Book of Common Prayer

¹ હે યહોવા, તમે ક્રોધમાં આવી મને ઠપકો આપશો નહિ,
    અને તમારા ગુસ્સામાં મને તમે શિક્ષા કરશો નહિ.
² તમારા બાણોએ મને વીંધી નાખ્યો છે;
    અને તમારા હાથે મને કચડી નાખ્યો છે.
³ તમારા ગુસ્સાને લીધે મારું શરીર જરાપણ તંદુરસ્ત નથી.
    મારા પાપોને લીધે અને તમારી શિક્ષાને લીધે મારા બધા હાડકાઁઓ ઇજા પામ્યા છે.
⁴ મારા માથા પર પાપો અને અન્યાયનો ભાર વધી ગયો છે,
    ભારે બોજાની જેમ તે મને અસહ્ય થઇ પડ્યો છે.
⁵ મારી મૂર્ખાઇને કારણે ઘા પડી ગયા છે
    અને કોહવાઇને ગંધાઇ ઊઠયા છે.
⁶ હું લથડી ગયો છું અને વાંકો વળી ગયો છું,
    અને આખો દિવસ હું શોક કર્યા કરું છું.
⁷ મારી કમરમાં અસહ્ય બળતરા થાય છેં,
    અને મારું શરીર રોગગ્રસ્ત થઇ ગયું છે.
⁸ હું નિર્બળ થઇને કચડાઇ ગયો છું,
    હૃદયની વેદનાને કારણે નિસાસા નાખું છું.
⁹ હે યહોવા, તમને મારી સર્વ ઇચ્છાની ખબર છે,
    મારા એ નિસાસાથી તમે અજાણ્યા નથી.
¹⁰ મારા હૃદયના ધબકારા વધી ગયા છે,
    આંખોનું તેજ ઘટી ગયું છે. અને શકિત ઘટી ગઇ છે.
¹¹ મારા રોગનાં ભયથી, મારા સ્નેહીજનો અને મિત્રો દૂર થઇ ગયા છે,
    અને મારા સગાસબંધી સૌ કોઇ, મારાથી જૂદા જઇ રહે છે.
¹² શત્રુઓ મને મારવા ફાંદા ગોઠવે છે,
    મારું અહિત કરનારા હાનિકારક વાતો કરે છે.
¹³ મારી વિરુદ્ધ આખો દિવસ કપટી કાવતરા કરે છે.
    પણ હું તો બહેરા માણસની જેમ સાંભળતો નથી,
    પોતાનું મોઢું ઉઘાડી ન શકું એવો હું મૂગો માણસ છું.
¹⁴ સાંભળી ન શકે, ઉત્તર ન આપી શકે,
    હું એવા માણસ જેવો છું.
¹⁵ હે યહોવા, મારા દેવ, હું તમારી વાટ જોઉં છું;
    હે યહોવા, હું આશા રાખું છું કે તમે મને ઉત્તર આપશો.
¹⁶ મેં કહ્યું, “મારો પગ લપસે ત્યારે,
    મારી વિરુદ્ધ બડાઇ કરનારા મારી દુ:ખદ પરિસ્થિતિ જોઇને કદાચ આનંદ પામે.”
¹⁷ હું હવે કોઇપણ સમયે ઢળી પડીશ,
    મારું દુ:ખ હંમેશા મારી સાથે છે.
¹⁸ હું મારા પાપ ને અન્યાય કબુલ કરું છુ;
    અને મારા પાપ માટે હું બહુ દિલગીર છું.
¹⁹ જેઓ વિના કારણે મારા શત્રુ થયા છે તેઓ અતિ પ્રબળ છે;
    જેઓ વિના કારણ મારો તિરસ્કાર કરે છે તેઓની સંખ્યા વધી છે.
²⁰ ભલાઇ ને બદલે દુષ્ટતા પાછી વાળે છે,
    અન્યાયથી તેઓ મારો તિરસ્કાર કરે છે,
કારણ, હું જે સારું છે
તેને અનુસરું છું.
²¹ હે યહોવા, તમે મને તરછોડશો નહિ,
    હે મારા દેવ, મારાથી દૂર ન થશો.
²² હે યહોવા, મારા તારણના દેવ,
    તમે જલદી આવો અને મને મદદ કરો!

²⁵ હું મૃત્યુ પામવાની તૈયારીમાં છું.
    તમારા વચન આપ્યું હતું પ્રમાણે મને જિવડા.
²⁶ મેં મારા માર્ગો પ્રગટ કર્યા, અને તેઁ મને ઉત્તર આપ્યો;
    મને તારા વિધિઓ શીખવ.
²⁷ તમારા શાસનોને સમજવામાં મારી મદદ કરો,
    જેથી હું તમારા અદૃભૂત કાર્યો વિશે ચર્ચા કરી શકું.
²⁸ વ્યથાને કારણે, હું રૂદન કરું છું, દુ:ખને કારણે મારું હૃદય ભારે થઇ ગયું છે,
    તમે આપેલા વચન પ્રમાણે મને બળવાન કરો.
²⁹ તમે મને પ્રત્યેક ભૂંડાઇથી દૂર રાખો;
    કૃપા કરીને મને તમારા નિયમોને આધીન થવાનું શીખવો.
³⁰ તમને વફાદાર થવાનું મે પસંદ કર્યુ છે.
    તમારા ન્યાયવચનો વિષે વિચારવાનું મે સતત ચાલું રાખ્યું છે.
³¹ હું વળગી રહ્યો છું તમારી આજ્ઞાઓને;
    મારે લજ્જિત થવું પડે એવું થવા ન દેશો.
³² તમારી આજ્ઞાઓના માર્ગમાં હું જીવન જીવીશ;
    કારણ તમે મારી સમજશકિત ખીલવો છો અને મારા હૃદયને પ્રફુલ્લિત કરો છો.

³³ હે યહોવા, તમારા વિધિઓનો માર્ગ મને શીખવો;
    અને પછી હું તેને કાળજીપૂર્વક અનુસરીશ.
³⁴ મને સમજણ આપો,
    એટલે હું તમારા નિયમ પાળીશ;
    હા, મારા અંત:કરણથી તેને માનીશ.
³⁵ મને તમારા આજ્ઞાઓના માર્ગે દોરો.
    કારણકે હું તેમાં આનંદ માણું છું.
³⁶ તમારા કરાર પર ધ્યાન આપવા માટે મને મદદ કરો નહિ કે,
    કેવી રીતે ધનવાન બનવું તેના પર.
³⁷ વ્યર્થતામાંથી તમે મારી દ્રષ્ટિ ફેરવો;
    અને તમારા માર્ગે જીવન જીવવા માટે મને મદદ કરો.
³⁸ તમારું જે વચન ભય ઉપજાવનારું છે;
    તે તારા સેવકના લાભમાં દ્રઢ કર.
³⁹ જે અપમાનનો મને ડર છે; તે મારાથી દૂર કરો;
    કારણકે તારાં ન્યાયવચનો ઉત્તમ છે.
⁴⁰ તમારા નિયમોને આધીન થવાનું હું ઝંખુ છું;
    મારા ન્યાયીપણાંમાં તમે મારા જીવનને સંભાળી રાખો.

⁴¹ હે યહોવા, તમારો અવિકારી પ્રેમ અને તમારા વચન પ્રમાણે
    મારું તારણ મારા પર આવો.
⁴² તે મને અપમાનિત કરવાવાળાને જવાબ આપવા માટે સક્ષમ કરશે,
    હું તમારા વચનનો ભરોસો કરું છું.
⁴³ ક્યારેય મારા મુખમાંથી સત્યને દૂર ન લઇ જશો,
    હું તમારા ન્યાયવચનો ઉપર આધાર રાખું છું.
⁴⁴ હું સદાય તમારા નિયમોને આધીન રહીશ.
⁴⁵ તમારા શિક્ષણને આધીન થવામાં મેં ચિત્ત લગાડ્યું છે;
    તેથી જીવન જીવવામા હું સ્વતંત્રતા અનુભવીશ.
⁴⁶ હું રાજાઓ સાથે તમારા કરાર વિષે વાત કરીશ,
    અને તેઓ (રસ પૂર્વક સાંભળશે અને) મને મૂંઝવણમાં મુકશે નહિ.
⁴⁷ તમારા નિયમો મને બહુ પ્રિય છે;
    તમારી આજ્ઞાઓમાં હું આનંદ માણું છું.
⁴⁸ હું તમારી આજ્ઞાઓ પાળવા મારા હાથ ઊંચા કરીશ,
    હું તેને ચાહું છું અને હું તેના વિશે મનન કરું છું.

⁴ વેપારીઓ તમે સાંભળો, તમે ગરીબોને લૂંટો છો
    અને લાચારને કચડી રાખો છો.
⁵ તમે સાબ્બાથદિન તથા ધામિર્ક ઉત્સવોના
    દિવસો પૂરા થવાની રાહ જુઓ છો,
જેથી બહાર જઇને તમે અનાજ વેચી શકો
    અને તમારાં ખોટાં ત્રાજવાં
અને વજનીયાનો ઉપયોગ કરી
    છેતરપિંડી કરી શકો;
⁶ એક જોડી પગરખા માટે,
    ગરીબો અને દરિદ્રોને
પૈસાથી ખરીદો છો,
    કાપણી વખતે જમીન
પર વેરાયેલા ઘઉંને
    પણ વેચો છો.

“નિશ્ચે હું કદી એ લોકોનાં કુકર્મો ભૂલીશ નહિ.
⁸ એ પાપોને લીધે ધરતી ધ્રુજી ઊઠશે,
    એના ઉપર રહેનારા સૌ શોકમાં ડૂબી જશે,
આખી પૃથ્વી ઉપર આવશે,
    તે ખળભળી જશે અને પછી
નાઇલ નદીની જેમ મંદ પડી જશે.

“જુઓ, એવો સમય આવી રહ્યો છે કે જ્યારે
    હું દેશમાં દુકાળ મોકલીશ.
લોકોને ભૂખ લાગશે પણ રોટલાની ભૂખ નહિ;
    તરસ લાગશે પણ પાણીની નહિ,
    યહોવાનું વચન સાંભળવાની ભૂખ અને તરસ લાગશે.
¹² ત્યારે લોકો સમુદ્રથી સમુદ્ર સુધી
    અને ઉત્તરથી પૂર્વ સુધી યહોવાના
    વચનોની શોધમાં ભટકશે.
તેની શોધમાં તેઓ અહીં તહીં દોડશે
    પણ તે તેઓને મળશે નહિ.
¹³ તે દિવસે રૂપવતી અક્ષતા કન્યાઓ
    અને યુવાન માણસો તરસને કારણે બેભાન થઇ જશે.
¹⁴ જેઓ સમરૂનના દેવોના નામે પ્રતિજ્ઞા કરે છે.
    ‘તેઓ હે દાન, તારા દેવના નામે વચન આપું છું’,
    એમ કહીને પ્રતિજ્ઞા લે છે.
તેઓ બધા ઢળી પડશે
    અને ફરી કદી પાછા ઊઠશે નહિ.”