गनती 25

Awadhi Bible: Easy-to-Read Version

पेऑर मँ इस्राएल

25 इस्राएल क लोग अबहिं सित्तीम क इलाका मँ सिबिर डाए रहेन। उ समई इस्राएली मनसेधूअन मोआबी मेहररुअन क संग वेस्यावृत्ति करइ लागेन। ^2-3 मोआबी मेहररुअन मनसेधुअन क आवइ अउ आपन मिथ्य देवतन क भेंट चढ़ावइ मँ मदद करइ क न्यौतेन। इस्राएली लोगन हुवाँ भोजन किहन अउ देवतन क पूजन। उ ठउरे प इस्राएल क लोग इ तरह लबार देवता-पोर क बाल क पूजा सुरु किहन। यहोवा इ लोगन प किरोध किहेस।

⁴ यहोवा मूसा स कहेस, “इ मनइयन क नेता लोगन क लिआवा। ओनका धूप मँ यहोवा क समन्वा लट्काइ द्या। तब यहोवा इस्राएल क मनइयन प न कोहाइ।”

⁵ तउ मूसा इस्राएल क जजन स कहेस, “तू पचन मँ स हर एक क आपन परिवार समूह मँ ओन लोगन क हेरिके निकारब अहइ जउन मनइयन क पेऑर क लबार देवता बाँल क आराधना खातिर अगुअइ किहन ह। तब तोहका उ मनइयन क जरुर मारि डावइ चाही।”

⁶ उ समइ मूसा अउ सबहिं इस्राएल क नेतन मिलापवाला तम्बू क दुआरे प एक संग बटुरा रहेन। एक इस्राएली मनई एक मिद्यानी मेहरारु क आपन परिवारे मँ आपन घरे लिआवा। उ इ हुवाँ किहेस जहाँ ओका मूसा अउ सारे देवता लखि सकत रहेन। मूसा अउ नेतन मिलापवाला तम्बू क समन्वा रोवत रहेन। ⁷ याजक हारून क पोता अउ एलीआज़ार क पूत पीनहास ऍका लखेन। एह बरे बइठक क तजि दिहस अउ आपन भाला उठाएस। ⁸ उ इस्राएली मनई क पाछे पाछे ओकरे तम्बू मँ गवा। तब उ इस्राएली मनसेधू अउ मिद्यानी मेहरारु क आपन भाला स मारि डाएस। उ तम्बू मँ आपन भाला क दुइनउँ क बदन स भोंकि के पार कइ दिहस। उ टेमॅ इस्राएल क लोगन मँ एक बड़की बेरामी सँचरी रही। मुला जब पीनाहास इ दुइनउँ मनइयन क मारि डाएस तउ बेरामी रुकि गइ। ⁹ इ बेरामी स 24,000 मनई मरि गवा रहेन।

¹⁰ यहोवा मूसा स कहेस, ¹¹ “याजक हारून क पोता अउ एलीआज़ार क पूत फिनहस इस्राएल क लोगन क मोरे किरोध स बचाइ लिहस। उ लोगन क बीच मँ मोर बरे व्यग्रसील रहा। एह बरे मइँ लोगन क आपन व्यग्रता मँ नाहीं मारब्या। ¹² एह बरे फिनहम स कहा कि मइँ ओकरे संग एक सान्ति क करार करइ चाहत हउँ। ¹³ उ अउ ओकरे पाछे बंसे मँ जन्मा मोरे संग एक करार करिहीं। उ पचे सदा याजकन रइहीं। काहे की उ आपन परमेस्सर क सम्मान बरे व्यग्रसील रहा उ इस्राएल क लोगन क पाप बरे प्रायस्चित किहेस।”

¹⁴ जउन इस्राएली मनई मिद्यानी मेहरारु क संग मारा गवा रहा ओकर नाउँ ज़िम्रि रहा। उ साल क पूत रहा। उ सिमोन क परिवार समूह क नेता रहा। ¹⁵ अउर मिद्यानी मेहरारु क मारी गइ रही ओकर नाउँ कोजबी रहा। उ जूर क बिटिया रही। उ अपने परिवार क मुखिया रहा। अउर उ मिद्यानी परिवार समूह क नेता रहा।

¹⁶ यहोवा मूसा स कहेस, ¹⁷ “मिद्यानी लोग तोहार दुस्मन अहइँ। तोहका ओनका मारि डावइ चाही। ¹⁸ उ पचे पहिले ही तोहका आपन दुस्मन बनाइ लिहे अहइँ। उ पचे तोहका ललचाएस अउ तू आपन लबार देवतन क पोर मँ पूजवाया। उ पचे तोहमाँ स एक मनई क कोजबी क संग वेस्यावृत्ति क अपराध करइ बरे बहकाएस। उ मिद्यानी नेता क बिटिया रही। मुला इहइ मेहरारु तब मारी गइ जब इस्राएली लोगन मँ महामारी फइली। इ महामारी एह बरे सँचर गइ काहेकि लोगन क संग लबार देवता बाल-पेऑर क आराधना करइ बरे छल कीन्ह ग रहा।”