Book of Common Prayer

⁷ За време на Својот живот на Земјата Исус ги изнесуваше Своите молитви и молби низ гласен плач и низ солзи, упатени до Бог, Кој можеше да Го спаси од смрт. Молитвите Му беа услишани, заради почитта што Тој ја искажуваше спрема Бог. ⁸ Иако Исус беше Божји Син, сепак, преку лични страдања мораше да дознае што значи да се биде послушен. ⁹ На тој начин Исус стана совршен Првосвештеник и извор на вечно спасение за сите што Нему Му се послушни. ¹⁰ Затоа Бог Го одреди за Првосвештеник од редот на Мелхиседек.

Прекори за бавен духовен растеж

¹¹ Толку многу работи имаме да ви зборуваме за ова, но се чини дека вам слушањето тешко ви паѓа и затоа слабо разбирате. ¹² Веќе долго време сте христијани и досега требаше вие да подучувате други луѓе. Наместо тоа се уште некој треба вас да ве учи на првите лекции од Божјата порака. Уште сте како бебиња што можат да пијат само млеко и не можат да јадат тврда храна. ¹³ А тој што се храни само со млеко, во духовниот живот, се уште е дете и не умее да постапува праведно. ¹⁴ Тврдата храна е за зрелите, за оние што со постојана практика го имаат извежбано чувството да го разликуваат правилното од погрешното, и го извршуваат правилното.

Исцелување на едно момче болно од епилепсија

(Матеј 17:14-18; Марко 9:14-27) ³⁷ Утредента додека Исус и тројцата Негови ученици слегуваа од планината ги пресретна многуброен народ. ³⁸ Еден човек извика од толпата: „Учителе! Те молам, погледни го мојот син, тој ми е единец! ³⁹ Го напаѓа зол дух, го тера да вреска, го фрла наваму-натаму и пена му избива на устата. Многу го измачува и долго не го пушта. ⁴⁰ Ги молев Твоите ученици да го истераат тој дух, но тие не можеа!“

⁴¹ Исус одговори: „Ах, колку неверно и грешно поколение сте вие! До кога ќе морам да останам со вас и да ве поднесувам!?“ Потоа му рече на човекот: „Донеси го синот овде!“ ⁴² Додека момчето приоѓаше, демонскиот дух го кутна наземи и почна да го измачува. Исус со наредба го изгони демонскиот дух и го исцели момчето, па му го врати на таткото.

Исус вторпат зборува за Својата смрт

(Матеј 17:22-23; Марко 9:30-32) ⁴³ Сите останаа вчудовидени пред Божјата моќна сила. И додека народот сe уште се восхитуваше од она што го правеше Исус, Тој им се обрати на Своите ученици и им рече: ⁴⁴ „Запомнете ги добро овие зборови: Синот Човечки^[a] ќе биде предаден во рацете на луѓето.“ ⁴⁵ Но учениците не ги разбраа овие зборови. За нив ова остана таинствено, а не се осмелуваа да Го прашаат Исуса што значат тие зборови.

Кој е најголем во Божјите очи?

(Матеј 18:1-5; Марко 9:33-37) ⁴⁶ Меѓу учениците на Исус се разви расправија за тоа, кој од нив е најголем? ⁴⁷ Исус, познавајќи ги нивните мисли, повика едно дете, го стави крај Себе, ⁴⁸ и им рече: „Тој што го прима ова дете во Мое име - Мене Ме прима; а кој Ме прима Мене, Го прима Оној^[b] што Ме испрати. Најголем меѓу сите вас е оној што е најпонизен!“

Кој не е против вас, тој е со вас

(Марко 9:38-40) ⁴⁹ Тогаш Јован Му рече на Исус: „Господару! Видовме еден човек, кој во Твое име изгонува демонски духови и му наредивме да престане, зашто тој не оди со нас.“ ⁵⁰ Но Исус му одговори: „Немојте да му забранувате! Кој не е против вас, тој е со вас!“