Book of Common Prayer

Исус Христос ќе се врати!

⁶ Потоа ангелот ми рече: „Ова што ти го кажувам е вистина и ќе се оствари. Господ Бог, Кој на Своите пророци им открива што ќе се случи во иднината, испрати Свој ангел за да им објави на Своите следбеници што ќе се случи во скорашно време.“

⁷ Исус порачува: „Очекувајте Ме, зашто брзо ќе се вратам! Благословен ќе биде секој што се придржува до напишаното во оваа пророчка книга!“

⁸ Јас, Јован, го чув и го видов сето ова. Откако го ислушав и видов сето ова паднав ничкум пред нозете на ангелот што ми го беше покажал сето ова, со намера да му се поклонам. ⁹ Но тој ми рече: „Немој, не прави го тоа! И јас сум само Божји служител, како и ти, како што се и пророците и сите други што им се послушни на зборовите запишани во оваа книга. На Бог поклони Му се!“

¹⁰ Уште ми рече: „Не запечатувај ги пророштвата запишани во оваа книга, зашто овие работи наскоро ќе се остварат.

¹¹ Злите луѓе ќе продолжат да вршат зло, испоганетите умови ќе продолжат да се поганат. Но, праведните луѓе ќе продолжат да живеат праведно, Божјите луѓе секогаш ќе бидат свети.“

¹⁸ А испраќам и предупредување до секој што ќе ги чуе пророштвата запишани во оваа книга: Никој ништо да не додава кон ова, зашто на таквиот Бог ќе му ги додаде сите казни опишани во оваа книга! ¹⁹ А ако некој одземе нешто од пророчките објави во оваа книга Бог ќе му го одземе правото на пристап до Дрвото на животот и до Светиот град, опишани во оваа книга.

²⁰ Оној што гарантира за вистинитоста на сето ова ни порачува: „Наскоро ќе се вратам!“

Амин! Дојди, Господе Исусе!

Раѓањето на Јован Крстител

⁵⁷ Дојде време Елисавета да се породи и таа роди син. ⁵⁸ Кога нејзините соседи и роднини видоа дека Господ покажа кон неа голема благонаклоност, заедно со неа се радуваа и тие.

⁵⁹ На осмиот ден по раѓањето го донесоа детето да го обрежат^[a] и сакаа да му дадат име Захарија, според името на татко му. ⁶⁰ Но мајка му рече: „Не, туку ќе се вика Јован^[b]!“ ⁶¹ Тие и велеа: „Па никој од твоите роднини не се вика така!“ ⁶² Потоа преку знаци го прашаа таткото, како сака да се вика детето. ⁶³ Захарија побара една плоча за пишување и напиша: „Ќе се вика Јован!“ Сите беа изненадени. ⁶⁴ Во истиот миг, му се врати говорот на Захарија и тој почна да Го слави Бога. ⁶⁵ По ова страв завладеа меѓу луѓето во тој крај, а за овие случки се расправаше по сиот планински предел на Јудеја. ⁶⁶ Сите што ќе слушнеа за ова размислуваа и се прашуваа: „Што ли ќе биде од ова дете!?“, зашто беше очигледно дека со него беше силата Господова.