Book of Common Prayer

¹³ Се разбира, драги пријатели христијани, јас не мислам дека веќе сум успеал да го достигнам тоа^[a], но мислам дека успеав да го заборавам она што е зад мене и од се срце да се стремам кон она што е пред мене. ¹⁴ Трчам право кон целта, за да ја добијам наградата, небесното жителство за кое Бог, преку Исус Христос, не повика.

¹⁵ Сите што сте духовно зрели, вака треба да размислувате. Ако во нешто не се согласувате, верувам дека Бог тоа ќе ви го разјасни. ¹⁶ Но важно е да продолжиме да се придржуваме до вистината што веќе ја прифативме.

¹⁷ Драги пријатели христијани, одете по моите стапки. Гледајте на оние што го следат нашиот пример. ¹⁸ Многу пати досега сум ви го кажал ова, а и сега, со солзи во очите ќе ви го повторам: има многу луѓе кои според начинот на кој живеат му се непријатели на Христовиот крст^[b]. ¹⁹ Тие ќе завршат во пеколот^[c], бидејќи нивните телесни желби^[d] им се бог. Се гордеат со она од што би требало да се срамат и размислуваат само за овоземни работи. ²⁰ За разлика од нив, ние сме жители на небото и желно очекуваме нашиот Спасител, Господ Исус Христос, оттаму да дојде. ²¹ Тој ќе ги преобрази нашите слаби, смртни тела и ќе ги направи слични на Неговото славно тело, со истата моќ со која ќе ја преземе власта над се.

4 Затоа, мои мили и многу сакани пријатели христијани, по кои толку копнеам, радост моја, гордост моја, останете Му непоколебливо верни на Господ!

Осуда на свештеничкото лицемерство

¹³ „Тешко вам, вероучители и фарисеи^[a], лицемери ниедни! Вие пред носот на луѓето им ги затворате вратите на небесното царство: ниту вие влегувате, ниту ги пуштате да влезат оние кои се обидуваат!

¹⁴ (Тешко вам, вероучители и фарисеи, лицемери ниедни! Вие ги искористувате вдовиците и ги ограбувате нивните домови, а потоа редите долги молитви! Затоа вие ќе бидете посурово казнети!)^[b]

¹⁵ Тешко вам, вероучители и фарисеи, лицемери ниедни! Океани и земји обиколувате за да придобиете еден следбеник, а кога ќе го придобиете го претворате во син на пеколот, двапати полош од вас!

¹⁶ Тешко вам, слепи водачи, кои велите: ,Ако некој се заколне во Божјиот храм, тоа на ништо не го обврзува, но ако се заколне во црковното злато, тогаш, тоа го обврзува!‘ ¹⁷ Безумници и слепци ниедни! Што е поважно: златото или храмот што го прави златото да биде свето!? ¹⁸ И ова го велите: ,Ако некој се заколне во олтарот, тоа на ништо не го обврзува, а ако се заколне во жртвениот прилог на олтарот, тогаш, тоа го обврзува!‘ ¹⁹ Слепци ниедни! Што е поважно: жртвениот прилог на олтарот или олтарот што го прави прилогот да биде свет!? ²⁰ Тој што се заколнува во олтарот, се заколнува во него и во се што е на него! ²¹ Тој што се заколнува во храмот, се заколнува во него и во Бога Кој е присутен во него! ²² Тој што се заколнува во небото, се заколнува во Божјиот престол и во Бога, Кој седи на него!

²³ Тешко вам, вероучители и фарисеи, лицемери ниедни! Вие давате десеток од зачините, како што се нането, копрата и кимот, а ги запоставувате најважните барања на Божјиот Закон: праведноста, милоста и верата! Да, десеток треба да давате, но не смеете да ги запоставувате најважните работи. ²⁴ Слепи водачи ниедни! Комарец цедите, а камила голтате!