Isaias 66:12-14

Biblia Sacra Vulgata

¹² Quia haec dicit Dominus: Ecce ego declinabo super eam quasi fluvium pacis, et quasi torrentem inundantem gloriam gentium, quam sugetis: ad ubera portabimini, et super genua blandientur vobis.

¹³ Quomodo si cui mater blandiatur, ita ego consolabor vos, et in Jerusalem consolabimini.

¹⁴ Videbitis, et gaudebit cor vestrum, et ossa vestra quasi herba germinabunt: et cognoscetur manus Domini servis ejus, et indignabitur inimicis suis.