Book of Common Prayer

Бидете светала во овој свет

¹² Затоа, драги мои, како што бевте послушни додека бев кај вас, уште поважно е да останете послушни и сега, кога сум отсутен. Продолжете да работите, со длабока страхопочит, за да се заокружи вашето спасение, ¹³ зашто Бог дејствува во вас, за да ве направи желни и способни да го работите она што Тој го сака.

¹⁴ Се што ќе правите, правете без да негодувате или да се расправате, ¹⁵ за да бидете беспрекорни и чисти. Меѓу овие расипани, изопачени луѓе вие треба да бидете совршени Божји деца, да светите меѓу нив како што ѕвездите светат на небото, ¹⁶ држејќи се цврсто до Пораката што носи живот. Така, кога Христос ќе се врати, јас ќе се гордеам со вас, зашто ќе биде јасно дека моите напори и мојата работа не биле залудни.

¹⁷ Вашата вера во Господ и вашето служење се жртва што Му се принесува на Бог. Можеби мојата крв ќе треба да се излее како принос врз таа жртва. Ако биде така, јас ќе бидам среќен и ќе се радувам со сите вас. ¹⁸ Така и вие треба да бидете среќни и да се радувате со мене.

Павле го препорачува Тимотеј

¹⁹ Ако Му е тоа по волја на Господ Исус, се надевам дека набрзо ќе можам да го пратам кај вас Тимотеј, та кога ќе се врати да ме израдува со вести за вас, ²⁰ зашто немам друг истомисленик што толку искрено се грижи за вас. ²¹ Сите други работат за своја корист, а не за делото на Исус Христос. ²² Но, тој се има докажано како карактерен човек. Се сеќавате како работевме заедно на ширењето на Радосната вест: како татко и син. ²³ Се надевам дека ќе можам да го испратам веднаш штом дознаам каква судбина ми се подготвува, ²⁴ а се надевам дека Господ ќе ми овозможи наскоро и јас да дојдам кај вас.

Павле го препорачува Епафродит

²⁵ Во меѓувреме, сметав дека е потребно да ви го пратам нашиот брат Епафродит, со кој заедно работевме и се боревме, откако вие ми го испративте да ми помага во разни потреби. ²⁶ Тој одвај чека да ве види, копнее да се врати дома, зашто му падна тешко што сте разбрале дека беше болен. ²⁷ Навистина беше смртно болен, но Бог му се смилува. И не само нему, туку и мене ми се смилува, за да не ми дојде тага врз тага. ²⁸ Брзам да го испратам, за да го видите и да му се нарадувате, па и јас да не бидам толку загрижен за вас. ²⁹ Затоа, пречекајте го со радост, како брат во Господ. Таквите како него треба многу да ги цените, ³⁰ зашто работејќи за Христос, тој животот си го доведе во опасност и речиси умре, за да ми помогне и да ми го надомести тоа што вие не можевте да го направите за мене, бидејќи сте далеку.

¹³ По заминувањето на мудреците, на Јосиф му се јави насон ангел Господов и му рече: „Стани, земи ги Детето и мајка Му и бегај во Египет; остани таму додека не ти се јавам, зашто Ирод ќе го бара Детето за да Го убие.“ ¹⁴ Тогаш Јосиф стана, ги зеде Детето и мајка Му Марија и ноќта заминаа за Египет. ¹⁵ И останаа таму се до смртта на Ирод. Со ова се исполнуваше претскажаното од Бог преку пророкот Осија^[a]:

„Од Египет го повикав Мојот Син.“

Колежот на новородените деца

¹⁶ Ирод збесна кога сфати дека мудреците го надитрија и нареди во Витлеем и во неговата околина да бидат убиени сите машки деца до двегодишна возраст - согласно со времето што го беше дознал од мудреците. ¹⁷ Со ова се исполнуваше претскажаното од пророкот Еремија:

¹⁸ „Пискотници се слушаат во Рама,

плач и тажни лелеци;

Рахела плаче по своите деца

и не сака да се утеши,

зашто нив повеќе ги нема^[b].“

Враќањето од Египет во Назарет

¹⁹ По смртта на Ирод, на Јосиф, кој беше во Египет, му се јави насон ангел Господов ²⁰ и му рече: „Стани, земи ги Детето и мајка Му и врати се во израелската земја, зашто изумреа тие што сакаа да Му го одземат животот на Детето.“ ²¹ Тогаш Јосиф стана, ги зеде Детето и мајка Му и сите се вратија во израелската земја. ²² Меѓутоа, кога Јосиф дозна дека во Јудеја, на местото на Ирод дошол на власт неговиот син Архелај, се исплаши да појде таму. Па откако насон прими упатства, замина во покраината Галилеја. ²³ Таму се насели во градот Назарет, со што се исполнуваше претскажаното од пророците дека Месијата ќе Го викаат „Назареќанец“.