Book of Common Prayer

¹⁵ Asiamanta cajcuna tucuicuna ñucata shitashpa rishcataca, canllataj yachanguimi. Figelopish, Hermogenespish chai ñucata shitashpa rijcunapurami.

¹⁶ Onesiforollami ñuca llaquihuan cajpica, tauca cutin cushichij shamurca. Paica, cadenacunahuan ñuca huatashca cajpipish, mana pingarircachu. Chaimanta Apunchij Jesusca, paipaj huasipi cajcunataca achcata llaquichun. ¹⁷ Onesiforoca, Romaman chayamushpapish, ñucataca japingacamami mashcarca. ¹⁸ Paica, Efesopipish ñucanchijta llaquishpa, achca allicunata rurashcataca canllataj allimari yachangui. Pai chashna cashcamantaca, shamuj punllapica Apunchij Jesusca, paita ashtahuan llaquishca cachun.

2 Ñuca huahualla, canca Cristo Jesushuan shujllami cangui. Chaimanta canca, mana c'uyaipajta Dios c'uyashpa cushcataca sinchita catilla. ² Achcacunapaj ñaupajpi ñuca yachachishcataca uyarcanguimi. Chaitaca yachachi tucuj, alli crijcunaman mingai. Paicuna shujtajcunamanpish yachachichun.

³ Canca, Jesucristopaj alli soldado shinataj, tucui llaquicunata apailla. ⁴ Maijanpish soldado tucushpaca, pai quiquinpaj imata ruranataca mana yuyarinchu. Ashtahuanpish paita mandajta cushichinallatami yuyan. ⁵ Shinallataj pugllajcunapish pugllana shinataj mana pugllashpaca, coronataca mana japi tucunchu. ⁶ Tarpuj runapish granota japingapajca, allpata shaicuita ñutushpa allichinrajmi. ⁷ Cai ñuca nishcacunataca, alli yuyarilla. Imata nisha nishcataca, Apunchij Jesusllataj yuyaita cushpa tucuita yachachingami.

⁸ Jesucristotaca yuyaipi charingui. ‘Alli huillaita Paimanta huillashpaca, jatun mandaj Davidpaj huahua huahuami, huañushcacunapaj chaupimantapish causarishcami’ nishpami huillani. ⁹ Ñucaca Paimantami, cai llaquicunataca apacuni. Huañuchij runata shina, carcelpi churashcapishmi tiyacuni. Ñuca chashna cajpipish, Diospaj Shimica mana preźu tiyanchu. ¹⁰ Dios agllashcacunapish Cristo Jesusmanta huiñaipaj quishpichishca, sumajyachishca cachunmi, paicunata c'uyashcamanta tucui laya llaquicunata apacunilla.

¹¹ Caica, crinalla shimicunami.

‘Ama shitanacuchun’ yachachishcami

10 Jesusca chaimanta ña llujshishpaca, Jordán yacu ch'imbanij, Judeapi caj llajtacunamanmi shamurca. Pai shamujpica, cutinmi achcacuna tandanacumurca. Paicunamanpish Pai yachachij cashca shinallatajmi, cutin yachachicurca. ² Chaipimi fariseocuna Jesuspajman c'uchuyamushpaca, pandachishun yuyashpa:

–¿Mandashcapica, ‘Cusaca huarmita shitanallami’ ninchu, imatagari?– nishpa tapurcacuna.

³ Ashtahuanpish Jesusca:

–Moisesca, ¿imatataj cancunataca, mandashca?– nircami.

⁴ Paicunaca:

–Moisesca, “Huarmitaca shitashcata ricuchij shuj quillcata rurashpaca, shitanallami” nishcami– nircacunami.

⁵ Jesusca cashnami cutichirca:

–Cancunallataj sinchi shungu cajpimi, chashna mandashpa quillcarca. ⁶ Ashtahuanpish Taita Diosca, callaripi tucuita ruracushpaca, “C'arita, huarmitami rurarca.” ⁷ Chaimanta “C'arica, yaya mamamanta ch'icanyashpa, paipaj huarmihuan tandanacushpa causachun. ⁸ Ishquimantaca, shujlla aichami tucunga.” Ña mana ishquichu, ashtahuanpish ishquimantaca shujllami tucun. ⁹ Taita Dios chashna tandachishcataca, amataj runaca ch'icanyachichun– nircami.

¹⁰ Yachacujcunaca, huasipi cashpami Jesustaca, chaillatataj cutin tapurcacuna. ¹¹ Jesusca cashnami nirca:

–Maijanpish paipaj huarmita shitashpa shujtajhuan caźarajca, huainayashpa quiquin huarmitami llaquichin. ¹² Shinallataj, maijan huarmipish cusata shitashpa caźarajca, huainayanllatajmi– nircami.

Jesusca huahuacunatami bendiciashca

¹³ Chai q'uipami, Jesús tuparichun nishpa, huahuacunata ricuchij shamurcacuna. Ashtahuanpish yachacujcunaca, huahuacunata pushamujcunataca, sinchita rimashpami jarcarcacuna. ¹⁴ Chaita ricushpaca, p'iñarishpami Jesusca cashna nirca: «Saquichij huahuacuna Ñucapajman shamuchun, ama jarcaichijchu. Taita Dios mandacunca chashnacunapajmi. ¹⁵ Maijanpish Taita Dios mandacunta shuj huahua shina mana chasquijca, chaimanca manataj yaicungachu, chaica chashnatajmi» nircami.

¹⁶ Chashna nishpaca, huahuacunata marcashpami, paicunapaj jahuapi maquita churashpa bendiciarca.