Book of Common Prayer

7) Отворање на седмиот печат

Молк на небото

8 Кога Јагнето го отвори седмиот печат, на небото настапи полчасовен молк.

Сцена на небото: жртвеник, кадилница и молитви

² Потоа забележав дека на седумте ангели што стоеја пред Бог им беа разделени седум труби.

³ Во тој момент еден друг ангел, кој носеше златна кадилница, дојде и застана врз жртвеникот. Нему му беше дадено големо количество темјан да го принесе заедно со молитвите на Божјите луѓе^[a], на златниот жртвеник, пред престолот. ⁴ Тогаш од раката на ангелот се подигна дим од темјанот и од молитвите на Божјите луѓе и втаса до Бог.

⁵ Потоа ангелот ја зеде кадилницата, ја наполни со жар од жртвеникот и го истури врз Земјата. Од тоа зататнеа грмотевици, болснаа молскавици, а Земјата почна да се тресе.

СЕДУМТЕ ТРУБИ

1) Врнежи од град и оган

⁶ Седумте ангели кои ги имаа седумте труби се подготвија да затрубат.

⁷ Првиот ангел затруби и врз Земјата се истурија град и оган, измешани со крв! Од нив се запали една третина од Земјата и изгоре една третина од дрвјата и сето зеленило.

2) Пламната гора фрлена во морето

⁸ Вториот ангел затруби и нешто како пламната гора беше фрлено во морето. Од тоа, една третина од морето се претвори во крв, ⁹ една третина од живиот свет во морето изгина и една третина од бродовите потонаа.

3) Отровна ѕвезда паѓа во слатките води

¹⁰ Третиот ангел затруби и од небото падна една голема ѕвезда. Таа гореше како факел и падна врз една третина од реките и изворите. Ѕвездата беше наречена Пелин ¹¹ и од неа стана горчлива една третина од водата за пиење. Голем број луѓе изумреа од горчливата вода.

4) Замрачувања и офкања

¹² Четвртиот ангел затруби и една третина од Сонцето, една третина од Месечината и една третина од ѕвездите беа погодени и сите тие загубија по една третина од својата светлина. Така и една третина од денот и една третина од ноќта останаа без светлина.

¹³ Во моето видение тогаш забележав еден орел како лета високо сред небото. Орелот громогласно извикуваше: „Тешко, тешко, тешко на жителите на Земјата од трубењето на следните тројца ангели!“

Враќањето на Исусовите ученици

¹⁷ Седумдесеттемина^[a] се вратија радосни, велејќи: „Господе, преку Твоето име нам ни се покоруваат и демонските духови!“ ¹⁸ А Исус им рече: „Видов како падна Сатаната, како молскавица од небото! ¹⁹ Ете, ви дадов моќ да газите на змии и скорпии и надмоќ над секоја непријателска сила - ништо да не може да ве повреди. ²⁰ Сепак, не радувајте се што ви се потчинуваат демонските духови, туку радувајте се што вашите имиња се запишани како жители на небото!“

Радоста на Исус

(Матеј 11:25-27; 13:16-17) ²¹ Во тој миг Исус се исполни со радост, преку Светиот Дух^[b], и рече: „Ти благодарам, небесен Татко, Господару на небото и на Земјата, што сето ова им го откри на скромните, а го скри од оние што мудруваат и се потпираат на својот разум. Да, Татко, така сакаше Ти.

²² Мојот небесен Татко Ме има овластено Мене за сe. Никој не знае Кој е Синот, освен Таткото; и никој не знае Кој е Таткото, освен Синот и оние на кои Синот ќе реши да им открие.“ ²³ Потоа насамо им рече на учениците: „Благословени се очите што го гледаат ова што го гледате вие! ²⁴ Ви велам: многу пророци и цареви сакаа да го видат ова што го гледате вие, но не го видоа; сакаа да го слушаат тоа што вие го слушате, но немаа можност!“