Book of Common Prayer

⁹ Во моето претходно писмо ви напишав да се држите настрана од луѓе што се впуштаат во блуд. ¹⁰ Притоа не мислев на луѓе кои се уште не се христијани, а живеат во блуд. Кога би требало да се држите настрана од сите што во овој свет се неморални, алчни, лажговци и што им се поклонуваат на разни идоли, би требало сосема да го напуштите овој свет! ¹¹ Мислев на луѓето што се нарекуваат христијани, а сепак прават блуд, или се алчни, или им се поклонуваат на идоли, или ги навредуваат другите, или се опиваат или мамат. Со такви немојте дури заедно ни да јадете!

¹² Зар е моја работа да судам за оние што се надвор од црквата? Не треба ли и вие најнапред да се грижите какви се оние што се внатре во црквата? ¹³ На оние што се надвор, Бог ќе им суди, а нам Светото Писмо ни порачува:

„Отстранете го од вашите редови секој што е зол^[a]!“

За споровите меѓу христијаните

6 Кога меѓу двајца христијани има некој спор, им прилега ли случајот да го изнесуваат пред световен суд, наместо да побараат помош од други христијани? ² Зар не знаете дека еден ден, ние, христијаните, ќе му судиме на овој свет? Ако вие треба да му судите на целиот свет, зарем не сте способни да разрешите дури и најситен меѓусебен спор? ³ Зар не знаете дека ние, христијаните, ќе им судиме дури и на ангелите? Тогаш, колку полесно треба да ги разрешуваме овоземните несогласувања! ⁴ Кога спорите за најобични, секојдневни работи, зошто одите да се судите пред луѓе кои црквата воопшто не ги цени!? ⁵ Треба да се засрамите што сум принуден да ви го кажувам ова! Нема ли меѓу вас христијаните барем еден мудар човек кој би можел да пресудува во вашите меѓусебни спорови? ⁶ Туку дозволувате еден христијанин да се суди со друг христијанин, и тоа пред суд на неверници!

⁷ Самото тоа што вие воопшто се тужите еден со друг, несомнено претставува пораз за вас. Зошто не истрпите, макар и да сте онеправдани? Зошто не ја прежалите штетата што евентуално ви е нанесена? ⁸ Наместо тоа, вие самите правите неправди и им нанесувате штета на своите сохристијани!

За одмаздувањето

(Лк. 6:29-30; Рим. 12:7; 1Кор. 6:7; 1Пет. 3:9; 5Мојс. 15:8) ³⁸ „Познато ви е дека во Мојсеевиот Закон било заповедано вака:

,Око за око, заб за заб^[a].‘

³⁹ Јас, пак, ви велам: ,Не возвраќајте им на оние што ви прават зло! Ако некој те удри по едниот образ, сврти му го и другиот. ⁴⁰ Ако некој те тужи за да ти ја земе кошулата, дај му го и палтото. ⁴¹ Ако некој те присили да му ги носиш торбите еден километар, ти носи му ги два километри. ⁴² Кога некој ќе запроси нешто од тебе - дај му; и не одбивај човек што бара да позајми нешто од тебе.‘“

За непријателите

(Лк. 6:27-28, 32-36) ⁴³ „Познато ви е дека во Мојсеевиот Закон било заповедано и ова:

,Сакај ги своите ближни, а мрази ги своите непријатели^[b].‘

⁴⁴ Јас, пак, ви велам: ,Покажувајте љубов и спрема своите непријатели и молете се за доброто на оние што ве прогонуваат; ⁴⁵ на тој начин вие ќе се однесувате како деца на вашиот небесен Татко, чие сонце изгрева и за лошите и за добрите. Тој им испраќа дожд и на праведните и на неправедните. ⁴⁶ Зашто, ако ги сакате само оние кои вас ве сакаат, тогаш, каква награда очекувате за тоа? Та, зар не го прават тоа и подмитливите собирачи на данок^[c]!? ⁴⁷ И ако сте љубезни само спрема своите ближни, тогаш, по што се разликувате од другите луѓе? Та, тоа го прават и паганите! ⁴⁸ Вие треба да се однесувате совршено исто како што се однесува вашиот небесен Татко!‘“