Book of Common Prayer

Проповедај правилно и ревносно

4 Кога Исус Христос ќе дојде да го воспостави Своето царство, Тој ќе им суди на сите - и на живите и на мртвите. Затоа, имајќи ги Бог и Исус Христос за сведоци, со заклетва те задолжувам ² да ја проповедаш Божјата порака! Прави го тоа ревносно, без оглед на тоа дали моментот е погоден или не. Исправај ги луѓето и укорувај ги за нивните гревови. Трпеливо поучувај ги и охрабрувај ги.

³ Ќе дојде време кога луѓето нема да го слушаат правилното учење. Напротив, за да си најдат оправдување за своите грешни страсти, ќе си повикаат многубројни учители што ќе им го кажуваат она што сакаат да го слушнат. ⁴ Ќе престанат да ја слушаат вистината и ќе се свртат кон бесмислени митови.

⁵ Ти, меѓутоа, биди трезвен во секоја ситуација. Издржи ги неправдите. Како проповедник на Радосната вест, изврши ја својата задача докрај.

⁶ На мојот живот му се гледа крајот. Дојде време да заминам кај Господ. ⁷ Храбро се борев, ја завршив трката и останав верен. ⁸ Затоа, за мене е веќе обезбеден венецот на праведноста што Господ ќе ми го даде. Тој суди праведно и во Оној Ден^[a] ќе ми даде венец, и мене, и на сите што со нетрпение го чекаат Неговото повторно доаѓање.

Слепиот Бартимеј од Јерихо

(Мт. 20:29-34; Лк. 18:35-43) ⁴⁶ Исус и Неговите ученици пристигнаа во градот Јерихо. На излегување од градот многуброен народ одеше по нив. Покрај патот седеше еден питач, по име Бартимеј - син на Тимеј. ⁴⁷ Кога слушна дека овде минува Исус Назареќанецот, тој почна да вика: „Исусе, Сине Давидов, покажи милост спрема мене!“ ⁴⁸ Мнозина се обидуваа да го замолкнат, но тој уште погласно викаше: „Сине Давидов, покажи милост спрема мене!“ ⁴⁹ Исус застана и рече: „Викнете го овде!“ Луѓето го повикаа слепиот и му говореа: „Не плаши се, дојди, Тој те вика!“ ⁵⁰ Човекот го фрли своето палто, рипна и потрча кон Исус. ⁵¹ „Што сакаш да сторам за тебе?“ - го праша Исус. Слепиот одговори: „Учителе, сакам да прогледам!“ ⁵² Исус му рече: „В ред; твојата вера те исцели!“ Човекот веднаш прогледа и Му се придружи^[a] на Исус.