स्तोत्रसंहिता 98

Marathi Bible: Easy-to-Read Version

98 परमेश्वराने नवीन आणि अद्भुत गोष्टी केल्या
    म्हणून त्याच्यासाठी नवीन गाणे गा.
त्याच्या पवित्र उजव्या बाहूने
    त्याच्याकडे विजय परत आणला.
² परमेश्वराने राष्ट्रांना त्याची उध्दाराची शक्ती दाखवली.
    परमेश्वराने त्यांना त्याचा चांगुलपणा दाखवला.
³ त्याच्या भक्तांना इस्राएलाच्या लोकांशी असलेला देवाचा प्रामाणिकपणा आठवला.
    दूरच्या प्रदेशातील लोकांना देवाची वाचवण्याची शक्ती दिसली.
⁴ पृथ्वीवरच्या प्रत्येक माणसा, परमेश्वराचा जयजयकार कर.
    त्वरेने त्याचे गुणवर्णन करायला सुरुवात कर.
⁵ वीणे, परमेश्वराची स्तुती करा.
    वीणेच्या झंकारांनो, त्याची स्तुती करा.
⁶ कर्णे आणि शिंग वाजवून आपल्या राजाचे,
    परमेश्वराचे गुणवर्णन करा.
⁷ समुद्र, पृथ्वी आणि त्यावरील सर्व वस्तूंना
    जोर जोरात गाऊ द्या.
⁸ नद्यांनो, टाळ्या वाजवा पर्वतांनो,
    सगळ्यांनी बरोबर गाणे गा.
⁹ परमेश्वरासमोर गा.
    कारण तो जगावर राज्य करायला येत आहे.
तो जगावर न्यायाने राज्य करेल,
    तो लोकांवर चांगुलपणाने राज्य करेल.