Book of Common Prayer

Sardis pueblopi tandanacuj crijcunaman quillcashcami

3 Sardispi tandanacushca crijcunapaj angelmanpish quillcai:

Diospaj canchis Espiritucunatapish, canchis luźerocunatapish charicujca cashnami nicun: “Ñucaca, can imallata ruracushcatapish, causacushpapish huañushca shinallataj cashcatapish yachanimi. ² ¡Cutin rijchariari! Can imalla allita ruracushcata manaraj tucui chiriyajpi, allichiari. Ñucaca can imallata rurashcataca, Taita Diospaj ñaupajpi manaraj alli cashcatami ricuni. ³ Chaimanta imalla yachachishcatapish, uyashcatapish alli yuyarishpa caźuiari, mana allita ruracushcamanta cutiriari. Can mana rijcharijpica, ñucaca can mana yuyashca horaspimi, shuhua shina cambajman shamusha.

⁴ Shina cajpipish cai Sardispi causaj cancunapurapica, ashacunallami churanacunata mana mapayachishcacuna. Paicunaca, alli causaj cashcamanta, yurajlla churanata churashcami, ñucahuan puringacuna. ⁵ Millaita mishajmanca, yurajlla churanatami churachisha. Paipaj shutitaca, causanaman rinapaj libromantaca, mana p'ichashachu. Ashtahuanpish ñuca Yayamanpish, Paipaj angelcunamanpish, paica ñucapajmi’ nishpami huillasha. ⁶ Rinrinta charijca, crij tandanacushcacunaman Diospaj Espíritu huillacujta uyachun” ninmi.

nishpa quillcai.

Cai pacha tucurinapaj jatun llaquicuna tiyanatami huillashca

24 Diospaj huasimanta Jesús llujshicujpimi, Paipaj yachacujcunaca Diospaj huasi pircacunata ricuchircacuna. ² Chaicunata ricuchijpimi, Jesusca:

–¿Caita ricushpachu mancharinguichij? Cancuna ricushca caicunaca, tucuimi urmachishca cagrin. Shuj rumillapish pircashca mana saquiringachu, chashnatajmi tucunga– nirca.

³ Chai q'uipami Jesusca, Olivos urcupi tiyacujpi, Paipaj yachacujcunaca cashna nircacuna:

–Ñaja can huillashcaca, ¿ima punllataj chashna tucungari? Can cutin shamunatapish, cai pacha tucurinatapish, ¿ima señalta ricushpataj yachashunri?– nishpa, Paillata tapurcacuna.

⁴ Chashna tapujpimi, Jesusca cashna nirca:

–Pi cancunata ama llullashpa crichichun, yuyaipi alli puringuichij. ⁵ Achcacunami, ñuca shutipi shamushpa: “Ñucami Quishpichij Cristo cani” nishpa, achcacunata umangacuna. ⁶ ‘Mai llajtacunapipish jatun macanacui, huañunacuimi tiyan’ ninacujta uyanguichijmi. Chaita uyashpapish, ama mancharinguichijchu. Chashna jatun llaquicunaca, tiyanataca tiyanallatajmi. Chashna tiyajpipish, cai pachaca manaraj tucuringachu. ⁷ Llajtacunapurami macanacungacuna. Shinallataj llajtacunata jatun mandajcunapurapish macanacuchingacunami. Mai llajtapica achca ungüicuna, jatun yaricai, allpa chujchuicunami tiyanga. ⁸ Chai tucui llaquicunaca, shamuna jatun llaquicunapaj callarillamari canga.

⁹ Chai punllacunaca, cancunata llaquichichun japichingacunami, huañuchingacunami. Ñucata caticushcamantaca, maipipish tucuicunami p'iñangacuna. ¹⁰ Chashna rurajpica, achcacunami crishcataca ñitcarij shina saquingacuna. Chashnacunaca, huañuchijcunaman caishuj chaishujmi japichingacuna, paicunapura p'iñanacungacunami. ¹¹ Llulla huillajcunapish achcacuna shamushpami, achcacunata llullashpa crichingacuna. ¹² Millaita ruranapish yallitaj mirarijpimi, achcacunapaj c'uyai chiriyanga. ¹³ Shina cajpipish, tucuringacama ima llaquicunatapish apajtaca, Dios quishpichingami. ¹⁴ Dios mandacun cai alli huillaitaca, tucui cai pacha llajtacunapimi yachachun huillashca canga. Chashna huillashca q'uipami, tucui tucurina chayamunga.