Book of Common Prayer

Новиот Ерусалим

⁹ Потоа дојде еден од седумте ангели што ги држеа седумте садови со седумте последни казни и ми рече: „Дојди да ти ја покажам Невестата - свршеницата на Јагнето.“ ¹⁰ Со духот ме пренесе на врвот од една висока планина и ми го покажа Светиот град, Ерусалим, како се спушта од небесниот Бог.

¹¹ Градот болскотеше од Божјата слава со сјај како од скапоцен камен - светкаше како проѕирен јаспис. ¹² Околу градот имаше високи и широки ѕидови, со дванаесет порти; пред секоја порта стоеше по еден ангел. На секоја порта беше напишано по едно од имињата на дванаесетте Израелови синови, односно племиња. ¹³ Три порти беа на источната страна, три на северната, три на јужната и три на западната страна. ¹⁴ Градските ѕидови беа поставени врз дванаесет темели; на секој темел беше напишано името на еден од дванаесетте апостоли на Јагнето.

¹⁵ Ангелот што зборуваше со мене во раката држеше метар за мерење на градот, на портите и на градските ѕидови. ¹⁶ Градот имаше изглед на коцка: должината и височината му беа еднакви. Тој го измери градот и се покажа дека градот е долг^[a] 2.220 километри, а исто толку изнесуваа и неговата широчина и неговата височина. ¹⁷ Потоа ангелот, користејќи човечки мери, ги измери и ѕидовите: нивната широчина изнесуваше околу шеесет метри^[b].

¹⁸ Ѕидовите беа изградени од јаспис, а градот - од чисто злато, кое светкаше како кристал. ¹⁹ Дванаесетте темели му беа од скапоцени камења^[c]. Првиот темел беше од јаспис, вториот од сафир, третиот од ахат, четвртиот од смарагд; ²⁰ петтиот темел беше од оникс, шестиот од карнелијан, седмиот од хризолит, осмиот од берил, деветтиот од топаз, десеттиот од хризопраз, единаесеттиот од хијацинт и дванаесеттиот од аметист. ²¹ Секоја од дванаесетте порти беше од по едно зрно бисер. Улиците на градот беа од чисто злато, кое светкаше како кристал.

Исус вторпат ја навестува Својата смрт

(Мк. 9:30-32; Лк. 9:43б-45) ²² Еден ден, кога учениците се беа вратиле во Галилеја, Исус им рече: „Наскоро Јас, Синот Човечки, ќе бидам предаден во рацете на луѓето. ²³ Тие ќе Ме убијат, но на третиот ден ќе воскреснам.“ Ова многу ги ожалости учениците.

Исус плаќа данок за храмот

²⁴ Кога дојдоа во градот Кафарнаум, на Петар му пријдоа наплатувачите на данок за храмот и му рекоа: „Ќе плати ли вашиот Учител данок за храмот?“ ²⁵ „Секако!“ - им одговори Петар. А кога Петар се врати дома, Исус го пресретна и го праша: „Што мислиш, Симоне, од кого наплатуваат данок земните цареви: од сопствените синови или од туѓите?“ ²⁶ „Од туѓите!“ - одговори Петар. Тогаш Исус му рече: „Значи, синовите се ослободени од плаќање. ²⁷ Но, за да не ги соблазниме, појди до морето, фрли јадица и отвори и ја устата на првата риба што ќе ја фатиш; во неа ќе најдеш една пара^[a] што ќе биде доволна да платиш данок и за Мене и за себе.“