Book of Common Prayer

¹³ Xpe jwak anjl, xrokˈsaj jtrompet, xinta jun chˈaˈwem xaanch xoˈlak mak quejabˈ ri chapcaˈ rilic cach ri bˈanal laˈ mak quejabˈ jxiquinl man altar ri bˈanal laˈ oro ri wiˈ chiwch Kakaj Dios. ¹⁴ Y man chˈaˈwem ri xaanch xoˈlak mak quejabˈ ri chapcaˈ rilic cach ri bˈanal laˈ mak quejabˈ jxiquinl man altar ri bˈanal laˈ oro, xij re jwak anjl: Tak mak quejabˈ anjl ri ximiltak chiˈ man nimi jaˈ Éufrates, xcheˈ re.

¹⁵ Jilonli xtaksajtak mak quejabˈ anjl ri xichak ulbˈel jwiˈlak man or, man kˈij, man icˈ y man junabˈ pire tibˈe jcamsajtak raquitz mitaˈ pajnicˈj re juntir cristian ri wiˈtak wich ulew. ¹⁶ Xinta xajlaj jurubˈ soldad ri quejal cwaˈy jwiˈlak, quibˈ cient millon (200,000,000) ribˈilak.

¹⁷ Jilonli cuando xwil mak cwaˈy ri xwabˈaˈ ribˈak chinwch chapcaˈ li ichicˈ y mak quejawinak rechak cojolbˈi nicˈj chˈiˈchˈ jwiˈlak pire colbˈi chijchˈolak ri jbˈij coraza ri quiek, azul y kˈan rilic. Y mak cwaˈy jilon jbˈaak chapcaˈ jbˈa mak coj y laj jchiˈak tielch kˈakˈ, sibˈ y asufre. ¹⁸ Man kˈakˈ, sibˈ y asufre ri tielch laj jchiˈak mak cwaˈy riˈtakaˈ mak uxibˈ nimlaj cˈax li ri xcamsan rechak raquitz mitaˈ pajnicˈj re juntir cristian ri wiˈtak wich ulew. ¹⁹ Jwiˈl mak cwaˈy li laˈ jchiˈak y laˈ jjeak tijcamsajtak cristian. Mak jjeak jilon rilic chapcaˈ cumatz ri wiˈ jbˈaak y laˈ mak jbˈaak li trantak cˈax rechak cristian. ²⁰ Pero mak cristian ri taˈ xcamtak jwiˈl mak nimaktak cˈax li, taˈ xcan jyeˈtak jbˈanic mak etzltak noˈj ri tijin trantak. Taˈ xcan jyeˈtak jcojic jkˈij mak etzl, mak tiox ri bˈanal laˈ oro, laˈ plata, laˈ brons, laˈ abˈaj y laˈ cheˈ. Juntir mak ichbˈal li taˈ tinaˈtuntak y taˈ titontak ni taˈ tiwoˈcottak. ²¹ Y taˈ xcan jyeˈtak camsanc, taˈ xcan jyeˈtak jbˈanic itz, taˈ xcan jyeˈtak jbˈanic tzˈiˈal y taˈ xcan jyeˈtak alkˈanc.

Tisolajtak Marta pach María

³⁸ Kakaj Jesús xeˈ chic pach yak ajtijol ribˈak chirij y xtaw li jun tilmit. Li man tilmit li xcˈulsaj la ja jwiˈl jun anm ri jbˈij Marta. ³⁹ Y Marta wiˈ chiquiˈ jun jkˈun jbˈij María. María xcubˈar riqˈui Kakaj Jesús chi jtaic nen tijbˈij.

⁴⁰ Pero Marta taˈ xan jilonli jwiˈl subˈlaj latzˈ jwich chi jbˈanic ropis. Marta xeˈ riqˈui Kakaj Jesús y xtzˈonaj re: Kajawl, ¿kuskecˈu tawil xincan yeˈsaj wicˈan chi jbˈanic wopis jwiˈl inkˈun? Bˈijcoˈ re chi injtˈoˈw, xcheˈ re.

⁴¹ Pero Kakaj Jesús xij re Marta: Marta, Marta, subˈlaj atoc il chirij awopis, ⁴² pero junke chi kelen mas rajwax tibˈansajc, riˈ xan María lawiˈ mas rajwax tibˈansajc y taˈ nen tiesaj re, xcheˈ re Marta.