◀ All Reading Plans / Book of Common Prayer / Ps. 101 109:1–4 (5–19) 20–30; Ps. 119:121–144; Isa. 63:15—64:9; 1 Tim. 3:1–16; Mark 11:27—12:12 (Awadhi Bible: Easy-to-Read Version)

Prev Day

February 15, 2023

Next Day

Use the calendar to view readings from this devotional.

February 2023
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 101

दाऊद क एक ठु गीत।

¹मइँ पिरेम अउ खरेपन क गीत गाउब।
    यहोवा मइँ तोहरे बरे गाउब।
²मइँ पूरी सावधानी स सुद्ध जिन्नगी बिताउब।
    मइँ आपन घर मँ सुद्ध जिन्नगी जिअब।
    हे यहोवा तू मोरे लगे कब अउब्या?
³मइँ कउनो भी बियर्थ मूरति समन्वा नाहीं राखब।
    जब लोग तोहार खिलाफ विद्रोह करत हीं तउ मइँ इ स घिना करत हउँ।
    मइँ कबहुँ भी एकर हिस्सा नाहीं बनब।
⁴मइँ इमानदार रहब।
    मइँ बुरा काम स कबहुँ सम्बंध नाहीं राखब।
⁵अगर कउनो मनई छिप छिपके आपन पड़ोसी बरे चुगली कहइ,
    मइँ ओनका रोकब।
मइँ डींग हाँकइवाला
    अउर महत्वाकांच्छी व्यक्तियन क सहन नाहीं करब।

⁶मइँ आपन संग काम करई बरे बिस्सासी लोगन क दूढ़ता हउँ।
    सिरिफ ओन लोग मोर सेवक होइ सकत हीं
    जउन इमानदारी स जिन्नगी जिअत हीं।
⁷मइँ आपन घरे मँ अइसे लोगन क रहइ नाहीं देब जउन झूठ बोलत हीं।
    मइँ झूठ लोगन क आपन लगे भी फटकइ नाहीं देब।
⁸मइँ ओन दुट्ठन क सदा ही नस्ट करब, जउन इ देस मँ रहत हीं।
    मइँ ओन दुट्ठ लोगन क मजबूर करब, कि उ पचे यहोवा क नगर क तजि देइँ।

भजन संहिता 109:1-30

संगीत निदेर्सक बरे दाऊद क एक ठु स्तुति गीत।

¹हे परमेस्सर, जब मइँ तोहरे आगे पराथना करउँ
    तउ चुप नाहीं रह्या।
²लोग मोरे बारे मँ बुरी बातन अउ झूठ बोलत ह।
    उ पचे मोरे बारे मँ उ सबइ कहत अहइँ जउन फुरइ नाहीं बाटइ।
³लोग मोरे बारे मँ घिना स बोलत अहइँ।
    उ पचे मोर खिलाफ बिना कारण हमला करत हीं।
⁴मइँ ओनका पिरेम किहेउँ, फिर भी उ पचे मोहसे दुस्मनी करत हीं।
    जद्यपि मइँ पराथना मँ वफ़ादार हउँ।
⁵मइँ ओन मनइयन क संग भला किहे रहेउँ।
    मुला उ पचे मोरे बरे बुरा करत अहइँ।
मइँ ओनसे पिरेम किहेउँ,
    मुला उ पचे मोसे बइर रखत अहइँ।

⁶ओकरे खिलाफ एक ठु दुट्ठ मनई क नियुक्त करा,
    अउर कउनो दोख लगवइया ओका दोख लगावइ बरे ओकरे बगल मँ खड़ा करा।
⁷ओनमाँ दोख पावइ द्या जब उ अदालत मँ निआउ पइहीं,
    ओकर पराथना क ओकरे पाप क सबूत होइ द्या।
⁸मोर दुस्मन क हाली मरि जाइ द्या।
    ओकरे क जगह कउनो दूसर क लेइ द्या।
⁹मोरे दुस्मनन क सन्तानन क अनाथ कइ द्या अउर ओकरी पत्नी क तू राँड़ कइ द्या।
¹⁰ओनका आवारा अउर भिखारी होइ द्या,
    अउर ओनका आस्रय क खोज तब तलक करइ द्या जब तलक कि ओकर आपन घर बर्बाद न होइ जाइँ।
¹¹मोरे दुस्मन कर्जदार लोगन क जउन कछू मोर दुस्मन क लगे होइँ लइ जाइ द्या।
    अजनबियन क ओकर मेहनत क कमाइ क लूटिके जाइ द्या।
¹²कउनो मनई क मोरे दुस्मन पइ कउनो दाया न देखाँवइ।
    अउर ओकरे अनाथ गदेलन पइ कउनो भी मनई दाया नाहीं देखाँवइ।
¹³मोर दुस्मन क सन्तानन बर्बाद कइ द्या।
    आवइवाली पीढ़ी स ओकर नाउँ मिटइ द्या।
¹⁴मोरे दुस्मन क पुरखन क पापन क परमेस्सर सदा ही याद राखइ।
    ओकरे महतारी क पापन न मेटाइ।
¹⁵यहोवा सदा ही ओन पापन क याद रखी।
    अउर उ लोगन बरे मोरे दुस्मन क बिसिरइ क कारण होइ।
¹⁶काहेकि दुट्ठ लोगन कउनो भी अच्छा करम कबहुँ नाहीं किहेन
    अउर उ लोगन क बिना आसा क मउत मँ धकेल दिहा।
    उ दीन लोगन असहाय लोगन क जिअब कठिन बनाइ दिहा।
¹⁷ओन दुट्ठ लोगन क सरापब भावत रहा।
    तउ अहइ सराप ओह पइ लउटिके गिर जाइ।
उ बुरा मनई असीस कबहुँ नाहीं दिहस कि लोगन बरे कउनो अच्छी बात घटइ।
    तउ ओकरे संग कउनो भी भली बात मत होइ द्या।
¹⁸सराप ओकरे बरे ओढ़नन क नाईं होइ।
    सराप ओकरे सरीर मँ पानी क नाईं भरि जाइ।
अउर सराप ओकरे हड्डियन मँ
    चर्बी क नाईं रहइ।
¹⁹उ दुट्ठ मनई बरे सराप क ओढ़ना बनी द्या।
    सराप क ओकरे बरे हमेसा बरे कमर बन्द बनइ द्या।

²⁰यहोवा मोहे पइ दोख लगावइवालन क अउर ओन लोगन क जउन मोरे खिलाफ बुरा जोजना बनावत ह क,
    उ सबइ चिजियन क भुगतान क रूप मँ देइ द्या।
²¹किन्तु हे यहोवा, तू मोर सुआमी अहा।
    तउ मोरे संग अइसा बेउहार करा जेहसे तोहरे नाउँ क जस बाढ़इ।
    तोहार करुणा महान अहइ, तउ मोर रच्छा करा।
²²काहेकि मइँ बस एक गरीब अउर असहाय व्यक्ति अहउँ।
    मइँ फुरइ दुःखी अहउँ।
²³मोका अइसा लागत बाटइ जइसे मोर जिन्नगी साँझ क समइ क लम्बी छाया क तरह बीति चुकी बाटइ।
    मोका अइसा लागत रहा मइँ महसूस करत हउँ कि मइँ किरवा क नाईं हउँ जउन मोका हिराइ दिहेस ह।
²⁴उपवास क कारण मोर घुटना दुर्बल होइ ग अहइँ।
    मोर वजन घटत ही जात अहइ, अउर मइँ झुरान जात अहउँ।
²⁵बुरे लोग मोका अपमानित करत हीं।
    उ पचे मोका घूरत अउ आपन मूँड़ी मटकावत हीं।
²⁶यहोवा मोर परमेस्सर, मोका सहारा द्या।
    आपन बिस्ससनीय पिरेम देखाँवा अउर मोका बचाइ ल्या।
²⁷फुन उ पचे लोग जान जइहीं कि तू ही मोका बचाया ह।
    ओनका पता चल जाइ कि उ तोहार सक्ति रही जउन मोका सहारा दिहस।
²⁸यद्यपि दुट्ठ लोग मोका सराप देत ह, हे यहोवा तू मोका आसीर्बाद दे।
    यद्यपि उ पचे मोह पइ वार करत हीं, ओनका अपमानित होइ द्या।
    किन्तु तोहार सेवक क खुस होइ द्या।
²⁹मोर बिरोधियन क अपमान स ढाँपि लेइ द्या।
    ओनका लज्जा स घेरी लेइ द्या।
³⁰मइँ यहोवा क बहोत अधिक धन्यवाद देत हउँ।
    बहोत लोगन क समन्वा ओकर गुण गावत हँउ।

भजन संहिता 119:121-144

ऐन

¹²¹मइँ उ सबइ बातन किहेउँ ह जउन नीक अउर खरा अहइँ।
    हे यहोवा, तू मोका अइसेन ओन लोगन क जिन सौंपा जउन मोका हानि पहोंचावइ चाहत हीं।
¹²²मोका वचन द्या कि तू मोरे बरे अच्छा करब्या।
    मइँ तोहार दास अहउँ।
    हे यहोवा, अहंकारी लोगन क मोह पइ अत्याचार जिन करइ द्या।
¹²³हे यहोवा, तू आपन अच्छाई स मोका वचन दिहे रह्या कि तू मोर मदद करब्या।
    मुला मोर आँखी तोहार राह निहारत भए थकी गइन।
¹²⁴तू आपन बिस्ससनीय पिरेम मोह पइ परगट करा।
    मइँ तोहार दास हउँ।
    तू मोका आपन विधान क सिच्छा द्या।
¹²⁵मइँ तोहार सेवक हउँ।
    आपन विवेक स मोका आसीस द्या तउ मइँ तोहार करार क समुझ सकेउँ।
¹²⁶कार्यवाही करा, हे यहोवा,
    काहेकि ओन लोग तोहरे कानून क नाफ़रमानी करत हीं।
¹²⁷हे यहोवा, उत्तिम सुवर्ण स भी जियादा
    मोका तोहार आदेस भावत हीं।
¹²⁸तोहरे सब उपदेसन क बहोत सावधानी स मइँ पालन करत हउँ।
    मइँ सबइ झूठे रास्तन स घिना करत हउँ।

पे

¹²⁹हे यहोवा, तोहार करार अद्भुत बा।
    एह बरे मइँ ओकर अनुसरण करत हउँ।
¹³⁰तोहार वचन क व्याख्या प्रकास लावत ह।
    तोहार सिच्छन बुद्धिहीन लोगन क समुझ देत ह।
¹³¹हे यहोवा, मइँ तोहरे आदेसन क पालन करइ इच्छुक हउँ।
    मइँ दौड़वालन क नाईं हाँफब।
¹³²हे परमेस्सर, मोरी कइँती निगाह करा अउर मोह पइ दयालु ह्वा।
    तू ओन लोगन बरे वइसा ही करा जउन ओकरे बरे नीक अहइ जउन तोहार नाउँ स पिरेम किया करत हीं।
¹³³हे यहोवा, मोका ओन लोगन स बचाइ ल्या जउन मोका दुःख देत हीं
    अउर मइँ तोहरे आदेसन क पालन करब।
¹³⁴हे यहोवा मोका ओन आदेसन स बचाइ ल्या जउन मोका दुःख देत हीं।
    अउर मइँ तोहरे आदेसन क पालन करब।
¹³⁵हे यहोवा, आपन सेवक पइ दाया दिखावा
    अउर आपन विधान तू मोका सिखावा।
¹³⁶रोवत रोवत आँसुअन क एक नदी मइँ बहाइ चुका हउँ।
    काहेकि लोग तोहरी सिच्छन क पालन नाहीं करत अहइँ।

सादे

¹³⁷हे यहोवा, तू सच्चा अहा
    अउर तोहार फइसला खरा अहइँ।
¹³⁸उ सबइ चिजियन उत्तिम अहइँ जउन तू हमका करार मँ दिहा।
    हम पूरी तरह स तोहरे विधान क भरोसे रहि सकित ह।
¹³⁹तोहरे बरे मोर धुन मोका बर्बाद करत ह।
    मइँ बहोत बेचैन हउँ, काहेकि मोर दुस्मन लोग तोहरे वचन क बिसराइ दिहन।
¹⁴⁰हे यहोवा, तोहार वचन प्रमाणित अउर फुरइ अउर सच्चा बाटइ,
    अउर मइँ तोहार सेवक एहसे पिरेम करत हउँ।
¹⁴¹मइँ एक महत्वहीन हउँ अउर लोग मोर आदर नाहीं करत बाटेन।
    मुला मइँ तोहरे उपदेसन क बिसरत नाहीं अहउँ।
¹⁴²हे यहोवा, तोहार अच्छाई अनन्त अहइ।
    तोहरे सिच्छन क भरोसे रहा जाइ सकत ह।
¹⁴³संकट अउर परेसानी मोका घेरि लिहेस ह।
    मुला, मइँ तोहार उपदेसन क नाहीं बिसारे रहेउँ।
¹⁴⁴तोहार करार हमेसा नीक बाटइ।
    एका समुझइ मँ मोर सहायता करा ताकि मइँ जी सकउँ।

यसायाह 63:15-64:9

ओकरे लोगन क मदद बरे यहोवा स पराथना

¹⁵हे यहोवा, तू अकासे स खाले लखा ओन बातन क लखा जउन घटत अहइँ।
    तू हमका आपन महान पवित्तर घरे स जउन अकासे मँ अहइ, खाले लखा।
तोहार सुदृढ़ पिरेम हमरे बरे कहाँ अहइँ?
    तोहार सक्तिसाली कार्य कहाँ अहइ?
तोहार हिरदय क पिरेम कहाँ अहइ?
    मोरे बरे तोहार कृपा कहाँ अहइ?
    तू आपन करूण पिरेम मोहसे कहाँ छुपाइ रखा अहइ?
¹⁶लखा, तू हमार पिता अहा!
    होइ सकत ह इब्राहीम हम पच क नाहीं पहिचान सकी।
    होइ सकत ह इस्राएल हमका नाहीं जान सकी कि हम पचे कउन अहउँ।
किन्तु यहोवा तू हमार पिता अहा।
    तू उहइ यहोवा अहइ जउन हमका सदा छोड़ाएस ह!
¹⁷हे यहोवा, तू हमका आपन स दूर काहे ढकेलत अहा?
    तू हमरे बरे आपन अनुसरण करइ क काहे कठिन बनावत अहा?
यहोवा तू हमरे लगे लउटि आवा।
    हम तउ तोहार दास अही।
हमरे पास आवा अउर हमका सहारा द्या।
    हमार परिवार तोहार अहइँ।
¹⁸थोड़े समय बरे हमार दुस्मनन तोहार पवित्तर लोगन पइ कब्जा कइ लिहे रहेन।
    हमार दुस्मनन तोहरे मन्दिर क कुचरि दिहे रहेन।
¹⁹कछू लोग तोहार अनुसरण नाहीं करत हीं।
    उ पचे तोहरे नाउँ क धारण नाहीं करत हीं।
जइसे उ सबइ लोग
    हम भी वइसे हुआ करत रहे।

64 जदि तू अकास चीरिके धरती पइ खाले उतरि आवा
    तउ सब कछू ही बदल जाइ।
    तोहरे समन्वा पर्वत टेघर जाइ।
²पहाड़न मँ लपट उठिहीं। उ सबइ अइसे बरिहीं जइसे झाड़ियन बरत हीं।
    पहाड़ अइसे उबलिहीं जइसे उबलत पानी आगी पइ रखा गवा होइ।
तब तोहार दुस्मन तोहरे बारे मँ समुझिहीं।
    जब सबहिं जातियन तोहका लखिहीं तब उ पचे भय स थर-थर काँपिहीं।
³किन्तु हम फुरइ नाहीं चाहित ह
    कि तू अइसे कामन क करा कि तोहरे समन्वा पहाड़ पिघल जाइ।
⁴फुरइ तोहार ही लोग तोहार कबहुँ नाहीं सुनेन।
    जउन कछू तू बातन कहया फुरइ तोहार ही लोग ओनका कबहुँ नाहीं सुनेन।
तोहार जइसा परमेस्सर कउनो भी नाहीं लखेस।
    कउनो भी दूसर परमेस्सर नाहीं, बस सिरिफ तू ही अहा।
जदि लोग धीरा धइके तोहरे सहारे क बाट जोहत रहइँ,
    तू ओनके बरे बड़े काम कइ देब्या।

⁵जेनका अच्छे काम करइ मँ मजा आवत ह, तू ओन लोगन क संग अहा।
    उ सबइ लोग तोहरे जिन्नगी क रीति क याद करत हीं।
पर लखा, बीते दिनन मँ हम तोहरे विरूद्ध पाप किहा ह।
    एह बरे तू हमके कोहाइ ग रह्या।
    अब भला कइसे हमार रच्छा होइ?
⁶हम सबहिं पाप स मैला अही।
    हमार सब “नेकी” पुरान गन्दे कपड़न स अहइ।
हम झुरान मुरझाए पत्तन स अही।
    हमार पाप हमका आँधी स उड़ाये अहइ।
⁷हम तोहार उपासना नाहीं करित ह।
हम का तोहरे नाउँ मँ बिस्सास नाहीं अहइ।
    हम मँ स कउनो तोहार अनुसरण करइ क उत्साही नाहीं अहइ।
एह बरे तू हमस मुँह मोड़ लिहा ह।
    काहेकि हम पाप स भरा अही एह बरे हम तोहरे समन्वा असमर्थ अही।
⁸किन्तु, यहोवा तू हमार पिता अहा।
    हम माटी क लौंदा अही अउर तू कोमहार अहा।
    तोहरे ही हाथन हम सबक रचा ह।
⁹हे यहोवा, तू हमेसा कुपित जिन बना रहा।
    तू हमरे पापन क सदा ही याद जिन रखा।
कृपा कइके तू हमरी कइँती लखा।
    हम तोहार ही लोग अही।

1 तीमुथियुस 3

कलीसिया क निरीच्छक

3 इ एक बिसवास करइ जोग्ग कथन बा कि अगर केउ निरिच्छक बनइ चाहत ह तउ उ एक अच्छे कामे क इच्छा रखत ह। ²अब देखा ओका एक अइसी जिन्नगी जिअइ चाही जेकर लोग निआव स भरी आलोचना न कइ पावइँ। ओकर एकई पत्नी होइ चाही, ओका आत्मसंयमी, सुसील अउर अतिथि सत्कार करइवाला अउर सिच्छा देइ मँ निपुण होइ चाही। ओका पइसा क पिरेमी न होइ चाही। ³ओका पियक्कड़ न होइ चाही, न तउ ओका झगड़ालू होइ चाही। ओका तउ सज्जन अउर सान्ति प्रेमी होइ चाही। ओका पैसे का पिरेमी न होइ चाही। ⁴अपने परिवारे क उ अच्छा प्रबन्धक होइ अउर ओनकर बच्चन ओरके कब्जे मँ रहत रहइँ। ओकर पूरा सम्मान करत होइँ। ⁵अगर केउ अपने परिवारे क प्रबन्ध करइ नाहीं जानत तउ उ परमेस्सर क कलीसिया क प्रबन्ध कइसे कइ पाई?

⁶उ एक नवा बिसवासी न होइ चाही ताकि उ अहंकार स फूलि न जाइ। अउर ओका सइतान क जइसा दण्ड पावइ पड़इ। ⁷एकरे अलावा बाहेर क लोगन मँ भी ओकर अच्छी इज्जत होइ चाही ताकि उ कउनउ आलोचना मँ फँसिके सइतान क फंदा मँ न पड़ि जाइ।

कलीसिया क सेवक

⁸इही तरह कलीसिया क सेवकन केउ आदरणीय होइ चाही अउ ओका अउर दु मुँहा न होइ चाही। ओकर मदिरापान मँ रुचि न होई चाही। बुरे रस्तन स ओनका धन कमाइ क इच्छुक न होइ चाही। ⁹ओनका तउ पवित्तर मने स हमरे अभिव्यक्त सत्यन क थामे रखइ चाहे। ¹⁰ऐन्हेऊ क पहिले निरीच्छकन क समान परखा जाइ चाही फिन अगर ओनके विरोध मँ कछू आपत्ति न होइ तबहिं एनका कलीसिया क सेवकन क न रूप मँ सेवा काम करइ देइ चाही।

¹¹इही तरह स्त्रीयन क भी सम्मान क जोग्ग होइ चाही। ओनका निंदक न होइ चाही। बल्कि सालीन अउर सब तरह स भरोसा करइवाली होइ चाही।

¹²कलीसिया क सेवक क केवल एक्कई पत्नी होइ चाही अउर ओका आपन बाल बच्चन अउर अपने घरारन क अच्छा प्रबन्धक होइ चाही। ¹³काहेकि अगर क कलीसिया क अइसेन सेवक क रूप मँ होइहीं जउन अच्छा सेवा प्रदान करत हीं, तउ उ पचे अपने बरे सम्मान स भरा स्थान अर्जित करिहीं। मसीह ईसू क बरे बिसवासे मँ जरूरइ ओनकइ आस्था होई।

हमार जीवन क रहस्य

¹⁴मइँ इ आसा क साथे तोहे इ बातन क लिखत हउँ कि जल्दी ही तोहरे लगे आउबइ। ¹⁵अगर मोका आवइ मँ समइ लग जाइ तउ तोहे सबन क पता रहइ कि परमेस्सर क परिवारे मँ, जउन सजीव परमेस्सर क कलीसिया बा, कउनो क आपन व्यवहार कइसे रखइ चाही। कलीसिया तउ सब क जड़ अउर आधार स्तम्भ अहइ। ¹⁶बिना संदेह क हमरे भक्ति का रहस्य महान बाटइः

उ नर-देह धरे परगट भवा
    आतिमा द्वारा धर्मी प्रमाणित भवा
देखेन ओका सरगदूतन हुआ
    प्रचारित उ राष्ट्रन मँ,
जग तउ ओहपइ बिसवास किहेस,
    अउर उठावा गवा ओका महिमा मँ उप्पर।

मरकुस 11:27-12:12

यहूदी नेतन क ईसू क अधिकारे प संदेह

(मत्ती 21:23-27; लूका 20:1-8)

²⁷फिन उ पचे यरूसलेम लउट आएन। ईसू जब मन्दिर मँ टहरत रहा तउ मुख्ययाजकन, धरम सास्तिरियन, बुजुर्ग यहूदी नेतन ईसू क लगे आएन। ²⁸उ पचे ईसू स कहेन, “हमका बतावा! तू इ कामन क कउने अधिकार स करत बाट्या? कउन तोहका अधिकार दिहेस ह?”

²⁹ईसू ओनसे कहेस, “मइँ तोहसे एक सवाल पूछत हउँ। तू मोरे सवाल क जबाव द्या? तउ मइँ तोहका बताउब कि कउने अधिकारे स मइँ इ काम करत हउँ। ³⁰मोका बतावा: यूहन्ना जउन बपतिस्मा देत रहा, का ओहका सोझे सरगे स या मनई स मिला रहा?”

³¹ईसू क सवाले प उ सब बिचारत बिचारत आपुस मँ कहइ लागेन कि, “जदि हम पचे इ कहित ह, ‘ओका इ सरगे स मिला रहा,’ तउ ईसू कही, ‘फिन तू पचे ओह प बिसवास काहे नाहीं करत्या?’ ³²अउर जदि हम पचे इ कही, ‘उ मनई स पाए रहा’ तउ सब मनई हम प रिसियाइ जइहीं।” (ई नेतन लोग मनइयन स डेरात रहेन। सब मनइयन क बिसवास रहा कि यूहन्ना नबी अहइ।)

³³एह बरे यहूदी नेतन ईसू स कहेन, “हम पचे जानित नाहीं।”

ऍह पइ ईसू ओनसे कहेस, “तउ फिन मइँ तोहका नाहीं बतावत अही कि इ काज मइँ कउने अधिकारे स करत हउँ।”

परमेस्सर आपन पूत क पठएस

(मत्ती 21:33-46; लूका 20:9-19)

12 ईसू दिस्टान्त कथा खोलि के समझावत ओनसे कहइ लाग: “एक मनई अंगूरे क बाग लगाएस अउर ओकरे चारिहुँ कइँती चहरदेवार बनाएस। फिन उ अंगूरे क रस धरइ बरे एक गड़हा खोदेस अउर ओकरे बाद एक ठु बुर्ज खड़ा करेस। फिन उ कछू किसानन क लगाने प दिहस अउ जात्रा प चला गवा।

²“फिन अंगूर पकइ क रितु मँ उ एक ठु नउकर पठएस जेसे उ किसानन स जउन अंगूर पक गवा अहइँ, ओहमाँ स ओकर हींसा लइ आवइ। ³उ मुला उ सबइ नउकर क पकरिके पीटेन, ओका खालि हाथे भगाइ दिहन। ⁴उ एक ठु अउ नउकर हुवाँ पठएस। उ किसानन ओकर मुड़वा फोड़त ओका बेज्जत करेन। ⁵उ फिन एक ठु अउ नउकर पठएस, जेकर उ सब कतल कइ दिहन। उ इ तरह कई ठु नउकरन क पठएस, जेनका उ सब मारेन पीटेन अउर केतनन क मारि डारेन।

⁶“अब ओकरे लगे पठवइ क आपन पियारा बेटवा ही बचा रहि गवा। आखिर उ ओनके लगे इ कहत पठएस, ‘उ पचे मोरे बेटवा क मान सम्मान जरूर कहि रहीं।’

⁷“उ किसानन एक दुसरे स कहेन, ‘इ तउ ओकर वारिस अहइ। आवा, ऍका मारि डाइ। अइसे हम पचे एकर वारिस होई जाब।’ ⁸उ सबइ ओका पकरिके मारि डाएन अउर ओका अंगूर क बागे स बाहेर फेंके दिहन।

⁹“एह पइ अंगूर क बगिया क मालिक का करी? उ आइके किसानन क मारि डाई अउर बगिया क दुसरे क दइ देई। ¹⁰का तू पचे पवित्तर सास्तर का बचन नहीं बांच्या:

‘उ पाथर जेका राजगीर बेकाम क समझेन
उहइ कोने क पाथर बनि गवा।
¹¹इ पर्भू करेस,
जउन हमरे निगाहे मँ अजूबा बाटइ।’” ^(A)

¹²उ सबइ जान गएन कि जउन दिस्टान्त उ दिहेस ह उ ओकरे खिलाफ रहा। तउ उ पचे ओका गिरफतार करइके कउनो कुचाल खोजइ लागेन, मुला उ पचे मनइयन स डेरात रहेन। एह बरे ओका तजि के गएन।

Awadhi Bible: Easy-to-Read Version (ERV-AWA)