◀ All Reading Plans / Book of Common Prayer / Ps. 78:1–39; Ps. 78:40–72; Jer. 7:21–34; Rom. 4:13–25; John 7:37–52 (Awadhi Bible: Easy-to-Read Version)

Prev Day

March 14, 2023

Next Day

Use the calendar to view readings from this devotional.

March 2023
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 78

आसाफ क एक कलात्मक।

¹मोर मनवइयो, तू पचे मोरे उपदेसन क सुना।
    ओन बातन पइ कान द्या जेनका मइँ बतावत हउँ।
²मइँ तू पचन्क इ कथा सुनाउब।
    मइँ तू पचन्क पुरान कथा सुनाउब।
³हम पचे इ कहानी सुना ह, अउर ऍका अच्छी तरह जानित ह।
    हम लोगन क पुरखन इ कहानी कहेन ह।
⁴हम लोग ऍन बातन क आपन सन्तानन स नाहीं छुपाउब।
    हम लोग ऍन बातन क आपन अगवा पीढ़ी क बताउब।
हम लोग ओनसे यहोवा क सक्ति अउर ओकरे अद्भुत कामन क बारे मँ बताउब।
    हम पचे ओनका ओन कामन बरे जेनका उ किहस ह बखान करब।
⁵यहोवा याकूब स वाचा किहस।
    परमेस्सर इस्राएल क व्यवस्था क विधान दिहस,
अउर हमार परमेस्सर हमरे पुरखन क हुकूम दिहन।
    उ हमरे पुरखन क व्यवस्था क विधान आपन संतानन क सिखावइ क किहेस।
⁶इ तरह अगवा पीढ़ी ऍन बातन क बरे मँ जानिहीं।
    अउर हर एक पीढ़ी मँ गदेलन पइदा होइ अउर बढ़ीइ अउर फुन उ पचे इ कहानी क आपन गदेलन क बतइहीं।
⁷ऍह बरे उ सबहिं लोग यहोवा पइ भरोसा करिहीं।
    उ पचे ओन सक्ति स भरा कामम क नाहीं बिसरिहीं।
    जेन्का परमेस्सर किहे रहा।
    उ पचे धियान स रखवारी करिहीं अउर परमेस्सर क हुकूम क मनिहीं,
⁸एह बरे उ पचे आपन पुरखन क नाई नाहीं होइ।
    ओनकर पुरखन परमेस्सर क अनसुनी किहे रहेन
अउर ओकर अनुसरण करइ स इन्कार किहे रहेन उ पचे हठी रहेन।
    उ पचे बिस्सासी होइ क परमेस्सर क अनुसरण नाहीं किहेन।

⁹ओन मुड़ी भइ कमान की तरह जेका उ पचे लइ रहेन
    एप्रैम क लोग जुद्ध स पीठ दिखाइ गए।
¹⁰उ पचे ओन करार क नाहीं मानेन जउन उ पचे यहोवा स किहे रहेन।
    उ पचे उ नाहीं किहे जउन उ ओन लोगन क करइ क हुकूम दिहे रहा।
¹¹एप्रैम क उ सबइ लोग ओन बड़की बातन क बिसरि गएन जेनका परमेस्सर किहे रहा।
    उ पचे ओन अद्भुत बातन क बिसरि गएन जेनका उ ओनका देखाँए रहा।
¹²परमेस्सर ओनकर पुरखन क
    मिस्र क भुइयाँ सोअन मँ निज महासक्ति देखाँइस।
¹³परमेस्सर लाल सागर क चीरिके दुइ भाग कइके लोगन क पार उतार दिहस।
    उ पानी क मजबूत देवार क तरह दुइनउँ कइँती खड़ा कइ दिहस रहा।
¹⁴परमेस्सर ओन लोगन क दिन क समइ मँ महा बादर स अगुवाई किहस।
    अउर रात क समइ मँ चमकत भवा आगी स राह देखाँएस।
¹⁵उ चट्टान क फारेस अउर पानी तेजी स बाहर निकर आवा
    वइसे ही जइसे झड़ना स निकरत ह।
¹⁶परमेस्सर चट्टान स पानी क धारा
    नदी क नाईं निकारे रहा।
¹⁷मुला लोग रेगिस्तान मँ सर्वोच्च परमेस्सर क खिलाफ
    पाप करत जारी रखे रहेन।
¹⁸फिन ओन लोग परमेस्सर क परखइ क पक्का इरादा किहन।
    उ पचे बस आपन भूख मिटावइ बरे परमेस्सर स खइया क माँगेन।
¹⁹परमेस्सर क खिलाफ उ पचे बतियाइ लागेन, उ पचे कहइ लागेन,
    “का रेगिस्ताने मँ परमेस्सर हमका खाइ क दइ सकत ह?
²⁰लोगन ने कहा, जब परमेस्सर चट्टाने पइ चोट किहस तउ पानी क एक ठु रेला फूटि पड़ा।
    किन्तु का उ हमका कछू रोटी अउ गोस भी दइ सकत ह?”
²¹जब यहोवा इ सुनि लिहस जउन लोग कहे रहेन
    तउ ओकर किरोध इस्राएल क रास्ट्र
    याकूब क खिलाफ भड़क गवा।
²²काहेकि लोग ओह पइ भरोसा नाहीं रखे रहेन, ओनका भरोसा नाहीं रहा,
    कि परमेस्सर ओनका बचाइ सकत ह।
^23-24तब भी परमेस्सर ओन पइ बादर क खोल दिहस।
    ओनका खाइ बरे खाले मन्ना बरसाइ दिहस।
इ ठीक वइसेन ही भवा जइसे कि उ अकासे क दुआर खोल दिहस ह
    अउर ओनसे अनाज बाहेर उड़ेर दिहस ह।
²⁵लोग उ भोजन खाएन अउर उ पचे बहोत ताकतवर होइ गएन।
    परमेस्सर ओन लोगन क तृप्त करइ बरे भर पूर भोजन पठएस।
²⁶फिन परमेस्सर पूरब स तेज हवा चलाएस
    अउर ओन लोगन बरे बटेर क बर्खा बरसात क नाई बरसाएस।
²⁷परमेस्सर क महासक्ति तैमान कइँती स एक ठु आँधी उठाएस
    अउर नीला अकास करिआ होइ गवा काहेकि हुवाँ अनगिनत पंछी छाइ ग रहेन।
²⁸उ सबइ पंछी क ठीक ओनकर डेरे क बीच मँ
    खेमन क चारिहुँ कइँती गिरा दिहे रहेन।
²⁹ओनके लगे खाइ बरे भरपूर भोजन रहा।
    उ ओनका उहइ दिहस जउन उ पचन्क इच्छा रहेन।
³⁰उ पचे उ भोजन अबहुँ तलक खाइ क खतम नाहीं किहे रहेन जेन्का इच्छा उ पचन्क रहेन
    अउर गोस अबहुँ तलक ओनकर मुँह मँ ही रहेन।
³¹तउ ओन लोगन पइ परमेस्सर बहोत कोहाइ गवा अउर ओनमाँ स सबन्क नीक क मारि दिहस।
    उ बरिआर जवानन क मउत दइ दिहस।
³²फिन भी लोग पाप करत जारी राखे रहेन!
    उ पचे परमेस्सर क अद्भुत करमन पइ भरोसे नाहीं किहेन।
³³तउ परमेस्सर ओनकर जिन्नगी क बियर्था मँ
    अउर बरिसन क डर मँ खतम किहस।
³⁴जब कबहुँ परमेस्सर ओनमाँ स कउनो क मारेस
    ओनमाँ स बाकी लोग परमेस्सर कइँती लउटि गएन।
³⁵उ सबइ लोग याद किहेन कि परमेस्सर ओनकर चट्टान रहत रहा।
    उ पचे याद किहन कि परमेस्सर ओनकर मदद किहे रहा।
³⁶किन्तु ओकर पाछे उ पचे अइस किहेन जइसे उ पचे ओन पइ बिस्सास करत हीं, किन्तु असल मँ उ पचे झूट बोले रहेन।
    उ पचे ओकर बिस्सासी नाहीं रहेन।
³⁷उ पचे फुरइ मनवा स यहोवा क संग नाहीं रहेन।
    उ पचे आपन करार बरे सच्चा नाहीं रहेन।
³⁸मुला परमेस्सर करुणा स भरा नाहीं रहा।
    उ ओनकइ पापन बरे छिमा किहेस, अउर उ ओनकर विनास नाहीं किहस।
परमेस्सर अनेक अवसरन पइ आपन किरोध रोकेस।
    परमेस्सर आपन क बहोत किरोधी नाहीं होइ दिहस।
³⁹परमेस्सर क याद रहा कि उ पचे सिरिफ मानव जात अहइँ।
    लोग सिरिफ हवा जइसे अहइँ जउन बहिके चली जात ह अउर कबहुँ नाहीं लउटत ह।
⁴⁰हाय, उ पचे सबइ मरुभूमि मँ परमेस्सर क खिलाफ विद्रोह किहेन ह।
    उ पचे मरुभूमि मँ ओका बहोत दुःखी किहे रहेन।
⁴¹उ पचे लगातार परमेस्सर पइ सक किहेन
    अउर इस्राएल क पवित्तर क चोट पहुँचाएन।
⁴²उ सबइ लोग परमेस्सर क सक्ती क बिसरि गएन।
    उ सबइ लोग बिसरि गएन कि परमेस्सर ओनका दुस्मन स कइसे बचाए रहा।
⁴³उ सबइ लोग ओन अद्भुत बातन क बिसरि गएन जउन कि उ मिस्र क सोआन मँ किहे रहा
    अउर ओन चमत्कारन क बिसरि गएन जउन उ उस भुइयाँ मँ किहे रहा।
⁴⁴उ ओनकर नदियन क रक्त मँ बदल दिहे रहा।
    मिस्र क लोग आपन नदी-नाला स पानी पी नाहीं सकत रहेन।
⁴⁵परमेस्सर भिड़न क झुण्ड पठए रहा जउन मिस्र क मनइयन क काटेन।
    परमेस्सर ओन मेघन क पठएस जउन ओन लोगन क भुइयाँ क नास कइ दिहन।
⁴⁶उ ओनकर फसलन क जेकर बरे उ पचे बहोत सखत मेहनत किहे रहेन
    टिड्डन अउर झिंगुरन क दइ दिहस।
⁴⁷उ मिस्रियन क अंगूरे क बगिया ओलन स बर्बाद किहस,
    अउर ओनकर गोलर क बृच्छन क पाला स बर्बाद कइ दिहस।
⁴⁸उ ओनकर जनावरन क ओलन स मारि दिहस
    अउ बिजुरी गिराइके मवेसियन क बर्बाद कइ दिहस।
⁴⁹उ मिस्री लोगन क खिलाफ आपन प्रचण्ड किरोध अउर फटकार देखाँएस, अउर ओन लोगन पइ मुसीबत लिआएस।
    उ आपन विनास क दूत ओन लोगन क खिलाफ पठएस।
⁵⁰उ किरोध परगट करइ बरे एक राह पाएस।
    उ ओन लोगन क मउत स नाहीं बचाएस।
    उ ओनकर गोरुअन क बेरामी स मरि जाइ दिहस।
⁵¹परमेस्सर मिस्र क हर पहिलउटी पूत क मार डाएस।
    हाम क घराने क हर पहिलउटी पूत क उ मार डाएस।
⁵²फिन उ इस्राएल क चरवाहा क नाई अगुवाई किहस।
    उ ओन लोगन क भेड़न क झुण्ड क नाई रेगिस्तान स होत भए निकारेस।
⁵³उ आपन निज लोगन क सुरच्छा क संग लइ चला।
    परमेस्सर क भगतन क कउनो स डर नाहीं रहा।
    परमेस्सर ओनकर दुस्मनन क लाल सागर मँ डुबाएस।
⁵⁴परमेस्सर आपन मनवइयन क आपन पवित्तर भुइँया पइ लइ आवा।
    उ ओनका उ पहाड़े पइ लिआवा जउन उ आपन सक्ति स पाएस।
⁵⁵परमेस्सर दूसर जातियन क उ भुइँया तजइ क मजबूर किहस।
    परमेस्सर हर एक परिवारन क उ भुइँया मँ ओनकर खुदकास्त क हींसा दिहस।
    इ तरह इस्राएल क परिवारन आपन ही घरन मँ बस गएन।
⁵⁶उ पचे लगातार सर्वोच्च परमेस्सर पइ सक किहेन अउर ओकर खिलाफ विद्रोह किहेन
    उ सबइ लोग परमेस्सर क आग्या क नाहीं मानेन।
⁵⁷इस्राएल क लोग परमेस्सर स भटकिके विमुख होइ ग रहेन।
    उ सबइ आपन पुरखन क नाईं परमेस्सर क अबिस्सासी रहेन।
    उ पचे मुड़ा भवा धनुस^[a] क जइसे होइ गवा रहेन।
⁵⁸इस्राएल क लोग ऊँच पूजा क ठउरन बनाएन अउर परमेस्सर क कोहाइ दिहन।
    उ पचे मूर्तियन गढ़ेन जउन परमेस्सर क किरोधित बनाएन।
⁵⁹परमेस्सर इ सुनेस अउर बहोत कोहाइ गवा।
    उ इस्राएल क पूरी तरह रद्द कइ दिहस।
⁶⁰परमेस्सर सिलोह क पवित्तर तम्बू क तजि दिहस।
    जहाँ उ लोगन क बीच निवास करत रहा।
⁶¹फिन उ दूसर रास्ट्रन क, करार क संदूख क कब्जा करइ क दिहस।
    दुस्मन ओकर महिमा क संकेत क लइ लिहस।
⁶²उ आपन ही लोगन पइ आपन किरोध परगट किहस।
    उ ओनका जुद्ध मँ मार दिहस।
⁶³ओनकर जवान मनइयन आगी मँ जरिके नास होइ गएन।
    अउर ओकर जवान कुआँरी लड़कियन कबहुँ आपन बियाह गीत नाहीं सुनि पाएन।
⁶⁴याजक मार डावा गएन
    मुला ओनकर राँड़ मेहरारूअन ओनके बरे नाहीं रोइ सकेन।
⁶⁵आखिर मँ यहोवा उठ बइठा
    जइसे कउनो नींदे स जागिके उठी बइठत होइ।
    या कउनो जोद्धा क नाई जउन कि दाखरस क नसा स होस मँ आवा होइ।
⁶⁶फुन तउ उ आपन दुस्मनन क मारिके भगाइ दिहस अउर ओनका हराइ दिहस।
    उ आपन दुस्मनन क हराइ दिहस अउर सदा बरे ओनका अपमानित किहस।
⁶⁷मुला परमेस्सर यूसुफ क तम्बू^[b] क रद्द कइ दिहस।
    उ इब्राहीम परिवार क नाहीं चुनेस।
⁶⁸परमेस्सर यहूदा क पिरवार क चुनेस
    अउर उ सिय्योन क पहाड़ क चुनेस जउन ओका पियारा अहइ।
⁶⁹उ ऊँचे पहाड़न नाई अउर धरती क नाई जेका उ सदा बरे स्थापित किहस ह
    आपन पवित्तर मन्दिर क सुरच्छित बनाएस।
⁷⁰परमेस्सर दाऊद क आपन विसेस सेवक बनावइ मँ चुनेस।
    दाऊद तउ भेड़िन क देखरेख करत रहा, मुला परमेस्सर ओका उ काम स लइ आवा।
⁷¹उ दाऊद क भेड़िन क रखवाली स लइ आवा।
    तउ उ ओका आपन लोगन याकूब क सन्तानन, इस्राएल^[c] क रखवाली क काम बरे बहाल किहा।
⁷²तउ फिन दाऊद पुरे मन स ओन लोगन क देख-भाल किहस।
    उ ओनका पूरी बुद्धिमानी स राह देखाँएस।

यिर्मयाह 7:21-34

यहोवा बलि क अपेच्छा, आपन आग्या क पालन जियादा चाहत ह

²¹इस्राएल क परमेस्सर सर्वसक्तिमान यहोवा इ कहत ह, “जा अउर जेतनी भी होमबलि अउर बलि चाहा, भेंट करा। ओन बलियन क गोस खुद खा। ²²मइँ तोहरे पचन्क पुरखन क मिस्र स बाहेर लिआएउँ। मइँ ओनसे बातन किहेउँ, किन्तु ओनका कउनो आदेस होमबलि अउर बलि क बारे मँ नाहीं दिहस। ²³मइँ ओनका सिरिफ इ आदेस दिहेउँ, ‘मोरी आग्या क पालन करा अउर मइँ तोहार पचन्क परमेस्सर रहब तथा तू पचे मोर लोग होब्या। जउन मइँ आदेस देत हउँ उकरा, अउर तोहरे पचन्क बरे सब नीक होइ।’

²⁴“किन्तु तोहार सबन्क पुरखन मोर एक नाहीं सुनेन। उ पचे मोह पइ धियान नाहीं दिहन। उ पचे हठी रहेन अउर उ पचे ओन कामन क किहन जउन उ पचे करइ चाहत रहेन। उ पचे नीक नाहीं बनेन। उ पचे पहिले स भी जियादा बुरे बनेन, उ पचे पाछे क गएन, अगवा नाहीं बढ़ेन। ²⁵ओ दिन स जउने दिन तोहरे सबन्क पुरखन मिस्र तजेन आजु तलक मइँ आपन सेवकन क तोहरे पचन्क लगे पठएउँ ह। मोरे सेवक नबी अहइँ। मइँ ओनका तोहरे सबन्क लगे बराबर पठएउँ। ²⁶मुला तोहार पचन्क पुरखन मोर अनसुनी किहन। उ पचे मोह पइ धियान नाहीं दिहन। उ पचे बहोत हठी रहेन, अउर उ पचे बहोत जिद्दी रहेन, अउर उ पचे आपन पुरखन स भी बढ़िके बुराइयन किहन।

²⁷“यिर्मयाह, तू यहूदा क लोगन स इ सबइ बातन कहब्या। किन्तु उ पचे तोहार पचन्क एक न सुनिहीं। तू पचे ओनसे बातन करब्या मुला उ पचे तू पचन्क जवाब नाहीं देइहीं। ²⁸एह बरे तोहका ओनसे इ सबइ बातन कहइ चाही: ‘इ उ रास्ट्र अहइ जउन यहोवा आपन परमेस्सर क आग्या क पालन नाहीं किहस। इ सबइ लोग परमेस्सर क सिच्छन क अनसुनी किहन। इ सबइ लोग सच्ची सिच्छन क नाहीं जानतेन।’

हत्या घाटी

²⁹“यिर्मयाह, अपने बारन क काट डावा अउर एका लोकाइ द्या। पहाड़ी क नंगी चोटी पइ चढ़ा अउर रोवा चिचियाअ। काहेकि यहोवा इ पीढ़ी क लोगन क दुत्कार दिहेस ह। यहोवा एन लोगन स आपन पीठ मोड़ लिहस ह अउर उ किरोध मँ एनका सजा देइ। ³⁰इ सबइ करा काहेकि मइँ यहूदा क लोगन क पाप करत लखेउँ ह।” इ सँदेसा यहोवा क अहइ। “उ पचे आपन देवमूर्तियन क स्थापना किहेन ह अउर मइँ ओन देवमूर्तियन स घिना करत हउँ। उ पचे देवमूर्तियन क उ मन्दिर मँ स्थापित किहेन ह जउन मोरे नाउँ स अहइ। उ पचे मोरे मन्दिर क ‘गन्दा’ कइ दिहन ह। ³¹यहूदा क उ सबइ लोग बेन हिन्नोम घाटी मँ तोपेत क उच्च स्थान बनाए अहइँ। ओन ठउरन पइ लोग आपन पूत-बिटियन क मार डावत रहेन, उ पचे ओनका बलि क रूप मँ बार देत रहेन। इ अइसा अहइ जेकरे बरे मइँ कबहुँ आदेस नाहीं दिहेउँ। इ तरह क बात कबहुँ मोरे मन मँ आई ही नाहीं। ³²एह बरे मइँ तू पचन्क चितउनी देत हउँ। उ सबइ दिन आवत अहइँ।” इ सँदेसा यहोवा क अहइ, “जब लोग इ ठउरे क तोपेत या बेन हिन्नोम क घाटी फुन नाहीं कहिहीं। नाहीं, उ पचे एका हत्याघाटी कहिहीं। उ पचे एका इ नाउँ एह बरे देइहीं कि उ पचे तोपेत मँ एतने मनइयन क दफनइहीं कि ओनके बरे कउनो दूसर क दफनावइ क जगह नाहीं बची। ³³तब लोगन क ल्हास जमीन क ऊपर पड़ा रइहीं अउर अकासे क पंछियन क चारा होइहीं। ओन लोगन क तने क जंगली जनावर खइहीं। हुआँ ओन पंछियन अउर जनावरन क भगावइ बरे कउनो मनई जिअत नाहीं बची। ³⁴मइँ आनन्द अउर खुसी क कहकहन क यहूदा क नगरन अउर यरूसलेम क सड़कियन पइ खतम कइ देब। यहूदा अउ यरूसलेम मँ दुलहिन अउ दुल्हा क हँसी-ठिठोली अब स अगवा नाहीं सुनाई पड़ी। पूरा पहँटा सूना रेगिस्तान बन जाइ।”

रोमियन 4:13-25

बिसवास अउर परमेस्सर क बचन

¹³इब्राहीम या ओकर बंसजन क इ बचन कि उ पचे संसार क उत्तराधिकारी होइहीं, व्यवस्था स नाहीं मिला रहा बल्कि उ धार्मिकता स मिला रहा जउन बिसवास क जरिये पैदा होत ह। ¹⁴अगर जे व्यवस्था क मानत ही, उ जगत क उत्तराधिकारी अहइँ तउ बिसवास क कउनउ मतलब नाहीं रहत ह अउर परमेस्सर की प्रतिग्या बेकार होइ जात ह। ¹⁵लोगन के जरिये व्यवस्था क पालन न किहे जाइसे परमेस्सर क किरोध उपजत ह परन्तु जहाँ व्यवस्था इ नाहीं बा उहाँ व्यवस्था क तोड़बइ का?

¹⁶इही बरे सिद्ध अहइ कि परमेस्सर क प्रतिग्या बिसवास क फल अहइ (अउर यह सेंतमेत मँ ही मिलत बाटइ।) सो ओकर प्रतिग्या इब्राहीम क सबहिं बंसजन क बरे सुनिस्चित बा, न केवल ओनके बरे जे व्यवस्था पर बिसवास करत हीं बल्कि ओन सबक बरे भी जउन इब्राहीम क समान बिसवास रखत हीं। उ हम सबका पिता अहइ। ¹⁷पवित्तर सास्तरन बतावत ह, “मइँ तोहका (इब्राहीम) कइयउ रास्ट्र क पिता बनाएउँ।”^(A) उ परमेस्सर क दिस्टी मँ उ इब्राहीम हमार पिता अहइ जेह पर ओकर बिसवास बा। परमेस्सर जउन मरे हुवन क जीवन देत ह, अउर जो वस्तुअन अहइँ ही नहीं, ओनकर नाम अइसे लेत है जइसे मानों उ अहइँ।

¹⁸सभन मनइयन क आसा क विरुद्ध अपने मने मँ आसा सँजोंए भए इब्राहीम ओहमें बिसवास किहेस इही बरे उ कहा गवा क अनुसार कइयउ रास्ट्र क पिता बना। “तोहार अनगिनत बंसज होइहीं।”^(B) ¹⁹इब्राहीम लगभग एक सौ बरिस क होइ गवा रहा, अउर ओकर सरीर बच्चा पइदा करे जोग्ग नाहीं रहा। सारा भी बच्चा पइदा नाहीं कइ सकत रही। एह बारे सोचेस, लेकिन ओकर बिसवास डगमागात नाहीं। ²⁰परमेस्सर क बचन मँ बिसवास बनाए रखेस एतना ही नाहीं बिसवास क अउर मजबूत करत भवा परमेस्सर क महिमा दिहेस। ²¹ओका पूरा भरोसा रहा कि परमेस्सर ओका जउन बचन दइ दिहेस ओका पूरा करइ मँ पूरे तरह समरथ बा। ²²इही बरे, “इ बिसवास ओकर धार्मिकता गिना गवा।” ²³पवित्तर सास्तर क इ बचन कि बिसवास ओकर धार्मिकता गिना गवा, केवल ओनके बरे बा ²⁴बल्कि हमरे बरे भी बा परमेस्सर हमका, जउन ओहमाँ बिसवास रखत हीं, धार्मिकता स्वीकार करी। काहेकि हम बिसवास करत ह कि उ हमार पर्भू ईसू मसीह क फिन स जिन्दा किहेस। ²⁵ईसू, जेका हमरे पापन क बरे मारा जाइ क सौंपा गवा अउर हमका धर्मी बनावइ क बरे, मरा हुवन मँ स फिन स जिन्दा कीन्ह गवा।

यूहन्ना 7:37-52

ईसू पवित्तर आतिमा क उपदेस दिहेस

³⁷त्यौहार क आखिरी अउर जरूरी दिन ईसू ठाढ़ भवा अउर ऊँची आवाज मँ कहेस, “अगर कउनो पियासा अहइ तउ मोरे पास आवइ अउर पियइ। ³⁸जउन मनई मोरे मँ बिसवास करत ह, जइसा कि पवित्तर सास्तर मँ लिखा अहइ, ओकरे पवित्तर आतिमा स जीवन जल क नदियन फूट पड़िहइँ।” ³⁹ईसू इ पवित्तर आतिमा क बारे मँ बताए रहा। जेहिका उ पचे पइहीं जउन ओहमा बिसवास करत हीं, उ पवित्तर आतिमा अबहीं तलक नाहीं दीन्ह गइ अहइ, काहेकि ईसू अबहीं तलक महिमावान नाहीं भवा अहइ।

ईसू क बारे मँ लोगन क बातचीत

⁴⁰भीड़ क कछू मनई जउन इ सुनेन तउ कहइ लागेन, “इ मनई सच मँ नबी अहइ।”

⁴¹कछू अउर मनई कहत रहेन, “इहइ मनई मसीह अहइ।”

कछू अउर मनई कहत रहेन, “मसीह गलील स न आई। का इ होइ सकत ह? ⁴²का पवित्तर सास्तर मँ नाहीं लिखा अहइ कि मसीह दाऊद क लरिका होई अउर बैतलहम स आई जउने सहर मँ दाऊद रहत रहा।” ⁴³ऍह तरह स ईसू क मनइयन मँ सब मनइयन क बीच मँ फूट पड़ि गइ। ⁴⁴कछू लोग ओका बन्दी बनावा चाहत रहेन मुला कउनो ओकरे प हाथ नाहीं डाएन।

यहूदी नेतन क अबिसवास

⁴⁵इ बरे मन्दिर क सिपाही मुख्ययाजक अउर फरीसियन क पास लौट आएन। एहि पइ ओनसे पूछा गवा, “तू ओका पकरिके काहे नाहीं लाया?”

⁴⁶सिपाहियन क जवाब रहा, “कउनो मनई आज तक अइसे नाहीं बोला, जइसे उ बोलत ह!”

⁴⁷ऍहि पइ फरीसियन ओनसे कहेन, “का तू पचे भरमाइ ग अहा? ⁴⁸कउनो यहूदी नेता या फरिसियन ओकरे मँ कबहुँ बिसवास नाहीं करे अहइँ। ⁴⁹मुला जउन मनइयन क व्यवस्था क जानकारी नाहीं अहइ, परमेस्सर ओनका सराप देत ह।”

⁵⁰नीकुदेमुस ओनसे कहेस इ उहइ रहा जउन पहिले ईसू क पास गवा रहा, इ ओन फरीसियन मँ स एक ठु अहइ, ⁵¹“हमार व्यवस्था क तब तलक कउनो क दोखी नाहीं ठहरावत जब तलक ओका सुनि नाहीं लेत अउर इ पता नाहीं लगाइ लेत कि उ कउन करम करे अहइ।”

⁵²ऍकरे जवाब मँ उ पचे ओसे कहेन, “का तू भी गलील क अह्या? सास्तर क पढ़े स पता चलत ह कि गलील स कउनो नबी कबहूँ नाहीं आई।”

Awadhi Bible: Easy-to-Read Version (ERV-AWA)

Prev Day

Top

Next Day

Use the calendar to view readings from this devotional.

Book of Common Prayer

आसाफ क एक कलात्मक।

Footnotes

यहोवा बलि क अपेच्छा, आपन आग्या क पालन जियादा चाहत ह

हत्या घाटी

बिसवास अउर परमेस्सर क बचन

Cross references

ईसू पवित्तर आतिमा क उपदेस दिहेस

ईसू क बारे मँ लोगन क बातचीत

यहूदी नेतन क अबिसवास

Use the calendar to view readings from this devotional.

Log in to read this devotional and:

Book of Common Prayer

आसाफ क एक कलात्मक।

Footnotes

यहोवा बलि क अपेच्छा, आपन आग्या क पालन जियादा चाहत ह

हत्या घाटी

बिसवास अउर परमेस्सर क बचन

Cross references

ईसू पवित्तर आतिमा क उपदेस दिहेस

ईसू क बारे मँ लोगन क बातचीत

यहूदी नेतन क अबिसवास