◀ All Reading Plans / Book of Common Prayer / Ps. 40 54; Ps. 51; Isa. 50:1–11; Gal. 3:15–22; Mark 6:47–56 (Awadhi Bible: Easy-to-Read Version)

Prev Day

January 27, 2023

Next Day

Use the calendar to view readings from this devotional.

January 2023
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 40

संगीत निर्देसक बरे दाऊद क एक पद।

¹यहोवा क मइँ पुकारेउँ।
    उ मोर सुनेस।
    उ मोर रोदन क सुन लिहस।
²यहोवा मोका विनास क गड़हा स उबारेस।
    उ मोका दलदल गड़हा स उठाएस,
अउर उ मोका चट्टाने पइ बइठाएस।
    उ ही मोरे कदमन क टेकाएस।
³यहोवा मोरे मुँह मँ एक ठु नवा गीत बसाएस।
    परमेस्सर क एक ठु स्तुति गीत।
बहुतेरे लोग लखिहीं जउन मोरे संग भवा ह।
    अउर फुन परमेस्सर क आराधना करिहीं।
    उ पचे यहोवा क बिस्सास करिहीं।
⁴अगर कउनो मनई यहोवा क भरोसे रहत ह, तउ उ मनई सचमुच खुस होइ।
    अउ अगर कउनो मनई मूर्तियन अउ झूठ देवतन क सरण मँ नाहीं जाइ, तउ उ मनई फुरइ खुस होइ।
⁵हमार परमेस्सर यहोवा, तू बहुतेरा अद्भुत काज किहा ह।
    हमरे बरे तोहरे लगे अद्भुत जोजना अहइँ।
कउनो मनई नाहीं जउन ओका गन सकइ।
    मइँ तोहरे कीन्ह काम क बारंबार बखानबउँ।

⁶हे यहोवा, तू मोका इ समुझाया ह:
    तू फुरइ कउनो अन्नबलि अउ पसुबलि नाहीं चाहत रह्या।
    कउनो होमबलि अउ पापबलि तोहका नाहीं चाही।
⁷तउ मइँ कहेउँ, “लखा मइँ आवत हउँ!
    किताबे मँ मोरे बारे मँ इहइ लिखा अहइ।
⁸हे मोरे परमेस्सर, मइँ उहइ करइ चाहत हउँ जउन तू चाहत ह।
    मइँ मनवा मँ तोहरी सिच्छन क बसाइ लिहेउँ।”
⁹मइँ महासभा क बीच लोगन क उद्धार क खुस खबरी कहेउँ।
    हे यहोवा, तू जानत अहा कि एकरे बारे मँ कहइ स डरेउँ नाहीं।
¹⁰मइँ तोहार उद्धार बरे चुप नाहीं रहब।
    हे यहोवा, मइँ तोहार बिस्सासी अउर मुक्ति बरे खुलके बोलेउँ।
मइँ महासभा मँ तोहार बिस्ससनीय पिरेम
    अउर दयालुता क बिना छुपाए बोलेउँ।
¹¹एह बरे हे यहोवा, तू आपन दाया मोहसे जिन छुपावा।
    तू आपन करुणा अउ सच्चाई स मोर रच्छा करा।

¹²मोका दुट्ठ मनइयन घेरि लिहन,
    उ पचे ऍतना जियादा बाटेन कि गना नाहीं जातेन।
मोका आपन पापन घेरि लिहे अहइँ,
    अउर मइँ ओनसे बचिके पराइ नाहीं सकत हउँ।
मोर पाप मोरे मूँड़े क बारे स जियादा अहइँ।
    मोर साहस मोहसे हेराइ चुका बाटइ।
¹³हे यहोवा, मोरी कइँती दउड़ा अउ मोर रच्छा करा।
    आवा, देरी जिन करा, मोका बचाइ ल्या।
¹⁴उ सबइ दुट्ठ मनई मोका मारइ क जतन करत हीं।
    हे यहोवा, ओनका लज्जित करा अउ ओनका निरास कइ द्या।
    उ सबइ मनई मोका दुःख पहोंचावइ चाहत हीं।
    तू ओनका अपमानित होइके पराइ द्या।
¹⁵उ सबइ दुट्ठ लोग मोर मसखरी उड़ावत हीं।
    ओनका ऍतना सर्मिन्दा करा कि उ पचे बोल तलक न पावइँ।
¹⁶मुला उ सबइ मनई जउन तोहका हेरत हीं, आनन्द मँ भरि जाइँ।
    उ सबइ मनई सदा इ कहत रहइँ, “यहोवा क गुण गावा!”
    ओन लोगन क तोहसे ही रच्छित होब नीक लागत ह।

¹⁷हे मोर सुआमी, मइँ तउ बस दीन, बेसहारा मनई अहउँ।
मोर रच्छा करा,
तू मोका बचाइ ल्या।
हे मोर परमेस्सर, अब जियादा देर जिन करा।

भजन संहिता 54

तार वाला बाजन पइ सँगीत निर्देसक बरे दाऊद क समइ क एक ठु भक्ति गीत जब जीपियन जाइके साऊल स कहे रहा, हम सोचत अही दाऊद हमरे लोगन क बीच छुपा अहइ।

¹हे परमेस्सर, आपन सक्ति^[a] क प्रयोग करा अउर हम पचन्क क बचावा।
    आपन महान सक्ति क प्रयोग इ सिद्ध करइ बरे करा कि हम पचन क निर्दोख अही।
²हे परमेस्सर, मोर पराथना सुना।
    जउन मइँ कहत हउँ सुना।
³अजनबी लोग मोरे खिलाफ उठ खड़ा भएन अउ बरिआर लोग मोका मारइ क जतन करत अहइँ।
    हे परमेस्सर, अइसे इ सबइ लोग तोहरे बारे मँ सोचत भी नाहीं।

⁴लखा, मोर परमेस्सर, मोर मदद करी।
मोर सुआमी मोका सहारा देइ।
⁵मोर परमेस्सर ओन लोगन क सजा देइ, जउन मोरे खिलाफ उठ खड़ा भवा अहइँ।
परमेस्सर मोरे बरे सच्चा सिद्ध होइ, अउर उ ओन लोगन क बरबाद कइ देइ।

⁶हे परमेस्सर, हम पचे आपन इच्छा स तोहका बलियन अर्पित करब।
हे यहोवा, हम पचे तोहरे नीक नाउँ क बड़कई करब।
⁷मुला, मइँ तोहसे इ विनय करत हउँ, कि मोका तू मोरे दुःखन स बचाइ ल्या।
तू मोका मोरे दुस्मनन क हारा भवा देखाँइ द्या।

भजन संहिता 51

संगीत निर्देसक बरे दाऊद क एक ठु पद। इ पद उ समइ क अहइ जब दाऊद क बतसेबा क संग पाप करइ क पाछे नातान नबी दाऊद क लगे गवा रहा।

¹हे परमेस्सर, आपन बिसाल पिरेम स भरी
    आपन करुणा स मोह पइ दाया करा।
आपन बड़ी दयालुता स
    मोरे सबहिं पापन क तू मेट द्या।
²मोर सबइ पापन क धोइ डावा,
    अउर फुन स मोका स्वच्छ बनाइ द्या।
³मइँ जानत हउँ, जउन पाप मइँ किहे अहउँ।
    मइँ आपन पापन क सदा आपन समन्वा लखत हउँ।
⁴हे परमेस्सर, मइँ उहइ काम किहेउँ जेनका तू बुरा कह्या।
    तू उहइ अहा, जेकरे खिलाफ मइँ पाप किहेउँ।
मइँ स्वीकार करत हउँ इ सबइ बातन क,
    ताकि लोग जानि जाइँ कि मइँ पापी हउँ अउर तू निआउ स पूर्ण अहा,
    अउ तोहार निर्णय निस्पच्छ होत हीं।
⁵मोर महतारी मोका दोखी मँ जनमेस,
    अउर पाप मँ मोर महतारी मोका गर्भ मँ धारण किहस।
⁶हे परमेस्सर, तू चाहत अहा, हम बिस्सासी बनी।
    अउर निर्भय बन जाउँ।
    एह बरे तू मोका सच्चा विवेक स रहस्यन क सिच्छा द्या।
⁷मोह पइ जूफा क पौंधा क प्रयोग करा अउर मोका पापे स स्वच्छ करा।
    मोका तब तलक धोआ, जब तलक मइँ बर्फ स जियादा उज्जवर न होइ जाउँ।
⁸मोका खुस बनाइ द्या।
    बताइ द्या मोका कि कइसे खुस बनउँ? मोर उ सबइ हड्डियन जउन तू तोड़्या, फिन आनन्द स भरि जाइँ।
⁹मोरे पापन्क जिन लखा।
    ओन सबन्क धोइ डावा।
¹⁰हे परमेस्सर, मोहेमाँ एक ठु नवा, सुद्ध हिरदइ बनावा।
    मोरी आतिमा क फुन सुदृढ़ कइ द्या।
¹¹मोका आपन समन्वा स जिन दूर हटावा,
    तोहार पवित्तर आतिमा क मोहसे जिन छोर ल्या।
¹²उ उल्लास जउन तोहसे आव्त ह, मोहमाँ भरि जाइ।
    मोरे चित्त क अडिग अउ तइयार करा
    सुरच्छित होइ बरे अउर तोहार हुकूम मानइ बरे।
¹³मइँ पापियन क तोहार जिन्नगी विधि सिखाउब,
    जेहसे उ सबइ लउटिके तोहरे लगे आवइँ।
¹⁴हे परमेस्सर, धरती पइ क हर कउनो दोख स मोर रच्छा करा,
    मोर परमेस्सर, परमेस्सर जउन मोका बचाएस,
मोका तोहार सदाचारी क बारे मँ गावइ क अनुमति द्या?
¹⁵    हे मोर सुआमी, मोका मोर मुँह खोलइ द्या कि मइँ तोहार बड़कई क गीत गावउँ।
¹⁶जउन बलियन तोहका नाहीं नीक लगतिन तउ मोका चढ़ाउब नाहीं अहइँ।
    उ सबइ बलियन तोहका बांछित तलक नाहीं अहइँ।
¹⁷हे परमेस्सर, मोर टुटही आतिमा ही तोहरे बरे मोर बलि अहइ।
    हे परमेस्सर, तू एक कुचरा अउ टुटहा हिरदइ स मुँह नाहीं फेरब्या।

¹⁸हे परमेस्सर, सिय्योन बरे दयालु होइके, उत्तिम बना।
    तू यरूसलेम क सहर क चहरदीवारी क बनावा।
¹⁹तू उत्तिमा बलियन क
    अउ सम्पूर्ण होमबलियन क आनन्द ल्या।
    लोग फुन स तोहरी वेदी पइ बर्धन क बलियन द्या।

यसायाह 50

इस्राएल क ओकरे पापन्क दण्ड

50 यहोवा कहत ह,
“हे इस्राएल क लोगो, तू पचे कहा करत रह्या कि मइँ तोहार महतारी यरूसलेम क तलाक दिहेउँ।
    किन्तु उ तलाकपत्र कहाँ अहइ जउन साबित कइ देइ कि मइँ ओका तलाक दिहेउँ ह।
हे मोरे गदेलो, का मइँ कउनो क कर्जदार अहउँ?
    का आपन कउनो कर्ज चुकावइ बरे मइँ तोहका बेचेउँ ह?
नाहीं, तू बिका रह्या एह बरे कि तू बुरे करम किहे रह्या।
    एह बरे तोहार महतारी दूर पठइ गइ रही काहेकि तू बुरा करम किहे रह्या।
²जब मइँ घरे आवा रहेउँ, मइँ हुआँ कउनो क नाहीं पाएउँ।
    मइँ बार-बार गोहराएउँ किन्तु कउनो जबाव नाहीं दिहस।
का तू पचे सोचत अहा कि तोहका मइँ नाहीं बचाइ सकत हउँ?
    मइँ तोहार बिपत्तियन स तोहका पचन्क बचावइ क सक्ति धरत हउँ।
लखा, जदि मइँ समुद्दर क झुराइ क आदेस देउँ
    तउ उ झुराइ जाइ।
मछरियन परान तजि देइहीं काहेकि हुवाँ जल न होइ
    अउर ओनकर देह सड़ि जाइ।
³मइँ अकासन क करिआ कइ सकत हउँ।
    अकास वइसे ही करिआ होइ जइहीं जइसे सोक वस्त्र होत हीं।”

परमेस्सर क सेवक परमेस्सर क भरोसे

⁴मोर सुआमी यहोवा मोका सीख देइ क जोग्यता दिहस ह। ऍह बरे मइँ थका भवा लोगन क प्रोत्साहित करत हउँ अउर ससकत बनावत हउँ। हर भिंसारे उ मोका जगावत ह अउर एक छात्र क नाईं सिच्छा देत ह। ⁵मोर सुआमी यहोवा सीखइ मँ मोर सहायक अहइ अउर मइँ ओकर विरोधी नाहीं बना अहउँ। मइँ ओकरे पाछे चलब नाहीं तजब। ⁶ओन लोगन क मइँ आपन पिटाइ करइ देब। मइँ ओनका आपन दाढ़ी क बार नोचइ देबउँ। उ सबइ लोग जब मोरे बरे अपसब्द कइहीं अउर मोह पइ थूकिहीं तउ मइँ आपन मुँह नाहीं मोड़ब। ⁷मोर सुआमी, यहोवा मोर मदद करी। एह बरे ओनकर अपसब्द मोका दुःख नाहीं पहोंचइहीं। मइँ सुदृढ़ रहब। मइँ जानत हउँ कि मोका निरास नाहीं होइ पड़ी।

⁸एक उ जउन कउनो मोका दोख रहित बनाएस ह उ मोर संग अहइ, एह बरे कउन मनई मोका अपराधी साबित कइ सकत ह। जदि कउनो मनई सोचत ह कि उ मोर खिलाफ कउनो सिकायत रखत ह, तउ उ मनई क मोरे लगे आवइ द्या अउर अपना तर्क रखइ द्या। ⁹किन्तु लखा, मोर सुआमी यहोवा मोर मदद करत ह। ऍह बरे कउन मनई अहइ जउन इ सिद्ध कइ सकी कि मइँ दोखी हउँ? उ सबइ सबहिं लोग वइसे ही बाहर फैंकइ जाइ जइसे पुरान कपड़न क जेका किरवन चट कइ जातहीं।

¹⁰अगर कउनो मनई जउन यहोवा क आराधना करत ह अउर ओकर सेवक क संदेस भी सुनत ह, मगर अबहुँ तलक अंधेरे मँ बिना प्रकास क चलत ह, एका अपने यहोवा क नाउँ मँ बिस्सास रखइ चाही अउर ओका आपन परमेस्सर पइ जरूर भरोसा रखइ चाही।

¹¹“लखा, तू लोग आपन ही ढंग स जिअइ चाहत अहा। आपन आगी अउर आपन मसालन क तू पचे खुद बारत अहा। तू पचे आपन ही ढंग स रहइ चाहत अहा। किन्तु तू पचन्क सजा दीन्ह जाइ। तू पचे आपन ही आगी मँ भहराब्या अउर तोहार पचन्क आपन ही मसालन तू पचन्क बारि डइहीं। अइसी घटना मइँ घटवाउब।”

गलातियन 3:15-22

व्यवस्था अउर बचन

¹⁵भाइयो, अब मइँ तू पचन क दैनिक जीवन स एक उदाहरण देइ जात अहउँ: देखा, जइसेन कउनउ मनई क जरिये कउनउ करार कइ लिहेजाइ प स्वीकृत हो जात ह, न तउ कउनो मनई ओका रद्द कइ सकत ह अउर न ही ओहमे स कछू घटावा जाइ सकत ह। अउर न बढ़ावा, ¹⁶वइसेन ही इब्राहीम अउर उनके भावी बंसज क साथे कीन्ह गइ प्रतिज्ञा क संदर्भ मँ भी बा। देखा! परमेस्सर इ नाहीं कहत ह, “अउर ओकरे बंसजन क।” (अगर अइसेन होत ह त बहुत लोगन क तरफ संकेत होत। परमेस्सर वचन मँ कहत ह, “अउर तोहरे बंसजन।” जउन मसीह अहइ।) ¹⁷मोर कहइ क मतलब इ बाटई कि जेह करार क परमेस्सर पहिलेन सुनिस्चित कइ दिहेस ओका चार सौ तीस साल बाद आवइवाली व्यवस्था क विधान नाहीं बदल सकत अउर न तउ ओकरे बचन क अप्रभावित ठहरावा जाइ सकत ह।

¹⁸काहेकि अगर उत्तराधिकार व्यवस्था पर टिका बा तउ फिह उ बचन पर न टिकी। मुला परमेस्सर उत्तराधिकार बचन क कारण मुक्त रूप स इब्राहीम क दिहे रहा।

¹⁹फिन भला व्यवस्था क प्रयोजन का रहा? व्यवस्था उल्लंघन क अपराध क कारण व्यवस्था क बचन स जोड़ दीन्ह गवा रहा ताकि जेकरे बरे बचन दीन्ह गवा रहा, ओह बंसज क आवइ तलक उ रहइ। व्यवस्था एक मध्यस्थ क रूप मँ रहइवाला मूसा क सहायता स सरगदूतन स दीन्ह गवा बा। ²⁰अब देखा, मध्यस्था क जरूरत नाहीं अहइ, जब केवल एक मनई होत ह। मुला परमेस्सर तउ एक्कई बा।

मूसा क व्यवस्था क प्रयोजन

²¹का एकर इ मतलब बा कि व्यवस्था परमेस्सर क बचन क बिरोधी अहइ? निस्चित रूप स नाहीं। काहेकि अगर अइसेन ही व्यवस्था दीन्ह गइ होत जउन सबन मँ जीवन क संचार कइ सकत तउ व्यवस्था परमेस्सर क आगे धार्मिकता क सिद्ध करई क साधन बन जात। ²²मुला पवित्तर सास्तरन घोसणा किहे बा कि इ समूचा संसार पाप क सक्ती क अधीन बा। ताकि ईसू मसीह मँ बिसवास क आधार पर जउन बचन दीन्ह गवा बा, उ बिसवासी लोगन क भी मिलइ।

मरकुस 6:47-56

⁴⁷जब सांझ भइ, नाउ झिलिया क मँझधर मँ रही अउर उ भुइयाँ प अकेल्ले रहा। ⁴⁸उ ओनका नाउ खेवत क मुसीबते मँ देखेस, काहेकि हवा ओनके खिलाफ बहत रही। लगभग तीन स छ बजे क समइ भिंसारेउ ओनके निअरे झिलिया प चलत आवा। जइसे हि ओनके निअरे स जाइ क भवा, ⁴⁹उ पचे ओका पानी प चलत भवा निहारेन। उ सब अंजाद लगाएन कि कउनो बड़वार दुस्ट आतिमा अहइ। ऍसे उ पचे डेरात भए चिचिआनेन। ⁵⁰मुला उ पचे ओका निहारेन अउर उ सब ससाइ गएन। तुरंतहि उ ओनसे बोला, “हिम्मत रखा। इ मइँ हउँ जिन डेराअ।” ⁵¹फिन उ ओनके संग नाउ प चढ़ि गवा, तब आँधी पटाइ गइ। ऍसे उ सबइ अचरज मँ पड़ि गएन। ⁵²उ पचे रोटियन क अद्भुत कारज क बारे मँ समझ पाएन नाहीं। ओनके दिमाग कठोर होइ गवा।

ईसू बहुतेन बेरमियन क नीक किहेस

(मत्ती 14:34-36)

⁵³जब उ सब झील पार कइ लिहन तउ गन्नेसरत क घाटे प आएन अउर नाउ क बाँध लिहन। ⁵⁴जबहिं उ पचे नाउ क छाँड़ि क उतर आएन, मनइयन ईसू क पहिचान लिहन। ⁵⁵उ पचे समूचे पहंटा मँ भागत फिरेन अउर बेरमियन क बिछउना प जहाँ कहूँ उ पचे सुनेन कि ईसू हुवाँ बा, लादि क लइ जाइ लागेन। ⁵⁶जहाँ कहूँ उ गाउँ मँ कस्बन मँ या खेतन मँ जात रहा, उ पचे आपन बेरमियन क हाटन मँ बइठाइ देतेन अउर उ पचे ईसू स बिनती करतेन कि उ आपन ओढ़ना क एक हींसा छुअइ दे। अउर सबइ जउन ऍका छुएन नीक होइ गएन।

Awadhi Bible: Easy-to-Read Version (ERV-AWA)