Book of Common Prayer

Бунт против христијанството во Ефес

²¹ По овие настани, поттикнат од Светиот Дух^[a], Павле реши да ги посети Македонија и Ахаја, па да замине за Ерусалим. „А потоа,“ - рече тој - „ќе треба да го посетам и Рим.“ ²² Ги испрати во Македонија двајцата свои помошници, Тимотеј и Ераст, а тој уште некое време остана во Азија.

²³ Во тоа време во Ефес настанаа големи немири заради Христовото учење^[b]. ²⁴ Еден златар по име Димитри, кој изработуваше сребрени модели од храмот на божицата Артемида^[c] и на тој начин се богатеа и тој и неговите соработници, ²⁵ ги собра сите што се занимаваа со оваа и слична работа и им рече: „Луѓе, вие знаете дека нашето богатство доаѓа од овој занает. ²⁶ Гледате и слушате дека не само во Ефес, туку речиси во цела Азија, овој човек, Павле, разубеди и одврати многу луѓе, велејќи им дека овие предмети направени од човечка рака не се богови. ²⁷ Постои опасност не само нашиот занает да падне во немилост, туку и храмот на големата божица Артемида сосема да ја загуби својата важност, да исчезне нејзината величественост што ја почитуваат цела Азија и целиот свет!“

²⁸ Кога го слушнаа ова, збеснаа и почнаа да викаат: „Голема е Артемида, божицата на Ефес!“ ²⁹ Во градот настана мешаница и откако ги фатија Македонците Гај и Аристарх, сопатници на Павле, сите се собраа во градскиот амфитеатар^[d]. ³⁰ Павле сакаше да се појави пред насобраната толпа, но тамошните христијани го одвратија од таквата намера, ³¹ а и некои луѓе од власта што му беа пријатели му испратија порака, молејќи го да не се појавува во амфитеатарот.

³² Собирот се претвори во бркотница. Едни викаа едно, други друго, а повеќето воопшто не знаеја за што се собрани. ³³ Евреите го посочија Александар и го изведоа напред, а тој замавна со раката за да ги смири и да даде објаснување пред толпата, ³⁴ но кога слушнаа дека тој е Евреин, сите во еден глас викаа речиси два часа: „Голема е Артемида, божицата на Ефес!“

³⁵ Најпосле градоначалникот^[e] ја смири толпата и рече: „Граѓани на Ефес! Има ли некој што не знае дека Ефес е град заштитник на храмот на големата божица Артемида и на кипот што ни падна од небото!? ³⁶ Ова никој не може да го оспори, затоа треба да се смирите и да не правите ништо непромислено. ³⁷ Овие луѓе, што сте ги довеле овде, ниту го ограбиле храмот, ниту пак зборувале против нашата божица.

³⁸ Ако Димитри и занаетчиите што се со него имаат некакво обвинение против овие луѓе, постојат судови и судии, па таму нека се судат. ³⁹ Ако имате некои други поплаки, тие мора да бидат разрешени на легалното градско собрание. ⁴⁰ Постои опасност Римјаните да не обвинат дека креваме бунт. Нема никаква причина да создаваме вакви немири.“

⁴¹ Откако го рече ова, го распушти собирот и луѓето се разотидоа.

Исусовите дела во Кафарнаум - Истерувањето на демони

(Марко 1:21-28) ³¹ Потоа Исус замина за Кафарнаум, град во Галилеја, каде што во саботите го поучуваше народот. ³² Луѓето беа одушевени од Неговите поуки, зашто Тој зборуваше со авторитет.

³³ Во синагогата^[a] имаше еден човек обземен од демон, кој викаше на сиот глас: ³⁴ „Што сакаш од нас, Исусе од Назарет? Зар Си дошол да нe уништиш? Знам Кој си Ти: Ти си Божјиот Светец, испратен од Бог!“ ³⁵ Исус му заповеда: „Замолкни и излези од него!“ Демонскиот дух го кутна човекот наземи пред очите на сите и излезе од човекот, не повредувајќи го. ³⁶ Луѓето беа стаписани и си говореа еден со друг: „Какви моќни зборови, полни со власт и сила да им се заповеда на демони и тие да излегуваат!“ ³⁷ По ова, веста за Исус се разнесе низ сите околни места.