Book of Common Prayer

2 Затоа ослободете се од се што е злобно, немојте да лажете и да лицемерите, немојте да завидувате и да клеветите. ² Бидете како новороденчиња, секогаш жедни за чисто духовно млеко, преку кое ќе растете до полнота во вашето спасение, ³ сега кога лично се уверивте дека Господ е добар.

Скапоцен темел и света градба

⁴ Дојдете кај Исус Христос. Тој е Живиот Камен, Кој, навистина од луѓето беше отфрлен, но Бог го одбра и за Него е скапоцен. ⁵ Сега и вие како живи камења сте вградени во еден духовен дом, за да бидете свето свештенство, да принесувате духовни жртви прифатливи за Бог, заради Исус Христос. ⁶ За ова во Светото Писмо Бог вели:

„Еве, ќе поставам во Ерусалим^[a] Камен-темелник,

одбран и скапоцен;

кој ќе поверува во Него,

никогаш нема да се разочара^[b].“

⁷ Да, за вас што верувате:

„Тој Камен што ѕидарите го отфрлија,

стана Камен-темелник^[c],“ скапоцен Камен. А за оние што Го отфрлија, истиот тој Камен е:

⁸ „Камен од кој ќе се сопнуваат,

Карпа преку која ќе паѓаат^[d].“

Тие се сопнуваат затоа што не ја слушаат и не ја веруваат Божјата порака. Затоа таква судбина им е определена.

⁹ Но вие сте одбрани луѓе, царско свештенство, свет народ, луѓе што Му припаѓаат на Бог. Вие сте избрани за да им ја покажете на луѓето Божјата добрина, зашто Тој ве изведе од темнината и ве воведе во Својата прекрасна светлина.

¹⁰ „Вие што порано не бевте сметани за народ,

сега сте Божји народ;

вие над кои немаше кој да се сожали,

сега добивте милост од Бога^[e].“

Исус е Лозата, ние сме прачките

15 Исус им рече на Своите ученици: „Јас сум вистинската Лоза^[a], а Мојот небесен Татко е Лозарот. ² Секоја прачка на Мене, која не раѓа плод, Тој ја отсечува. А секоја прачка што раѓа плод, Тој ја чисти^[b], за да дава уште повеќе род. ³ Вие сте веќе чисти преку словото што ви го проповедав. ⁴ Останете сврзани за Мене и Јас ќе останам сврзан за вас. Како што прачката не може да раѓа плод сама од себе, ако не е сврзана за лозата^[c], така ни вие нема да можете да бидете плодотворни, ако не останете сврзани за Мене.

⁵ Јас сум Лозата, а вие сте прачките. Ако останете сврзани за Мене и Јас за вас, ќе бидете многу плодотворни. А без Мене не можете да постигнете^[d] ништо. ⁶ Ако не останете сврзани за Мене, ќе бидете исфрлени како отсечени прачки и ќе се исушите. А сувите прачки ќе бидат собрани и в оган изгорени. ⁷ Ако останете сврзани за Мене и ако Моето учење се вкорени во вас, тогаш секоја ваша молитва ќе ви биде исполнета. ⁸ Кога вие ќе станете Мои плодотворни ученици^[e], тоа ќе Му донесе слава на Мојот небесен Татко.

⁹ Јас ве сакам исто како што и Таткото Ме сака Мене. Останете под закрилата на Мојата љубов. ¹⁰ Вие ќе останете под закрила на Мојата љубов, ако ги извршувате Моите заповеди, исто како што Јас ги исполнив заповедите на Мојот Татко и останувам под закрила на Неговата љубов. ¹¹ Ова ви го кажав за да бидете наполно радосни, како што Сум Јас.