Book of Common Prayer

¹ बाबुल क नदियन क किनारे बइठिके
    हम सिय्योन क याद कइके रोइ पड़ेन।
² हम लगिचे क बेंत क झाड़ियन पइ आपन सबइ वीणा टाँगेन।
³ बाबुल मँ जउन लोग हमका बन्दी बनाए रहेन, उ पचे हम से गावइ क कहेन।
    अत्याचारियन हम से खुसी क गीत गावइ क कहेन।
    उ पचे कहेन, “हमरे बरे सिय्योन क गीत गावा।”
⁴ मुला हम यहोवा क गीतन क
    कउनो दूसर देस मँ कइसे गाइ सकित ह।
⁵ हे यरूसलेम, अगर मइँ तोहका बिसरउँ,
    तउ मइँ बिसरि जाउँ कि कइसा गीत गाइ जात ह।
⁶ हे यरूसलेम, अगर मइँ तोहका याद न रखेउँ,
    अगर मइँ बड़ा खुसी क जइसा
बेउहार न करेउँ,
    तउ मइँ कउनो गीत गावइ मँ असमर्थ रहेउँ।

⁷ हे यहोवा, याद करा एदोमियन उ दिना जउन किहे रहेन।
    जब यरूसलेम हार ग रहा,
उ पचे चीखिके बोले रहेन,
    ऍका चीर डावा अउर नेंव तलक एका बर्बाद करा।
⁸ हे बाबुल, तोहका उजार दीन्ह जाइ।
    उ मनई क धन्य कहा जउन तोहका उ सजा देइ जउन तोहका मिलइ चाही।
    उ मनई क धन्य कहा जउन तोहका उ मुसीबत देइ जइसा तू हमका मुसीबत दिहे रहा।
⁹ उ मनई क धन्य कहा
    जउन तोहरे गदेलन क चट्टान पइ झपटिके पछार देइ।

³ हे यहोवा, मानव जाति तोहरे बरे काहे महत्वपूर्ण बना अहइँ?
    तू मानव जाति पइ काहे धियान देत अहा?
⁴ मनई क जिन्नगी एक फूँक क तरह होत ह।
    मनई क जिन्नगी ढलत भइ छाया क तरह होत ह।

⁵ अकासे क चीरके खाले उतरि आवा।
    पहाड़न क छुइ ल्या ताकि ओनसे धुआँ उठइ लाग।
⁶ हे यहोवा, बिजुरियन पठइ द्या अउर मोरे दुस्मनन क कहूँ दूर भगाइ द्या।
    आपन बाणन क चलावा अउर ओनका मजबूर करा कि उ पचे कहूँ पराइ जाइँ।
⁷ अकासे स मदद पठवा अउर मोका मुक्त करा अउ मोका बचाइ ल्या।
    एन, दुस्मनन क सागर मँ मोका जिन बूड़इ द्या।
    मोका ऍन बिदेसियन स बचाइ ल्या।
⁸ इ सबइ दुस्मन लबार अहइँ।
    उ पचे धोखेबाज़ अहइँ।

⁹ हे यहोवा, मइँ नवा गीत गाउब तोहरे ओन अद्भुत कर्मन क तू जेनका करत ह।
    मइँ तोहार जस दस तार वाली वीणा पइ गाउब।
¹⁰ तू राजा लोगन क मदद ओनकर जुद्धन जीतइ मँ करत ह।
    तू आपन सेवक दाऊद क ओकरे दुस्मनन क तरवारन स मुक्त किहा ह।
¹¹ मोका ऍन परदेसियन स मुक्त करा अउ मोका बचाइ ल्या।
    इ सबइ दुस्मन लबार अहइँ।
    उ पचे धोखेबाज़ अहइँ।

¹² हमार पूतन जवान होइके बिसाल बृच्छन जइसे मजबूत होइँ,
    हमार बिटियन महल क सुन्नर सजावटी कोने क पाथर जइसी होइँ।
¹³ तोहार गोदाम
    फसलन स भरपूर होइँ।
हमार भेड़िन चरागाहन मँ
    हजारन-हजारन मेमनन जनमत रहइँ।
¹⁴ हमार बर्धन बहोत स पइदावार ढोइहीं।
    हम पइ कउनो दुस्मन हमला न करी।
हम मँ स कउनो कबहुँ जुद्ध मँ नाहीं जाई।
    हमार गलियन मँ चिचियाहट नाहीं होई।

¹⁵ जउन लोगन बरे इ बातन नीक अहइँ उ धन्य अहइँ।
    जउन लोगन परमेस्सर यहोवा अहइ उ धन्य अहइँ।

¹ हे मोर आतिमा, यहोवा क स्तुति करा।
    हे यहोवा, हे मोरे परमेस्सर, तू अति महान अहा।
तू महिमा अउ आदर क ओढ़ना पहिरे अहा।
²     जइसे कउनो मनई चोगा पहिरत ही वइसा ही उ प्रकास क पहिरत हीं।
पर्दा क नाईं उ आकासे क फइलावत ह।
³     उ ओनके ऊपर आपन निवास स्थान बनाएस।
उ गहिर बादर क प्रयोग आपन रथ बनावइ मँ करत ह।
    उ पवन क पखना पइ चढ़िके अकास पार करत ह।
⁴ उ निज सरगदूतन क पवन क नाईं बनावत ह।
    उ निज सेवक क पवन क नाई बनाएस।
⁵ इ उहइ अहइ जउन धरती क ओकरी नेंव पइ निर्माण किहस।
    इ कबहुँ न गिरी।
⁶ उ जल क चादर स धरती क ढकेस।
    जल पहाड़न क ढाँकि लिहस।
⁷ तू आदेस दिहा अउर जल दूरि हट गवा।
    तू जल पइ गरज्या, अउर जल दूर भागा।
⁸ पहाड़न स खाले घाटियन मँ ओन सबइ ठउरन पइ
    जेका तू ओकरे बरे तइयार किहे रहा या जल बहा।
⁹ तू समुद्दर क चउहद्दी बाँध दिहा
    अउर फुन जल कबहुँ धरती क ढाँकइ नाहीं जाई।

¹⁰ उ पानी क पठवत ह
    जउन कि झरनन स पहाड़ियन क बीच मँ घाटियन मँ बहत ह।
¹¹ सबहिं जंगली पसुअन क सबइ धारा पानी देत हीं,
    जेनमाँ जंगली गदहा तलक आइके पिआस बुझावत हीं।
¹² जंगल क परिन्दा तलाबन क किनारे रहइ बरे आवत हीं।
    अउ निचके ठाड़ भए बृच्छन क डालियन पइ गावत हीं
¹³ तू पहाड़न क ऊपर बर्खा पठया ह
    अउर ओन चिजियन ओनका दिहा जेका तू बनाया जउन ओनका चाही।
¹⁴ परमेस्सर, पसुअन क खाइ बरे घास उपजाया,
    हम स्रम करित ह अउर उ हमका पैाधा देत ह।
    इ सबइ पौधन उ भोजन अहइँ जेका हम धरती स पाइत ह।
¹⁵ परमेस्सर, हमका दाखरस देत ह, जउन हमका खुस करत ह।
    हमार चाम नरम रखइ क तू हमका तेल देत ह।
    हमका पुट्ठ करइ क उ हमका खइया क देत ह।

¹⁶ परमेस्सर लबानोन क जउन देवदारू क बिसाल बृच्छ लगाएस ह।
    ओन बिसाल बृच्छ खातिर ओनकर बढ़वार बरे बहोत पानी रहत ह।
¹⁷ पंछी ओन बृच्छन पइ आपन घोंसला बनावत हीं।
    देवदार क बृच्छन पइ सारस क बसेरा अहइ।
¹⁸ बनैले पहाड़ी बोकरन क घर ऊँच पहाड़ मँ बना अहइँ।
    बीछियन खुद क बड़की चट्टान क आड़ मँ छुपावत अहइँ।

¹⁹ तू मौसम क पता लगावइ बरे चाँद क रच्या ह।
    सूरज सदा जानत ह कि ओका कहाँ बूढ़ब अहइ।
²⁰ तू अँधियारा बनाया जेहसे रात होइ
    ताकि जंगल क बनैला पसु एहर-ओहर घूमि सकिहीं।
²¹ उ पचे झपटत सेर जब दहाड़त हीं तब अइसा लगत ह जइसे उ पचे यहोवा क पुकारत होइँ,
    जेका माँगइ स उ ओनका अहार देत।
²² अउर पउ फाटइ पइ जीवजन्तु वापिस घरन क
    लउटत अउ आराम करत हीं।
²³ फिन लोग आपन काम करइ क बाहेर निकरत हीं।
    साँझ तलक उ पचे काम मँ लगा रहत हीं।

²⁴ हे यहोवा, तू अचरज भरा बहुतेरा काम किहा।
    धरती तोहरी वस्तुअन स भरी पड़ी अहइ।
    तू जउन कछू करत अहा, ओहमा आपन विवेक देखाँत ह।
²⁵ इ समुद्दर क लखा, इ केतॅना बिसाल अहइ!
    हुआँ बहुतेरी जीव-जन्तु अहइ जेका गना नाहीं जाइ सकिहीं।
    ओहमाँ कछू बिसाल अहइँ अउर कछू नान्ह।
²⁶ समुद्दर क ऊपर जलपोत तैरत हीं,
    अउर लिब्याथान^[a] जेका तू बनाएस ह
    समुद्दर मँ खेल-खेलत ह।

²⁷ यहोवा, इ सब कछू तोहरे आसरे पइ अहइ।
    हे परमेस्सर, ओन सबहीं जीवन क खाना तू ठीक समइ पइ देत अहा।
²⁸ हे परमेस्सर, तू ही अहा जउन सबइ जीव-जन्तुअन क खाना जेका उ पचे खात हीं,
    उपलब्ध करावत अहा।
²⁹ फुन जब तू ओनसे मुँह मोड़ लेत अहा तब उ पचे डेराइ जात हीं।
    ओनकर साँस रुकि जात हीं।
उ पचे दुर्बल होइ जात हीं अउर मर जात हीं।
    अउर ओनकर देह फुन धूरि मँ बदलि जात हीं।
³⁰ जब तू आपन आतिमा भेज्या ह, उ ओहसे जीवित होइ जात ह अउर
    धरती पइ जिन्नगी क संग फुन नवा कइ दीन्ह जात ह।

³¹ यहोवा क महिमा सदा-सदा बनी रहइ।
    यहोवा आपन रचना स सदा आनन्द मँ रहइ।
³² यहोवा क दृस्टि स इ धरती काँप उठी।
    पहाड़न स धुआँ उठइ लग जाइ।

³³ मइँ जिन्नगी भइ यहोवा बरे गाउब।
    मइँ जब तलक जिअत हउँ यहोवा क गुण गावत रहब।
³⁴ मोर सोच-बिचार ओका खुस करी।
    मइँ यहोवा क संग खुस अहउँ।
³⁵ धरती स पाप क लोप होइ जाइ।
    दुट्ठ लोग सदा बरे मिटि जाइँ।

हे मोर आतिमा,
    यहोवा क स्तुति करा।