Lucas 17:11-19

Biblia Sacra Vulgata

¹¹ Et factum est, dum iret in Jerusalem, transibat per mediam Samariam et Galilaeam.

¹² Et cum ingrederetur quoddam castellum, occurrerunt ei decem viri leprosi, qui steterunt a longe:

¹³ et levaverunt vocem, dicentes: Jesu praeceptor, miserere nostri.

¹⁴ Quos ut vidit, dixit: Ite, ostendite vos sacerdotibus. Et factum est, dum irent, mundati sunt.

¹⁵ Unus autem ex illis, ut vidit quia mundatus est, regressus est, cum magna voce magnificans Deum,

¹⁶ et cecidit in faciem ante pedes ejus, gratias agens: et hic erat Samaritanus.

¹⁷ Respondens autem Jesus, dixit: Nonne decem mundati sunt? et novem ubi sunt?

¹⁸ Non est inventus qui rediret, et daret gloriam Deo, nisi hic alienigena.

¹⁹ Et ait illi: Surge, vade: quia fides tua te salvum fecit.