Book of Common Prayer

Заговор против Павле

¹² Кога се раздени, група Евреи сковаа заговор. Се заколнаа дека нема ни да јадат, ни да пијат, се додека не го убијат Павле. ¹³ Во заговорот зедоа учество повеќе од четириесет мажи. ¹⁴ Тие отидоа кај Првосвештеникот и старешините, па им рекоа: „Ние се заколнавме ништо да не ставаме в уста, се додека не го убиеме Павле. ¹⁵ Затоа јавете му на полковникот да го доведе Павле во собранието, божем имате намера поподробно да го испрашувате, а ние, уште пред тој да втаса овде ќе му поставиме заседа и ќе го убиеме.“

¹⁶ Но синот на Павловата сестра разбра за овој заговор, па отиде во воената тврдина и му кажа на Павле. ¹⁷ Павле викна еден од офицерите и му рече: „Одведи го ова момче кај полковникот. Има нешто важно да му пренесе.“

¹⁸ Офицерот го одведе и му рече на полковникот: „Затвореникот Павле ме викна и ме замоли да го доведам ова момче кај вас, зашто имало нешто важно да ви каже.“ ¹⁹ Полковникот го фати за рака момчето, го одведе настрана и го праша: „Што сакаш да ми кажеш?“

²⁰ Момчето му рече: „Евреите се договорија да ве замолат утре да го доведете Павле во собранието, како божем да имаат намера поподробно да го испрашаат. ²¹ Немојте да ги послушате, зашто повеќе од четириесетмина Евреи му поставија заседа за да го убијат! Се заколнале дека нема да јадат и пијат, се додека не го убијат. Веќе демнат во заседа и чекаат само вие да го одобрите нивното барање.“

²² Полковникот го пушти момчето, наредувајќи му на никого да не кажува дека го известил за заговорот.

Павле е испратен кај гувернерот Феликс

²³ Потоа полковникот викна двајца од своите офицери и им рече: „Одберете двесте војници, седумдесет коњаници и двесте стрелци, и наредете им да се подготват вечерва во девет часот да заминат за Цезареја. ²⁴ Обезбедете за Павле добиток за јавање, за безбедно да го одведете кај гувернерот Феликс.“

Верата на еден римски офицер

(Матеј 8:5-13) 7 Кога Исус го заврши Своето излагање пред народот, замина во Кафарнаум. ² Таму, еден римски офицер имаше слуга што му беше многу драг, а беше тешко болен, на умирање. ³ Кога офицерот разбра за Исус, испрати кај Него неколку еврејски старешини, молејќи Го да дојде и да го исцели слугата. ⁴ Тие дојдоа кај Исуса и почнаа мошне сесрдно да Го молат, велејќи: „Овој човек заслужува да му излезеш во пресрет. ⁵ Тој го сака нашиот народ и ни изгради синагога^[a].“

⁶ Исус тргна со нив. Кога наближи до куќата, офицерот испрати луѓе да Му порачаат: „Господине, не труди се понатаму, зашто не сум достоен да влезеш под мојот покрив, ⁷ ниту пак сум достоен да дојдам кај Тебе. Кажи само збор и мојот слуга ќе оздрави! ⁸ Зашто и јас сум човек што се потчинува на наредби, а имам и власт да им издавам наредби на војниците. Кога на еден ќе му речам ,Оди!‘ - тој оди; на друг ќе му речам ,Дојди!‘, и тој доаѓа. На мојот слуга ќе му речам ,Стори го тоа!‘, и тој го извршува.“ ⁹ Кога го чу ова, Исус се воодушеви и на народот што одеше по Него му рече: „Навистина, кај никого во Израел не видов толку голема вера!“ ¹⁰ Кога оние што беа испратени се вратија дома, го најдоа слугата наполно здрав.

Воскреснување на момчето од Наин

¹¹ Набргу потоа, Исус отиде во градот Наин^[b]. Заедно со Него беа Неговите ученици и многуброен народ. ¹² Штом се приближи до градските порти, пресретна погребна поворка; беше починал синот-единец на една вдовица. Во поворката имаше многу луѓе од градот. ¹³ Кога Господ ја забележа вдовицата, се сожали, и и рече: „Не плачи!“ ¹⁴ Потоа пријде до ковчегот и го допре. Луѓето што го носеа, застанаа, а Исус рече: „Момче, ти заповедам да станеш!“ ¹⁵ Покојникот стана и почна да зборува, а Исус и го предаде на мајката. ¹⁶ Страв ги обзеде сите и Му оддаваа слава на Бог, велејќи: „Голем пророк се појави меѓу нас! Бог дојде за да го спаси Својот народ!“ ¹⁷ Оваа вест за Исус се разнесе по цела Јудеја и по целата околина.