Book of Common Prayer

Видение за жената и Змејот

12 Потоа на небото се покажа една чудна^[a] појава: жена облечена со Сонцето. Под нејзините нозе беше Месечината, а на главата имаше венец со дванаесет ѕвезди. ² Жената се породуваше и врескаше од породилни болки.

³ Тогаш и друга глетка се појави на небото: еден голем црвен Змеј со седум глави и десет рогови; на секоја од седумте глави имаше круна. ⁴ Со својата опашка Змејот завлече една третина од ѕвездите^[b] на небото и ги собори долу на Земјата. Потоа Змејот се упати кон жената за да и го погуби Детето, откако ќе Го роди.

⁵ Жената роди Син, Кој ќе владее над сите народи со железен скиптар. Синот беше издвоен и однесен кај Бог, на Неговиот престол. ⁶ Жената, пак, побегна во пустината, на местото што Бог го беше приготвил како засолниште за неа - таму да биде згрижена илјада двесте и шеесет дни.

⁷ Тогаш изби војна на небото: Михаел и ангелите под негова команда завојуваа против Змејот и неговите ангели. ⁸ Змејот беше поразен и тој и неговите ангели беа исфрлени од небото. ⁹ Големиот Змеј, старата Змија, што ги мами сите жители на Земјата, познат како Ѓавол и Сатана, беше фрлен на Земјата, заедно со неговите ангели.

¹⁰ Потоа чув глас од небото, кој рече:

„Сега дојде спасението и Царството на нашиот Бог

и власта на Неговиот Помазаник^[c],

бидејќи тужителот на Божјите луѓе,

кој деноноќно ги обвинува пред нашиот Бог, е исфрлен!

¹¹ Тие го победија преку крвта^[d] на Јагнето и со вистината што ја проповедаа, за која храбро ги жртвуваа и сопствените животи.

¹² Затоа, нека се весели небото со сите свои жители! А тешко си им на Земјата и на морето, бидејќи Ѓаволот е фрлен кај нив! Тој е силно разгневен, зашто знае дека му преостанува уште само малку време!“

Исус се враќа во Назарет, но не е прифатен

(Мк. 6:1-6; Лк. 4:16-30) ⁵³ Штом Исус заврши со изложувањето на споредбите, си замина оттаму, ⁵⁴ и се врати во Назарет - своето поранешно живеалиште, каде што го поучуваше народот по синагогите^[a]. Сите што Го слушаа се чудеа и говореа: „Каде се стекнал овој човек со олкава мудрост и моќ да прави чуда? ⁵⁵ Зар Тој не е синот на дрводелецот? Нели му е мајка Марија и нели му се браќа Јаков, Јосиф, Симон и Јуда? ⁵⁶ Нели се меѓу нас и сите Негови сестри? Каде ли се здобил овој човек со сето ова?“ ⁵⁷ Жителите на Назарет Го пречекаа со сомневања. Тогаш Исус им рече: „Пророкот останува без признание единствено во својот град и во своето семејство.“ ⁵⁸ И бидејќи Го дочекаа со недоверба, Тој не направи таму многу чуда.