Book of Common Prayer

⁴ Тогаш го слушнав и бројот на обележаните со Божјиот печат: тие беа вкупно сто и четириесет и четири илјади души, од сите племиња на Израел, и тоа:

⁵ 12.000 од племето на Јуда,

12.000 од племето на Реувен,

12.000 од племето на Гад,

⁶ 12.000 од племето на Ашер,

12.000 од племето на Нафтали,

12.000 од племето на Менаше,

⁷ 12.000 од племето на Шимон,

12.000 од племето на Левиј,

12.000 од племето на Исахар,

⁸ 12.000 од племето на Зевулун,

12.000 од племето на Јосиф и

12.000 од племето на Бинјамин.

Спасени луѓе од сите народи

⁹ Потоа погледнав и наеднаш пред мене се појави множество народ, кое никој не можеше да го изброи. Имаше луѓе од секоја раса, од секое племе, народ и јазик. Тие стоеја пред престолот и пред Јагнето, облечени во бели облеки и со палмови гранчиња во рацете, ¹⁰ и на цел глас пееја:

„Спасението е дело на нашиот Бог, Кој седи на престолот, и на Јагнето!“

¹¹ Сите ангели, кои стоеја околу престолот, околу старешините и околу четирите суштества паднаа ничкум и Му се поклонија на Бог, ¹² велејќи:

„Амин! На нашиот Бог Му припаѓа благослов, слава, мудрост, благодарност, чест, власт и моќ! Амин!“

¹³ Еден од старешините ме праша: „Знаеш ли кои се и од каде доаѓаат овие што се облечени во бели облеки?“ ¹⁴ Јас му одговорив: „Господине, Ти го знаеш тоа!“ Тогаш тој ми рече: „Тоа се оние што минаа низ големи страдања. Тие ги избелија своите облеки перејќи ги во крвта на Јагнето. ¹⁵ Затоа сега стојат пред Божјиот престол и деноноќно Му служат во Неговиот храм. А Тој што седи на престолот ќе ги заштитува со Своето присуство. ¹⁶ Тој никогаш нема да дозволи тие да гладуваат или да ожеднат, ниту пак да ги пече Сонцето или некоја друга горештина. ¹⁷ Јагнето, Кое е на средината на престолот, ќе им биде Пастир и ќе ги пои со животодавна вода. И Бог ќе ја избрише секоја солза од нивните очи.“

3. Споредба со синаповото зрно

(Мк. 4:30-32; Лк. 13:18-19) ³¹ Потоа, Исус им кажа уште една споредба: „Небесното царство може да се спореди со синапово зрно што некој ќе го посее во својата нива. ³² Иако тоа е најмало од сите семиња, кога ќе порасне, ги надвишува сите градинарски растенија и станува дрво на кое и птиците слетуваат и си свиваат гнезда на неговите гранки.“

4. Споредба со квасецот

(Лк. 13:20-21) ³³ Исус им кажа и ваква споредба: „Небесното царство може да се спореди со квасец што жената го замесува со три мери брашно, по што целото тесто нараснува!“

За проповедањето преку споредби

(Мк. 4:33-34) ³⁴ Исус се користеше со споредби за да му го објасни на народот сето ова и ништо не им говореше без споредби. ³⁵ Со тоа се исполнуваа Божјите зборови претскажани преку пророкот:

„Ќе им говорам преку споредби,

ќе им ги објавам тајните што беа скриени

од создавањето на светот^[a].“