Book of Common Prayer

¹⁹ Тогаш од Антиохија и од Иконија пристигнаа неколку Евреи, кои го подбуцнаа народот да го каменуваат Павле. Потоа го исфрлија надвор од градот, сметајќи го за мртов. ²⁰ Но кога тамошните христијани се собраа околу него, тој стана и се врати во градот. Утредента Павле и Барнаба заминаа за Дерба.

Довршување на првото мисионерско патување: Павле и Барнаба се враќаат во сириска Антиохија

²¹ Откако во тој град ја проповедаа Радосната вест и придобија многу следбеници, апостолите Павле и Барнаба се вратија најпрвин во Листра, а потоа и во Иконија и писидиска Антиохија^[a], ²² за да ги охрабрат Христовите следбеници, давајќи им поттик да истраат во верата, учејќи ги дека пред да втасаме во Божјото царство ќе треба да минеме низ многу неволи. ²³ Во секоја црква поставија старешини, откако постеа и се молеа, а потоа ги предадоа во рацете на Господ, во Кого поверуваа, Тој да се грижи за нив.

²⁴ Потоа преку Писидија се вратија во областа Памфилија. ²⁵ Уште еднаш проповедаа во Перга, а оттаму заминаа за Аталија ²⁶ откаде со брод се вратија во сириска Антиохија^[b], град од којшто и го започнаа првото мисионерско патување, со доверба дека Божјата благонаклоност ќе ги води во извршувањето на работата. Таа задача сега беше успешно завршена.

²⁷ Кога пристигнаа во Антиохија, ја собраа целата црква, им раскажаа за се што Бог направи преку нив, и како и на нееврејските народи им ја отвори вратата на верата. ²⁸ Тука останаа подолго време со тамошните христијани.

ТРИ ГОЛЕМИ ЧУДА НА ИСУС

1) Исус смирува бура

(Мт. 8:23-27; Лк. 8:22-25) ³⁵ Таа вечер, Исус им рече на Своите ученици: „Ајде да преминеме на другата страна од езероно!“ ³⁶ Тие го отпуштија народот и испловија со бротчето во кое седеше Исус. Ги придружуваа и други бротчиња. ³⁷ Одненадеж, голема бура го зафати езерото. Силни бранови удираа во бротчето и тоа беше во опасност да потоне.

³⁸ Исус беше на задниот дел од бротчето и спиеше на перница. Учениците Го разбудија, викајќи: „Учителе, зар не ти е грижа што ќе загинеме!?“

³⁹ Исус се разбуди и им заповеда на ветрот и на брановите: „Смирете се!“ Ветрот запре и настапи длабока тишина.

⁴⁰ Потоа Исус им се обрати на учениците: „Зошто се исплашивте? Зар немате вера?“

⁴¹ А тие беа толку исплашени, што еден на друг си говореа: „Кој ќе е овој Човек кому и ветровите и брановите Му се покоруваат!?“