Book of Common Prayer

⁵ हे परमेस्सर, तू मोर उ मन्नत सुन्या ह, जेका तोहे पइ चढ़ाउब,
    मुला तोहरे मनवइयन क लगे हर वस्तु ओनका तोहसे ही मिली अहइँ।
⁶ राजा क लम्बी उमर देइ।
    ओका हमेसा जिअइ द्या।
⁷ ओका सदा परमेस्सर क आसीर्बाद मँ बना रहइ द्या।
    ओकर रच्छा बिस्ससनीय पिरेम अउ दयालुता स करा।
⁸ मइँ तोहरे नाउँ क गुण सदा गाउब।
    ओन बातन क करब जेनका करइ क वचन मइँ दिहेउँ ह।

³ तू मोह पइ कब तलक वार करत रहब्या?
    मइँ एक ठु निहुरी देवार क नाईं होइ गवा हउँ,
अउर एक बाड़ा जइसा
    जउन भहराइ वाला अहइ।
⁴ उ सबइ लोग मोरे नास क कुचक्र रचत अहइँ।
    मोरे बारे मँ उ सबइ झूठी बातन बनावत अहइँ।
लोगन क बीच मँ,
    उ पचे मोर बड़कई करतेन,
    मुला उ पचे मोका लुकान-छिपान कोसत हीं।

⁵ मोर प्राण सान्ति स परमेस्सर क बाट जोहत अहा
    काहेकि सिरिफ उ ही मोर उद्धार क आसा अहइ।
⁶ परमेस्सर मोर गढ़ अहइ, परमेस्सर मोका बचावत ह।
    ऊँच पर्वत मँ परमेस्सर मोर सुरच्छा स्थल अहइ।
⁷ महिमा अउ विजय, मोका परमेस्सर स मिलत ह।
    उ मोर सुदृढ़ गढ़ अहइ, परमेस्सर मोर सुरच्छा स्थल अहइ।
⁸ लोगो, परमेस्सर पइ हर घड़ी भरोसा राखा।
    आपन सबइ समस्या परमेस्सर स कहा।
    परमेस्सर हमार सुरच्छा स्थल अहइ।

⁹ फुरइ लोग कउनो मदद नाहीं कइ सकतेन।
    फुरइ तू ओनके भरोसे मदद पावइ क नाहीं रहि सकत्या।
परमेस्सर क तुलना मँ
    उ पचे हवा क झोंका क नाईं अहइँ।
¹⁰ तू बल पइ भरोसा जिन रक्खा कि तू सक्ति क संग चिजियन क छोर लेब्या।
    जिन सोचा तू पचन्क चोरी करइ स कउनो लाभ होइ।
अउर अगर धनवान भी होइ जाइ
    तउ कबहुँ दौलत पइ भरोसा जिन करा कि उ तू पचन्क बचाई लेइ।
¹¹ एक ठु बात अइसी अहइ जउन परमेस्सर कहत ह जेकरे भरोसे तू फुरइ रहि सकत अहा:
    “सक्ती परमेस्सर स आवत ह!”

¹² मोरे सुआमी, तोहार पिरेम सच्चा अहइ।
    तू कउनो जन क ओकरे ओन कामन क प्रतिफल या सजा देत ह, जेनका उ करत ह।

⁷ हे परमेस्सर, तू आपन मनवइयन क मिस्र स निकार्या,
    अउ रेगिस्तान स पैदर ही पार निकार्या।
⁸ इस्राएल क परमेस्सर जब सिय्योन पर्वत पइ आवा रहा,
    तउ धरती काँप उठी रही, अउ अकास टेघरा रहा।
⁹ हे परमेस्सर, बर्खा क तू पठए रह्या,
    अउ पुरान अउ दुर्बल पड़ी धरती क तू फुन ससक्त किहा।
¹⁰ उहइ धरती पइ तोहार गोरू वापस आइ गएन।
    हे परमेस्सर, हुआँ क दीन लोगन क तू उत्तिम चिजियन दिहा।
¹¹ परमेस्सर हुकुम दिहस
    अउर बहोत लोग सुसंदेस सुनावइ गएन।
¹² “बरिआर राजा लोगन क फउजन एहर ओहर पराइ गइन।
    जुद्ध स जउन चिजियन क फउजी लिआवत हीं, ओनका घरे पइ रुकी मेहररूअन बाँटि लेइही।
    जउन लोग घरे म्ँ रूका बाटेन, उ सबइ उ धने क बाँटि लेइहीं।
¹³ उ सबइ चाँदी स मढ़ा भवा कबूतरे क पखना पइहीं।
    उ सबइ सोना स चमकत भवा पखनन क पइहीं।”

¹⁴ परमेस्सर जब सल्मोन पर्वत पइ दुस्मन राजा लोगन क बिखेर दिहस,
    तउ उ पचे अइसे छितरानेन जइसे बरफ गिरत ह।
¹⁵ बासान पर्वत महान पर्वत अहइ,
    जेकर चोटियन बहोत सी बाटिन।
¹⁶ बासान पर्वत, तू काहे सिय्योन पर्वत क नान्ह समुझत बाट्या?
    परमेस्सर ओहसे पिरेम करत ह।
    परमेस्सर ओका हुआँ सदा रहइ बरे चुनेस ह।
¹⁷ यहोवा पवित्तर पर्वत सिय्योन पइ आवत अहइ।
    अउ ओकरे पाछे कई लाख रथ अहइँ।
¹⁸ उ ऊँचे पइ चढ़ गवा।
    उ बंदियन क अगुआई किहस,
उ मनइयन स हिआँ तलक कि
    आपन विरोधी लोगन स भेंट लिहस।
    यहोवा परमेस्सर हुआँ रहइ गवा।
¹⁹ यहोवा क गुण गावा।
    उ हर दिन हमार, हमरे संग भार उठावइ मँ मदद करत ह।
    परमेस्सर हमार रच्छा करत ह।

²⁰ उ हमार परमेस्सर अहइ।
    उ उहइ परमेस्सर अहइ जउन हमका बचावत ह।
    हमार यहोवा परमेस्सर मउत स हमार रच्छा करत ह।
²¹ परमेस्सर देखाँइ देइ कि आपन दुस्मनन क उ हराइ दिहस ह।
    अइसे ओन मनइयन क जउन ओकरे खिलाफ लड़ेन, उ सजा देइ।
²² मोर सुआमी कहेस, “मइँ बासान स दुस्मन क वापस लिआउब,
    मइँ दुस्मन क समुद्दर क गहराई स वापस लाउब,
²³ ताकि तू ओनकर खून मँ विचरि सका,
    तोहार कूकुरन ओनकर खून चाट जाइँ।”

²⁴ लोग लखत हीं, परमेस्सर क विजय अभियान क अगुआइ करत भए।
    लोग मोरे पवित्तर परमेस्सर, मोरे राजा क अभियान क अगुआई करत लखत हीं।
²⁵ अगवा-अगवा गवइयन क मण्डली चलत ह, पाछे-पाछे वादक लोगन क मण्डली आवति अहइ,
    अउ बीच मँ कुमारियन तम्बूरन बजावति अहइँ।
²⁶ परमेस्सर क बड़कई महासभा क बीच करा।
    इस्राएल क लोगो, तू यहोवा क गुण गावा।
²⁷ नान्ह बिन्यामीन ओनकर अगुआई करत बाटइ।
    यहूदा क बड़का परिवार हुआँ बाटइ।
    जबूलून अउ नपताली क नेता हुआँ पइ अहइँ।

²⁸ हे परमेस्सर, हमका आपन सक्ति देखाँवा।
    हमका उ आपन सक्ति देखाँवा जेकर उपयोग तू हमरे बरे बीते भए जमाने मँ किहे रहा।
²⁹ राजा लोग, जरूसलेम मँ तोहरे मन्दिर क बरे
    निज सम्पत्ति लिअइहीं।
³⁰ ओन “गोरूअन” स काम मनचाहा करावइ बरे
    आपन कुबरी क प्रयोग करा।
ओन जातियन क “बर्धन”
    अउर “गइयन” क आग्या मानइवालन बनावा।
तू जउन रास्ट्रन क जुद्ध मँ हराया।
    अब तू ओनसे चाँदी मँगवाइ ल्या।
³¹ तू ओनसे मिस्र स धन मँगवाइ ल्या।
    हे परमेस्सर, तू आपन धन कूस स मँगवाइ ल्या।
³² धरती क राजा लोगो, परमेस्सर बरे गावा।
    हमरे सुआमी बरे तू जसगान गावा।

³³ परमेस्सर बरे गावा, उ रथे पइ चढ़िके सनातन अकासन स निकरत ह।
    तू ओकरे सक्तीसाली स्वर क सुना।
³⁴ इस्राएल क परमेस्सर,
    तोहरे कउनो भी देवतन स जियादा बलवान अहइ।
    उ जउन निज मनवइयन क सुदृढ़ बनावत ह।
³⁵ परमेस्सर आपन मन्दिर मँ अद्भुत बाटइ।
    इस्राएल क परमेस्सर भक्तन क सक्ति अउ सामरथ देत ह।

परमेस्सर क गुण गावा।

⁹ यरूसलेम तोहार उ सबइ भवन जउन बर्बाद होइ चुके अहइँ फुन स खुस होइ जइहीं।
तू पचे सबहिं आपुस मँ मिलिके आनन्द मनउब्या।
    काहेकि यहोवा यरूसलेम पइ दयालु होइ जाइ, यहोवा आपन लोगन क उद्धार करी।
¹⁰ यहोवा सबहिं रास्ट्रन क ऊपर आपन पवित्तर सक्ति दर्साइ अउर सबहिं उ सबइ देस जउन दूर-दूर बसा अहइँ,
    लखिहीं कि परमेस्सर आपन लोगन क रच्छा कइसे करत ह।

¹¹ तू लोगन क चाही कि बाबुल छोड़ जा।
    उ जगह छोड़ द्या।
हे लोगो, ओन वस्तुअन क लइ चलइवाले जउन उपासना क काम आवति हीं,
    अपने आप क पवित्तर करा।
    अइसी कउनो भी वस्तु जउन पवित्तर नाहीं ओका जिन छुआ।
¹² तू पचे बाबुल तजब्या
    किन्तु हाली मँ तजइ क तू पचन्पइ कउनो दबाव नाहीं होइ।
    तू पचे चलिके बाहेर जाब्या अउर यहोवा तू पचन्क संग संग चली।
तू पचन्क क अगुवाई यहोवा ही करी
    अउर तोहार पचन्क रच्छा बरे इस्राएल क परमेस्सर पाछे-पाछे भी होइ।