◀ All Reading Plans / Book of Common Prayer / Ps. 51:1–18 (19–20); Ps. 69:1–23; Jer. 12:1–16; Phil. 3:1–14; John 12:9–19 (Awadhi Bible: Easy-to-Read Version)

Prev Day

April 3, 2023

Next Day

Use the calendar to view readings from this devotional.

April 2023
Su	Mo	Tu	We	Th	Fr	Sa
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 51

संगीत निर्देसक बरे दाऊद क एक ठु पद। इ पद उ समइ क अहइ जब दाऊद क बतसेबा क संग पाप करइ क पाछे नातान नबी दाऊद क लगे गवा रहा।

¹हे परमेस्सर, आपन बिसाल पिरेम स भरी
    आपन करुणा स मोह पइ दाया करा।
आपन बड़ी दयालुता स
    मोरे सबहिं पापन क तू मेट द्या।
²मोर सबइ पापन क धोइ डावा,
    अउर फुन स मोका स्वच्छ बनाइ द्या।
³मइँ जानत हउँ, जउन पाप मइँ किहे अहउँ।
    मइँ आपन पापन क सदा आपन समन्वा लखत हउँ।
⁴हे परमेस्सर, मइँ उहइ काम किहेउँ जेनका तू बुरा कह्या।
    तू उहइ अहा, जेकरे खिलाफ मइँ पाप किहेउँ।
मइँ स्वीकार करत हउँ इ सबइ बातन क,
    ताकि लोग जानि जाइँ कि मइँ पापी हउँ अउर तू निआउ स पूर्ण अहा,
    अउ तोहार निर्णय निस्पच्छ होत हीं।
⁵मोर महतारी मोका दोखी मँ जनमेस,
    अउर पाप मँ मोर महतारी मोका गर्भ मँ धारण किहस।
⁶हे परमेस्सर, तू चाहत अहा, हम बिस्सासी बनी।
    अउर निर्भय बन जाउँ।
    एह बरे तू मोका सच्चा विवेक स रहस्यन क सिच्छा द्या।
⁷मोह पइ जूफा क पौंधा क प्रयोग करा अउर मोका पापे स स्वच्छ करा।
    मोका तब तलक धोआ, जब तलक मइँ बर्फ स जियादा उज्जवर न होइ जाउँ।
⁸मोका खुस बनाइ द्या।
    बताइ द्या मोका कि कइसे खुस बनउँ? मोर उ सबइ हड्डियन जउन तू तोड़्या, फिन आनन्द स भरि जाइँ।
⁹मोरे पापन्क जिन लखा।
    ओन सबन्क धोइ डावा।
¹⁰हे परमेस्सर, मोहेमाँ एक ठु नवा, सुद्ध हिरदइ बनावा।
    मोरी आतिमा क फुन सुदृढ़ कइ द्या।
¹¹मोका आपन समन्वा स जिन दूर हटावा,
    तोहार पवित्तर आतिमा क मोहसे जिन छोर ल्या।
¹²उ उल्लास जउन तोहसे आव्त ह, मोहमाँ भरि जाइ।
    मोरे चित्त क अडिग अउ तइयार करा
    सुरच्छित होइ बरे अउर तोहार हुकूम मानइ बरे।
¹³मइँ पापियन क तोहार जिन्नगी विधि सिखाउब,
    जेहसे उ सबइ लउटिके तोहरे लगे आवइँ।
¹⁴हे परमेस्सर, धरती पइ क हर कउनो दोख स मोर रच्छा करा,
    मोर परमेस्सर, परमेस्सर जउन मोका बचाएस,
मोका तोहार सदाचारी क बारे मँ गावइ क अनुमति द्या?
¹⁵    हे मोर सुआमी, मोका मोर मुँह खोलइ द्या कि मइँ तोहार बड़कई क गीत गावउँ।
¹⁶जउन बलियन तोहका नाहीं नीक लगतिन तउ मोका चढ़ाउब नाहीं अहइँ।
    उ सबइ बलियन तोहका बांछित तलक नाहीं अहइँ।
¹⁷हे परमेस्सर, मोर टुटही आतिमा ही तोहरे बरे मोर बलि अहइ।
    हे परमेस्सर, तू एक कुचरा अउ टुटहा हिरदइ स मुँह नाहीं फेरब्या।

¹⁸हे परमेस्सर, सिय्योन बरे दयालु होइके, उत्तिम बना।
    तू यरूसलेम क सहर क चहरदीवारी क बनावा।
¹⁹तू उत्तिमा बलियन क
    अउ सम्पूर्ण होमबलियन क आनन्द ल्या।
    लोग फुन स तोहरी वेदी पइ बर्धन क बलियन द्या।

भजन संहिता 69:1-23

“कुमुदिनी” नाउँ क धुन पइ संगीत निर्देसक बरे दाऊद क एक ठु भजन।

¹हे परमेस्सर, मोका मोर सब मुसीबतन स बचावा।
    मोरे मुँहना तलक पानी चढ़ि आवा अहइ।
²कछू भी नाहीं अहइ जउने पइ मइँ खड़ा होइ जाउँ।
    मइँ दलदले क बीच खाले धँसत ही चला जात हउँ।
मइँ नीचे धँसत हउँ।
    मइँ अथाह जले मँ अहउँ अउर मोरे चारिहुँ कइँती लहरियन थपेड़ा मारति अहइँ।
    बस, मइँ बूड़इ क अहउँ।
³मदद क गोहार लगावत मइँ दुर्बल होत जात हउँ।
    मोर गटइ मदद बरे गोहराव क कारण सुखन बाटइ।
मइँ बाट जोहत हउँ।
    तोहसे मदद पावइ अउ लखत-लखत मोर अँखियन दुःखति अहइँ।
⁴मोर दुस्मन मोरे मूँड़े क बारे स भी जियादा अहइँ।
    उ सबइ मोहसे बेकार दुस्मनी रखत हीं।
    उ पचे मोरे विनास क बहोतइ जुगत करत हीं।
मोर दुस्मन मोरे बारे मँ झूठी बातन बनावत हीं।
    उ पचे मोका झूठइ ही चोर बताएन।
    अउर ओन चिजियन क भरपाई करइ क मोका मजबूर किहन, जेनका मइँ चोराए नाहीं रहेउँ।
⁵हे परमेस्सर, तू तउ जानत अहा कि मइँ कछू अनुचित नाहीं किहेउँ।
    मइँ आपन पाप तोहसे नाहीं छुपाइ सकित।
⁶हे मोर सुआमी, हे सर्वसक्तिमान यहोवा, तू आपन मनवइयन क मोरे कारण लज्जित जिन होइ द्या।
    हे इस्राएल क परमेस्सर, अइसे ओन लोगन क मोरे बरे असमंजस मँ मत डावा जउन तोहार उपासना करत हीं।
⁷तोहार बरे मोर मुँह लज्जा स ढाँपि गवा।
    तोहार सेवा बरे मइँ इ लज्जा क जन्मेउँ ह।
⁸मोरे ही भाई, मोरे संग यूँ ही बर्ताव करत हीं।
    जइसे बर्ताव कउनो अजनबी स करत होइँ।
    मोरे ही सगे भाई, मोका पराया समुझत हीं।
⁹तोहरे मन्दिर क खातिर मोर गहरी लगन ही मोका जराइ डावत अहइ।
    उ पचे जउन तोहार मसखरी करत हीं उ मोह पइ आइ पड़ी बाटइ।
¹⁰मइँ तउ गोहरावत हउँ अउर उपवास करत हउँ,
    एह बरे उ पचे मोर हँसी उड़ावत हीं।
¹¹मइँ आपन सोक दर्सावइ बरे मोटवार ओढ़नन क पहिरत हउँ,
    अउर लोग मोर मसखरी करत हीं।
¹²उ पचे जनता क बीच सबइ चर्चा करत हीं,
    अउर पियक्कड़, मोर गीत रचा करत हीं।
¹³हे यहोवा, जहाँ तलक मोर बात बाटइ,
    मोर तोहसे इ बिनती अहइ कि मइँ चाहत हउँ: तू मोका अपनाइ ल्या।
हे परमेस्सर, मइँ चाहत हउँ कि तू मोका पिरेम भरा जवाब द्या
    मइँ जानत हउँ कि मइँ तोह पइ सुरच्छा क भरोसा कइ सकत हउँ।
¹⁴मोका दलदले स उबार ल्या।
    मोका दलदल क बीच जिन बूड़इ द्या।
मोका मोरे बैरी लोगन स तू बचाइ ल्या।
    तू मोका इ गहिर पानी स बचाइ ल्या।
¹⁵बाढ़ क लहरन क मोका बुड़ावइ न द्या।
    गहराई क मोका लीलइ न द्या।
    कब्र क मोरे ऊपर आपन मुँह बन्द न करइ द्या।
¹⁶हे यहोवा, तोहार करुणा खरी अहइ।
    तू मोका आपन सम्पूर्ण पिरेम स जवाब द्या।
    मोर मदद बरे आपन सम्पूर्ण कृपा क संग मोरी कइँती मुँह करा।
¹⁷आपन दास स जिन मुँह मोड़ा।
    मइँ संकटे मँ पड़ा अहउँ, मोका हाली सहारा द्या।
¹⁸आवा, मोर परान बचाइ ल्या।
    तू मोका मोरे दुस्मनन स छोड़ाइ ल्या।
¹⁹तू मोर निरादर जानत अहा।
    तू जानत अहा कि मोर दुस्मनन मोका लज्जित किहेन ह।
    ओनका मोरे संग तू अइसा करत लख्या ह।
²⁰निन्दा मोका चकनाचूर कइ दिहस ह।
    बस निन्दा क कारण मइँ मरइवाला अहउँ।
मइँ सहानुभूति क बाट जोहत रहेउँ,
    मइँ दिलासा क बाट जोहत रहेउँ,
मुला मोका तउ
    कउनो नाहीं मिला।
²¹उ पचे मोका जहर दिहन, खइया क नाहीं दिहन।
    सिरका मोका दइ दिहन, दाखरस नाहीं दिहन।
²²ओनकर मेजन खाना स भरी अहइ उ पचे ऍतना बड़का मैत्री भोज करत अहइँ।
    मइँ आसा करत हउँ कि उ सबइ भोजन ओनका बरबाद करइँ।
²³उ सबइ आँधर होइ जाइँ अउर ओनकर करिहाउँ निहुरिके दुहरी होइ जाइ।

यिर्मयाह 12:1-16

यिर्मयाह परमेस्सर स सिकाइत करत ह

12 यहोवा। मइँ तोहसे तर्क करत हउँ,
    तू सदा सही निकरत ह।
किन्तु मइँ तोहसे ओन सब क बारे मँ पूछइ चाहत हउँ जउन सही नाहीं लगतिन।
    दुट्ठ लोग सफल काहे अहइ?
    जउन तोह पइ बिस्सास नाहीं करतेन, ओनकर जीवन ऍतना सुखी काहे अहइ?
²तू ओन दुट्ठ लोगन क हिआँ बसाया ह।
    जउन मजबूत जरवाले पौधे अहइँ जउन बढ़त अउ फल देत हीं।
आपन मूँह स उ पचे तोहका आपन नजदीकी अउर प्रिय कहत हीं।
    किन्तु आपन हिरदइ स उ पचे असल मँ तोहसे बहोत दूर अहइँ।
³मुला मोर यहोवा, तू मोरे हिरदइ क जानत ह।
    तू मोका अउर मोरे मन क लखत अउर परखत अह,
मोर हिरदइ तोहरे संग अहइ।
    ओन दुट्ठ लोगन क मारी जाइवाली भेड़ी क नाई घसीटा।
    बलि दिवस बरे ओनका चुना।
⁴कब तलक भुइँया पियासी पड़ी रहब?
    घास कब तलक झुरान अउ मरी रही?
इ भूइँया क जनावर अउर पंछी मर चुका अहइँ
    अउर उ दुट्ठ लोगन क अपराध अहइ।
काहेकि उ सबइ दुट्ठ लोग किहा,
    “उ हम लोगन क अन्त नाहीं लखिहीं।”

परमेस्सर क यिर्मयाह क जवाब

⁵“यिर्मयाह, जदि तू मनइयन क गोड़ दौड़ मँ थक जात ह
    तउ तू घोड़न क मुकाबले मँ कइसे दउड़ब्या?
जदि तू सुरच्छित देस मँ थक जात ह
    तउ तू यरदन नदी क किनारन पइ उहइ भयंकर कँटीली झाड़ियन मँ पहोंचिके का करब्य?
⁶इ सबइ लोग तोहार आपन भाई अहइँ।
    तोहरे आपन परिवार क सदस्य तोहरे खिलाफ जोजना बनावत अहइँ।
तोहरे आपन परिवार क लोग तोह पइ चिचियात अहइँ।
    जदि उ सबइ मीत जइसा बोलइँ, ओन पइ बिस्सास जिन करा।”

यहोवा आपन लोगन अर्थात् यहूदा क तजत ह

⁷“मइँ (यहोवा) आपन घर तजि दिहे हउँ।
    मइँ आपन बिरासत अस्वीकार कइ दिहे हउँ।
मइँ जेहसे (यहूदा) पियार किहे हउँ,
    ओका ओकरे दुस्मनन क दइ दिहे हउँ।
⁸मोर आपन लोग मोरे बरे जंगली सेर बन गवा अहइँ।
    उ पचे मोह पइ गरजत हीं, एह बरे मइँ ओनसे घिना करत हउँ।
⁹मोर आपन लोग गीधन स घेरा भवा,
    मरत भवा जनावर बन गवा अहइँ।
उ सबइ पंछी ओह पइ मँडरात अहइँ।
    जंगली जनावरो आवा।
    अगवा बढ़ा, खाइ क कछू पावा।
¹⁰अनेक गड़रियन मोरे अंगूरे क खेतन क नस्ट किहेन ह।
    अउ मोरे खेत क पौधन क रौंदेन ह।
    ओन गड़रियन मोर सुन्नर खेत क सुनसान रेगिस्तान मँ बदलेन ह।
¹¹उ पचे मोरे खेत क रेगिस्तान मँ बदल दिहन ह।
    इ झुराइ गवा अउर मरि गवा।
कउनो भी मनई हुवाँ नाहीं रहत।
    पूरा देस ही सुनसान रेगिस्तान अहइ।
    उ खेते क देखभाल करइवाला कउनो मनई नाहीं बचा ह।
¹²अनेक फउजी ओन सूनी पहाड़ियन क रौंदत गएन ह।
    यहोवा ओन फउजन क उपयोग उ देस क सजा देइ बरे किहस।
समस्त देस बार्बाद रगिस्तान अहइ,
    किन्तु एकर देख-रेख करइवाला कउनो नाहीं अहइ।
¹³लोग गोहूँ बोइहीं, किन्तु उ पचे सिरिफ काँटा ही कटिहीं।
    उ सबइ बहोत जियादा थकइ तलक काम करिहीं,
किन्तु उ पचे आपन सारे कामन क बदले कछू भी नाहीं पइहीं।
    उ पचे आपन फसल पइ लजाइ जइहीं।
    यहोवा क किरोध इ सब कछू किहस।”

इस्राएल क पड़ोसियन क यहोवा क बचन

¹⁴यहोवा जउन कहत ह, उ इ अहइ: “मइँ तू पचन्क बताउब कि मइँ इस्राएल देस क चारिहुँ कइँती रहइवाले सबहिं लोगन बरे का करब। उ सबइ लोग बहोत दुट्ठ अहइँ। उ पचे उ देस क नस्ट किहेन जेका मइँ इस्राएल क लोगन क दिहे रहेउँ। मइँ ओन दुट्ठ लोगन क उखाड़ब अउर ओनके देस स ओनका बाहेर लोकाइ देब। अउ मइँ यहूदा क ओकर बीच स उखाड़ देब। ¹⁵किन्तु ओन लोगन क ओनके देस स उखाड़ फेकइ क पाछे मइँ ओनके बरे अफसोस करब। मइँ हर एक परिवार क ओनकर आपन सम्पत्ति अउर आपन भुइँया पइ वापस लिआउब। ¹⁶मइँ चाहत हउँ कि उ सबइ लोग अब मोरे लोगन क तरह रहब सीख लेइँ। बीते समइ मँ ओन लोग हमरे लोगन क सपथ खाइ बरे बाल क नाउँ क उपयोग करब सिखाएन। अब, मइँ चाहत हउँ कि उ सबइ लोग सीखइ ल्या कि मोर नाउँ कइसे उपयोग करइ होइ। मइँ चाहत हउँ कि उ सबइ लोग कहइँ, ‘काहेकि यहोवा सास्वत अहइ।’ जदि उ सबइ लोग वइसा करत हीं तउ मइँ ओनका सफल होइ देब अउर ओनका आपन लोगन क बीच रहइ देब।

फिलिप्पियन 3:1-14

मसीह सब क ऊपर बा

3 एह बरे स, मोरे भाइयो, तथा बहिनियो, पर्भू मँ आनन्द मनावत रहा। तू सबन क सच सच ओनही बातन क लिखत रहइ स मोका फिन कउनउ कस्ट नाहीं अहइ अउर तोहरे बरे तउ इ तैयार होइ क मदद करी।

²एन्हन कुकुरन स सावधान रहा जउन कुकर्मन मँ लगा अहइँ। उ पचे बधिया कइ देइ चाहत हीं। ³काहेकि सच्चा खतनावाला मनई तउ हम अही जउन अपने आराधना क परमेस्सर क आतिमा द्वारा अरपण करत अही। अउर मसीह ईसू पर हम होइ बरे गरब करत अही अउर जउन कछू सारीरीक बा, ओह प हम भरोसा नाहीं करत अही। ⁴जद्यपि मइँ खुद जउन कछू सरीरीक बा, ओह पइ मइँ भरोसा नाहीं कइ सकत रहउँ। मुला अगर केऊ अउर अइसेन सोचइ कि ओकरे लगे सरीसी पर बिसवास करइ बरे बा तउ मोरे लगे तउ उ अउर जियादा बा। ⁵जब मइँ आठ दिना क रहेउँ, मोर खतना कइ दीन्ह गवा रहा। मइँ इस्राएली हउँ बिन्यामीन क वंस क हउँ। मइँ इब्रानी माता-पिता स पइदा भवा एक इब्रानी हुउँ। जहाँ तक व्यवस्था क विधान तलक मोरे पहुँच क प्रस्न बा, मइँ फरीसी हउँ। ⁶जहाँ तलक मोरी निस्ठा क प्रस्न बा, मइँ कलीसिया क बहुत सताये रहउँ। जहाँ तलक ओह धार्मिकता क सवाल बा जेका व्यवस्था क विधान सिखावत ह, मइँ निर्दोख रहेउँ।

⁷परन्तु तब जउन मोर लाभ रहा, आज उही क मसीह क बरे मइँ आपन हानि समझत अहउँ। ⁸इहूउँ स बड़ी बात इ बा कि मइँ अपने पर्भू मसीह ईसू क गियान क स्रेष्ठता क कारण आज तलक सब कछु क हीन समझत रहेउँ। उही बरे मइँ सब कछू तियागा कइ दिहेउँ अउर मइँ सब कछू क घिना क परन्तु समझइ लाग हउँ ताकि मसीह क पाई सकउँ ⁹अउर ऊही मँ पावा जाइ सकउँ-मोर उ धरम भाव क कारण नाहीं जउन व्यवस्था क विधान पर टिकी रही, बल्कि ओह धरम भाव क कारण जउन मसीह मँ बिसवासे क कारण मिलत ह। जउन परमेस्सर स मिली बा ओकर आधार बिसवास अहइ। ¹⁰मइँ मसीह क जानइ चाहत हउँ अउर ओह सक्ती क अऩुभव करइ चाहत हउँ जेसे ओका पुनः जागरण भवा रहा। मइँ ओकरी यातनन का सहभागी होइ चाहत हुँ। अउर उही रूपे क पाइ लेइ चाहत हउँ जेका उ आपन मउत क द्वारा पाए रहा। ¹¹एह आसा क साथे कि मइँ भी इही तरह मरा हुआ मँ स उठि क फिन स जी पावउँ।

लच्छ पर पहुँचइ क प्रयास करत रहा

¹²अइसेन नाहीं अहइ कि मोका आपन प्राप्ति होइ चुकी बा अउर मइँ पूरा सिद्ध बन चुका हउँ। परन्तु मइँ उपलब्धि क पाइ ल्लेइ क बरे बराबर प्रयास करत रहत हउँ जेकरे बरे मसीह ईसू मोका आपन बँधुआ बनाए रहा। ¹³भाइयो, तथा बहिनियो, मइँ इ नाहीं सोचित हउँ कि मइँ ओका पाई चुका हउँ। पर बात इ अहइ कि बीती क बिसराइ द्या, जउन मोरे सामने बा, ओह लच्छ तलक पहुँचइ बरे मइँ संघर्ष करत रहउँ। ¹⁴मइँ ओह लच्छ क बरे हमेसा प्रयास करत रहउँ कि मइँ अपने ओह इनामें क जीत लेउँ, जेका मसीह ईसू मँ पावई क बरे परमेस्सर तउ मोका उप्पर बोलाए अहइ।

यूहन्ना 12:9-19

लाजर क खिलाफ साजिस

⁹फसह क त्यौहार प आए यहूदियन क तमाम भीड़ क जब पता चला कि ईसू बैतनिय्याह मँ अहइ तउ ओसे मिलइ चल दिहेस। उ भीड़ केवल ईसू स मिलइ क बरे नाहीं आइ रही, मुला लाजर क देखइ क बरे आइ रही। लाजर क मरइ क बाद ईसू फिन जीवित कइ दिहेस रहा। ¹⁰इही बरे मुख्ययाजकन लाजर क भी मारइ क तरकीब सोचइ लागेन। ¹¹काहेकि ओहि क कारण तमाम यहूदी जनता अपने अपने नेता क छोड़िके ईसू मँ बिसवास करइ लाग।

ईसू क यरूसलेम मँ जाब:

(मत्ती 21:1-11; मरकुस 11:1-11; लूका 19:28-40)

¹²दूसरे दिन फ़सह क त्यौहार प आई भीड़ जब इ सुनेस कि ईसू यरूसलेम आवत अहइ तउ ¹³लोग खजूर क टहनी लइके ओसे मिलइ चल पड़ेन। उ पचे गोहरावत रहेन,

“‘होसन्ना!
‘धन्य अहइ उ जउन पर्भू क नाउँ स आवत ह!’ ^(A)

उ जउन इस्त्राएल क राजा अहइ।”

¹⁴तब ईसू क एक गदहा मिला अउर उ ओकरे ऊपर चढ़ि लिहेस। जइसा कि पवित्तर सास्तर मँ लिखा अहइ:

¹⁵“सिय्योन क पुत्री डेराअ जिन!
देखा! तोहार राजा गदहे क बच्चा प
बइठके आवत अहइ।” ^(B)

¹⁶पहिला तउ ओकर चेलन ओकरे व्यवहार क नाहीं समझ पाएन्ह लेकिन जब ईसू क महिमा परगट भइ तउ समुझ पाएन कि सास्तर मँ ओकरे बारे मँ सब बात लिखी रहिन अउर तमाम मनई क ओकरे बार मँ अइसा बरताब रहा।

¹⁷ओकरे साथ जउन भीड़ रही, उ इ साच्छी दिहेस कि उ लाजर क कब्र स बोलाइके मरे स फिन जिआइ दिहेस। ¹⁸तमाम लोग ओसे मिलइ क बरे इहइ बरे आइ रहेन काहेकि उ पचे सुने रहेन कि इ अद्भुत कारज करइवाला उहइ अहइ। ¹⁹तउ फरीसी आपुस मँ कहइ लागेन, “सोचा तू सबेन्ह कछू नाहीं कइ पावत अहा अउर देखा पूरी दुनिया ओकरे पीछे पड़ गइ अहइ।”

Awadhi Bible: Easy-to-Read Version (ERV-AWA)