Book of Common Prayer

Савле проповеда во Дамаск

¹⁹ Откако се најаде, му се врати силата. Савле остана неколку дена со христијаните во Дамаск. ²⁰ Веднаш почна во синагогите да проповеда дека Исус е Божјиот Син.

²¹ Сите што го слушаа беа вчудовидени и велеа: „Не ли е овој истиот човек што во Ерусалим ги убиваше следбениците на Исус? Зар не дојде и овде со истата цел: да ги уапси Исусовите следбеници и во пранги да ги одведе кај Првосвештениците?“

²² Но Савле толку уверливо докажуваше дека Исус е Месијата, што Евреите кои беа во Дамаск беа целосно збунети и не можеа да му се противстават.

²³ По долго време, Евреите сковаа заговор да го убијат, ²⁴ но на Савле му беше јавено дека Евреите стражарат покрај градските порти и дење и ноќе, за да го фатат и да го убијат. ²⁵ Затоа христијаните во текот на ноќта го префрлија преку ѕидините, спуштајќи го во кош^[a].

Савле проповеда во Ерусалим

²⁶ Од Дамаск, Савле отпатува за Ерусалим, каде што се обиде да се поврзе со тамошните христијани, но тие се плашеа од него и не веруваа дека и тој навистина станал христијанин. ²⁷ Тогаш Барнаба го доведе кај апостолите и им раскажа како Савле на патот се сретнал со Господ и зборувал со Него, па како во Дамаск смело проповедал за Исус. ²⁸ Тогаш апостолите го прифатија. Савле остана извесно време со нив, движејќи се во Ерусалим и околината, смело проповедајќи за Господ. ²⁹ Се расправаше и со некои елинизирани Евреи, но тие се обидуваа да го убијат. ³⁰ Кога дознаа за ова, христијаните го одведоа во Цезареја, и оттаму го испратија за Тарс.

³¹ Тогаш низ цела Јудеја, Галилеја и Самарија, за Црквата настапи период на мир и растеж. Живеејќи со страхопочит спрема Господ и имајќи поткрепа од Светиот Дух, бројот на христијаните постојано се зголемуваше.

⁵² Тогаш Евреите почнаа одново да се препираат помеѓу себе, велејќи: „Како може Овој да ни го даде Своето тело да се храниме со Него!?“

⁵³ Исус, пак, им рече: „Ве уверувам дека, доколку не се храните од телото на Синот Човечки и не се напојувате од Неговата крв - ќе немате живот во себе! ⁵⁴ Оној што се храни^[a] од Моето тело и се напојува од Мојата крв, има вечен живот и на крајот, Јас ќе го воскреснам. ⁵⁵ Моето тело е вистинска^[b] храна и Мојата крв е вистинска напивка. ⁵⁶ Кој се храни^[c] од Моето тело и се напојува од Мојата крв, живее во Мене и Јас во него.

⁵⁷ Мене Ме испрати живиот Татко, и како што причина за Моето живеење е Таткото, така и оној што се храни од Мене ќе живее заради Мене. ⁵⁸ Лебот што слезе од небото не е како лебот што вашите предци го јадеа, а потоа умреа; тој што го јаде овој Леб - ќе живее вечно!“ ⁵⁹ Исус ги изрече овие зборови додека поучуваше во синагогата, во градот Кафарнаум.