Book of Common Prayer

9  Xpe jjoˈ anjl, xrokˈsaj jtrompet, riˈchak xwil wiˈ jun chˈumil wich ulew ri xtzaakch lecj. Y xyeˈsaj man law re, re man xelebˈxan. ² Y cuando xtebˈaˈ man xelebˈxan li, claˈ xelch subˈlaj sibˈ chapcaˈ jsibˈel jun nimlaj jorn. Jsibˈel man xelebˈxan li xkˈat jwich jkˈakˈal kˈij. ³ Y xilj man sibˈ li xeltakch subˈlaj sacˈ, xeˈtak wich ulew. Y mak sacˈ li xyeˈsaj jcwinelak chi jtiˈic cristian chapcaˈ mak sinaˈj re wich ulew. ⁴ Xijsaj rechak chi taˈ trantak cˈax rechak mak qˈuim re wich ulew pach mak woron, ni re jono cheˈ, xike trantak cˈax rechak mak cristian ri taˈ cojol retalak chiˈ jwichak laˈ jsey Kakaj Dios. ⁵ Pero taˈ xyeˈsaj luwar rechak chi tijcamsajtak mak cristian, xike trantak cˈax rechak chiwch jobˈ icˈ y ri jcˈaxcˈol tibˈansaj rechak mak cristian jilon jcˈaxcˈol chapcaˈ cuando titiˈsaj jun cristian jwiˈl jun sinaˈj.

⁶ Laˈ mak icˈ li mak cristian tijtoctak jcamicak, pero taˈ tijtaˈtak onque tijrayaj jcamicak, taˈ ticamtak. ⁷ Mak sacˈ jilon rilicak chapcaˈ mak cwaˈy cuando tibˈetak li chˈoˈj. Laj jbˈaak wiˈ jun kelen chapcaˈ rilic jun coron bˈanal laˈ oro y jcaybˈalak jilon chapcaˈ jcaybˈalak cristian. ⁸ Jilon rusumal jbˈaak chapcaˈ rusumal jbˈa anm y reeak jilon chapcaˈ ree mak coj. ⁹ Y cojol nicˈj kelen chi jchˈolak jwiˈlak pire colbˈi chi jchˈolak chapcaˈ coraza y mak jxicˈak cuando tirupuptak jilon jtaic chapcaˈ subˈlaj carret re chˈoˈj jural jwiˈl cwaˈy cuando subˈlaj tijolintak tibˈetak li chˈoˈj. ¹⁰ Wiˈ jjeak chapcaˈ jjeak mak sinaˈj y chi jtzam jeak wiˈ jchˈutak chapcaˈ jchˈutak mak sinaˈj, jobˈ icˈ tijtiˈtak cristian laˈ mak jchˈutak. ¹¹ Mak sacˈ li wiˈ jun rey titakon chibˈak y riˈ man anjl ri titakon li man xelebˈxan. Man anjl li, li tzijbˈal hebreo tibˈijsaj Abadón re y li tzijbˈal griego tibˈijsaj Apolión re. Ri jcholajl tielwiˈ man bˈij Apolión, ajsachal jwichak cristian, ticheˈ.

¹² Jilonli tikˈax man nabˈe nimlaj cˈax, pero ajwiˈ chiquiˈ quibˈ ri tina pena.

Esbˈi noˈj chirij jun tzilaj winak aj Samaria

²⁵ Li jun kˈij, jun rechak yak ajtijoltak cristian re Jpixbˈ Kakaj Dios xeˈ riqˈui Kakaj Jesús. Riˈ raj tijta nen tibˈijsaj re pire tijcojtak tzij chirij, xtzˈonaj re Kakaj Jesús: Ajtijonl, ¿nen rajwax tambˈan pire tantaˈ jun tzilaj cˈaslemal riqˈui Kakaj Dios lecj ri taˈ jqˈuisic? xcheˈ re.

²⁶ Kakaj Jesús xtzˈonaj re man winak li: ¿Nencˈu tzˈibˈal li wuj re Jpixbˈ Kakaj Dios? ¿Nencˈu jcholajl tiel chawch at? xcheˈ re.

²⁷ Man winak li xij chic re Kakaj Jesús: Lokˈaj Akaj Dios ri Awajawl riqˈui nojel awanm y xike chomorsaj chirij Kakaj Dios y bˈan riqˈui nojel awanm lawiˈ raj tabˈan y lokˈaj awijl atzˈakt chapcaˈ jlokˈaj aybˈ at tabˈan, xcheˈ.

²⁸ Kakaj Jesús xij chic re: Tzˈetiˈ xabˈij. Wi tabˈan juntir li, tataˈ jun tzilaj cˈaslemal riqˈui Kakaj Dios lecj ri taˈ jqˈuisic, xcheˈ re.

²⁹ Man ajtijol cristian re Jpixbˈ Kakaj Dios xan chapcaˈ taˈ retam jcholajl, xtzˈonaj re: ¿Nencˈu wijl intzˈakt? xcheˈ re Kakaj Jesús.

³⁰ Kakaj Jesús xij chic re: Wiˈ jun winak xelbˈi Jerusalén bˈenam re Jericó, xelch nicˈj alkˈom chirij, xkˈattak jbˈe, xresajtak juntir ritzˈik, xsecˈtak y xsoctak. Cuando xriltak camicchak re sicˈ winak, ajrucˈreˈ xcan jyeˈtak. ³¹ Y laˈ man bˈe li bˈesal jun ajcˈamal jbˈeak cristian riqˈui Kakaj Dios, pero cuando xril chi tobˈol sicˈ winak li bˈe, xcot jbˈe, naj xkˈaxwiˈ re, xecˈ.

³² Y bˈesal chic jun rijajl Leví. Re xril chi tobˈol sicˈ winak li bˈe, xcot jbˈe, naj xkˈaxwiˈ, xecˈ.

³³ Y ajrucˈreˈ bˈesal chic jun winak aj Samaria laˈ man bˈe li, cuando xtaw chijcˈulel sicˈ winak tobˈol li bˈe, subˈlaj xril cˈur jwich. ³⁴ Xjutun chijcˈulel chi rilic nen cˈax re y xoc chi jcunaj mak soqueˈl laˈ aceit olivo, laˈ vin y xpis jwich mak soqueˈl y xyeˈbˈi chirij jcwaˈy y xcˈambˈi li jun bˈambˈi posad y xwaˈx jun akˈabˈ chi jchajajc. ³⁵ Cuando xsakarsan laj jcabˈ kˈij, xecˈ, xcan jyeˈ quibˈ denario re man rajw posad y xij re: Bˈan tokˈobˈ, tacunaj sicˈ winak ri y tachajaj y wi wiˈ mas pwak tasach chirij, mat oc il re. In tiyukiˈ intojeˈ chawe cuando inkˈaj chicch, xcheˈ re.

³⁶ Kakaj Jesús xtzˈonaj re man ajtijol cristian re Jpixbˈ Kakaj Dios: ¿Nencˈu rechak mak uxibˈ chi cristian li ri rijl jtzˈakt sicˈ winak ri xansaj cˈax re jwiˈl mak alkˈom? xcheˈ re.

³⁷ Man ajtijol cristian re Jpixbˈ Kakaj Dios xij re Kakaj Jesús: Riˈ man jun ri xiliw cˈur jwich, xcheˈ re.

Kakaj Jesús xij chic re: Jat y bˈan at chapcaˈ xan man winak li, xcheˈ re man ajtijol cristian re Jpixbˈ Kakaj Dios.