइ जगत, यहोवा क स्तुति करा
    जउन हर जगह पइ सासन करत ह।
हे मोर आतिमा, यहोवा क बड़कई करा

“करत ह परमेस्सर विरोध अभिमानी क,
    मुला दीनन प अनुग्रहसील सदा ह।” ^(A)