Book of Common Prayer

¹² Некои од вас велат: „Имам слобода да правам што сакам!“ Да, но не е се полезно! Иако имам слобода да правам што сакам, нема да дозволам да робувам на нешто. ¹³ Велите: „Храната е наменета за стомакот, а стомакот за храната!“ Да, но еден ден Бог ќе ги уништи и стомакот и храната. Телото не постои со него да правиме блуд. Нашите тела Му припаѓаат на Господ, зашто Господ ги создал. ¹⁴ Бог ќе ги воскресне и нашите тела со истата моќ со која Го воскресна и нашиот Господ.

¹⁵ Зар не сфаќате дека вашите тела се органи на Христовото тело? Треба ли сега јас да земам нешто што е Христово и да го соединам со проститутка? Никако! ¹⁶ Или не ви е јасно дека оној што се соединува со проститутка станува едно со неа? Светото Писмо вели: „Двајцата ќе станат едно тело^[a].“ ¹⁷ На сличен начин, Кој се соединува со Господ, станува еден дух со Него.

¹⁸ Бегајте од блудот! Секој друг грев што човек може да го направи е надвор од неговото тело, но со блудот греши против сопственото тело. ¹⁹ Зар не знаете дека вашето тело е храм на Светиот Дух, Кој ви е подарен од Бог за да живее во вас? Вие не сте ваша сопственост. ²⁰ Откупени сте со скапа откупнина! Затоа, користете ги вашите тела со нужната почит спрема Бог.

2) Споредба со свеќата

(Лк. 8:16-18) ²¹ Продолжувајќи, Исус им рече: „Зар свеќа се пали за да се покрие со капак или пак да се стави под кревет!? Зар не се пали за да се стави на свеќник? ²² Нема ништо скриено што нема да излезе на виделина. Нема тајно дело што нема да се дознае. ²³ Ако имате уши - слушајте внимателно!

²⁴ Слушајте внимателно: со каква мера мерите, со таква ќе ви се мери и ќе ви се додаде! ²⁵ На тој што има нешто, ќе му се додаде уште; на тој што нема, ќе му се одземе и она малку што го има!“

3) Споредба со семето

²⁶ Во продолжение, Исус рече: „Божјото царство може да се спореди со семе што човек го посева на својата нива. ²⁷ Потоа, тој ноќе спие, а дење излегува. За тоа време семето никнува и расте, иако тој не го разбира тоа. ²⁸ Самата земја го произведува плодот: најпрво стебло, потоа клас и на крајот зрна. ²⁹ Штом плодот ќе созрее, доаѓа жетвата и сејачот го жнее.“

4) Споредба со синаповото зрно

(Мт. 13:31-32; Лк. 13:18-19) ³⁰ „Како да го опишеме Божјото царство? Со што да го споредиме?“ - продолжи Исус. ³¹ „Тоа може да се спореди со посеано синапово зрно: иако тоа е најмало од сите семиња, ³² кога ќе се посее, израснува поголемо од сите градинарски растенија и се разгранува, така што под неговите гранки и птиците си свиваат гнезда!“

Заклучок

³³ Користејќи се и со многу други, слични споредби, Исус му ја изложуваше на народот Својата порака, на разбирлив начин за нив. ³⁴ Ништо не им кажуваше без да се користи со споредби. А кога беше насамо со Своите ученици, ним им објаснуваше сe.