Book of Common Prayer
Трпение при страдања
7 Имајте трпение, драги пријатели, додека чекате да се врати Господ. Погледнете како земјоделецот трпеливо чека скапоцениот плод на земјата да узрее за жетва, како трпеливо го чека пролетниот и есенскиот дожд[a]. 8 Бидете и вие трпеливи како него и охрабрете ги вашите срца: Господ брзо ќе дојде! 9 Немојте да негодувате еден против друг, во спротивно Бог ќе ви суди! Еве Го Судијата, веќе стои пред врата!
10 Драги мои, следете го примерот на пророците што зборуваа во името на Господ. Тие имаа трпение, дури и кога мораа да страдаат. 11 Оние што најмногу издржаа, најмногу и ги почитуваме. Сте слушнале какво трпение покажа Јов и знаете како Господ на крајот го благослови. Господ е полн со милост и сочувство[b].
12 Но пред се, драги пријатели, немојте да се колнете, ни во небото, ни во Земјата, ниту во што било друго. Доволно е да кажете само „да“ или „не“, за да не паднете под осуда.
19 Пријатели мои, христијани, ако некој од вас застрани од вистината, треба да се потрудите да го вратите назад. 20 Оној што ќе врати грешник од погрешен пат, ќе ја спаси неговата душа од смрт и ќе покрие многу гревови[a].
14) Смртта на Исус
(Мт. 27:45-56; Лк. 23:44-49; Јвн. 19:28-30) 33 Напладне[a] се спушти густа темнина по целата земја и траеше до петнаесет[b] часот. 34 Во петнаесет часот, Исус извика со силен глас: „Ели, Ели, л’мах ш’вактани!?“ Тоа значи: „Боже Мој, Боже Мој, зошто Ме остави[c]?“
35 Некои од присутните го слушнаа ова, но погрешно го разбраа, па рекоа: „Го довикува Илија[d]!“ 36 Еден од нив веднаш истрча, натопи сунѓер во оцет, го закачи на врвот од трска и Му понуди на Исус да се напие. Потоа рече: „Чекајте да видиме дали ќе се појави Илија да Го симне!“
37 Исус уште еднаш извика со силен глас и умре.
38 Во истиот момент, завесата[e] во храмот се расцепи на два дела, озгора додолу.
39 Таму, спроти Исус, стоеше и еден римски офицер. Кога Тој виде како умре Исус, рече: „Овој човек навистина беше Божјиот Син!“
Copyright 1999 by HBC Radosna Vest