◀ All Reading Plans / Book of Common Prayer / Ps. 41 52; Ps. 44; Isa. 48:1–11; Gal. 1:1–17; Mark 5:21–43 (Awadhi Bible: Easy-to-Read Version)

Prev Day

January 23, 2023

Next Day

Use the calendar to view readings from this devotional.

January 2023
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 41

संगीत निर्देसक बरे दाऊद क एक ठु गीत।

¹जउन दीन क कामयाब होने मँ मदद करत ह उ धन्य अहइ।
    यहोवा ओनका बचावत ह जब उ पचे विपत्ती मँ होत हीं।
²यहोवा उ मनई क रच्छा करी अउ ओकर जिन्नगी बचाइ।
    उ मनई धरती पइ बहोतइ बरदान पाई।
    परमेस्सर ओकरे दुस्मनन क जरिये ओकर नास नाहीं होइ देइ।
³जब मनई रोगी होइ अउर बिछउना मँ पड़ा होइ, ओका यहोवा सक्ति देइ।
    उ मनई बिछउना मँ चाहे रोगी पड़ा होइ, मुला यहोवा ओका चंगा कइ देइ।

⁴मइँ कहेउँ, “यहोवा, मोहे पइ दाया करा।
    मइँ तेरे खिलाफ पाप किहेउँ ह, मुला मोका अउर अच्छा करा।”
⁵मोर दुस्मन मोरे बरे अपसब्द कहत अहइँ,
    उ पचे कहत अहइँ, “इ कब मरी अउर कब बिसराइ दीन्ह जाई?”
⁶कछू लोग मोरे लगे मिलइ बरे आवत हीं।
    उ पचे कउनो लाभदायक बात नाहीं बोलत हीं,
उ पचे सिरिफ कछू समाचार मोरे बरे जमा करत हीं।
    बाद मँ इ ओनका हर जगह फइलावत हीं।
⁷मोर दुस्मन छुपे छुपे मोर निन्दा करत रहत हीं।
    उ पचे मोरे खिलाफ कुचक्र रचत हीं।
⁸उ पचे कहा करत हीं, “उ कउनो बुरा करम किहेस ह,
    इहइ स ओका कउनो बुरा लोग लगा ह।
    मोका आसा अहइ उ कबहुँ तन्दुरुस्त नाहीं होइ।”
⁹मोर परम मित्र मोरे संग खात रहा, ओह पइ मोका भरोसा रहा।
    मुला अब मोर परम मित्र भी मोरे खिलाफ होइ ग अहइ।
¹⁰तउ हे यहोवा, मोह पइ कृपा करा अउ मोहे पइ कृपालु ह्वा।
    मोका खड़ा करा कि मइँ बदला लेउँ।
¹¹हे यहोवा, अगर तू मोरे दुस्मनन क बुरा नाहीं करइ देब्या,
    तउ मइँ समुझब कि तू मोका अपनाइ लिहा ह।
¹²मइँ निर्दोख रहेउँ अउर तू मोर मदद किहा।
    तू मोका खड़ा किहा अउर मोका तोहार सेवा करइ दिहा।

¹³इस्राएल क परमेस्सर,
यहोवा क प्राचीन काल स लइके अन्तिम समई तलक धन्न होइ।

आमीन, आमीन!

भजन संहिता 52

संगीत निर्देसक बरे उ समइ क एक ठु कलात्मक। जब एदमी दोएग साऊल क लगे आइके कहे रहा, दाऊद अबीमेलेक क घरे मँ अहइ।

¹अरे ओ, बड़का मनई! तू काहे सेखी बघारत अहा जउन बुरे करमन क तू करत अहा?
    तू लगातार परमेस्सर क अपमान करत अहा।
²तू मूरखता भरा कुचक्र रचत अहा।
    तोहार जीभ वइसी ही भयानक अहइ, जइसे तेज उस्तरा होत ह।
    काहेकि तोहार जीभ झूठ बोलत रहत ह!
³तोहका नेकी स जियादा बदी भावत ह।
    तोहका झूठ क बोलब, फुरइ बोलइ स जियादा भावत ह।

⁴तोहका अउ तोहरी झूठी जीभ क, लोगन क हानि पहोंचाउब नीक लागत ह।
⁵तोहका परमेस्सर सदा बरे नस्ट कइ देइ।
उ तोह पइ झपटी अउर तोहका धरिके घरे से बाहेर करी।
उ तोहका मारी अउ तोहार कउनो भी संतान नाहीं रही।

⁶सज्जन लोग ऍका लखिहीं
    अउ परमेस्सर स डेराब अउर ओकर आदर करब सिखिहीं।
उ पचे तोह पइ, जउन घटा ओह पइ हँसिहीं अउर कइहीं,
⁷    “लखा उ मनई क संग का भवा जउन यहोवा पइ निर्भर नाहीं रहा।
    उ मनई सोचेस कि ओकर धन अउर झूठ ऍकर रच्छा करिहीं।”

⁸मुला मइँ परमेस्सर क मन्दिर मँ एक ठु हरिअर जइतून क बृच्छा जइसा अहउँ।
मोर परमेस्सर क बिस्सासी पिरेम मँ सदा-सदा बरे भरोसा अहइ।
⁹हे परमेस्सर, मइँ ओन कामे क बरे जेनका तू किह्या हमेसा स्तुति करब।
मइँ तोहरे बिस्सासी मनइयन क समन्वा तोहरे नाउँ क घोसना करब।

भजन संहिता 44

संगीत निर्देसक बरे कोरह परिवार क एक ठु भक्ति गीत।

¹हे परमेस्सर, हम पचे तोहरे बारे मँ सुने अही।
    हमार पुरखन ओनकइ दिनन मँ जउन काम तू किहे रह्या ओनके बारे मँ हम पचन्क बताया।
    उ पचे पुराने जमाने मँ जउन तू किह्या ह, ओनका हम पचन्क बताया।
²हे परमेस्सर, तू इ धरती आपन महासक्ति स पराये लोगन्स लिहा
    अउर हम का दिहा।
ओन बिदेसी लोगन्क तू कुचर दिहा,
    अउर ओनका इ धरती तजिके देइ क दबाव डाया।
³हमार पुरखन इ धरती आपन तरवारन क बल पइ नाहीं लिहे रहेन आपन भुजदण्डन क बल पइ बिजयी नाहीं भएन।
    इ एह बरे भवा रहा।
काहेकि तू हमरे पुरखन क संग रह्या।
    हे परमेस्सर, तोहार महान सक्ति हमरे पुरखन क रच्छा किहस।
    काहेकि तू ओनसे पिरेम करत रह्या।
⁴हे मोरे परमेस्सर, तू मोर राजा अहा।
    उ आदेस द्या जउन कि याकूब क लोगन क जीत मँ अगुवाइ करी।
⁵परमेस्सर, तोहरी सक्ति स हम आपन दुस्मनन क पीछे ढकेल दिहन।
    तोहार नाउँ स हम आपन दुस्मन क कुचरि देब।
⁶मोका आपन धनुस अउ बाणन पइ भरोसा नाहीं।
    मोर तरवार मोका बचाइ नाहीं सकत।
⁷हे परमेस्सर, तू ही हमका मिस्र स बचाया।
    तू हमरे दुस्मनन क लज्जित किहा।
⁸हर दिन हम परमेस्सर क गुण गाउब।
    हम तोहरे नाउँ क स्तुति सदा करब।

⁹मुला अब, हे यहोवा, तू हम लोगन स पीछे मुड़ि गवा ह अउ हमका नीचा कइ दिहा ह!
    तू हमरे फउज मँ जुरइ स इन्कार कइ दिहा ह जब हम जुद्ध मँ गए रहेन!
¹⁰तू हमका हमरे दुस्मनन क लगे छोड़ि दिहेस,
    तउ उ पचे हमार सारा धन दौलत छीन लइ गएन।
¹¹तू हमका उ भेड़ी क नाई तज्या जउन खइया क तरह खाइ क होत ह।
    तू हमका रास्ट्रन क बीच छितराइ दिहा।
¹²हे परमेस्सर, तू आपन लोगन क यूँ ही बेच दिहा,
    अउ ओनके मूल्य पइ भाव ताव नाहीं किहा।
¹³तू हमका हमरे पड़ोसियन मँ हँसी क पात्र बनाया।
    हमरे पड़ोसी हमार मसखरी करत हीं, अउर हमार मजाक बनावत हीं।
¹⁴लोग हमरी भी कथा उपहास कथा मँ कहत हीं।
    हिआँ तलक कि उ सबइ लोग जेनका आपन कउनो रास्ट्र नाहीं अहइ, आपन मूँड़ी हलाइके हमार मसखरी करत हीं।
¹⁵मइँ लज्जा मँ बूड़ा अहउँ।
    मइँ सारे दिन भइ निज लज्जा निहारत रहत हउँ।
¹⁶मोर दुस्मन मोका लज्जित किहेन ह।
    मोर मसखरी उड़ावत भए मोर दुस्मन, आपन बदला लेइ चाहत ह।
¹⁷हे परमेस्सर, हम तोहका बिसरावा नाहीं।
    फिन भी तू हमरे संग अइसा करत ह।
    हम जब आपन करार पइ तोहरे संग हस्ताच्छर किहे रहे, झूठ नाहीं बोले रहे।
¹⁸हे परमेस्सर, हम तउ तोहसे मुँह नाहीं मोड़ा।
    अउर न ही तोहार अनुसरण करब तजा ह।
¹⁹मुला, हे यहोवा, तू हमका इ ठउरे पइ अइसे ठूँस दिहा ह जहाँ सियार रहत हीं।
    तू हमका इ जगह मँ जउन मउत क तरह अँधियर अहइ मूँद दिहा ह।
²⁰का हम आपन परमेस्सर क नाउँ बिसरी?
    का हम विदेसी देवतन क अगवा निहुरी? नाहीं।
²¹निहचय ही, परमेस्सर ऍन बातन क जानत ह।
    उ तउ हमार गहिर रहस्य तलक जानत ह।
²²हे परमेस्सर, हम तोहरे बरे रोज रोज मारा जात अही।
    हम ओन भेड़िन जइसा बना अही जउन बधइ बरे लइ जाई जात अहइँ।
²³मोर सुआमी, उठ!
    नींदिया मँ काहे ओलरा अहा?
    उठा! हमका सदा बरे जिन तजा।
²⁴हे परमेस्सर, तू हमसे काहे छुपत ह?
    का तू हमार दुःख अउर सबइ वेदना क बिसरि गवा अहा?
²⁵हमका धूरि मँ पटक दीन्ह गवा ह।
    हम ओंधा मुँह कइके धरती पइ पड़ा भवा अही।
²⁶हे परमेस्सर, उठा अउर हमका बचाइ ल्या।
    आपन नित्य पिरेम क कारण हमार रच्छा करा।

यसायाह 48:1-11

परमेस्सर आपन जगत पइ राज करत ह

48 यहोवा कहत ह, “याकूब क परिवार,
    तू उहइ जाति अहइ जेका
    ‘इस्राएल’ कहा जात ही, मोर बात सुना!
तू पचे यहूदा क घराने स जउन बचन देइ बरे यहोवा क नाउँ लेत अहा,
    तू पचे इस्राएल क परमेस्सर क बारे मँ बोलत अहा,
    किन्तु सच्चाई अउर निस्ठावानी स नाहीं।

²“तू लोग आपन क पवित्तर नगरी क नागरिक कहत अहा।
तू पचे इस्राएल क परमेस्सर क भरोसे रहत अहा।
ओकर नाउँ सर्वसक्तीमान यहोवा अहइ।

³“मइँ तू पचन्क बहोत पहिले ही पहिले क ओन घटना क बारे मँ ओका घटइ स पहिले ही बताइ दिहे रहा,
    तू पचन्क ओन घटना क बारे मँ बताइ दिहे रहा कि इ होइ सकत ह।
    मइँ अचानक ओन बातन घटाइ दिहेउँ! इ सबइ बातन वइसा ही भवा जइसा मइँ बताए रहा।
⁴मइँ तोहका इ सबइ बातन क पहिले ही बताए दिहे रहेउँ काहेकि मोका मालूम रहा कि तू पचे बहोत जिद्दी अहा।
    मइँ जउन कछू भी बताए रहेउँ ओहे पइ बिस्सास करइ स तू पचे इन्कार किहा, तू पचे बहोत जिद्दी रह्या, जइसे लोहा क छड़ नाहीं निहुरत ह।
    इ बात अइसी रही जइसे तोहार मूँड़ काँसा क बना भवा होइ।
⁵एह बरे मइँ तू पचन्क पहिले ही ओन घटना क बारे मँ बताइ दिहे रहेउँ जउन घटी सकत ह।
    अइसा एह बरे किहे रहेउँ ताकि तू नाहीं कहि सकइ कि
‘इ सबइ काम हमार देवतन किहेन।’
    तू इ नाहीं कहि सकत्या कि ‘हमार मूर्तियन, हमार देवतन,’
    इ सबइ बातन घटाइ क आदेस दिहे रहेन।”

इस्राएल क पवित्तर करइ बरे परमेस्सर क ताड़ब

⁶“तू ओन सबहिं बातन क जउन होइ चुकी अहइँ,
    लख्या अउर सुन्या ह।
    एह बरे तोहका इ सबइ खबरियन दूसरन क बतावइ चाही।
अब मइँ तोहका नई बातन बतावइ सुरू करत हउँ।
    जेनका तू अबहिं नाहीं जानत अहा।
⁷इ सबइ उ सबइ बातन नाहीं अहइँ जउन पहिले घटि चुकी अहइँ।
    इ सबइ बातन अइसी अहइँ जउन अब सुरू होत अहइँ, आजु स पहिले तू इ सबइ बातन नाहीं सुन्या।
    तउ तू नाहीं कहि सकत्या, ‘हम तउ एहसे पहिले ही जानित ह।’
⁸किन्तु तब पर भी, तू कबहुँ ओह पइ कान नाहीं दिहा जउन मइँ कहेस।
    तू मोह स कछू नाहीं सीख्या! तू कछू नाहीं सुन्या जउन मइँ कह्या।
    किन्तु मइँ तोहका ओन बातन क बारे मँ बताएउँ
काहेकि मइँ जानत नाहीं रहेउँ कि तू मोरे विरोध मँ होब्या।
    तू तउ विद्रोही रह्या जब स तू पइदा भवा।

⁹“किन्तु मइँ धीरज धरब।
    अइसा मइँ अपने बरे करब।
    मोका किरोध नाहीं आवा एकरे बरे लोग मोर जस गइहीं।
मइँ आपन किरोध पइ काबू करब कि तोहार नास न करउँ।
    तू मोर बाट जोहत भए मोर गुण गउब्या।

¹⁰“लखा, मइँ तोहका सुद्ध करब।
    चाँदी क सुद्ध करइ बरे लोग ओका आग मँ डावत हीं।
    किन्तु मइँ तोहका विपत्ति क भट्ठी मँ डाइके सुद्ध करब।
¹¹इ मइँ खुद अपने बरे करब।
    तू मोरे संग अइसे नाहीं बरतब्या, जइसे मोर महत्व न होइ।
    कउनो मिथ्या देवता क मइँ आपन तारीफ नाहीं लेइ देब।

गलातियन 1:1-17

1 पौलुस क तरफ स, जउन एक प्रेरित अहइ, जे एक अइसेन सेवा बरत धारन किहे अहइ। जउन ओका न तउ मनइयन स मिला बा अउर न कउनो एक मनई क जरिये दीन्ह गवा रहा, बल्कि ईसू मसीह क जरिये उ परमपिता परमेस्सर स, जे ईसू मसीह मरे रहे प फिन स जियाइ दिहे रहा, दीन्ह भवा बा। ²अउर मोरे साथे जउन भाइ अहइँ, ओन्हे सब ओर स,

गलातिया^[a] छेत्र क कलीसियवन क नाउँ:

³हमरे परमपिता परमेस्सर अउर पर्भू ईसू मसीह कइँती स तू सबन क अऩुग्रह अउर सान्ति मिलइ। ⁴जे हमरे पापन बरे अपने आपके अर्पित कइ दिहेन ताकि इ पाप पुन्न संसारे स, जेहेमें हम रहत हई, उ हमका छुटकारा देवॉइ सकइ। हमरे परमपिता क इहइ इच्छा अहइ। ⁵उ हमेसा महिमावान होइ। आमीन।

सच्चा सुसमाचार एक्कइ अहइ

⁶मोका अचरज बा, कि तू सभे ऍतनी जल्दी उ परमेस्सर स मुँह मोड़के, जे मसीह क अनुग्रह द्वारा तू पचन क बोलाए रहा, कउनो दुसरे सुसमाचार क तरफ जात अहा। ⁷कउनउ दुसर सुसमाचार तउ सहीयउ मँ अहइ ही नाहीं ना, मुला कछू जने अइसेन अहइँ जउन तोहे भरमावत अहइँ। अउर मसीह क सुसमाचार मँ हेर-फेर क जतन करत हीं। ⁸मुला चाहे हम होई अउर चाहे केऊ सरगदूत या तू सबन क हमरे कारण सुनावा गवा सुसमाचार स अलग सुसमाचार सुनावत हीं तू ओका धिक्कार बा। ⁹जइसेन की हम पहिले कहिं चुका हई, ओइसेन ही मइँ अब फिन दोहरावत अहउँ कि जदि चाहे हम होइ अउर चाहे केऊ सरगदूत, या तोहरे स स्वीकार कीन्ह गवा सुसमाचार स अलग सुसमाचार सुनावत हीं तउ ओका धिक्कार अहइ।

¹⁰का एहसे तू सब्बन क अइसेन लागत ह कि मोका मनइयन क स्वीकृति चाही? या इ अउर परमेस्सर की स्वीकृति मिलइ। अउर का मइँ मनइयन क खुस करई क जतन करत हइ? अगर मइँ मनइयन क खुस करित ह तउ मइँ ईसू मसीह क सेवक-सा न होइत।

पौलुस क सुसमाचार परमेस्सर स मिला बा

¹¹भाइयो, मइँ तोहका जतावइ चाहित ह कि सुसमाचर जेकर उपदेस तू पचन क मइँ दिहे हउँ उ मनई द्वारा नाहीं बनावा गवा ह। ¹²कउनउ मनई स मिला सुसमाचार नाहीं ना काहेकि न तउ मइँ एका कीहीउ मनई स पाएउँ हउँ अउर न तउ कउनउ मनई एकर उपेदस मोका दिहे बा। ईसू मसीह द्वारा हमरे सामने परगट भवा बा।

¹³यहूदी धरम मँ मइँ पहिले कइसे जिअत रहेउँ ओका तू सुन चुक्या ह, अउर तू इहउ जानत ह कि मइँ परमेस्सर क कलीसिया पर केतॅना अत्याचार किहे हउँ अउर ओका मिटाइ डालइ क कोसिस तक किहे अहइ। ¹⁴यहूदी धरम क पालइ मँ मइँ अपने जुगे क समकालीन यहूदियन स आगे रहेउँ काहेकि मोर पूर्वजन स जउन परम्परा मोका मिली रहिन, ओहमँ हमार उत्साहरपूरक आस्था रही।

¹⁵मुला परमेस्सर मोरे जनम स पहिलेन मोका चुन लिहे रहा। अउर आपन अनुग्रह व्यक्त करइ क मोका बोलाइ लिहे रहा। ¹⁶ताकि उ मोका अपने पूत (ईसू) क गियान कराइ देइ। जेसे मइँ गैर यहूदियन क बीच ओकरे सुसमाचार क प्रचार करउँ। ओह समइ जल्दी स मइँ कउनउ मनई स कउनउ राय नाहीं लिहेउँ। ¹⁷अउर न तउ मइँ ओन्हन क लगे यरूसलेम गएउँ जउन मोसे पहिले प्रेरितन बना रहेन। बल्कि मइँ अरब गवा रहेउँ अउर फिन उहाँ स दमिस्क लउटि आएउँ।

मरकुस 5:21-43

एक ठु मरी लरिकी अउर बेरमिया स्त्री क जिन्नगी अउर चंगा करब

(मत्ती 9:18-26; लूका 8:40-56)

²¹ईसू अब फिन झिलिया क उ पार गवा। ओकरे चारिहुँ कइँती बहोत भारी भीर जमा होइ गइ। उ झिलिया क तीरे रहा। ²²तबहिं आराधनालय क अधिकारी जेकर याईर नाउँ रहा, हुवाँ आइ अउर ईसू क देखेस फिन ओकरे गोड़वा पर गिरि गवा। ²³वॅइसे चिरउरी बिनती करत कहेस, “मोर छोट बिटिया मरइ क अहइ। मोर बिनती अहइ कि तू मोरे संग आवा अउर आपन हथवा ओकरे मूँड़े प धइ द्या। ऍसे उ नीक होइ जाइ अउर जी जाई।”

²⁴तउ ईसू ओकरे साथे गवा। बहोत भारी भीर ओका पछुआवत रही, जेसे उ दबा जात रहा।

²⁵हुवाँ एक ठु स्त्री रही, जेकर बारह बरिस स लहू जारी रहा। ²⁶उ बैद्ययन स दवाई करवावत करवावत बहोतइ तकलीफ उठाइस। उ सब कछू खरिच कइ डाइस जउन उ धरे रही। मुला उ तनिकउ जिआदा नीक नाहीं होत रही; ओकर हालत जिआदा बिगड़त जात रही।

²⁷जइसे उ ईसू क बारे मँ सुनेस, वॅइसे उ पाछे भिरिया मँ आइ अउर ओकर ओढ़ना छुइ लिहस। ²⁸आपन मानव मँ उ सोचत रहीं, “जदि मइँ ओकर ओढ़ना छुइ पाई तउ मइँ नीक होइ जाब।” ²⁹अउर तुरंतहि खुनवा बहइ क जगह सुखाइ गइ। आपन तन मँ अइसा जानेस कि ओकर दिकदारी नीक होइ ग। ³⁰अउर ईसू फउरन महसूस करस कि ओसे सक्ति निकर गइ। उ भिरिया कइँती घुमेस अउर पूछेस, “कउन मोर ओढ़ना छुएस?”

³¹ओकर चेलन ओका बतएन, “तू देखत अहा कि भिरिया तोहका घेरित अहइ। यह पइ तू पूछत अहा, ‘कउन मोका छुएस?’”

³²उ चारिहुँ कइँती निहारत रहा कि कउन अइसा करेस ह। ³³तब्बइँ एक ठु स्त्री इ जानत भइ कि ओहका का भवा ह, डर स काँपत आइ अउर ओकरे समन्वा गोड़वा प गिर पड़ी अउ उ सबइ सच सच कबूलेस। ³⁴तबहिं ईसू ओसे कहेस, “बिटिया! तोहार बिसवास तोका बचाएस। चइन स रहा, अउर दिकदारी स बची रहा।”

³⁵जब उ बोलतइ रहा याईर, आराधनालय क अधिकारी क घरे स कछू लोग आएन अउर ओसे कहेन, “तोहार बिटिया मरि गइ। अब गुरु (ईसू) क बेफजूल काहे क तकलीफ देत अहा?”

³⁶ईसू अनकेस कि उ पचे का कहेन अउर आराधनालय क अधिकारी स कहेस, “डरा जिन, मुला बिसवास करा।”

³⁷फिन ईसू सबन्क छाँड़िके सिरिफ पतरस, याकूब अउर याकूब क भाई यूहन्ना क संग लइके ³⁸आराधनालय क अधिकारी क घरे गवा। उ निकारेस कि हुवाँ खलवली मची बाटइ। उ मनइयन क जोर स चिचियाब पुपुआब अउर रोवत देखेस। ³⁹उ भीतर गवा अउर ओनसे बोला, “काहे का इ सब खलबली अउर रोउब पीटब? बचनी मरी नाहीं बा, उ सोवति अहइ।” ⁴⁰उ सब ओह पइ हँसेन।

ईसू सबन्क बाहेर खदेरेस। बिटिया क बाप, महतारी अउर जउन ओकरे संग रहेन, सिरिफ ओनका आपन संग रखेस। ⁴¹उ बिटिया क हथवा पकड़ेस फिन ओसे कहे, “तलीता कूमी” (अरथ अहइ “छोट बिटिया मइँ तोहसे उठइ क कहत हउँ।”) ⁴²छोटवार बिटिया फउरन उठि गइ अउर ऍहर ओहॅर टहरइ लाग। (उ बिटिया बारह बरिस क रही।) सगतइ आलिम अचरज मँ पूरी तरह आइ गवा। ⁴³ईसू ओनका कर्रा हुकुम दिहेस कि कउनो ऍकरे बारे मँ पता न चलइ। फिन उ बोलेस कि उ बिटिया क कछू खइया क द्या।

Awadhi Bible: Easy-to-Read Version (ERV-AWA)