Book of Common Prayer

Писмо до

Евреите

Христос е конечниот и врвниот Божји пратеник

1 Во минатото Бог преку пророците им говореше на нашите предци по многу поводи и на многу начини. ² Сега, во овие последни денови, Тој ни проговори преку Својот Син - Исус Христос. Преку Него Бог го создаде светот и Него го определи за наследник на се. ³ Тој го одразува сиот сјај на Божјата слава и точно покажува каков е Бог. Тој ја одржува вселената со Својот моќен збор. Откако умре за да не исчисти од нашите гревови, Христос седна на небото од десната^[a] страна на Величествениот Бог.

Божјиот Син е над ангелите

⁴ Ова покажува дека Божјиот Син е повозвишен од ангелите, како што е повозвишено и името што Му е дадено, ⁵ зашто на ниеден ангел Бог не му рекол: „Ти Си Мој Син, денес станав Твој Татко^[b]“, и повторно: „Јас ќе Му бидам Татко, а Тој ќе Ми биде Син^[c]“.

⁶ Понатаму, кога Го испрати Својот Првороден Син на светот, Бог рече: „Сите ангели Божји Нему нека Му се поклонат^[d].“

⁷ И додека Бог ангелите ги нарекува: „Гласници брзи како ветер, слуги од огнен пламен^[e]“, ⁸ напротив, за Својот Син вели:

„Ти Си Бог и вечно ќе владееш како Цар!

Твојата царска моќ воспоставува правда.

⁹ Ти ја сакаш правдата, а го мразиш беззаконието, и затоа

Јас, Твојот Бог, Те избрав^[f] Тебе

и ти определив поголема радост

отколку на Твоите придружници^[g].“

¹⁰ А кажано е и следново:

„Господе, Ти беше Тој што во почетокот ја создаде Земјата, а и небесата се дело на твоите раце. ¹¹ Тие ќе пропаднат, ќе изветват како стара облека, а Ти ќе останеш. ¹² Ќе ги свиткаш како старо палто, ќе избледат како стара облека. А Ти си секогаш ист, Ти никогаш нема да станеш стар^[h].“

¹³ На ниеден ангел Бог не му рекол така како што Му рече на Својот Син:

„Седни од Мојата десна страна,

додека да ги соборам^[i] Твоите непријатели под нозете Твои!“

¹⁴ Ангелите се само слуги. Тие се духовни суштества кои Бог ги испраќа да им помагаат^[j] на оние што ќе го примат спасението.

Евангелието според

Јован

Вечниот Збор

- Христос 1 Уште на почетокот постоеше Зборот. Зборот беше со Бог и Зборот беше Бог. ² Од самиот почеток, Зборот беше со Бог.

³ Се што постои беше создадено преку Зборот. Не постои ништо создадено, кое не беше создадено преку Зборот! ⁴ И самиот живот беше во Зборот, и Тој живот им дава светлина на луѓето. ⁵ Оваа Светлина свети во темнината, и темнината никогаш не може да ја изгаси.

⁶ Се појави еден човек, по име Јован Крстител, кој беше испратен од Бог. ⁷ Тој дојде како сведок, за да им каже на сите за Светлината и да ги упати луѓето во верата. ⁸ Јован не беше Светлината; тој беше само сведок за Светлината. ⁹ Вистинската Светлина, која го осветлува секој човек, стапуваше на светската сцена.

¹⁰ Иако Зборот беше во светот и светот беше преку Него создаден, светот не Го позна. ¹¹ Кај Своите дојде, но тие не Го прифатија. ¹² А на сите што Го прифатија - на оние што поверуваа во Него^[a] - им даде право да станат Божји чеда. ¹³ Тие се нановородени, но овојпат не физички, не од телесна похота, или пак од волјата на маж, туку се родени од Бог.

¹⁴ Зборот стана човек и живееше меѓу нас. Ние ја видовме Неговата слава - славата што Тој ја прими како Единороден Син од небесниот Татко. Тој беше полн со љубов и искреност.^[b]

¹⁵ Јован посведочуваше за Него и викаше, велејќи: „Ова е Оној за Кого реков: ,По мене доаѓа еден Човек, Кој е поголем од мене, зашто Тој постоеше уште пред да се родам јас!‘“ ¹⁶ Од Неговата полнота сите ние примивме благослов врз благослов, ¹⁷ зашто Законот беше даден преку Мојсеј, а Исус Христос ни ги донесе љубовта и вистината^[c]. ¹⁸ Никој, никогаш не Го видел Бога; но имаме објава за Него, преку Единородниот Син - Кој е Бог, и Кој произлегува^[d] од Таткото.