Book of Common Prayer

Dios alli nishca servij cangui

¹⁴ Caicunataca yuyachinatajmi cangui. Ima manapish canamanta ama rimanacushpa p'iñanacuchun, Apunchij Jesuspaj ñaupajpi yuyachishpa cunai. Chaicunamanta rimanacunaca imapaj mana allichu, ashtahuanpish uyajcunatamari chingarinaman apanga. ¹⁵ Canca, Taita Dios alli nishca servij ricuringapajca, imalla rurana cashcata chai yuyai rurangui. Chashna allita rurashpami, imamanta mana pingarinata charingui. Cashcatataj huillaj Shimitapish yachachina cashca shinataj yachachingui. ¹⁶ Ashtahuanpish yanga, mapa parlocunataca pajta uyanguiman. Chai parlocunaca, Diosta mana manchaj canamanmi ashtahuan ashtahuan apanga. ¹⁷ Chaita yachachijcunaca, ismuchij ungüi shinami huashan huashan miraringa. Himeneohuan, Filetohuanca ñami chaicunapurapi. ¹⁸ Paicunaca, cashcatataj yachachishcata crishca jahua saquishpami, cunanca: “Ñami causarircanchij” nishpa yachachishpa purincuna. Chashna nishpami, tauca crijcunata pandachincuna. ¹⁹ Chashna nicujpipish huasita shayachi callaringapaj, Taita Dios churashca Rumi shinaca, pi mana cuyuchipaj tiyacunllami. Chaitaca, ricunalla cachunmi cashna quillcashca: «Apunchij Jesusca, Paipaj cajcunataca rijsinmi» ninmi. Shinallataj: «Cristopaj shutipi mañajcunaca, tucui millaimanta anchurichij» nishcapishmi.

²⁰ Shuj jatun huasipica, curita, cullquita rurashca ima sumajcunallaca mana tiyanchu. Ashtahuanpish caspimanta, allpamanta rurashca imacunapishmi tiyan. Shujcunataca ima allipajllami charincuna, cutin shujcunataca, ima yangapajllami charincuna. ²¹ Chashna cashcamantaca, Apunchij Jesús imapajpish munashca alli sumaj cangapajca, tucui millaita saquishca allimi cana canchij. Chashna alli cashpami, Diospajlla tucushpa imapajpish paipaj maquipi cashun.

²² Q'uipa huiñaicunata urmachij munaicunataca, canmanta caruyachingui. Apunchij Jesusta chuya shunguhuan mañajcunahuan, cashcata rurashpa, alli crishpa, c'uyashpa, sumajta causashpa catilla. ²³ Ch'ahuanyashcacuna imata nishca, manapish cana upa yuyaicunataca ama uyanguichu. Chai parlocunaca p'iñanacuchinllami, chaitaca yachanguillatajmi. ²⁴ Apunchij Jesusta servijca, mana p'iñanacushpa purinachu. Ashtahuanpish tucuicunahuanmi alli cana, yachachinatapish allimi yachachina, llaqui shamujpipish apanallami. ²⁵ Yachachicujpi jarcajcunatapish, mana p'iñarishpami alli tucuchun cunana. Chashna rurajpica, cashcata huillashcata crishpa, Paiman cutirina yuyaita Dios cungapishchari. ²⁶ Diablo paipaj munaita rurachishpa, huatashpa charicushcamanta quishpiringacunapishchari.

Achcata charij mosomi Jesushuan parlashca

¹⁷ Chaimanta llujshishpa ñanpi yaicujpimi, ñapish shuj runaca callpashpa chayamurca. Chaimi Paipaj ñaupajpi cungurishpaca:

–Alli Yachachij, huiñai causaita charingapajca, ¿imatataj rurana cani?– nishpa tapurca.

¹⁸ Shina nijpi Jesusca, cashnami nirca:

–¿Ima nishpataj Ñucataca alli ningui? Allica pi mana tiyanchu, shujllami tiyan. Paica Taita Diosmi. ¹⁹ Mandashcapi ima nicushcataca, canllataj yachanguimi: “Ama huainayangui, ama huañuchingui, ama shuhuangui, ama pita yanga llullashpa juchachingui, ama umangui, cambaj yaya mamatapish c'uyangui” ninmi– nircami.

²⁰ Shina nijpi paica:

–Yachachij, chaitaca huambramantapachamari tucuita pajtachicuni– nishpami cutichirca.

²¹ Chashna nijpi Jesusca, c'uyaj ñahuihuan ricurashpami:

–Shujca illanrajmi, can tucui charishcacunata c'atushpa huajchacunaman cugri. Chashna rurashpami, jahua pachapica achcata charingui. Chai huasha, cambaj cruzta japishpa, Ñucata catilla– nircami.

²² Chashna nijpica, paica achcata charij cashcamantaca, anchata nanarishpa llaquijlla rircallami.

²³ Chashna rijpica Jesusca, muyujta ricushpami, Paipaj yachacujcunataca:

–¡Achcata charijcunaca Dios mandacunpica, mana jahualla yaicungacunachu!– nirca.

²⁴ Chaita uyashpa, Paipaj yachacujcuna jatunta mancharicujpimi, Jesusca cutintaj cashna nirca:

–¡Huahuacuna, ima charishcacunallapi shunguta churajpajca, Taita Dios mandacunman yaicunaca manataj jahuallachu! ²⁵ Dios mandacunman shuj charij yaicunaca, yalli sinchimari. Camellota auja rinrinpi pasachisha nicushcatapish yalli sinchimi– nircami.

²⁶ Shina nijpicarin paicunapurami ashtahuan mancharinacushpa:

–¿Shinashpaca, pitaj quishpiri tucungari?– ninacurcacuna.

²⁷ Chaimantami Jesusca, paicunata ricurashpa:

–Runacunapajca sinchitajmari, ashtahuanpish Taita Diospajca, mana sinchichu. Taita Diospajca tucui imapish jahuallamari– nircami.

²⁸ Chashna nijpi Pedroca:

–Ñucanchijca tucuita saquishpami, Cantaca caticunchij– nircami.

²⁹ Shina nijpimi Jesusca, cashna nirca:

–Mana nij tucunillachu, maijanca alli huillaita crishpa Ñucata catingaraicumi quiquin huasita, huauquicunata, panicunata, yaya mamata, huarmita, huahuacunata, allpacunata saquin. ³⁰ Paica, cunan punllallatajmi yallihuan chasquin. Huasicunata, huauquicunata, panicunata, mamacunata, huahuacunata, allpacunatapish patsaj cutihuan yallitami chasquin. Shamuj punllapicarin, huiñai causaitamari chasquinga. ³¹ Shina cajpipish achcacunami, puntapi cajcunaca huashayangacuna. Ashtahuanpish huashalla cajcunami, puntapi cangacuna– nircami.